Filiipö a ‑nʋa 1

'Bɔgʋʋ Pɔɔlʋ 'cɛlɩɛ

Filiipö a ‑nʋa

'wʋʋ

Bhälɩwɛlɩɩ

‑Amö Pɔɔlʋ,

n ‑nyɛ Timotee 'sɔ,

‑abhʋaa glɩnɩɛ Zezwii Kliisɩ a 'yliwʋwaa,

‑abhʋaa panyɩɛ 'bɔgʋ nɩ 'wʋ.

Abhʋaa glɩnɩɛ Zezwii Kliisɩ a ‑nʋa,

abhʋaa ‑wʋä ‑mä Filiipö glɔ 'möö,

a ‑nyɛ 'a 'yukugänɩwaa 'sɔ,

nɩkpaa ‑wa kwänɩɛ 'yukugänɩwaa kökä,

a 'wuë ‑a bhälanyɩ.

2 ‑Aa dɩba Lagɔ,

ɔ ‑nyɛ ‑Alowli Zezwii Kliisɩ 'sɔ,

'pʋpʋɛɛ ‑nyɛ 'nyupälɩɩ 'sɔ ‑yɩ 'bhöönuëë 'möö,

yɩ nɩ ghlanyɩ 'wʋ.

Pɔɔlʋ yɛ Zezwii a ‑nʋa ‑wa ‑wʋä ‑mä Filiipö a dɛ bhibhee

3 Na dlɩ ‑kä 'kwädlɩ a dɛ bhlinɩ,

a za Lagɔ 'mö n bhälɩɛ.

4 N ‑kä 'kwädlɩ a 'wlumö Lagɔ bhibhee,

'mänasɛ n bhibheoo.

5 Ɛ'ɛ ‑bhö nyɩasɛ,

‑maa tɛɛnɩ dɛ a 'nʋä tɛkädɔ'wʋ Lagɔ 'a wɛlɩɩ ‑këë zɩ'ɛ,

abhʋaa kwänɩɩɛ 'n n yiɛ Zezwii 'a 'Mänatɩtɩɩ bia.

6 Lagɔ mɔɔ tɛɛ libho a ‑libho 'la ‑mä a dila zɛmö zaa,

n kɩ dlɩ 'wʋ nɩɩ,

ɔ yu nʋ ‑këë Zezwii Kliisɩ 'a yiyizlɩɩ ‑kä ghlɛɛ,

ɔ yu zɛmö bhɩɛ.

7 N ‑kä sa'a a 'wuë a dɔ'wʋ sasɛ dlɩ 'pää,

sɛ yɩ 'kä a‑a ‑wʋ ‑sɩbhä ma‑a.

Ɛ'ɛ ‑bhö nyɩasɛ,

‑maa dlɩ 'wʋ a ‑gälaa.

Lagɔ mɔɔ 'pää na ngäzɩdlɩ 'n ɔ ‑yiiɛ ɔ libhonʋnyɔ 'wʋ 'zʋa.

Dɛ n ‑wʋä dɛ'ɛ ‑jie 'mö 'n dɛ n gwɩ a‑a 'Mänatɩtɩɩ 'wʋ yɩ 'kä gbɔlɔnɩ a za‑a,

'libho 'la ɔ nyɩaaa,

gämö ‑a nʋnuä.

8 A 'wuë,

Zezwii Kliisɩ mɔɔ kää 'nglɩ 'n a ‑glaa dlɩ 'wʋ tenyii.

N ‑kä ‑sɩbhä nʋʋ,

Lagɔ a'bhë,

ɔ ‑yi sɛ nɩɩ ‑tiamöä.

9 Sɛ n bhibhee a za Lagɔ ‑sɩbhä ma‑a nɩɩ:

A sɛ a ‑waa nɩkpa 'wuë,

‑sɩbhä nɩ 'tɛmanɩ 'mö 'kwädlɩ 'yize,

a 'kä ‑lii 'wuë a zɛmö yɩbhlɩnɩ,

a 'kɩ'ɛ sasɛ 'mö 'nʋ

10 ‑sɩbhä a dɔ'wʋ,

'saa nɛnɩɛ,

a bhɛnɩ a 'kʋ yɩbhlɩnɩ.

Kliisɩ 'a ‑zijle 'kädaa a zlɩ,

gbʋ 'naa 'kanyɩ ‑gömö ‑wʋ,

a 'naa 'kä ‑maa yɔwʋ ‑kä.

11 Sɛɛ Zezwii Kliisɩ ‑wʋanyɩɛ ‑gömö a za,

‑li a ‑li ‑yɩ nɛnɩɛ Lagɔ dlɩ yɔwʋ a nʋä,

yɩ yi tenyii zumanɩ.

‑Sɩbhä a za wa yi Lagɔ a 'nglɩ 'ghlimanɩ,

wa yi nɩɩ kɛ ɔ ‑gää nʋ.

Pɔɔlʋ ‑wʋ ‑jie 'mö ‑maa Mänatɩtɩɩ mö 'yukusɛ 'yize

12 ‑Atʋayuënyɩ,

a nɩ ‑yi sɛ nɩɩ,

'saa ghlɩɩɩɛ dɛ'ɛ,

mɩɩ kää ‑tiamö 'nglɩ 'n Zezwii 'a 'Mänatɩtɩɩ yiɛ gbɔlɔnɩ.

13 Ɛ'ɛ ‑bhö nyɩasɛ,

‑maa 'kämanɩnyɔ 'kɔdɔɔ a 'ligbëkʋwaa 'wuë,

wa ‑nyɛ ‑wa ‑wʋä mä'ä 'wuë 'sɔ,

wa yɛ sɛ yɩbhlɩmanɩ nɩɩ,

Kliisɩ 'a libhoo n nʋä a za,

nza n ‑wʋä ‑jie 'mö.

14 Zezwii Kliisɩ a ‑nʋä a ‑bɛ,

wa ‑kä 'na ‑jiea 'wʋ yɩlɩɩ,

ku 'mö wa sumanɩɛ tenyii,

'n wa 'tɛɛnɩɛ ‑Alowli dlɩ.

Wa'a nganɔ ku 'mö ‑kä 'n wa bhïlaa Lagɔ 'a wɛlɩɩ.

15‑17 ‑Mumuë ‑wʋ ‑lɛ,

wa ‑kä Kliisɩ 'a wɛlɩɩ biaa,

wa'a 'pä käbölu dlɩ 'wʋ 'n ɛ 'nɩ ‑bhö yɩ 'yize mi.

Wa ‑kä ‑sɩbhä 'zʋʋ,

na ‑wawʋʋ ‑wuëë dila zɛmö,

wa ‑yi sɛ nɩɩ,

'Mänatɩtɩɩ,

n 'kɩ 'wʋ gwɩ a za,

nza n ‑wʋä dɛ'ɛ ‑zijle 'mö.

‑Maa ‑mumuë ‑wʋ'ɛ ‑lɛ,

mʋa ‑kä Kliisɩ 'a wɛlɩɩ biaa,

sɛ n këluëë 'yli a za,

'na wɛlɩɩ,

'mö wa kpɛniɛ 'n wa bhïlaa Zezwii 'a wɛlɩɩ yɔwʋvanɩsɛ.

Wa ‑tɔnɩ n ‑kä mä'ä ‑jie 'mö ‑wʋ 'n wa ‑kä sa'a 'zʋʋ,

yɩ ‑yii tenyii yɔwʋ kälɩ.

18 ‑Maa ‑amö na a,

wa ‑kä ‑sɩbhä 'zʋ ‑kë,

na gbʋ 'nɩɛ ‑mä ‑wʋ.

'Wa dlɩpäsaa yi nɛnɩ oo,

‑sɩbhä 'nɩ nɛnɩ oo,

n ‑yi sɛ nɩɩ Kliisɩ 'a wɛlɩɩ 'mö wa biaa zaa,

yɩ ‑bhöö 'mäna 'wʋ 'yize.

'N 'mäna ‑yii'ɛ 'kwädlɩ 'lɩbhä 'yize.

19 Ɛ'ɛ ‑bhö 'fʋ ‑maa,

n ‑yi sɛ nɩɩ,

a bhibhe Lagɔ na 'wlumö 'yize,

'n Zezwii Kliisɩ 'a 'Wugɔmʋʋ ‑suu,

‑sɩbhä a za,

'saa ghlɩɩɩɛ dɛ'ɛ,

yɩ 'wuë a 'wlusɛnɩda,

sɛɛ ‑sɩbhä yi 'mö ‑wʋ ‑kë,

'pʋ n 'kää 'pʋ.

20 Sɛɛ 'na dlɩɩ yɩbhää tenyii,

‑sɩbhä ma‑a da'a.

N 'tɛɛnɩ tenyii Lagɔ dlɩ nɩɩ,

zʋ 'naa ‑kaa 'lɩbhä 'lɩlɩlɩ.

‑Maa n yi ‑bhölɩ oo,

n yi 'ku oo,

'na ‑wʋwʋsaa yi Kliisɩ a 'nglɩ 'ghlimanɩ klɩpaa.

21 Na dɔ'wʋ n ‑kä ‑bhölɩɩ,

Zezwii Kliisɩ a 'yize a za n ‑bhölɩɛ.

N ‑kä'ɛ 'kuu,

bɔ n'n‑ä bɔ.

22 Zaa,

n 'kä 'ku ma,

'n n 'kä ‑bhlɛ ‑bhölɩ 'yize n 'kä Lagɔ 'a libho nʋ ma,

yɩ 'sɔɔ a dɔ'wʋ,

‑lɛ n ‑kä a ‑sɛɛ yii,

'saa n 'kä a‑a ‑lɛ ‑sɛɛ,

n 'nuä ‑yi.

23 Yɩ 'sɔɔ a dɔ'wʋ 'na dlɩɩ 'mö ɛ ‑dlinɩɛ.

Ɛ yɩbhä n nɩ 'ku n 'kä ‑mä Zezwii Kliisɩ yɔwʋ mö.

Mɩɩ nɛnɩɛ tenyii mɩɩ ziɛ ‑mi'la 'wʋ.

24 ‑Maa a za,

yɩ nɛnɩ tenyii,

n 'kä ‑bhlɛ ‑bhölɩ 'yize.

25 N 'tɛɛnii ‑sɩbhä dlɩ zaa,

nza n ‑yiɛ sɛ nɩɩ,

n yi ‑bhlɛ ‑bhölɩ 'yize,

n yeanyɩɛ ‑bhlɛ gla'mö ‑wʋ a 'kä 'yukusɛ mö,

a 'kä Lagɔ 'mänasɛ dlɩ 'tɛɛnɩ.

26 ‑Lɛ a dɔ'wʋ,

n ‑kaanyɩ'ɛ 'wʋ 'sɔnadɔ'wʋ jijo'wʋ yii,

sɛ n ‑bhöanyɩ a‑a 'mäna 'wʋ,

'n a 'ghlimanɩ a‑a 'kwädlɩ Zezwii Kliisɩ a 'nglɩ na za‑a,

n yeanyɩ'ɛ ‑sɩbhä tenyii 'mäna 'wʋ ‑bhö,

a yi ɔ 'nglɩ 'ghlimanɩ 'yize.

27 ‑Yɩ kää dɛsɛ miɛ nɩɩ,

Puënyɔɔ Lagɔ ‑sɛɛ ‑lɛ 'a 'Mänatɩtɩɩ,

a nɩ 'zwi 'a ‑wʋwʋsaa 'wuë 'mö 'klʋkpamö.

‑Lɛ a dɔ'wʋ,

n yeanyɩ 'ylɩmöä yi oo,

n 'nanyɩ 'ylɩmöä yi oo,

n yi 'nʋ nɩɩ,

'yli yɔwʋ a 'tɛɛ,

'nyu 'nanyɩɛ'ɛ jijo'wʋ 'plɩnɩ.

A bianɩ dlɩ ‑bhʋlʋ 'mö Zezwii 'a 'Mänatɩtɩɩ,

nzɩɩ nɩkpa 'kɔa dlɩ 'tɛɛnɩ.

28 A nɩ tɩ 'a ‑gblɩwaa a za kɔmanɩ 'lɩlɩlɩ,

mɩɩ 'kʋää 'ylimö tulanɩ nɩɩ,

'yli wa kää bhɩɛ,

‑maa abhʋa abhlɩ a yi 'pʋ.

Lagɔ a'bhë mɔɔ 'kää 'nglɩ ‑kä yɩ 'kä ‑sɩbhä 'wʋ 'plɩ.

29 Lagɔ ‑saanyɩɛ ‑lɛ,

ɛ'ɛ ‑bhö a 'kä Kliisɩ dlɩ 'tɛɛnɩ a 'yize a za,

‑maa a 'kä'ɛ ɔ za 'zwɩ zi a za‑a.

30 N ‑nyɛ abhʋa 'sɔ,

sɛ ‑a yɔlɔnɩɛ 'gämö Lagɔ 'a libhoo a za‑a,

a ‑yi ‑sɩbhä.

‑Bhlɛ ‑sɩkaa,

sɛ n ylɔ libho 'la a za 'yizee,

a nwi.