Filiipö a ‑nʋa 4

Bhälɩwɛlɩɩ

‑Atʋayuënyɩ,

a 'tʋ lɩbhaaa tenyii.

'Mäna 'wʋ a ‑bhööä.

A za,

‑Alowli ‑yii zɩla'a bhɩzɩ.

Zaa,

ɔ ‑gänɩgänɩ dɔ'wʋ dɛ a kää sɛ a nɩ nyɔnʋ ‑lɛ kɛ.

Sɛ'ɛ Pɔɔlʋ zʋä Zezwii a ‑nʋa ‑wa ‑wʋä ‑mä Filiipö 'dɩ 'mö

2 ‑Aa nglʋdaayuë Evodii ‑nyɛ Sɛtisɩ 'sɔ,

n bhiuë yɔwʋ,

sɛ wa glɩnɩɛ ‑Alowli a ‑nʋä a za,

wa nɩ wamanɩ.

3 ‑Nmö ‑naa,

‑nmöö glɩnɩɛ na ‑tiamö a libho'wʋnʋnɩnyɔɔ,

n bhiamö,

ngwlɩ 'la 'sɔ ‑kpɔ,

'zʋmuë 'dɩ 'mö,

wa 'kä wamanɩ.

‑Maa wa 'sɔ ‑kpɔ,

wa ‑nyɛ Klemaa 'sɔ,

'n ‑muë'la 'wuë n ‑nyɛɛ 'sɔ ‑a nʋä Lagɔ 'a libho kökä,

wa 'wuë yɔlɔ wa yɔlɔ a‑a tenyii Zezwii 'a 'Mänatɩtɩɩ a biabiadɔ'wʋ.

Wa 'wuë,

'wa nglɩɩ cɛlɩ ‑mä 'pɩwʋ mää 'naa 'kää 'yli bhɩɛ a 'bɔgʋʋ 'mö.

4 ‑Atʋayuënyɩ,

sɛ a glɩnɩɛ ‑Alowli a ‑nʋä a za,

'mäna nɩ 'lɩbhanyɩ 'kwädlɩ 'yize.

Sɛ'ɛ n gbää nɩɩ,

'mäna nɩ 'lɩbhanyɩ.

5 A dila nɩ ‑wʋ ‑pälɛpälɛ ‑mä nɩkpa 'wuë ‑gömö.

‑Maa ‑Alowli 'a yiyitɛnyɩɩ yɛ 'dio.

6 'N ‑mɔ ‑lu a gbʋ ‑kä plɛnɩɩ,

ɔ nɩ tɩ nyɩasɛ dlɩ 'pä.

‑Maa 'saa ɔ ‑kä 'yɩbhä ‑kë,

ɔ nɩ bhibhe yɩ za Lagɔ 'yize.

Ɔ ‑kɔɔ bhibhee,

ɔ nɩ bhälɔ'ɛ 'gämö yɩ za.

7 A ‑kä ‑sɩbhä 'zʋʋ,

'tɩɩglɩglɛ ‑ɛ 'bhöönɩɛ Lagɔ 'mö,

nɩkpɛ 'nɩɛ bhɛnɩ ɔ 'kä 'mö 'nʋʋ,

ɛ yi 'a dilaa ‑nyɛ 'a dlɩpäsaa 'sɔ Zezwii Kliisɩ 'wʋ glɛ.

8 ‑Atʋayuënyɩ,

‑yɩ 'kanyɩɛ 'yukwli 'mö tʋʋ miɛ nɩɩ:

‑Yɩ kää gbëaa 'mö,

‑yɩ kää 'klʋkpamö,

‑yɩ zlɔnɩɛ 'mö,

‑yɩɩɛ ‑maa yɔwʋ ‑kä,

‑yɩ ‑bhöä 'mäna 'wʋ,

‑yɩ kää 'nglɩ ‑gömö,

nanɩli a kii 'la 'wuë,

'mö a nɩ 'pä 'wʋ dlɩ.

9 Wɛlɩɩ wa 'nyanyɩɛ,

a 'cɩɛɛ,

a 'nʋä ‑mä na nglii,

a yɩɩɛ 'ylɩmö n nʋä,

yɩ 'wuë sɛ yɩ gbää,

a nɩ nɛmö ‑sɩbhä 'tɩɩ.

‑Lɛ a dɔ'wʋ,

Lagɔ 'tɩɩglɩglɛ 'bhöönɩɛ 'mö,

ɔ yeanyɩ 'kwädlɩ ‑su.

Pɔɔlʋ bhälɩ ‑mä Filiipö a ‑nʋa ‑li a ‑lii wa nɔɔ 'wlu a za

10 Sɛ a 'pä'ɛɛ 'wʋ 'sɔ na dɛ dlɩ,

'n a ‑yiiɛ 'wʋ yi a za,

‑Alowli a 'mänaa ‑wʋä 'mlɩ tenyii.

N ‑yi sɛ nɩɩ,

yɩ ‑wʋanyɩ a ‑sɩbhä dlɩ 'wʋ 'yize,

‑maa a'aa la sɛ a 'kä 'zʋä ‑yi.

11 N ‑kä sa'a gbää,

ɛ'ɛ ‑bhö sɛɛ ‑lu a 'tʋ lɩbhaaa a za.

‑Amö na a,

sɛ n 'cɩɛɛ,

‑sɩbhä ma‑a nɩɩ:

'Saa n ‑kä ghlɩ ‑kë,

wʋ ‑zunɩɩ kɛ.

12 'Pʋa ‑yii 'lɩbhä ‑kë,

n ‑yi sɛ n 'kä zʋ.

'N 'pʋa ‑nɩɩ'ɛ 'lɩbhä ‑kë,

n ‑yi'ɛ sɛ n 'kä zʋ.

Kii 'wuë 'mö a dɔ'wʋ,

n yi lile ghlɩ oo,

n 'nɛ ghlɩ oo,

n yi ‑li a ‑bɛ ghlɩ oo,

n 'nɩ'ɛ ‑lu ghlɩ oo,

sɛ yɩ yi 'mö ‑wʋ ‑kë,

sɛ yɩ 'nɩ 'mö ‑wʋ ‑kë,

yɩ nɛnɩɩ dlɩ yɔwʋ 'yize.

13 Kliisɩ mɔɔ nyɩaaa 'mötɛɛnɔ,

mɔɔ kää 'nglɩ nza n bhɛnɩɛ ‑li 'la 'wuë.

14 Miɛ abhlɩ da'a,

‑maa ‑mä 'na yɔlɔylʋʋ 'mö,

sɛ a yiiiɛ 'wʋ a za,

yɩ nɛnɩ.

15 Filiipö a ‑nʋänyɩ,

a'bhï a ‑yi sɛ,

tɛɛtɛɛdɔ'wʋ,

dɛ n 'bhöö a‑a ‑mä Masedʋanɩ‑bhölɩɩ 'mö,

'n n yi a‑a 'Mänatɩtɩɩ biaa möö,

Zezwii a ‑nʋa a ‑zɩkpö 'wuë gla'mö,

a 'yize abhʋaa 'pɛnɩɩɛ Lagɔ 'a libhoo n nʋä a 'wlumö.

16 Dɛ n ‑wʋ a‑a ‑bhlɛ ‑mä Tesaloniikö glɔ 'möö,

‑lɛ a 'pänɩɩ a‑a 'wʋ a ‑bɛ moni 'yio 'wʋ,

'n a ‑yiiɛ 'wʋ yi.

17 Yɩ 'wuë 'mö a dɔ'wʋ,

a ‑kaa 'nyɛ 'mö n 'nɩɛ sɛ tɛlɩ,

‑maa 'saa n tɛlɩɛ sɛ miɛ nɩɩ,

Lagɔ 'kanyɩ 'nyu 'pä,

'a ‑li a ‑lii a nʋä nɩkpa 'wluu,

yɩ 'kä zumanɩ,

mɩɩ kää a ‑li a ‑lii 'mö.

18 Zaa,

‑li 'la 'wuë a paaaa 'yio 'wʋʋ,

n kɩ ghlɩ.

Yɩ ‑zu,

yɩ 'mɩɛ ‑lɛ 'wʋ a'bhë.

Tɛɛnɩ ‑zlɩ Epafoditɩ nyɩa'miɛ yowʋʋ,

n'n‑a'a ‑lu bɔ.

'A 'saa a nyɩaaa da'aa,

yɩ 'kä ‑bhɩɛ Lagɔ a bʋbɔnɩli a ‑mii kä nglɛ a nglɛ,

‑yɩ nɛnɔ dlɩ yɔwʋ.

19 ‑Maa Lagɔ ‑ɔnyɩ libho n nʋä,

Zezwii Kliisɩ a za,

'saa 'wuë a'aa ‑kä ɔ yeanyu 'nyɛ.

Ɛ'ɛ ‑bhö nyɩasɛ,

‑maa mɔɔ 'ghïliɛ,

mɔɔ wʋlʋä.

20 Zaa,

‑aa dɩba Lagɔ a 'nglɩ nɩ 'ghlimanɩ 'kwädlɩkwädlɩnɩ.

‑Amɛɛ!

Sɛ'ɛ Pɔɔlʋ bhälɩɛ 'gbëbhlenɩ dɔ'wʋ Filiipö a ‑nʋa

21 N ‑nyɛ na Lagɔdaayuë 'sɔ,

Zezwii Kliisɩ a ‑nʋa 'wuë ‑wa ‑wʋä ‑mä 'a mä'aa,

‑a bhäluë.

22 Zezwii a ‑nʋa 'wuë ‑wa ‑wʋä mä'ää,

wa lɛ wa bhälanyɩ.

'Bhlɩlowli 'kɔdɔɔ Sezaa a zɛmö a ‑nʋa a'bhë,

wa lɛ wa bhälanyɩ ‑këë.

23 ‑Alowli Zezwii Kliisɩ nɩ 'pänyɩ 'nyu!