2 Kolɛɛtɩ a ‑nʋa 12

‑Lii Lagɔ tulanɩɛ Pɔɔlʋ 'ylɩmöö

Sɛ'ɛ n gbää nɩɩ,

tɛkpɔtɛkpʋ,

wʋ'ʋä abhlɩ nɩkpɛ a ‑lu a ‑lu 'mö ‑kä.

‑Maa n kä n 'kä ‑bhlɛ tɛkpɔ 'yize.

Sɛɛ ‑Alowli ‑dɩɛ 'na yilaa,

'n n yiɛ ‑li 'ylɩmö,

'n sɛ ɔ tulanɩɩɛ ‑li ‑mimii 'ylimöö,

‑sɩbhä a 'tɩtɩ n 'kanyɩɛ dɛ'ɛ 'nyɛ.

2 N ‑yi Zezwii a ‑nɔ ‑bhlʋ.

Nɩkpɛ 'la,

'ylɩ ‑bhlʋ 'mö 'n Lagɔ yoo 'wʋ 'libhï,

‑mä ghäyɩ ghäyɩ ‑mä ɔ yɔwʋ a'bhë 'n ɔ ‑nyɔɔ yiɛ ‑mä mö.

‑Abhɩɛ 'ɔ kpökpaa 'mö ma oo,

‑abhɩɛ ‑lii ghlɔ 'ylimö oo,

n 'niɛ ‑yi,

Lagɔ a 'yize mɔɔ ‑yiiɛ.

‑Li 'la yɩ yɛ 'plɩ a 'ylʋbö kʋgbä‑mʋänaa dɛ'ɛ.

3 Nɩkpɛ 'la ‑mä Lagɔ yɔwʋ a'bhë ‑mä ɔ mö a‑a ‑tiamö.

‑Sɩbhä n gbä'ɛ nɩɩ,

ɔ'bhë mɔɔ ‑kä a ‑mä mö oo,

‑lii ‑kɔɔ a 'ylimö ghlɛ oo,

n 'niɛ ‑yi,

Lagɔ a 'yize mɔɔ ‑yiiɛ.

4 ‑Maa ɔ möä ‑mä,

nanɩwɛlɩ a ‑mi ‑yɩɩɛ ‑sɩbhä a sɛ ‑wʋʋ,

nɩkpɛ 'nɩɛ bhɛnɩ ɔ 'kä bhïlaa,

'mö ɔ 'nʋä.

5 ‑Sɩbhä a nɩkpɛ 'la 'mö n 'kää 'mö bhanɩ.

N ‑kä a n 'kä tɛkpɔɔ,

‑lii ‑yinyɩɩ dɔ'wʋ n'n‑ä 'mötɛɛnɔ ‑kä,

'mö n 'kä a‑a 'mö tɛkpɔnɩ.

6 N ‑kä a n 'kä tɛkpɔ nʋʋ,

wa 'naa ‑kaa ‑ɔɔ'nɛɛnyɔ 'mö 'wʋ 'libhï.

Ɛ'ɛ ‑bhö nyɩasɛ,

‑maa gbëaa n 'kä a bhïla.

‑Maa,

n'n‑ä 'yɩbhä n 'kä tɛkpɔ nzɩɩ 'saa n nʋä ‑nyɛ 'saa n bhïlaa 'sɔ a za,

nɩkpa tɩa nɩɩ,

n glɩnɩ 'kɔdɔ n zuë 'wʋ nʋ.

7 ‑Li 'la ‑yɩɩɛ ‑sɩbhä a sɛ ‑wʋ,

Lagɔ tulanɩɩɛ 'ylimöö,

n tɩa yɩ za nanyɩ 'wʋ 'pä a za,

gu Lagɔ 'tatinɩɛ 'yi 'n wʋ ‑yiiɛ ku 'mö bhlinɩ.

Gu 'la ‑bhɩɛ zuzukwëzokwëë yɛ ‑mä Sataa kä'mö 'bhöö,

ma‑a ‑wʋʋ 'lɩbhä dɔ'wʋ.

‑Maa n tɩa bha a za,

nza yɩ ‑wʋä ‑sɩbhä.

8 Wʋ za n yɛɛ ‑bhlɛ 'wʋ taa Lagɔ 'mö 'winɩ nɩɩ,

ɔ nɩ ‑sa'mu ‑gömö.

9 ‑Maa sɛ'ɛ ɔ nyɩaaa 'dɩ nɩɩ:

«Sɛɛ n pää 'kwädlɩ ‑na ngäzɩdlɩɩ,

‑sɩbhä nɩ ‑zunɩmö kɛ.

‑Maa ‑nanyɩgäsɛ ‑n 'nɩ ‑lu bhɛnɩɩ,

‑lɛ a dɔ'wʋ 'na 'mötɛɛnɔɔ 'kää sasɛ ‑mä ‑na 'mö 'yli 'wlʋnɩ.»

Zaa,

sɛɛ n'n‑ä 'na sɛ'ɛ nɩ ‑lu bhɛnɩ,

‑sɩbhä a 'yize 'mö n 'kää 'mö tɛkpɔnɩ,

nzɩɩ ɔ ‑kaa 'kwädlɩ Kliisɩ 'a 'mötɛɛnɔɔ ‑gömö zʋ 'yize.

10 Zaa,

n 'nɩ sɛ'ɛ ‑lu bhɛnɩ oo,

wa ‑yii ‑di zia oo,

n yi klɩɩ a kii 'wuë 'yɩ oo,

wa ‑yii 'zwɩ zia oo,

n 'nɩa'a sɛ a'bhë n 'kä 'zʋä ‑yi Kliisɩ a za oo,

yɩ ‑bhöö 'mäna 'wʋ 'yize.

Ɛ'ɛ ‑bhö nyɩasɛ,

‑maa n ‑yi sɛ nɩɩ,

dɛɛ n'n‑ä 'na sɛ'ɛ nɩ ‑lu bhɛnɩɩ,

‑lɛ Lagɔ 'zʋnɩɩɛ 'ɔ 'mötɛɛnɔɔ ‑gömö 'n n 'tɛmanɩɛ 'mö.

Pɔɔlʋ lɛ dlɩ ɔ pää tenyii Kolɛɛtɩ a ‑nʋa a za

11 ‑Tiamö abhlɩ,

‑ɔɔ'nɛɛnɩsɛ n tɛkpɔɔ da'a,

‑maa a'bhï abhʋaa 'pänɩɩɛ ‑sɩbhä a ‑li 'wʋ.

'Lɩlɩlɩ a dɔ'wʋ,

abhʋaa kä a‑a a ‑kaa nimï 'plɩ,

a 'kä na 'dɩ a dɩ ‑sɛ.

N 'nɩ ‑lu glɩnɩ a'bhë ‑kë,

'a nɩkpa 'la a laa Zezwii a tietiewa 'kädɩ 'kädɩɩ,

wa ‑nɩɩɛ ‑lu ‑bhlʋ a'bhë 'mö zi.

12 N ‑wʋ a‑a ‑mä a jijo'wʋʋ,

sɛ n ‑kpaanɩ a‑a dlɩ 'mö tenyii,

a 'yɩ ‑sɩbhä 'ylɩmö.

Zɩzɛlii a kii 'wuë n ‑bhɛnɩ a‑a Lagɔ 'a 'mötɛɛnɔɔ 'möö,

mɩɩ tulanɩ a‑a 'ylimö nɩɩ,

Zezwii a tietienyɔ n glɩnɩɛ ‑tiamö.

13 Zezwii a ‑nʋa a ‑zɩkpöö 'wuë a dɔ'wʋ,

abhʋa n nʋ bhä ‑lizoku 'wlu ‑a?

‑Maa n 'nanyɩɛ moni 'yɩbhänɩ mɩɩ glɩnɩ bhä ‑lizoku ‑a?

N 'zʋä ‑sɩbhä,

‑lizoku n ‑kä da'a nʋʋ,

a ‑yaya a nɩ 'tatinɩ yɩ gbʋʋ 'yi.

14 'Wʋ tanadɔ'wʋ n 'käa'aa dɛ'ɛ ‑mä 'a mä'a yinɩ.

N ‑kä yii,

abhʋa 'naa ‑kaa ‑su.

A'bhï a gbʋʋ plɛnɩɩɛ,

‑maa 'a moni a gbʋʋ mʋʋ ‑nɩɩɛ plɛnɩ.

A ‑yi sɛ nɩɩ,

'yuë 'tikïyiea mʋa 'nɩɛ wa ‑lowluwa ‑su,

‑maa ‑lowluwaa mʋa ‑suä 'yuë 'tikïyiea.

15 ‑Amö na a,

n ngulu 'wʋ 'na 'saa n kää n 'kanyu 'mänasɛ 'nyɛ,

n ngulu'ɛ 'wʋ n 'kä a za nanyɩ 'mö 'wlʋ a'bhë.

Sɛ n ‑waanyɩɛ sa'a tenyii,

‑sɩbhä ma‑a kä bhä 'nglɩ nza a ‑nɩɩ 'tikïyie 'wʋ ‑wa ‑a?

16 A'bhï,

a ‑yi sɛ nɩɩ abhʋa ‑nɩɛ ‑su.

Sɛɛ ‑mumuë nʋä nɩɩ,

duladulasɛ n kplanyɩɛ kä'möö,

‑sɩbhä ma bhä ‑tiamö ‑a?

17 N kanyɩ bhä tɛkäsɛ na 'wʋ‑bhlinɩnyɔ ‑bhlʋ 'wʋ tie ɔ 'kanyɩ kä'mö kplɛ ‑a?

18 ‑Tiamö abhlɩ,

Tiitɩ ‑nyɛ ‑aa ‑daayu ‑mɔ'la 'sɔ,

‑amöö tieanyuëë 'wʋ.

‑Maa wa ghlɛɛ ‑mä,

Tiitɩ kplanyɩ bhä kä'mö ‑a?

N ‑nyɛ Tiitɩ 'sɔ,

‑a'a nɛmönɛmösaa ‑bhʋlʋ a glɩnɩɛ,

'na gbäpöö 'mö ɔ ‑gänɩɛ.

19 ‑A ‑kä 'kwädlɩ sɛ'ɛ bhïlaa,

sɛ'ɛ a 'kää ‑kamä dlɩ 'pä nɩɩ,

‑a 'kanyɩa 'ylimö tulanɩ nɩɩ,

‑a'a wɛlɩɩ mɩɩ nɛnɩɛ a za,

nza ‑a bhïlaa ‑sɩbhä.

Ɛ'ɛ ‑bhö ‑sɩbhä a za.

‑Maa Lagɔ a 'yila 'klʋ,

Kliisɩ a 'nglɩ 'mö,

n 'kä 'a dlɩ'wʋkänɔɔ 'yukusɛ kwä a za‑a.

20 ‑Maa n ‑kä ‑mä 'a mä'a yii,

n guä miɛ nɩɩ,

sɛɛ a'aa ‑kä a 'kä ‑wʋ,

n tanyɩa ‑sɩbhä ghlɩ,

nzɩɩ sɛɛ a'aa ‑wa,

n tɩa'ɛ na a ‑sɩbhä ‑wʋ.

N'n‑ä 'yɩbhä n 'kanyɩ 'lʋlwɛɛ ‑nyɛ 'ylikälɩkälɛ 'sɔ jijo'wʋ ghlɩ.

'Klɛwɛlɩ oo,

yɔwʋvanɩvanɛ oo,

‑diziawɛlɩ oo,

widɩsɛsʋ oo,

bhabhʋ oo,

bidibidinʋnwɛ oo,

‑li 'la 'wuë,

n'n‑ä 'yɩbhä n 'kanyi jijo'wʋ ghlɩ.

21 N gu'ɛɛ miɛ nɩɩ,

n'n‑ä 'yɩbhä n ‑kä ‑mä 'a mä'a yi,

zʋ ‑kaa'ɛ ‑sɩkaa a za Lagɔ a 'yila 'klʋ 'lɩbhänɩ.

A gla'mö a nɩkpa a ‑bɛ ‑wa nʋ a‑a 'nyinyloli,

‑wa 'niɛ ‑bhlɛ kɛ'mö ‑sɛɛ,

n'n‑ä 'yɩbhä n 'kʋä ‑mä 'wa ‑lizoku 'la 'mö ghlɩnɩ n tuëa 'wʋ 'winɩ.

Zaa,

sɛ wa nɛmöä bidibidi 'n ‑lii a kii 'wuë a 'tʋzokwëa ‑sunuëë 'wlumö 'n wa pälaa wanyɩ fɩ Lagɔ a 'yila 'klʋ a dɔ'wʋʋ,

wa nɩ ‑sɛ ‑bhlɛ ‑sɩbhä kɛ'mö.