2 Kolɛɛtɩ a ‑nʋa 11

Pɔɔlʋ yɛ yiowaa ‑wa laa wanyɩ Zezwii a tietiewaa a dɛ bhïla

‑Atʋayuënyɩ,

n yɩbhä a nyɩasɛ a nɩ nyɩaa 'tikïyie 'wʋ 'tɛnyɩ,

n 'kä ‑ɔɔ'nɛɛnɩnyɔ a ‑li nʋ.

Zaa,

a nɩ nglu 'wʋ,

n 'kä ‑sɩbhä 'zʋ.

2 Nglʋnyinye ‑ɛ ‑wʋʋä a za 'lɩbhä dɔ'wʋʋ,

nglʋnyinye a ‑mɛ 'bhöönɩ Lagɔ 'mö mɛɛ.

Ɛ'ɛ ‑bhö nyɩasɛ,

‑maa ngluyu a ‑mɔ 'nɩɛ ‑bhlɛ nyɩbhɛlʋ yɩbhlɩnɩ a sɛ a ‑wʋä,

'n n yeanyɩɛ nyɩbhɛlʋ ‑bhlʋ 'tɩɩ 'wʋ bhibhe.

Nyɩbhɛlʋ 'la,

Zezwii Kliisɩ mɔɔ.

3 N guä miɛ nɩɩ,

sɛɛ tɩmɛ nʋ a‑a Ɛɛvö ylʋ 'n ɛ yo a‑a 'wlumö nyimaa,

nɩkpa tanyɩa ‑sɩbhä 'wlumö nyima zaa,

a'bhï a nɩ 'nɛmanɩ anyɩ 'wʋ,

nzɩɩ Kliisɩ a ‑wawa dɔ'wʋ,

'a dilaa tɩa 'mö ‑dlinɩ.

4 Nyɩasɛ n'n‑ä ‑sɩbhä gbä,

‑maa nɩkpɛ ‑kä yi ɔ ‑kaanyɩ käbözezwii,

‑ɔɔɔ Zezwii ‑ɔnyɩɩ 'dɩ ‑a 'nyanyɩ a‑a glɩnɩ a 'dɩ 'nyɛɛ,

ɔ ‑kaanyɩ käböwugɔmʋ,

‑ɔɔɔ 'Wugɔmʋʋ ‑ɔ ‑yeanyɩ a‑a ‑gömöö glɩnɩ a 'dɩ 'nyɛɛ,

ɔ ‑kaanyɩ käbömänatɩtɩ,

‑yɩɩɛ 'Mänatɩtɩɩ ‑a 'nyanyɩ a‑a glɩnɩ 'nyɛɛ,

'wʋ a ngluä nza n gbää ‑sɩbhä.

5 'A nɩkpa 'la a laa Zezwii 'a tietiewa 'kädɩ 'kädɩɩ,

wa ‑nɩɩɛ yɩ na a ‑lu 'mö zi.

6 ‑Tiamö abhlɩ,

n'n‑ä ‑kamä bhïlasɛyinyɔ 'kɔdɔ glɩnɩ,

‑maa n ‑kä bhïlaa,

n ‑yi 'saa n bhïla.

‑Sɩbhä n tulananyi a‑a 'kwädlɩ 'ki a ‑bɛ 'mö 'ylimö.

7 Lagɔ 'a wɛlɩ a ‑wɛlɩɩ,

'fʋ n 'nyanyiɛ.

N ‑lɛmöä sa'a nanyɩ dʋdʋ 'wʋ a 'käa abhlɩ 'pʋ a za‑a,

'nyinyloli bhä ‑a?

8 'Na Lagɔlibhoo n nʋ a‑a ‑mä a jijo'wʋʋ,

Zezwii a ‑nʋa a ‑zɩkpö ‑mimii 'mö n kplɛɛ kä'mö n 'kanyɩ 'wʋ yi a za.

9 N ‑wʋ a‑a ‑mä a jijo'wʋ,

dɛɛ n'n a‑a ‑lu kä'mö ‑kää,

a gla'mö a nɩkpɛɛ ‑nɩɩɛ a ‑su.

‑Maa ‑aa ‑daayuë ‑wa 'bhöönɩ a‑a ‑mä Masedʋanɩ,

mʋa yiiia a‑a 'wʋ.

Kii 'wuë 'mö a dɔ'wʋ,

n'n‑ä 'wʋ nglu,

a gla'mö a nɩkpɛ ‑kaa ‑su,

‑sɩbhä n 'kää 'kwädlɩ 'zʋ 'yize.

10 Kliisɩ ‑ɔ zʋʋʋä 'kwädlɩ 'ɔ gbëaa ngli 'yize,

ɔ 'nglɩ 'mö n nyanyɩɛ dɛ'ɛ 'dɩ nɩɩ:

‑Mä Akayii‑bhölɩɩ 'wuë 'mö,

nɩkpɛ ‑bhlʋ a'bhë 'naa ‑kaa ‑lɛ a nglɩ 'la ‑gömö ‑sɛ.

11 N ‑kä ‑sɩbhä zʋʋ,

sɛ'ɛ yɩ sɛ bhä zɛmö nɩɩ,

n 'nanyɩɛ ‑wa a za‑a?

Lagɔ a'bhë ɔ ‑yi sɛ nɩɩ,

n ‑waanyɩ.

12 'Na sɛ n nʋä da'a Lagɔ 'a libhoo,

‑sɩbhä n 'kʋä nʋ 'yize,

ɛ'ɛ ‑bhö nyɩasɛ,

‑maa nɩkpa 'la ‑wa tɛlɩɛ 'saa wa 'kää 'mö tɛkpɔnɩ sɛ,

‑wa nʋä nɩɩ 'na sɛ n nʋä Lagɔ 'a libhoo ‑sɩbhä wa nʋmuä,

n tuëa 'tɛnyɩ 'nyɛ wa tɩa tɛkpɔ.

13 Nɩkpa 'la,

Kliisɩ a tietiewa wa'aa glɩnɩ.

Ylʋplɛwa wa glɩnɩɛ.

Wa nʋ 'fʋ Kliisɩ a tietiewa a ‑li,

‑maa mɔɔ 'nuë tie.

14 N ‑kä ‑sɩbhä nʋʋ,

yɩ nɩ tanyɩ 'fʋ ngli yɩa,

‑maa Sataa,

ɔ bhɛnɩ ɔ 'kä Lagɔzuzukwë ‑a lɩɛ zɩzlɔnɩ.

15 Zaa,

Sataa 'a libhonʋwaa wa ‑kä ‑sɩbhä zɩzlɔnɩmö,

wa ‑kä 'fʋ Lagɔ a libhonʋwa a ‑li nʋʋ,

yɩ nɩ tanyɩ ngli yɩa.

Nɩkpa 'la,

Lagɔ yuë zɩla'a 'wa nʋnʋlii a 'pɛna 'nyɛ.

‑Lii Pɔɔlʋ tɛkpɔnɩɛ ɔbhlɩ 'möö miɛ dɛ'ɛ

16 Sɛ'ɛ n gbää nɩɩ,

‑bɛ nɩ ‑tɩɩ ‑ɔɔ'nɛɛnɩnyɔ 'mö 'wʋ 'libhï.

‑Maa a ‑kä a ‑kaa ‑sɩbhä 'wʋ 'libhï nʋʋ,

a nɩ nglu'ɛ 'wʋ,

n 'käa'a ‑sɩkaa ‑ɔɔ'nɛɛnɩnyɔ a sɛ tɛkpɔmö.

17 N ‑yi abhlɩ sɛ nɩɩ,

sɛ n 'kää dɛ'ɛ tɛkpɔɔ,

ɛ'ɛ ‑bhö Lagɔsɛ,

‑ɔɔ'nɛɛnɩsɛɛ.

18 ‑Maa nɩkpaa ‑wanyɩɩ tɛkpɔtɛkpɔsaa 'nɩɛ Lagɔsɛ ‑wʋʋ,

wa'aa ‑mä a gla'mö muënɩ zaa,

tɛkpɔ n 'kää tɛkpɔmö.

19 Abhʋa la'ɛ anyɩ 'nɛɛnɩwaa,

‑ɔɔ'nɛɛnɩwɛlɩɩ a kii 'wuë 'mö a ngluä 'wʋ.

20 Wa ‑kaanyɩ gasɛ ‑su,

wa ‑kanyɩ kä'mö kplɛ,

wa ‑kaanyɩ 'wʋ li,

wa ‑kaanyɩ 'ylimö fälanɩ,

wa ‑kaanyɩ 'klʋ 'pä a'bhë ‑kë,

'wʋ a ngluä.

21 ‑A 'nanyɩ ‑sɩbhä köbhää,

yila ‑a gu bhä ‑a?

Zʋ 'wʋ yɩ ‑bhööä.

‑Ɔɔ'nɛɛnɩnyɔ a sɛ n 'kää bhïla.

'Saa kää 'nglɩ 'n wa tɛkpɔɔ,

n bhɛnɩ n 'kä wʋ za tɛkpɔmö.

22 Nɩkpa 'la,

sɛ wa glɩnɩɛ Ebleewaa,

‑sɩbhä n glɩnɩmöä Ebleeyi,

sɛ wa glɩnɩɛ Yizlaɛlɩ 'a ngëyii 'mö a ‑nʋä,

‑sɩbhä n glɩnɩmöä Yizlaɛlɩ a ngëyi 'mö a ‑nɔ,

sɛ wa glɩnɩɛ Ablaamö a 'yuë a 'yuëë,

‑sɩbhä n glɩnɩmöä Ablaamö a 'yu a 'yu.

23 Ɛ ‑kä Kliisɩ a libhonʋwaglɩnɩzaa,

zaa ‑yeeke!

Mä'ä ‑mä a 'käa'a yi.

A nɩ 'tatinɩɩɛ ‑ka 'yi n 'kä nɩkpɛ a ‑mɔɔ ‑nyimaa 'wlumö 'lɩlɩlɩ a sɛ bhïla.

Sɛ'ɛ n gbää nɩɩ,

‑sɩbhä a za wa nɩ ‑kä tɛkpɔɔ,

‑amöö glɩnɩɛ ɔ libhonʋnyɔ,

‑amöö zuëë wa 'wuë 'wʋ.

N ylɔ tenyii ɔ za,

wa paaa 'kwädlɩ ‑jie 'mö,

wa lɩbhaa,

wa paaa 'kwädlɩ 'kwie ngli.

‑Li 'la 'wuë 'mö a dɔ'wʋ,

n zi nɩkpa 'la 'wʋ.

24 Zwiiföwaa ‑kaaa ‑bhlɛ 'wʋ ngbï 'sɛlɩnɩ.

Gbösɛnyɔ a sɛ,

'wʋ a glʋ ‑bhlʋ 'wʋ kʋgbä ngbï‑mʋäna wa 'sɛlɩnɩɩɛ ‑sɩbhä ‑kpli 'mö 'yize.

25 Ghlʋmɛɛwaa ‑kaaa ‑bhlɛ wabhlɩ 'wʋ taa 'sɛlɩnɩ.

N yɛɛ ‑bhlɛ 'wʋ ‑bhlʋ 'kpɩ 'pɔɔnɩ n 'kä 'ku a za.

Batoo ‑kaaa ‑bhlɛ 'nyu 'klʋ 'wʋ taa zɛmö ghɔlɔnɩ.

Wʋ ghɔlɔɔ sa'aa,

n ‑sɛ tɛkäsɛ ‑mä 'nyu 'mö 'ylɩ a ‑gëgëbhë.

26 Saa 'wuë sɛ n mönɩɛ kplɩ 'ylii,

n 'yɩnɩ nyuu ‑wʋ yiee kɛ 'klɩ,

n 'yɩnɩ jɛzlʋwaa kɛ 'klɩ,

na 'bhɩa Zwiiföwaa 'yɩaa 'klɩ,

‑waaa Zwiiföwa glɩnɩ 'yɩaa 'klɩ.

‑Mä ‑gwlɩɩ 'mö n 'yɩnɩ ‑mä 'klɩ,

mää nɩkpɛ 'nɩɛ ‑wʋ n ‑kä ‑mä 'wʋ 'tʋ,

n yɩ 'klɩ,

n 'yɩnɩ ‑mä gïnyɛ 'mö klɩ,

nɩkpa ‑wa laa 'fʋ wanyɩ Zezwii a ‑nʋä,

wa 'yɩaa 'klɩ.

27 Lagɔ 'a libhoo a za,

yɔlɔ n yɔlɔɔ tenyii.

Zila ‑mimii a ‑bɛ 'mö,

n'n ngämö,

ngɔmʋ lɩbhaa,

'nyutʋ lɩbhaa.

'Tɛnyɩ ‑mɛmɛɛ 'mö n'n ‑sɛ du 'lɩlɩlɩ,

n'n ghlɩ 'wualu,

wëtlokwë lɩbhaa.

28 ‑Li 'la 'wuë,

'n ‑li ‑mimii a ‑bɛ mɩɩ ghölɩɩɛ 'kwädlɩ.

Zilaa 'wuë 'mö Zezwii a ‑nʋa a ‑zɩkpöö 'wuë a za,

dlɩ n pää tenyii.

29 Nɩkpɛ ‑mɔ swɩ ‑kä yɔwʋ 'kunɩ ‑kë,

ɔ dlɩ n pää,

‑mɔɔ ‑kä Lagɔ 'a 'yioo 'wʋ 'bhöö,

ɔ za na dlɩɩ mɛɛ siɛ 'yli.

30 Zaa,

n ‑kä n 'kä tɛkpɔɔ,

‑lii ‑yɩnyɩ dɔ'wʋ n'n‑ä 'mötɛɛnɔ ‑kä,

'mö n 'kää 'mö tɛkpɔnɩ.

31 ‑Alowli Zezwii a dɩba Lagɔ,

ɔ ‑yi sɛ nɩɩ,

n'n‑ä yio ngli ‑kä.

Ɔ 'nglɩ nɩ 'ghlimanɩ 'kwädlɩkwädlɩnɩ.

32 N ‑wʋ a‑a mä Damasɩ,

'bhlɩlowli Aletasɩ a zɛmö a nɩkpɛɛ,

ɔ lɛ naa,

'slʋjaa nɩ ‑kʋ na za ‑glɔ a ngloluu nzɩɩ wa ‑kaa köbhä.

33 ‑Maa ‑käka 'mö wa zʋʋʋä,

'kpakwëa ‑a ‑binɩɛ ‑glɔɔ,

'n wa ‑yiiɛ a 'yioki ‑bhlʋ 'mö ghälanɩ,

'n wa ‑yiiɛ 'likpï 'mö 'kwïlanɩ.

Sa'a ‑sɩbhä n 'pʋ a‑a nɩkpɛ 'la ngli.