2 Kolɛɛtɩ a ‑nʋa 13

'Dɩmözʋwɛlɩɩ

'Wʋ tanadɔ'wʋ n 'käa'aa dɛ'ɛ ‑mä 'a mä'a yinɩ.

Lagɔwɛlɩɩ lɛ naa:

Wa ‑kä nɩkpɛ 'kïbhë ‑gömö ghlɩɩ,

nɩkpa 'sɔ nɩkpa ta ‑kɩɩ ‑sɩbhä 'ylɩmömöö,

wa nɩ ‑sɛnɩ 'mö yɩ 'kä 'wlu 'doo.^a

2 Zaa,

a gla'mö a nɩkpaa ‑wa nʋ a‑a tɛkädɔ'wʋ 'nyinyloli,

wa ‑nyɛ ‑muë'la 'wuë 'sɔ,

wa dɛ n bhïlaa.

N 'nanyɩɛ ‑sɩkaa dɛ'ɛ jijo'wʋ ‑wʋ,

‑maa n yi a‑a 'wʋ 'sɔnadɔ'wʋ ‑mä 'a mä'a a sɛ n 'nyanyɩ a‑a 'dɩɩ,

‑sɩbhä n nyanyɩ'ɛɛ dɛ'ɛ gbëaa 'dɩ nɩɩ:

N ‑käa'a ‑sɩkaa ‑mä 'wʋ tanadɔ'wʋ yii,

nɩkpa 'la n yuëë yɔwʋkanɩsɛ 'dɩ 'nyɛ.

3 A yɩbhä n nɩ tulananyɩ 'ylimö nɩɩ Kliisɩ bhïlanɩɩ 'mö.

Zaa,

n ‑wʋ yi dɔ'wʋ.

Kliisɩ,

'mö ɔ 'tɛɛ.

Sɛ ɔ 'tɛɛ ‑tiamö 'möö,

ɔ yi ‑sɩbhä ‑mä a jijo'wʋ 'ylimö tulanɩ.

4 ‑Tiamö abhlɩ ɔ'ɔɔ 'mö 'tɛɛ nza wa kʋnɔ a‑a ‑lɛ su 'klʋ.

‑Maa ‑sɩkaa a dɔ'wʋ,

Lagɔ 'a 'mötɛɛnɔɔ 'mö ɔ ‑bhölɩnɩɛ 'mö.

‑Abhʋaa ‑glɛɛ Zezwii 'wʋʋ,

‑aaa 'mö 'tɛɛ,

‑maa Lagɔ 'a 'mötɛɛnɔɔ a za ‑a ‑nyɔɔ yi 'gämö ‑bhölɩnɩ.

A 'wuë a yi ‑sɩbhä 'ylɩmö.

5 A'bhï a nɩ vɩɛ sasɛ anyɩ 'mö,

'n a ‑kä ‑tiamö Zezwii dlɩ 'wʋ ‑kä,

Zezwii Kliisɩ a'bhë 'n ɔ ‑kaanyɩ 'mö ‑bhölɩnɩɩ,

a 'kä ‑sɩbhä 'ylɩmö.

‑Maa ɔ'bhë 'n ɔ 'nanyɩ 'mö ‑bhölɩnɩɩ,

a'aa ‑tiamö Zezwii dlɩ 'wʋ ‑kä.

6 ‑Maa ‑amö na a,

n kɩ dlɩ 'wʋ,

a yi 'ylɩmö nɩɩ ‑a kɔ dlɩ 'wʋ 'yize.

7 ‑A bhibhee a za Lagɔ nɩɩ,

‑lii 'wuë ‑yɩɩɛ 'mö zlɔnɩɩ,

a nɩ ‑sɩɩ kɛ'mö.

‑A ‑kä ‑sɩbhä Lagɔ bhibhee,

ɛ'ɛ ‑bhö nɩɩ sɛ ‑a tɛlɩ ‑anyɩ a 'nglɩ sɛ a za.

Wa ‑yinyɩ nɩkpa a ‑muë ‑waaa sasɛ Lagɔ 'a libhoo nʋ 'mö 'wʋ 'libhï ‑kë.

A 'kä nɩkpa a ‑muëë nʋä 'mözlɔnɩli glɩnɩ,

mɩɩ ‑kanyɩɛ dɛsɛ.

8 Ɛ'ɛ ‑bhö nyɩasɛ,

‑maa ‑aaa bhɛnɩ ‑a 'kä Lagɔ 'a ‑tiamö a wɛlɩɩ ‑kplikpli 'yli klɛnɩ,

‑maa ‑a 'kɩ 'yukusɛ kwä a za,

nza ‑a kää 'mötɛɛnɔ.

9 A‑a 'nɩ 'mötɛɛnɔ ‑kä,

'n a ‑kä 'mötɛɛnɔ ‑kä,

mɩɩ ‑bhönyɩɛ 'mäna 'wʋ.

‑A ‑kä a za Lagɔ bhibhee,

‑a 'yɩbhänɔɔ miɛ nɩɩ,

'a dlɩ'wʋkänɔɔ nɩ mö 'yukusɛ.

Nzɩɩ a 'kä 'mö zlɔmanɩ.

10 Nza n ‑wʋä mä'ä 'yuku 'n n cɛlanyɩɛ 'bɔgʋ nɩ 'wʋ.

Ɛ'ɛ ‑bhö nyɩasɛ,

‑maa n'n‑ä 'yɩbhä nɩɩ,

n ‑kä ‑mä 'a mä'a yi n 'kanyɩ yɔwʋkanɩsɛ 'mö zlɔmanɩ.

N 'kä ‑Alowli Zezwii 'a ‑zɩkpöö 'mö a ‑nʋa swɩ yɔwʋ 'kätɛ nza ɔ ‑nɩɩɛ ɔ tietienyɔ 'wʋ 'zʋa,

‑maa n 'kʋä swɩ nyɛmʋ 'mö 'pä wa 'kä 'yukusɛ mö,

nza ɔ tieaaa.

Bhälɩwɛlɩɩ

11 ‑Yɩ 'kanyɩɛ 'yukwli 'mö tʋʋ miɛ nɩɩ,

a nɩ ‑wʋ 'mäna 'mö,

a nɩ 'tɛmanɩ 'yli yɔwʋ a 'käa sasɛ nɛmö.

A nɩ 'päpänɩ swɩ nyɛmʋ 'mö.

A nɩ kä dlɩ ‑bhʋlʋ,

a nɩ ‑wanɩ.

‑Lɛ a dɔ'wʋ,

Lagɔ,

‑wawʋ ‑nyɛ 'tɩɩglɩglɛ 'sɔ 'bhöönɩɛ 'möö,

ɔ yeanyɩ 'kwädlɩ nimï ‑wʋ.

12 A 'wuë,

a nɩ gbönɩ ‑wanɩwanɩsɛ dlɩ.

Zezwii a ‑nʋa 'wuë ‑wa ‑wʋä mä'ää,

wa lɛ wa bhälanyɩ.

13 ‑Alowli Zezwii Kliisɩ nɩ 'pä 'kwädlɩ a ngäzɩ dlɩ,

Lagɔ 'a ‑wawʋʋ nɩ ‑waanyɩ 'kwädlɩ dlɩ zɛmö,

'ɔ 'Wugɔmʋʋ nɩ ‑wʋanyɩ 'kwädlɩ ‑gömö.