2 Kolɛɛtɩ a ‑nʋa 8

A nɩ 'nyɛ 'mänasɛ

‑Atʋayuënyɩ,

Zezwii a ‑nʋa ‑wa ‑wʋä mä'ä Masedʋanɩ a ‑gwlɩɩ ‑gömöö,

sɛɛ Lagɔ 'pʋää 'nyu 'n ɔ yiɛ ‑mä wa jijo'wʋ 'ɔ libhoo nʋnɩɩ,

‑sɩbhä a 'tɩtɩ n 'kanyɩɛ dɛ'ɛ 'nyɛ.

2 'Klɩ a ‑bɛ wa 'yɩɛ ‑tiamö.

‑Maa 'wa dlɩ'wʋkänɔɔ a za 'mäna 'käda 'lɩbhʋää,

'n wa yiɛ 'yli yɔwʋ 'tɛmanɩ tenyii.

‑Sɩbhä a za,

wa glɩnɩ ‑tiamö 'pʋäwa,

‑maa 'wa dlɩzɛmönanɔɔ zumanɩ wʋ zumanɩɛ.

3‑4 Wa 'nʋä nɩɩ,

wa 'bhɩa Lagɔgänɩwaa a ‑zɩkpöö ‑wʋ moni 'wʋ 'päpänɩ dɔ'wʋ wa 'kɛ Zeluzalɛɛmö a ‑nʋa ‑mä kwää,

yɔwʋ wa bhibheaa nɩɩ,

n nɩ nglu 'wʋ wa 'kä ‑lɛ a moni 'la 'wälamö klɩpaa,

‑maa yɩ ‑bhuë ‑sɩbhä 'mäna 'wʋ.

‑Amöö 'nuëë 'dɩ 'nyɛ nɩɩ,

wa nɩ 'wäla moni 'la.

‑Maa wa'bhï dlɩ glu wa ghlɛɛ,

'n wa yiɛ dɛ wa kää 'nyɛ,

wa 'plɩ ‑lɛ ‑gömö.

Na'bhë n 'yi ‑sɩbhä 'ylɩmö.

5 Sɛ n 'nuë a‑a ‑tɔnɩ,

‑sɩbhä wa 'zʋä.

Wanyɩ wa 'nyɛɛ tɛɛ ‑Alowli Zezwii yowʋ 'wë,

'n wa ‑yinyɩɛ wanyɩ yowʋ 'nyɛ sɛɛ Lagɔ 'yɩbhɩɛ.

6 Nza n 'nyɛɛ Tiitɩ 'dɩ nɩɩ,

ɔ nɩ yi ‑mä a mä'a 'bɩwʋ klɩpaa,

nzɩɩ moni a 'wluyɩbhalibo 'la ɔ tɛɛ a‑a ‑mä a jijo'wʋ,

‑a nʋä ngäzɩwa a za‑a,

ɔ 'kanyɩ kwänɩ a 'kʋ zɛmö bhɩɛ.

7 Abhʋa abhlɩ,

Lagɔ 'a 'Wugɔmʋʋ 'a 'nyupälɩɩ ‑wʋanyɩ tenyii ‑gömö.

A 'tɛɛnɩ Lagɔ dlɩ 'tɩɩ,

'ɔ wɛlɩɩ,

a nwi sasɛ 'mö,

a bhïli sasɛ,

‑lii 'wuë 'mö a dɔ'wʋ,

a ‑su tenyii ku 'mö,

‑wawʋʋ n 'zʋanyɩɛ dlɩ zɛmöö,

wʋ ‑zu.

Zaa,

monii a 'kää da'a 'nyɛ a dɔ'wʋ,

'a ngäzɩdlɩkäkʋʋ nɩ zumanɩɛ tenyii a 'kä sasɛ 'nyɛ.

8 Sɛ'ɛ n'n‑ä nɩɩ,

a kä a 'kä ‑sɩbhä 'zʋ klɩpaa nʋ.

‑Maa sɛɛ ‑muë'la ‑suä 'nyɛnyɛdɔ'wʋ ku 'möö,

‑sɩbhä a 'tɩtɩ n 'nyanyɩɛ,

yɩ 'kanyɩ'ɛ abhlɩ dlɩ glu ‑sɛmö,

nzɩɩ 'a ‑wawʋʋ ‑kä ‑tiamö a ‑lu glɩnɩɩ,

wʋ 'kä 'ylɩmö 'yoo.

9 A'bhï,

sɛɛ ‑Alowli Zezwii Kliisɩ 'pää a ngäzɩdlɩ,

a ‑yi ‑sɩbhä.

Mɔɔ ‑kälɩɛ ‑lii 'wuë,

‑maa yɩ 'wuë kɛ'mö ɔ ‑sɩɩɛ 'n ɔ yiɛ mä'ä dʋdʋ 'wʋ yi,

ɔ 'kä mä'ä 'pʋanyɔ a sɛ ‑wʋ,

nzɩɩ 'ɔ pʋa 'la a za,

'nyupälɩɩ a ‑bɛ 'kanyɩa 'wʋ ghlɛ.

10 Zaa,

'na sɛ n pää dlɩ ‑sɩbhä ma‑a nɩɩ:

Moni 'la,

a ‑kɛɛ 'wʋ 'päpänɩmöö,

yɩ nɛnɩ a dɔ'wʋ.

'Ylʋba ‑mä'la 'mö,

a nglu a‑a 'wʋ a 'kä moni 'la 'wʋ 'päpänɩ,

'n a yi a‑a ɛ 'wʋpäpänɛ tɛɛ.

11 Zaa,

sɛ a ‑su a‑a ku 'mö 'n a yi a‑a 'wʋ ngluu,

a nɩ ‑su ‑sɩbhä ku 'mö a 'kä ɛ 'wʋpäpänɛ zɛmö bhɩɛ.

Sɛ a kää,

‑sɩbhä a nɩ 'nyɛ bhʋlʋbhlʋ.

12 Ɛ'ɛ ‑bhö nyɩasɛ,

‑maa ‑n ‑kä 'nyɛɛ yi ‑n ‑kä ku 'mö ‑suu,

yɩ nɛnɩ Lagɔ dlɩ yɔwʋ.

‑Maa 'saa nɛnɔɔ dlɩ yɔwʋ a'bhëë,

miɛ nɩɩ,

‑n ‑kä ku 'mö ‑suu,

dɛ ‑n kää,

'nyɛ ‑lɛ.

13 N ‑kä a nɩ 'päpänɩ moni 'la 'wʋ nʋʋ,

ɛ'ɛ ‑bhö nɩɩ n 'kanyɩ kä'mö kplɛ n 'kä ‑mumuë kwänɩ a za,

‑maa ‑a 'wuë ‑a 'kä ‑lu ‑kä,

nza n gbää ‑sɩbhä.

14 ‑Sɩkaa a dɔ'wʋ abhʋaa kää ‑li a ‑bɛ zaa,

‑waaa ‑lu ‑kä,

a kä a 'kʋä 'wʋ yi.

‑Lɛ a dɔ'wʋ a 'nɩ'ɛ abhlɩ zɩla'a ‑lu ‑kä,

wa ‑kä ‑li a ‑bɛ ‑kää,

wa 'kanyɩ'ɛ wabhlɩ 'wʋ yi.

‑Sɩbhä ‑a 'kää 'zʋ,

nzɩɩ ‑a 'wuë,

‑a 'käa 'mö mlɩnɩ.

15 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

‑Ɔ 'libhïä ‑bɛ,

ɔ ‑nɩɩ 'nɩɛ 'wlu 'plɩ,

‑ɔ 'libhïä 'tikïyiee,

ɔ'ɔɔ ‑lu bɔ.^a

Moni a 'wluyɩbhalibhoo

16 N bhälɩ Lagɔ.

Mɔɔ kää 'nglɩ sɛɛ a gbʋ plɛnɩɩɛ tenyii,

'n wʋ plɛnɩmöä ‑sɩbhä ‑aa ‑daayu Tiitɩ.

17 N 'nyɔɔ 'dɩ nɩɩ,

n 'kɔ 'wʋ 'sɔ ‑mä 'a mä'a tienɩɩ,

ɔ'bhë ɔ ‑su a 'kɩ ku 'mö ɔ 'kä ‑mä mö a dɔ'wʋ zaa,

'wʋ ɔ ngluä cuu ɔ 'kä ‑mä mö.

18 ‑Aa ‑daayu ‑mɔmɔɔ 'mö n tiemanyɩ'ɛɛ 'wʋ ɔ ‑nyɛ Tiitɩ 'kä yɔwʋ mönɩ.

Nɩkpɛ 'la,

'ɔ sɛ ɔ nʋä Zezwii 'a 'Mänatɩtɩɩ a biabialibhoo a za,

Zezwii a ‑nʋa a ‑zɩkpöö 'wuë,

ɔ 'dɩ a ‑dɩ yɩ sɛɛ.

19 Wa'bhï mʋa ‑sɔɔɔ,

monii Zezwii a ‑nʋa 'yɩbhaa dlɩzɛmönanɩsɛ 'wluu,

‑a ‑nyɔɔ 'sɔ ‑a 'kä 'gämö mönɩ,

‑a 'kɛ ‑mä Zeluzalɛɛmö kwä.

‑A 'bhɩa Lagɔgänɩwaa ‑wa ‑wʋä ‑mä,

‑a 'kʋä 'wʋ yi,

Lagɔ a 'nglɩ 'kä 'ghlimanɩ.

20 Moni kɔkɔmlɛ 'la a dɔ'wʋ,

‑mumuë tɩa ‑aa 'nglɩ nyima zaa,

‑aa 'yize ‑abhʋa 'naa 'kä ɛ dlinɩdlinɩlibhoo nʋ.

21 Ɛ'ɛ ‑bhö nyɩasɛ,

‑maa ‑a 'kä ‑Alowli Lagɔ a 'yila 'klʋ 'mö zlɔnɩ a gbʋ a 'yize mʋʋ ‑nɩnyɩɛ plɛnɩ,

‑maa ‑a 'kä nɩkpa a 'yila 'klʋ 'mö zlɔnɩ a gbʋʋ,

wʋ plɛmönyɩ'ɛ.

22 Tiitɩ ‑nyɛ ‑aa ‑daayu ‑mɔ'la 'sɔ,

‑aa ‑daayu ‑mɔmɔɔ mö ‑a 'pʋä'ɛɛ 'bɩwʋ.

‑Aa ‑daayu 'la,

‑a kɔ ‑bɛ 'wʋ 'ylɩmö nɩɩ,

ku'mösusɛ ɔ nʋä Lagɔ 'a libhoo.

Ɔ ‑wʋä ‑sɩkaa dɛ'ɛ ‑mä 'a mä'a yi dɔ'wʋʋ,

ɔ kanyɩ dlɩ 'wʋ zaa,

ɔ ‑su ku 'mö tenyii a'bhë.

23 Na 'wʋ‑bhlinɩnyɔ Tiitɩ ɔbhlɩ,

'mö n ‑nyɛɛ nʋä Lagɔ 'a libhoo ‑mä a jijo'wʋ.

‑Muë'la 'sɔ ‑kpɔ wabhlɩ,

Zezwii a ‑nʋa a ‑zɩkpöö 'wuë mʋa ‑sʋää.

Nɩkpa a ‑muë 'ghlimanɩɛ Kliisɩ a 'nglɩ 'mö wa glɩnɩɛ.

24 Zaa,

sɛ a ‑waa a 'bhɩa Lagɔgänɩwaa,

a nɩ tulanuë ‑sɩbhä 'ylimö.

‑Lɛ a dɔ'wʋ Zezwii a ‑nʋa a ‑zɩkpö 'wuë yi sɛ yɩbhlɩmanɩ nɩɩ,

'a 'dɩ a ‑dɩɩ ‑a ‑sɛnuë a‑a,

ɛ'ɛ ‑bhö yiodɩ.