2 Kolɛɛtɩ a ‑nʋa 7

Na dlɩsɛkäwanyɩ,

wɛlɩ 'la 'wuë,

‑aa ‑liɛ.

‑Sɩbhä a za,

‑a'a nʋnʋlii 'wuë ‑nyɛ ‑a'a dlɩpäsaa 'wuë 'sɔ ‑yɩ pälanyɩɛ fɩ Lagɔ a 'yila 'klʋ a dɔ'wʋʋ,

a‑a nɩ ‑sɩɩ kɛ'mö.

A‑a nɩ kä 'kwädlɩ Lagɔ a nganɔ ku 'mö.

A‑a nɩ 'tɛmanɩ 'yli yɔwʋ,

‑a'a nɛmönɛmösaa 'wuë 'mö,

‑a 'kä Lagɔ a 'yize a ‑nʋä a sɛ ‑wʋ.

'Mäna yɛ Pɔɔlʋ 'lɩbhä

2 ‑Atʋayuënyɩ,

a nɩ ‑tɩnyɩ 'a dilaa 'bɩwʋ ‑sɛ.

‑A ‑wʋ a‑a ‑mä 'a mä'aa,

‑aaa nɩkpɛ ‑bi 'wʋ plɛ,

‑aaa nɩkpɛ swɩ yɔwʋ 'kuanɩ,

‑aaa nɩkpɛ kä'mö kplɛ.

3 'Naa 'kanyɩ ‑sɩbhä a za 'lʋnɩ.

Sɛ'ɛ n gbä a‑a nɩɩ,

dlɩ 'wʋ a ‑glaa tenyii.

Zaa,

‑a yi 'ku oo,

‑a yi ‑bhölɩ oo,

'nyu 'naa ‑kanyɩ 'kwädlɩ jijo'wʋ 'plɩnɩ.

4 N 'tɛɛnanyɩ dlɩ tenyii.

‑Mä ‑a'a 'klɩyɩyɛɛ 'wuë 'mö,

‑a kä 'kwädlɩ swɩ nyɛmʋ 'mö,

'mäna lɩbhanyɩ 'kwädlɩ tenyii.

5 Sɛ ‑a 'maa 'kä a mä'ä Masedʋanɩ‑bhölɩɩ 'mö ghlɛɛ,

‑aaa ‑bhlɛ 'tikïyie 'wʋ nyɛpɛ.

Saa 'wuë,

yɔlɔylʋ ‑a ‑nyɛɛ gbanɩɛ wʋ.

‑A'a ‑gblɩwaa zumanɩ tenyii,

'n ‑mä ‑aa dila zɛmö,

nganɔ a ‑bɛ ‑wʋ'ɛ mä.

6 ‑Maa nɩkpa a swɩnyɛmʋ'möpänyɔ Lagɔ,

‑mä Tiitɩ 'a yiye 'mö,

mɔɔ paanyɩɛ swɩ nyɛmʋ.

7 'Ɔ yiyee a 'yize mɛɛ ‑nɩnyɩɛ swɩ nyɛmʋ 'mö 'pä.

‑Maa ɔ möä ‑mä 'a mä'a,

a'bhï sɛɛ 'a 'zʋzʋsaa 'pɔɔ swɩ nyɛmʋ 'möö,

‑sɩbhä a 'tɩtɩ ɔ nyɩanyɩɛ,

mɩɩ pälanyɩɛ 'mäna 'mö.

Ɔ lɛ naa:

Na 'tʋ lɩbhanyɩ tenyii.

A yɛ ligba zaa 'a dilaa ‑gbapö,

'n a ‑wʋʋa'a ‑sɩkaa nimï.

Tɩtɩ 'la 'wuë a za 'mäna lɩbhanyɩɛ tenyii.

8‑9 'Bɔgʋʋ n 'cɛlanyɩ a‑a 'wʋʋ,

n 'nʋä nɩɩ,

wʋ 'mö a wɛlɩɩ dlɩ 'yli yɩ sianyɩɛ,

na'bhë dlɩ yɩ ‑gbapïaaa.

‑Maa ‑sɩkaa a dɔ'wʋ,

yɩ ‑nɩɩa'a dlɩ ‑gbapïa,

‑maa 'mänaa ‑wʋʋa'aa 'lɩbhä dɔ'wʋ.

Sɛɛ 'bɔgʋ 'la 'mö a wɛlɩɩ sianyɩ a‑a dlɩ 'ylii,

‑sɩbhä ma‑a ‑nɩɩɛ 'mäna 'wʋ ‑bhö.

‑Maa ‑sɛɛ ‑lɛ a wɛlɩ 'la ligbanyɩɛ 'n yɩ yeanyɩɛ 'mö zlɔmanɩɩ,

‑sɩbhä a za 'mäna lɩbhaaa tenyii.

‑Maa sɛ wʋ sianyɩ a‑a da'a 'ylɩya 'mö dlɩ 'ylii,

Lagɔ a'bhë mɔɔ 'yɩbhɩɛ ‑sɩbhä zaa,

a ‑li a ‑li wʋ 'wälanɩɛ 'yli.

10 Dlɩ'ylisise Lagɔ a'bhë lɛnɩɛ nɩkpɛ 'wʋʋ,

mɛɛ kää 'nglɩ 'n nɩkpɛ yɩbhlɩnɩɛ 'ɔ ‑lizokuu,

'n ɔ sɩɛ kɛ'mö 'n ɔ ghlɩɛ Lagɔ 'a 'pʋpʋɛ.

Zaa,

ɛ'ɛɛ 'zokwë glɩnɩ.

‑Maa mä'ä 'pɩwʋ a dlɩ'ylisise,

nɩkpa ɛ kwää 'kwie 'mö.

11 A yɩɛ,

'a dlɩ'ylisise 'la,

'mö Lagɔ ghlɛnɩɛ 'mö 'n ɔ yiɛ ‑mä a dila zɛmö 'ɔ libhoo nʋ.

Mʋʋ kää 'nglɩ 'n a yiɛ ligba a 'kä wɛlɩ 'la ku'mösusɛ 'mö plɛ,

'n a ‑yiiɛ yɔwʋ bhibhee.

Wɛlɩɩ ‑yɩ 'plɩ a‑a,

a'bhï a 'niɛ ‑wa 'lɩlɩlɩ,

yɩ ‑bhöanyɩ nganɔ 'wʋ a'bhë.

Na 'tʋ lɩbhanyɩɛ'ɛ tenyii.

A ku 'mö ‑su tenyii a 'kä ‑ɔ nyima a‑a da'a wɛlɩɩ 'mö zlɔmanɩ.

Sa'a ‑sɩbhä a ‑sɛɛ anyɩ gbʋ ‑gömö.

12 Zaa,

sɛ'ɛ n gbää nɩɩ,

'bɔgʋʋ n 'cɛlɩ a‑a,

‑ɔ nyima a‑a da'a wɛlɩɩ,

ɔ za n 'nuä 'cɛlɩ,

ɔ nʋä ‑lizoku 'wluu,

ɔ za n 'nuä'ɛ 'cɛlɩ.

‑Maa a'bhï,

Lagɔ a 'yila 'klʋ,

a 'kä 'ylimö tulanɩ nɩɩ,

a ‑wʋʋ nimï,

nza n 'celuä.

13 ‑Sɩbhä a 'zʋä zaa,

swɩ ‑kanyɩ nyɛmʋ 'mö 'pɔɔ.

Miɛ abhlɩ da'a,

‑maa Tiitɩ yiɛ,

'a 'zʋzʋsaa a za ɔ 'wuë 'mäna.

‑Sɩbhä a za 'mäna 'käda lɩbhämönyɩ'ɛɛ ‑abhlɩ tenyii.

14 Ɛ'ɛ ‑bhö nyɩasɛ,

‑maa ɔ 'kä a‑a ‑mä 'a mä'a möä yii,

n ‑sɛnɔ a a 'dɩ a dɩ.

Ɔ ghlɛɛ ‑mä,

sɛ n 'nyɔ a‑a a dɛ 'dɩɩ,

‑sɩbhä ɔ ghïlanyɩɛ ‑tiamö.

Zaa,

sɛ n kä a‑a 'kwädlɩ ‑mä a jijo'wʋ gbëaa a 'yize nglii,

‑sɩbhä n'n‑ä a dɛ Tiitɩ yiodɩ 'nyɛ.

15 Sɛ a kää Lagɔ a nganɔ ku 'mö 'n a yiɛ ɔ 'nglɩ 'mö Tiitɩ päla,

'n a yoo 'yukwli ‑pʋnɩ,

sɛ a zʋä 'na wɛlɩɩ 'klʋkpamöö,

'ɔ dlɩɩ bhlinɩ ‑lɛ.

‑Sɩbhä a za,

a ‑wawʋ ‑wʋ ‑wɔɔ a‑a 'kwädlɩ dlɩ zɛmöö,

'n wʋ yia'aa tenyii zumanɩ.

16 Na'bhë,

n ‑yi sɛ nɩɩ,

‑lii 'wuë 'mö a dɔ'wʋ n yeanyɩ dlɩ 'wʋ ‑kä.

‑Sɩbhä a za,

'mäna lɩbhaaa tenyii.