6
Lagɔ mɔɔ ‑wʋnyɩɛ ‑gömö,
a‑a nʋä 'ɔ libhoo.
Zaa,
‑bɛlɩ ‑a panyɩɛ dɛ'ɛ nɩɩ:
Lagɔ 'a ngäzɩdlɩkäkʋʋ,
a nɩ tu 'fʋ a ‑lu 'mö 'wʋ 'libhï.
2 Lagɔ lɛ naa:
'Tɛnyɩ a ‑tɛnyɩ 'mö,
n ‑pʋnɩ ‑na'a bhibhewɛlɩ 'yukwli.
Puëpuëzlɩɩ 'mö 'n n ‑yimöä 'wʋ yi.a
A ‑pʋnɩ 'yukwli,
n nɛ naa:
‑Sɩkaa a 'tɛnyɩ ‑a ‑wʋä dɛ'ɛ 'möö,
mɛɛ glɩnɩɛ 'tɛnyɩ a 'tɛnyɩɩ mɛ,
mɛɛ glɩnɩɛ Lagɔ 'a puëpuëzlɩɩ.
Lagɔ a libhonʋwa ‑a glɩnɩɛ
3 ‑Abhʋa Zezwii 'a tietiewaa,
‑aaa 'yɩbhä nɩɩ libhoo ‑a nʋä,
wa nɩ bhïla wʋ dɛ wɛlɩzoku.
Zaa,
dɛ ‑a ‑kä mö ‑kë,
‑aa nʋ ‑li ‑mii 'kää 'nglɩ ‑kä 'n nɩkpa 'kää Lagɔ ‑gömö panɩ.
4 ‑A yɩbhä nɩɩ,
‑a'a nɛmönɛmösaa 'wuë nɩ tulanɩ 'ylimö nɩɩ,
Lagɔ a libhonʋwaa ‑a glɩnɩɛ.
‑Sɩbhä a za,
klɩɩ 'wuë ‑ɛ ghölɩnyɩɛ 'mö,
dlɩ 'mö ‑a ‑kpaanɩɛ 'yize.
A‑a 'nɩa'a sɛ ‑a 'kä zʋ a'bhë ‑yi,
‑a'a dilaa yi 'yli klɛ dɔ'wʋ ‑wʋ ‑kë,
swɩ 'nɩ 'kunɩnyɩ yɔwʋ.
5 Wa lɩbhanyɩ,
wa paanyɩ ‑jie 'mö,
wa sɛ ‑aa za nɩkpa dila glu wa ‑kanyɩ tʋ kwä,
‑maa ‑li 'la 'wuë yɩ ‑nɩnyɩɛ swɩ yɔwʋ 'kuanɩ.
Lagɔ 'a libhoo a za,
‑a ylɔ tenyii,
zila ‑mimii 'mö ‑aa ngämö,
‑aa li ‑lu.
6 ‑A'a sɛ a nɛmöä Lagɔsɛ,
sɛɛ Lagɔ kälɩnɩnyɩɛ 'kwädlɩ 'ɔ wɛlɩɩ kɛ 'klʋ,
sɛ ‑a ‑kpaanɩɛ nɩkpaa 'wuë ‑gömö dlɩ 'mö,
sɛ ‑a nɛnɩɛ dlɩ zɛmö,
sɛɛ 'Wugɔmʋʋ 'Wlɩlɩ ‑sunyɩɛ,
sɛ ‑a kää ‑tiasɛ ‑wawʋ dlɩ zɛmö,
7 sɛ ‑a bhïlaa 'ɔ ‑tiamö a wɛlɩɩ,
sɛɛ 'ɔ 'mötɛɛnɔɔ ‑wʋnyɩ ‑gömöö,
‑li 'la 'wuë mɩɩ tulanɩɛ 'ylimö nɩɩ,
ɔ libhonʋwaa ‑a glɩnɩɛ ‑tiamö.
‑A'a nʋnʋlii sɛ yɩ zlɔnɩɛ 'kwädlɩ 'möö,
‑sɩbhä ma‑a gbaa ‑a'a ‑gblɩwaa nuë 'wʋ 'n ‑sɩbhä ma‑a ‑kʋnyɩɛ'ɛɛ 'wʋ.
8 ‑Mumuë zʋʋnyɩ,
‑mumuë fälanɩnyɩ 'ylimö.
‑Mumuë sɛ ‑aa 'dɩ a dɩ,
‑mumuë sɛ ‑aa 'dɩzoku.
Wa ‑yinyɩ ylʋwa la ‑kë,
gbëaa 'mö ‑a ‑wʋä.
9 ‑Mumuë a dɔ'wʋ ‑aaa ‑yio,
‑maa ‑a ‑yio.
‑Mä 'kwie 'mö ‑mä ‑a ‑wʋä 'kwädlɩ,
‑maa ‑a ‑bhölɩ.
Wa 'yɩanyɩ 'klɩ,
‑maa ‑aa 'ku.
10 Wa kälanyɩ dlɩ 'yli,
‑maa ‑a ‑wʋ 'mäna 'mö 'yize.
‑A glɩnɩ 'pʋäwa,
a‑a 'zʋaa nɩkpa a ‑bɛ lɩkäwa 'wʋ.
‑Aaa ‑lu ‑kä,
‑maa ‑a kä ‑lii 'wuë.
11 ‑Aa dlɩsɛkäwanyɩ,
abhʋaa ‑wʋä ‑mä Kolɛɛtɩ,
‑a 'nanyɩɛ wɛlɩ 'yli zizanɩ 'lɩlɩlɩ,
‑maa ‑a'a dilaa 'wuë,
mö ‑a kälɩnaanyɩɛ kɛ 'klʋ.
12 ‑Abhʋa ‑abhlɩ,
dlɩ 'wʋ a ‑glanyɩɛ ‑tiasɛ,
‑maa abhʋa ‑aaa dlɩ 'wʋ ‑glɛ.
13 Zaa,
sɛɛ nɩkpɛ zʋ'ɛ ɔnyɩ a 'yuë 'dɩ 'möö,
‑sɩbhä n zʋanyɩɛ dɛ'ɛ 'dɩ 'mö nɩɩ:
A dɔ'wʋ,
sɛ n kälɩɛ 'na dlɩɩ 'wuë 'klʋʋ,
a nɩ 'zʋmö ‑sɩbhä.
A nɩ 'nɛmanɩ nɩkpaa ‑waaa Lagɔ ‑gänɩ 'wʋ
14 ‑Atʋayuënyɩ,
nɩkpaa ‑waaa Lagɔ ‑gänɩ,
‑wa nʋä ‑li a ‑mii 'nanyɩɛ 'wʋ ‑ngwaa,
a ‑nyʋä nɩ tɩ bhʋ ‑bhʋlʋ yɩ.
A'bhï a ‑yi sɛ nɩɩ,
sɛɛ ‑gägäzlɩ ‑nyɛ guylukwë 'nɩ mönɩ'ɛ yɔwʋʋ,
‑sɩbhä 'mözlɔnɩli ‑nyɛ ‑lizoku 'nɩ mönɩɛ yɔwʋ.
15 Zezwii Kliisɩ ‑nyɛ Sataa 'sɔ wa'aa 'ki 'wʋ ‑gbɔ.
Zaa,
‑ɔ ‑gänɩɛ Lagɔ ɔ'ɔɔ ‑kä ɔ ‑nyɛ ‑ɔɔɔ Lagɔ ‑gänɩ 'kä bhʋ ‑bhʋlʋ yɩ.
16 Lagɔ 'a ‑buduu ‑nyɛ 'fʋ a ‑lagwɩɩ 'sɔ,
yɩ'ɩɛ 'ki 'wʋ ‑gbɔ.
N ‑kä Lagɔ ‑ɔ ‑bhölɩ 'a ‑buduu nʋʋ,
‑abhʋa ɔ ‑nʋa ‑abhʋa n gaaa.
Lagɔ a'bhë sɛ'ɛ ɔ gbää ‑mä 'ɔ 'bɔgʋʋ 'mö nɩɩ:
‑Amö Lagɔ,
‑mä wa jijo'wʋ,
‑mä n 'kää glɩ n ‑nyʋä 'kä 'wʋ‑bhlinɩ.
Na ‑nʋä wa 'kää glɩnɩ,
na 'yize,
‑amö wa 'kää wa ‑Lowli la.
17 Zaa,
‑lizokunʋwaa,
a nɩ 'bhöö ‑mä wa jijo'wʋ.
A ‑nyʋä nɩ tɩ bhʋ ‑bhʋlʋ yɩ.
‑Lizokuu 'wuë a nɩ ‑sɩɩ kɛ'mö.
‑Lɛ a dɔ'wʋ n yeanyɩ kɛ tula.
18 N yi a dɩba glɩnɩ,
a yi na nyɩbhɛlʋyuë glɩnɩ,
a yi na nglʋyuë glɩnɩ.
‑Amö Lagɔ,
'mötɛɛnɔ 'wuë 'bhöönɩɛ 'möö,
‑amöö gbää ‑sɩbhä. b