5
‑A ‑yi sɛ nɩɩ,
‑a'a kpökpaa ‑a ‑suä mä'ä dʋdʋ 'wʋ,
‑a 'kä ‑bhɩɛɛ ‑gligbëë,
a ‑kä 'yli bhɩɛ 'wëë,
‑budu a ‑budu nɩkpɛ 'nɩɛ 'sɩbhä ‑maa Lagɔ gïganɩɛ 'wlu,
‑wʋ 'naa 'kää 'kwädlɩ wɔlɔɔ,
wʋ ‑kʋnɩnyɩ ‑mä ɔ yɔwʋ.
2 ‑A'a kpökpaa ‑a ‑suä ‑bhlɛ dɛ'ɛ mä'ä dʋdʋ 'wʋʋ,
klɩ ‑a 'yɩnaa 'mö zaa,
wi ‑a wiɛ.
‑Sɩbhä a za ‑a'a ghäyɩ 'wʋ a ‑buduu a tʋ lɩbhanyɩɛ tenyii,
‑a 'yɩbhä ‑a 'kʋ 'mö ‑bhölɩnɩ.
3 N ‑a 'nɩa'a ‑mä ‑a'a kpökpalele 'la 'mö plɛɛ,
ɛ 'kä ‑bhɩɛ wlu ‑a dɩ‑ɩ.
4 ‑A'a kpökpaa ‑a ‑suä dɛ'ɛɛ,
klɩ ‑a 'yɩnaa ‑tiamö 'mö,
‑sɩbhä a za 'lilelea a 'tʋ lɩbhanyɩɛ.
Miɛ abhlɩ ‑maa,
‑a 'kä 'ku ‑a tɩa kpökpa 'mö ‑wʋ,
mö ‑a 'nɩɛ 'yɩbhä,
‑maa ‑a yɩbhää nɩɩ,
‑a'a kpökpaa ‑a glɩnɩɛ 'ylibhɩɛla ‑a ‑suä dɛ'ɛɛ,
a nɩ zigbonɩ 'mö a 'kä 'lilelea ‑a 'naa 'kää 'kwädlɩ 'yli bhɩɛ 'mö yinɩ.
5 Lagɔ a'bhë mɔɔ 'yɩbhää yɩ nɩ 'wlʋnɩ ‑sɩbhä ‑aa dɛ 'ylii,
ɔ zʋʋnyɩɛ 'ɔ 'Wugɔmʋʋ ‑gömöö,
‑li a ‑lii ɔ ‑kanyɩɛ zɩla'a 'nyɛɛ,
'mö ɔ 'fɩɛɛ ‑bhlɛ da'a 'mö.
6 Nza ‑a kää 'kwädlɩ tenyii swɩ nyɛmʋ 'mö 'yize.
‑Tiamö abhlɩ,
‑a ‑yi sɛ nɩɩ,
mä'ä dʋdʋ 'wʋ a kpökpaa,
‑a ‑kaa ‑bhlɛ ‑suu,
‑aaa ‑bhlɛ ‑mä Lagɔ yɔwʋ ghlɛ.
7 Ɛ'ɛ ‑bhö nyɩasɛ,
‑maa Lagɔ,
‑a 'nɔ 'wʋ yɩlɩ ‑kë,
‑a 'tɛɛnɔɔ dlɩ,
8 nza swɩ 'nɩ 'kunɩnyɩɛ yɔwʋ.
‑Tiamö abhlɩ,
‑a yɩbhä tenyii nɩɩ,
‑a'a kpökpaa ‑a ‑suä dɛ'ɛɛ,
‑a 'ka 'mö 'wlʋ nzɩɩ ‑a 'kä ‑mä ‑Alowli yɔwʋ glɩɛ mö.
9 ‑Maa ‑a yi ‑bhlɛ mä'ä ‑wʋ oo,
‑a yi ‑mä Lagɔ yɔwʋ mö oo,
‑yɩ ‑kanyɩɛ dɛsɛ miɛ nɩɩ,
‑a'a nɛmönɛmösaa nɩ nɛnɩ 'kwädlɩ Lagɔ dlɩ yɔwʋ.
10 Ɛ'ɛ ‑bhö nyɩasɛ,
‑maa ‑zlɩ Kliisɩ ‑kä nɩkpaa 'wuë ‑zijli tuë yii,
‑a 'wuë,
‑a'a zɩkpaa ‑lɛ ɔ 'yila 'klʋ ‑lɛ a 'kää gbëdanguu bhli.
‑A'a nʋnʋlii,
yɩ ‑kä nɛnɩ oo,
yɩ 'nɩ nɛnɩ oo,
ɔ ‑kanyɩ bhʋlʋbhlʋ yɩ 'pɛnaa 'nyɛ.
Zezwii Kliisɩ a bɔɔmö a za ‑a ‑nyɛ Lagɔ yɛ wamanɩ
11 ‑Sɩbhä a za,
‑a ‑kä 'kwädlɩ nɩkpa 'mö 'nʋa dɔ'wʋ ‑wʋʋ,
Lagɔ a nganɔ ‑wʋnyɩɛ ku 'mö 'yize.
‑A'a nʋnʋlii 'wuë yɩ'ɩɛ Lagɔ 'yli zizaanɩ.
Ɔ ‑yinyɩ 'tɩɩ.
N kɩ'ɛ dlɩ 'wʋ nɩɩ,
a'bhï ‑mä 'a dilaa zɛmö,
a ‑yimöö.
12 ‑A 'kä ‑anyɩ a 'dɩ a dɩ ‑sɛ a ‑kanyɩ 'zʋ a za,
nza ‑aaa sɛ'ɛ bhïla,
‑maa sɛ ‑a nɛmöä Lagɔsɛ a 'kä ‑sɩbhä ‑yi 'yize,
nzɩɩ a gla'mö a nɩkpaa ‑wanyɩ dilaa 'nɩɛ Lagɔsɛ ‑wʋ,
‑wa tɛkpɔnɩɛ 'fʋ a ‑li 'möö,
wa ‑kaanyɩ ‑a'a wɛlɩ 'wʋ 'yɩbhänɩɩ,
a'bhï a 'käa wa 'yila 'klʋ ‑aa 'dɩ a dɩ ‑sɛ,
nza ‑a bhïlaa ‑sɩbhä.
13 'N nɩkpa ‑kanyɩ ‑ɔɔ'nɛɛnɩwa 'mö 'wʋ 'libhïï,
Lagɔ a za‑a.
'N wa ‑nɩnyɩ ‑sɩbhä 'wʋ 'libhïï,
a ‑li a ‑liɛ.
14 Kliisɩ 'a ‑wawʋʋ muu ‑sunyɩɛ ‑mä ‑a'a nʋnʋlii 'wuë 'mö.
Ɛ'ɛ ‑bhö nyɩasɛ,
‑maa ‑a ‑yi sɛ nɩɩ,
ɔ 'yize ‑kpöö,
mɔɔ 'wlʋä ɔnyɩ 'mö 'n ɔ yiɛ ‑a 'wuë a 'wlumö 'ku.
Zaa,
‑a 'wuë,
nɩkpa a ‑muë ‑nyɔɔ yɛ 'gämö 'kunɩ a sɛ ‑a ‑bhölɩɛ.
15 Sɛ'ɛ n gbää nɩɩ,
‑a 'wuë a 'wlumö ɔ 'kuä,
nzɩɩ ‑a ‑käa'a ‑sɩkaa ‑bhölɩɩ,
‑anyɩ a gbʋ ‑tɩnyɩa plɛnɩ,
‑maa mɔɔ 'kuä ‑aa 'wlumö 'n ɔ yiɛ glu 'wlʋ zaa,
‑a 'kä ɔ 'yize a za ‑bhölɩ.
16 ‑Sɩbhä a za ‑aa 'libhïa'a nɩkpɛ kpökpasɛ 'wʋ.
Bhla'mö a dɔ'wʋ,
a‑a ‑kä a Kliisɩ kpökpasɛ 'wʋ 'libhïï,
‑sɩkaa a dɔ'wʋ,
‑a 'nɔɔa'a kpökpasɛ 'wʋ 'libhï.
17 'Lɩlɩlɩ a dɔ'wʋ nɩkpɛ ‑kä Zezwii Kliisɩ a ‑nɔ glɩnɩɩ,
Lagɔ kɔ 'wʋ 'sɔ nʋnɩ.
Bhla'mö a ‑lii 'wuë yɩ yɛ 'plɩ,
ɔ 'wuë 'lilolo ɔ glɩnɩa'aa.
18 Lagɔ a'bhë,
ɔnyɩgäsɛ mɔɔ 'wälanɩɛ ‑li 'la 'wuë 'yli,
mɔɔ wamanɩnyɩɛ ɔnyɩ Zezwii Kliisɩ a bɔɔmö a za.
Mɔɔ tieanyɩɛ,
‑a 'kä nɩkpaa 'wuë 'ɔ wamanɩwamanɛ a wɛlɩɩ 'nyɛ.
19 Wɛlɩ 'la,
sɛ'ɛ yɩ nʋä nɩɩ,
Lagɔ a'bhë,
Zezwii Kliisɩ a bɔɔmö a za,
mɔɔ wamanɩnyɩɛ ɔnyɩ.
'N ɔ yiɛ 'bhlɩbhëa 'wuë a 'nyinylolii a gbʋʋ 'yi 'tatinɩ.
'N ɔ ‑yinyɩɛ tie,
‑a 'kä wamanɩwamanɛ 'la a wɛlɩɩ bia.
20 Zaa,
Zezwii Kliisɩ a tietiewa ‑a glɩnɩɛ,
a‑a nyɛɛ ɔ 'wlumö nɩkpa 'wuë 'dɩ nɩɩ:
«Zezwii a 'nglɩ 'mö,
‑a bhianyɩ,
a nɩ nglu 'wʋ a ‑nyɛ Lagɔ 'kä wamanɩ.»
‑A ‑kʋä ‑sɩbhä 'dɩ 'nyɛɛ,
Lagɔ a'bhë mɔɔ wäzuëë da'a.
21 Sɛ'ɛ n gbää nɩɩ,
Zezwii Kliisɩ,
‑ɔɔɔ ‑bhlɛ tɛkäsɛ 'nyinyloli a 'ke ‑bhlʋ a'bhë nʋʋ,
'mö Lagɔ 'zʋä ‑a 'wuë a 'nyinylolii a gbʋʋ ‑gömö 'n ɔ yiɛ ‑aa 'wlumö 'ku,
nzɩɩ ‑a 'käa ɔ bɔɔmö a za Lagɔ a 'yila 'klʋ a dɔ'wʋ ‑kpöö 'wʋ ‑wʋ.