2 Kolɛɛtɩ a ‑nʋa 4

Zezwii 'a nglɩɩ mö ‑a biaa

Lagɔ,

'ɔ ngäzɩdlɩ a za,

mɔɔ 'zʋanyɩɛ Zezwii 'a 'Mänatɩtɩɩ a biabiawa 'wʋ.

Zaa,

libho 'la,

a ‑kʋʋ nʋ dɔ'wʋ ‑wʋ,

swɩ 'nɩ 'kunɩnyɩ yɔwʋ.

2 Zʋ'wʋbhölii 'wuë nɩkpa nʋä 'wi 'möö,

‑a kɩ kɛ'mö ‑sɛ.

‑A ‑kä Lagɔ 'a ‑tiamö a wɛlɩɩ bia dɔ'wʋ ‑wʋʋ,

‑aaa nɩkpa ylʋ nʋ,

‑a 'niɛ 'mö cɩcɛ,

‑maa sɛ yɩ ‑wʋä 'tɩɩ,

Lagɔ a 'yila 'klʋ,

‑sɩbhä ‑a nyɩɛ gbëaa nɩkpa.

‑Wa yɩliɛ sasɛ 'möö,

mʋa yɩbhlɩmanɩɛ sɛ nɩɩ,

‑tiamö 'ɔ wɛlɩɩ mö ‑a nyɛɛ nɩkpa.

3 ‑Maa 'Mänatɩtɩ 'la ‑a biaa,

nɩkpa ‑waaa 'yɩbhä wa 'kɩ 'wʋ nglu,

‑wa 'kää ‑sɩbhä a za 'yli bhɩɛɛ,

wa 'yize mʋa nʋä nɩɩ,

yɩ'ɩɛ gbëaa 'mö ‑kä.

4 Nyɩasɛ wa'aa wɛlɩ 'la nimï ‑sɛ,

‑maa Sataa,

‑ɔ 'kämanɩɛ mä'ä 'pɩwʋ a 'yize a ‑nʋa ‑gömöö,

mɔɔ ‑gbaa 'wa dilaa 'klʋ,

nza wa zʋä ‑sɩbhä.

'Mänatɩtɩ 'la mɩɩ nglaa ‑tiamö nɩkpɛ 'wʋ.

Kliisɩ,

sɛɛ Lagɔ ‑wʋä 'tɩɩ ‑ɔ ‑wʋä ‑sɩbhää,

'ɔ 'ghïlinɔɔ 'mö yɩ 'wälanɩɛ 'yli.

5 Sɛ'ɛ n gbää nɩɩ,

‑a'a nglɩɩ,

mö ‑a 'nɩɛ bia,

‑maa Zezwii Kliisɩ,

'ɔ nglɩɩ,

mö ‑a biaa nɩɩ mɔɔ glɩnɩɛ 'bhlɩbhëa 'wuë a ‑lowli.

‑Maa ‑abhʋa ‑abhlɩ,

ɔ za,

a 'yliwʋwaa ‑a glɩnɩɛ cuu.

6 ‑Mä yɩ 'mö,

Lagɔ ‑ɔ nʋ a‑a nɩɩ:

Lɩlɛ nɩ ngäla ‑mä guylukwëa 'mö 'wʋʋ,^a

ɔ ‑bhʋlʋ ‑kpɔ 'la,

mɔɔ zʋʋnyɩɛ 'ɔ lɩlɛɛ dlɩ zɛmö,

miɛ nɩɩ,

‑a'a dilaa 'mö ɔ ngälaa 'wʋ,

a‑a yiɛ ‑mä Zezwii Kliisɩ 'mö,

'ɔ 'ghïlinɔɔ yɩbhlɩnɩ.

Pɔɔlʋ ‑nyɛ 'ɔ ‑gänɩwaa 'sɔ a yɔlɔylʋʋ

7 ‑Maa ‑abhʋaa biaa 'ɔ wɛlɩ a ‑wɛlɩ 'laa,

'fʋ a ‑lakï a ‑mii kää dɛsɛkäli 'möö,

yɩ sɛ ‑a ‑wʋä.

‑Anyɩgäsɛ ‑abhʋaa 'nɩɛ 'mö 'tɛɛ.

Nyɩasɛ yɩ'ɩɛ ‑sɩbhä ‑wʋ,

‑maa Lagɔ 'a libhoo a 'mötɛɛnɔɔ ‑wʋʋä yɛkanɩyi ‑kä,

nɩkpaa 'wuë 'käa sɛ yɩbhlɩmanɩ nɩɩ,

‑abhʋa wʋ'ʋä 'mö 'bhöönɩ,

‑maa Lagɔ a'bhë 'mö wʋ 'bhöönɩɛ 'mö,

nza yɩ ‑wʋä ‑sɩbhä.

8 ‑Sɩbhä a za,

klɩɩ a kii 'wuë,

mö ‑a yɩɛ 'kwädlɩ,

‑maa ‑sɩbhä yɩ ‑wʋ 'mö,

nyɛmʋ 'nɩ luunyɩ 'wʋ.

Dlɩpäpʋ a ‑bɛ ghölɩnyɩ,

‑aa sɛ ‑a 'kä zʋä ‑yi,

‑maa swɩ 'nɩ 'kunɩnyɩ yɔwʋ.

9 Wa zianyɩ 'zwɩ,

‑maa Lagɔ ‑wʋnyɩ 'kwädlɩ nimï.

Wa paanyɩ 'kwie 'yli a'bhë,

‑maa Lagɔ ‑sanyɩ 'kwädlɩ ‑mä.

10 Sɛ wa zia a‑a Zezwii 'zwɩ ‑këë 'n wa yo a‑a glu kwää,

‑sɩbhä wa 'zʋmönyɩɛ zilaa 'wuë 'mö.

Nyɩasɛ yɩ'ɩɛ ‑sɩbhä ‑wʋ,

‑maa Lagɔ ‑sɛɛ Zezwii glu a zɩkpalelea ɔ 'nyɔɔ,

a 'käa ‑mä ‑aa 'mö 'ylɩmö 'yoonɩ,

nza yɩ ‑wʋä ‑sɩbhä.

11 ‑Tiamö,

Zezwii a za,

‑mä 'kwie 'mö ‑mä ‑a ‑wʋä 'kwädlɩ,

nzɩɩ ‑a'a kpökpaa ‑a glɩnɩɛ 'ylibhɩɛlaa,

Zezwii 'a ‑bhölɩbhölɛɛ 'kä ‑mä a 'mö 'ylɩmö 'yoonɩ.

12 Nza n gbää nɩɩ,

‑sɩkaa a dɔ'wʋ,

‑abhʋa 'ɔ tietiewaa,

‑a ‑kä 'kwädlɩ ‑mä 'kwie 'mö ‑wʋʋ,

‑sɩbhä ma‑a 'kää 'nglɩ ‑kä,

nzɩɩ abhʋa abhlɩ a 'kä 'pɩwʋ mää 'naa 'kää 'yli bhɩɛ ghlɩ.

13 Lagɔbɔgʋʋ 'mö a wɛlɩkïbhë ‑bhlʋ,

sɛ'ɛ a nʋä nɩɩ:

Dlɩ n 'tɛɛnɩɛ Lagɔ,

nza n bhïlaa ɔ dɛ.^b

Dlɩtɛɛnɩtɛnɛ 'la ‑bhʋlʋ ‑kpɔ mɛɛ ‑sunyɩɛ nza swɩ 'nɩ 'kunɩnyɩɛ 'ɔ wɛlɩɩ a biabiadɔ'wʋ yɔwʋ.

14 ‑A kɩ dlɩ 'wʋ nɩɩ,

Lagɔ ‑ɔ gälaa Zezwii 'n ɔ yoo glu ‑sɛɛ,

sɛ ɔ ‑sɔɔɔ glu,

ɔ ‑yinyɩ 'ylɩ ‑bhlʋ 'mö ‑sɩbhä glu ‑sɛmö,

nzɩɩ ‑a ‑nyɛ abhʋa 'sɔ,

ɔ ‑kanyɩ ‑lɛ ɔnyɩ yɔwʋ ‑lɛ.

15 Klɩɩ 'wuë ‑a yɩɛ,

a za ‑a yee.

‑A'a sɛ ‑a yɩbhää,

‑sɩbhä ma‑a nɩɩ,

Sɛɛ Lagɔ pää nɩkpɛ a ngäzɩdlɩɩ,

saa 'wuë a nɩkpa wa nɩ yɩbhlɩnɩ ‑sɩbhä,

nzɩɩ nɩkpa a ‑bɛ 'kä Lagɔ bhälɩ ɔ 'nglɩ 'kä 'ghlimanɩ.

‑Aa dila 'tɛɛ 'kwädlɩ 'wʋ

16 ‑Sɩbhä a za,

swɩ 'nɩ 'kunɩnyɩɛ 'kwädlɩ yɔwʋ.

‑A'a kpökpaa 'yila yɩlɩɛ dɛ'ɛ ‑wʋ,

a ‑wʋ abhlɩ 'yli bhɩɛ dɔ'wʋ 'yize,

‑maa ‑lii Lagɔ zʋʋnyɩɛ dlɩ zɛmöö,

mɩɩ 'naa 'kää 'kwädlɩ 'yli bhɩɛ.

Yɩ za,

sɛɛ zila zɩɛ,

‑sɩbhä ‑a 'pɔɔ swɩ nyɛmʋ 'mö 'yize.

17 Zwɩɩ ‑a ‑wʋä mä'ä 'pɩwʋ zi dɔ'wʋʋ,

'plɩplɩleyi ɛ glɩnɩɛ.

‑Li a ‑lii ɛ ‑glɛɛ gwë ‑a 'kää zɩla'a ghlɩɩ,

nɛnɩ yɩ nɛnɩɛ tenyii,

yɩ'ɩɛ ‑sɩbhä a sɛ ‑wʋ,

mɩɩ 'naa 'kää 'kwädlɩ 'plɩ.

Yɩ dɔ'wʋ zwɩɩ a'bhë ‑a ziɛ dɛ'ɛɛ,

ɛ'ɛɛ ‑lu glɩnɩ.

18 Mä'ä 'pɩwʋ a ‑lii 'wuë ‑a yɩlɩɛ dɛ'ɛ 'wʋʋ,

yɩ yia'a ‑pa 'plɩ.

‑Maa ‑mä Lagɔ yɔwʋ a ‑nɩɩ ‑aaa ‑bhlɛ 'wʋ yɩlɩɩ,

mɩɩ 'naa 'kää 'kwädlɩ 'plɩ.

Zaa,

‑lii ‑yɩ yiloo dɛ'ɛ 'wʋ mö ‑a 'nɩɛ dlɩ 'wʋ 'pä,

‑maa ‑mi ‑aaa ‑bhlɛ 'wʋ yɩlɩ mö ‑a pää 'wʋ dlɩ.