2 Kolɛɛtɩ a ‑nʋa 9

‑Atʋayuënyɩ,

‑a'bhɩa Lagɔgänɩwaa ‑wa ‑wʋä ‑mä Zeluzalɛɛmöö,

a 'kʋä 'wʋ yimö a dɔ'wʋ,

'naa 'kanyɩa'a ‑bɛ 'wʋ 'wʋ 'cɛlɩ.

2 N ‑yi sɛ nɩɩ,

a'bhï a ngulu 'wʋ a 'kä ‑sɩbhä 'zʋ.

‑Sɩbhä a za n ‑sɛnɩɛ mä'ä Masedʋanɩ a 'dɩ a dɩ nɩɩ:

«‑Aa ‑daayuë ‑wa ‑wʋä ‑mä Akayii‑bhölɩɩ 'möö,

wa yɛ a ‑pa wabhlɩ 'ylʋba ‑mä'la 'mö 'wʋ nglu wa 'kä wa 'bhɩa 'la 'wʋ yimö.»

'A sɛ a ‑suä da'a ku 'mö n 'nyʋää ‑sɩbhä 'dɩɩ,

‑sɩbhä ma‑a sɛɛ wa gla'mö a ‑nʋä a ‑bɛ dila glu,

wa 'kä ‑sɩbhä 'zʋmö.

3 ‑Sɩbhä a za n tieanyɩɛ ‑aa ‑daayuë 'la ta ‑kpɔ 'wʋ,

ɛ tɩ ‑bhɩɛa yiodɩ n yɛ a dɔ'wʋ ‑sɛ.

N yɩbhä a 'kä 'wlu ‑gïganɩ,

a 'kʋä ‑kʋnɩ.

4 N guä miɛ nɩɩ,

n ‑nyɛ mä'ä Masedʋanɩ a nɩkpa ‑mumuë 'sɔ,

‑a ‑kä ‑mä 'a mä'a yɔwʋ yinɩ,

'n ‑a ‑kä lɛ 'bhöö 'lɛ a 'nɩ 'wlu ‑gïganɩɩ,

'fʋ n kanyɩɛ da'a dlɩ 'tɛɛnɩ zaa,

zʋʋ ‑kaaa 'lɩbhä.

A'bhï,

zʋ yeanyɩ 'lɩbhämö.

5 ‑Sɩbhä a za n 'nyɛɛ ‑aa ‑daayuë 'la 'dɩ nɩɩ,

wa ‑kä 'yuku 'plɩɩ,

yɩ nɛnɩ.

Nzɩɩ monii a gbä a‑a a 'kä 'nyɛɛ,

wa 'kɛ ‑bhlɛ 'wlu 'yɩbha.

‑Lɛ a dɔ'wʋ n ‑kä lɛ 'bhöö 'lɛ ɛ ‑wʋa'a ‑lɛ 'kɩ.

N yɩbhä nɩɩ,

dlɩ a dlɩ 'mö a nɩ 'nyɛnɛ,

‑maa ɛ nɩ tɩ ‑bhɩɛ 'wlumö a ‑köbhänɩ.

A‑a nɩ 'nyɛnɩ Lagɔ dlɩ a dlɩ 'mö

6 A nɩ yɩbhlɩnɩ sɛ nɩɩ:

‑Ɔ ‑glʋä 'tikïyiee,

'tikïyie ɔ dɩɛ,

‑ɔ glʋä ‑bɛɛ,

‑bɛ ɔ dɩɛ.

7 Zaa,

‑ɔ ‑kä 'nyɛɛ yii,

ɔ'bhë sɛ ɔ 'yɩbhää,

‑sɩbhä ɔ nɩ 'nyɛ.

‑Maa 'ɔ dlɩɩ nɩ tɩ 'mö ‑ki ɔ nɩ tɩ 'nyɛ,

ɛ nɩ tɩ ‑bhɩɛ 'wlumö ‑ɔ ‑köbhänɩ.

Ɛ'ɛ ‑bhö nyɩasɛ,

‑maa ‑ɔ 'nyɛɛ 'mänasɛ,

mɔɔ nɛnɩɛ Lagɔ dlɩ yɔwʋ.

8 Lagɔ a'bhë ɔ bhɛnɩ ɔ 'kanyɩ 'nyupälɩɩ a kii 'wuë 'wʋ ghäla,

nzɩɩ ‑lii 'wuë 'kanyɩ 'kwädlɩ kɛ 'kplɛnɩ,

a 'kɩ 'wʋ 'libhï a 'kä nɩkpa ‑li a ‑li a kii 'wuë 'wlu nʋ.

9 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

Yɛ'mönanɩsɛ ɔ nyɛɛ 'pʋäwa,

'ɔ dlɩzɛmönanɔɔ 'nɩɛ 'bhlenɩdɛ ‑kä.^a

10 Lagɔ ‑ɔ nyɛɛ glʋglʋnyɔ glʋglʋluu,

‑ɔ nyɔɔ lilee,

ɔ yeanyɩ glʋglʋlii 'nyɛ,

ɔ yi ‑gömö 'pä,

nzɩɩ 'a yɛ'mönanɔɔ 'kä zumanɩ.

11 Sɛ ɔ 'kanyɩɛ kii 'wuë 'mö 'nyu 'pää,

‑sɩbhä ma‑a 'kää 'nglɩ ‑kä,

a 'kä'ɛ abhlɩ dlɩzɛmönanɩsɛ nɩkpa 'nyɛmö 'yize.

‑Lɛ a dɔ'wʋ,

'a 'saa a 'nyɛɛ da'a,

‑a ‑kɩɩ ‑waaa ‑lu kä'mö ‑kä ‑mä kwää,

mɩɩ 'kää 'nglɩ ‑kä wa 'kä a za Lagɔ bhälɩ.

12 Monii ‑a 'wälaa da'aa,

ɛ'ɛ ‑bhö nɩɩ ‑a 'kä ‑mä Zeluzalɛɛmö a Lagɔgänɩwaa 'wʋ yi a 'yize a za.

‑Maa ‑yɩ kää tenyii dɛsɛ a'bhë miɛ nɩɩ,

ɛ za,

nɩkpa a ‑bɛ yi tenyii Lagɔ bhälɩ.

13 Wɛlɩ 'la 'mö a dɔ'wʋ,

a ‑kä sasɛ Lagɔ 'klʋkpamö zʋ 'tɩɩ,

‑muë'la yi a za ɔ 'nglɩ 'ghlimanɩ.

Wa yi sɛ yɩbhlɩmanɩ nɩɩ,

Kliisɩ 'a 'Mänatɩtɩɩ sɛ yɩ gbää ‑sɩbhä a nɛmöä 'tɩɩ.

'A 'saa a kää,

sɛ a 'nyɛmuënyɩɛ dlɩ a dlɩ 'mö 'n a 'nyɛmi'ɛ ‑sɩbhä ‑mumuëë,

wa yi ‑sɩbhä 'ylɩmö,

wa yi ‑sɩbhä a za Lagɔ bhälɩ.

14 Lagɔ,

'nyu ɔ panyɩɛ tenyii zaa,

wa yi a za Lagɔ bhibhee,

a 'kä sɛ ‑yi nɩɩ wa ‑waanyɩ.

15 ‑A bhälɩ Lagɔ ‑ɔnyɩɩ 'nyɛnyɛlu 'nɩɛ ‑sɩbhä a sɛ ‑wʋ.