Nʋnʋlii 27

‑Gɔmla Fɛtusɩ yɛ Pɔɔlʋ ‑mä Ghlɔɔmö 'yio 'wʋ 'pä

‑Gɔmla Fɛtusɩ 'kää Pɔɔlʋ ‑mä Yitalii‑bhölɩɩ 'mö 'yio 'wʋ 'pää yii,

Pɔɔlʋ ‑nyɛ ‑jiewa mumuë 'sɔ,

'slʋjaa a 'kifi ‑bhlʋ 'mö ɔ 'nyʋä yowʋ,

ɔ nglɩɛ Zuliusɩ,

‑gɔmlɩwa a 'slʋjaa a ‑zɩkpa ‑bhlʋ wa laa 'bhlɩlowli 'kɔdɔɔ Ogwiisɩ 'a ‑zɩkpaa,

a 'mö a ‑nɔ ɔ glɩnɩɛ.

2 A‑a yia'aa batoo 'wʋ 'libhï.

Batoo 'la,

glɔ ‑bhlʋ wa laa Adlamiitɩ,

‑mä a batoo,

‑maa ‑mä Azii‑bhölɩɩ a ‑gwlɩ ‑mimii 'mö,

mä wʋ ‑wʋä mö dɔ'wʋ,

mö ‑a 'libhïä 'wʋ.

Masedʋanɩyi Alitaakö,

Tesaloniikö a nɩkpɛ 'la,

‑a ‑nyɔɔ 'sɔ a‑a yiɛ mö.

3 Zlɩ zɩɛ,

‑glɔɔ wa laa Sidɔɔ,

a‑a yiɛ mä ghlɛ.

‑Maa 'slʋja a 'kifii Zuliusɩ,

dlɩ zɛmö ɔ nɛnɩɛ Pɔɔlʋ a dɔ'wʋ.

Zaa,

'n ɔ yiɛ Pɔɔlʋ 'tɛnyɩ 'nyɛ,

ɔ 'kä ɔ 'bhɩa ‑wa ‑wʋä ‑mä 'ylɩmöä mö,

wa 'kɔ 'saa ɔ'ɔɔ ‑kä 'nyɛ.

4 ‑A 'bhööä ‑mä ‑glɔ 'la 'möö,

a‑a yiɛ mö.

‑Maa 'vuu,

yinɩ wʋ yinɩnyɩɛ zaa,

Siiplɩ‑bhölɩɩ ‑ɛ ‑wʋä gïnyɛlekpë 'käda 'klʋʋ,

‑mä ɛ nimï,

a‑a yiɛ ‑mä 'wʋ 'tʋ.

5 ‑A 'tʋä Silisii‑bhölɩɩ ‑nyɛ Pafilii‑bhölɩɩ 'sɔ a gïnyɛ 'wëë,

bhlɩɩ wa laa Lisii,

‑mä a glɔ ‑bhlʋ wa laa Milaa,

a‑a yiɛ ‑mä ghlɛ.

6 ‑Mä 'slʋja a 'kifii ghlɩnɩɛ batoo ‑bhlʋ,

Alɛzadlii a ‑luä.

‑Maa Yitalii‑bhölɩɩ 'mö ‑mä wʋ ‑wʋä mö dɔ'wʋ.

'N ɔ ‑yinyʋä 'mö 'pä.

7 ‑A möa,

‑a ‑sɛ 'ylɩya ‑mä 'nyu 'klʋ.

'Vuu a za,

‑a'a batoo 'nɩɛ 'pulo,

‑glɔɔ wa laa Köniidɩ,

‑a 'kʋ yɔwʋ ghlɛɛ yi a dɔ'wʋ,

'mö yɩ 'tɛmanɩɛ.

‑A ghlɛɛ ‑lɛ ‑glɔ 'la yɔwʋʋ,

'vuu ‑nɩnyɩa'a 'tɛnyɩ 'nyɛ ‑a 'kä gbɩɩ mö.

Zaa,

a‑a yiɛ kɔpɛ 'lɩbhä,

Klɛɛtɩ‑bhölɩɩ ‑ɛ ‑wʋä ‑lɛ gïnyɛlekpë 'käda 'klʋʋ,

ɛ ‑sokosi ‑ɛ pää ‑mä 'nyu 'mö wa laa Salɩmɔnɩ,

a‑a yee yɔwʋ ghlɛnɩ,

‑mä bhlɩɩ a'bhë a nimï,

mää 'vuu 'nɩɛ 'mö 'tɛɛnɩ,

a‑a yiɛ 'mä 'wʋ tʋ.

8 ‑Maa ‑mä a pɩɔ 'la 'yli,

batoo 'kä ‑gba 'mö 'bhöö a dɔ'wʋ,

'mö yɩ 'tɛɛ,

sa'a ‑këë,

dɛ ‑bhlʋ dɛ wa laa 'Kïkë a ‑Kïkëë,

‑lɛ a glɔ ‑bhlʋ wa laa Lazee yɔwʋ,

a‑a yiɛ ‑lɛ 'kïkë köbhä.

9 ‑Maa 'vuu ‑kanyɩ ‑bɛ 'wʋ bʋanɩ 'wë,

a‑a yiɛ da'a ghlɛ.

Zlɩɩ,

Zwiiföwaa laa suplɛzlɩɩ,

ɛ yɛ 'plɩ 'wë,

a‑a yiɛ ‑lɛ ghlɛ.

‑Maa zlɩ 'la,

ɛ ‑kä 'plɩ 'wë a 'tɛnyɩ 'la 'mö,

'nyuklʋnɛmö dɔ'wʋ,

'mö yɩ 'tɛɛ tenyii.

Zaa,

'n Pɔɔlʋ yiɛ batoo 'mö a nɩkpaa ‑fɩa 'yukwli 'mö ‑sɛ,

ɔ lɛ naa:

10 «‑A'bhɩanyɩ,

n ‑yi sɛ nɩɩ,

mä ‑a ‑wʋa'aa ‑sɩkaa dɛ'ɛ mö dɔ'wʋ a dɔ'wʋ,

'mö yɩ 'kää 'tɛɛ tenyii.

Batoo ‑nyɛ wʋ 'mö a ‑lii 'sɔ a 'yize mɩɩ 'naa 'kä nyimo,

‑maa ‑a'bhï,

a 'nɩ 'wʋ 'zʋzʋnɩɩ,

‑a yi ‑mä tʋʋnɩ.»

11 ‑Maa batoosunyɔɔ ‑nyɛ wʋ ‑lowlii 'sɔ,

wa gbä 'wa käbösɛ.

'Slʋjaa a 'kifii a'bhë,

batoolowluwa 'la a 'wɛlɩɩ 'mö ɔ kää dlɩ 'wʋ,

‑maa ɔ'ɔɔ Pɔɔlʋ a ‑nɩɩ dlɩ 'wʋ ‑kä.

12 Kïkëa batoo köbhää,

wa 'kä ‑lɛ glɩ ‑këë cwɩɩ 'wuë wëtlokwë 'kädaa yiɛ 'mö 'kä 'plɩ a dɔ'wʋ,

'mö yi 'tɛɛ.

‑Sɩbhä a za,

nɩkpaa ‑wa ‑wʋä ‑mä batoo 'möö,

wa gla'mö a ‑bɛ lɛ naa:

«A‑a nɩ mö,

a‑a nɩ yɛla ‑li 'mö,

‑a 'kä ‑mä Feniisɩ ghlɛ.»

'Fʋ ‑wa'aa sa'a gbä,

‑maa Klɛɛtɩ‑bhölɩɩ a ‑glɔ 'la 'mö,

'nyuswɩ 'sɔ ‑wʋ ‑mä.

Batoo ‑kä yɩ 'kïkë ‑bhlʋ köbhää,

‑a 'kä ‑lɛ glɩ ‑këë wëtlokwë 'kädaa a 'tɛnyɩ 'kä 'plɩ a dɔ'wʋ,

'vuu 'nɩɛ ‑lɛ ghlɛ zaa,

‑lɛ ma‑a nɛnɩɛ,

nza wa gbää ‑sɩbhä.

‑Podie yɛ batoo ‑lɛ 'nyu 'klʋ ghlɩnɩ

13 ‑Aaa ‑bhlɛ 'wʋ ‑sɔ cuu,

'n ‑vʋvɔlʋ yiɛ yi.

Wʋ 'bhöönɩ ‑mä bɔɔzɛmö.

‑Vʋvɔlʋ 'la mʋʋ nɛnɩɛ batoo a dɔ'wʋ,

zaa wʋ yiɛ,

'n yɩ yiɛ batoo 'mö a nɩkpaa swɩ yɔwʋ päla,

wa lɛ naa:

«‑A 'kä 'mö.»

'N wa yiɛ batoo bulonɩ,

a‑a yiɛ mö.

‑A ‑wʋ Klɛɛtɩ‑bhölɩɩ a kïkëa tɩtlɩnɩ dɔ'wʋ cuu,

14 'n ‑podie yiɛ yi.

‑Podie a ke 'la,

'mö batoosuwaa guä 'kwädlɩ,

a nglɩɛ Elakilɔɔ^a,

a 'bhöönɩ ‑mä gïnyɛlekpëa a pɩɔ 'yli 'n a yiɛ yi.

15 ‑Podie 'la yiɛ,

a ‑susunɩ ‑a'a batoo 'wlumö,

wʋ ‑suwaa wa 'yɩbhä a nyɩasɛ,

wa 'kʋ 'klʋ kɩa,

‑maa yɩ'ɩɛ ‑mä mö zaa,

n wa yia'aa sɛ glɩ,

'n ‑podiea ‑nyɛ ‑abhʋa yiɛ 'plɩ.

16 Gïnyɛlekpë ‑mämaa ‑bhlʋ wa laa Kodaa,

a‑a yeaa nimï ghlɛnɩ,

ma‑a ‑sɛɛ 'tikïyie 'wʋ ‑podiea 'yio 'wʋ.

‑A ‑wʋ ‑mä,

'gokpëa ‑a glɛ a‑a ‑mä ‑a'a batoo gwë 'wʋʋ,

a‑a yeaa jli ‑këë a‑a yiɛ yɔlɔ,

a‑a yea'aa 'wʋ 'libhï,

17 a‑a yeaa ‑mä batoo a'bhë 'mö 'zʋ.

'N wa yiɛ batoo 'likpï 'kädɩ 'mlɩ bhlɩnɩ klɩklɩ,

‑a tɩa ‑glɔɔ wa laa Silitɩ a bʋsɛdʋdʋʋ 'wlu libhï a nganɔ a za,

'n wʋ ‑lowliwaa yiɛ 'wʋwɔlʋlu 'kɔdʋ ‑bhlʋ wa 'nigbanuä ‑mä 'nyu 'mö 'pä.

'N ‑podiea ‑nyɛ ‑abhʋa möä 'yize.

18 ‑Podiea a 'mötɛɛnɔ a za,

zlɩ zɩɛ,

'n batoolowluwaa yiɛ ‑mä wʋ 'mö a 'gbluku ‑mimii ‑sɛ,

'n wa yiɛ ‑mä 'nyu 'mö 'pä.

19 Ylɩ a tanɛɛ 'mö,

‑lii ‑mimii wa ‑sunɩ a‑a batoo,

wa'bhï 'n wa yiɛ 'wʋ 'libhï 'n wa yi'ɛɛ ‑mä 'nyu 'mö 'pä.

20 'Ylɩ a ‑bɛ 'mö,

zlɩ ‑wʋ ‑kpokuu 'yize,

‑aa 'yɩ 'ylʋ 'ylɩmö,

‑aa 'yɩ zɛleyi 'ylɩmö,

‑podiea abhlɩ,

a 'tɛɛ 'mö 'yize,

'n swɩ ‑yinyɩa'aa yɔwʋ 'kunɩ,

'pʋpʋbɛyɩ a'bhë,

‑aa dila 'nɩa'a ‑mä ‑wʋ.

21 Nɩkpaa 'wuë ‑wa ‑wʋä ‑mä batoo 'möö,

wa'aa ‑bhlɛ ‑lu li,

‑lɛ yɛ 'mö gwälɛ.

'N Pɔɔlʋ yiɛ ‑mä wa jijo'wʋ 'wʋ ‑sɔ 'n ɔ yiɛ wa 'wuë 'dɩ 'nyɛ,

ɔ lɛ naa:

«‑A'bhɩanyɩ,

sɛ'ɛ a za n gbä a‑a.

A ‑kaa a da'a 'yukwli ‑pʋnɩɩ,

‑a 'naa 'kä a ‑mä Klɛɛtɩ 'bhöö zaa,

'klɩyɩyɛ nɩ 'wuë ɛ 'naa ‑kanyɩ a ghlɩ,

'gbluku nɩ 'naa kä a tʋʋ.

22 Miɛ abhlɩ da'a 'wë,

‑maa ‑sɩkaa a dɔ'wʋ,

n nyanyɩ 'dɩ nɩɩ,

a nɩ 'tɛmanɩ 'yli yɔwʋ,

‑maa ‑aa gla'mö a nɩkpɛ ‑bhlʋ a'bhë,

ɔ 'naa 'kä 'ku.

Batoo a 'yize mʋʋ 'kää nyimo.

23 Zɩ'ɛ a sabʋ a'bhë,

Lagɔ ‑ɔ glɩnɩɛ na ‑lowli,

‑ɔnyɩ libhoo n nʋä,

mɔ tieaaa ɔ zuzukwë ‑bhlʋ 'wʋ.

24 Sɛ'ɛ a nyɩaaa 'dɩ nɩɩ:

Pɔɔlʋ,

tɩ ‑gu ‑maa 'bhlɩlowli 'kɔdɔɔ Sezaa a 'yila 'klʋ,

‑n yi ‑lɛ ghlɛ klɩpaa,

‑sɩbhä Lagɔ 'yɩbhɩɛ.

Sɛ ɔ nɛnɩɛ ‑na dɛ dlɩ zɛmö a za,

nɩkpaa 'wuë ‑n ‑nyɛɛ 'sɔ a ‑wʋä mä'ä batoo 'möö,

‑na za ɔ yuë puë.

25 Sa'a a gbää.

Zaa,

‑a'bhɩanyɩ,

a nɩ 'tɛmanɩ 'ylɩ yɔwʋ,

‑maa n kä Lagɔ dlɩ 'wʋ nɩɩ,

sɛ ɔ nyɩaaa da'a 'dɩɩ,

yɩ yi ‑sɩbhä 'yli 'wlʋnɩ.

26 ‑Maa batoo wʋbhlɩ,

gïnyɛlekpë 'käda ‑bhlʋ a 'kïkë wʋ 'kää 'wlu libhïä mö,

wʋ 'kä ‑lɛ nyimonɩ.»

Sa'a Pɔɔlʋ nyʋää 'dɩ.

27 Sɛ ‑a 'maa 'kä a ‑mä Klɛɛtɩ 'bhöö,

‑a yɛɛ ‑bhlɛ 'ylɩ kʋgbä ‑mʋäna ‑lɛ 'nyu 'klʋ ‑sɛ,

‑maa gïnyɛɛ a pɩɔ wa laa Adlia 'klʋ,

‑mä ‑podiea kwänɩnyɩɛ 'yize.

Sɛ'ɛ zlɩ ‑jijo'wʋ,

batoo 'mö a libhonʋwaa lɛ naa:

«Ɛ 'kä ‑bhɩɛ ‑a yia'a ‑pa 'kïkë köbhä.»

28 'N wa yiɛ 'likpë ‑vʋkwa 'wʋ 'libhï a ‑gwanɩ 'wʋwɔlʋlu 'yli,

'n wa yeaa ‑mä 'nyu 'mö 'pä,

wa 'kä nyuu yɛka.

Wa 'yeaa 'ylɩmöö,

nyuu a 'möbhʋɔnɔɔ bhli 'mɛtile a glʋ ‑bhlʋ 'mɛtile kʋgbä ngbi'sɔ.

‑A 'dio'ɛɛ 'tikïyiɛ 'wʋ 'yukudɛɛ,

'n wa yeaa 'wʋ 'sɔ ‑mä 'pänɩ,

a bhli 'mɛtile a glʋ ‑bhlʋ 'mɛtile ‑gbʋäta.

29 Batoo tɩa 'nyu glu a kpayii 'wlu libhï a nganɔɔ mʋʋ 'lɩbhʋä,

zaa,

'wʋwɔlʋli 'kädɩɩ wa 'nigbanɩɛ batoo,

'n wa yiɛ ‑sɩbhä a ‑li ‑mʋäna 'wʋ 'libhï,

yɩ ‑glɛ batoo gwë 'wʋ,

'n wa yiɛ ‑mä 'nyu 'mö 'pä.

Da'a ‑lɛ ‑a glɩa'aa,

wa 'wuë wa yɔwʋ nʋ ‑kpakpakpa,

wa lɛ 'dɛɛ zlɩ nɩ zɩa'a cuu.

30 Sabʋ ‑bhʋlʋ ‑kpɔ 'la,

batoo 'mö a libhonʋwaa,

'n wa yiɛ 'gokpëa ‑mä batoo 'mo ‑sɛ,

'n wa yeaa ‑lɛ 'nyu 'klʋ 'pä,

wa lɛ,

'wʋwɔlʋli ‑mimii 'mö wa mö ‑mä batoo a 'yuku zʋä,

wʋ 'kä sasɛ 'nɩgbö,

‑zɛglɛgbaa wa 'kä 'kunɩmɛ ‑kosu 'mö ‑sɛ a za,

nza wa gbää.

31 ‑Maa wa 'zʋä sa'aa,

'n Pɔɔlʋ yiɛ 'slʋjaa a 'kifii ‑nyɛ 'ɔ nɩkpaa 'sɔ 'dɩ 'nyɛ nɩɩ:

«Nɩkpa nɩ,

'n wa 'nɩa mä'ä batoo 'mö sɛ glɩɩ,

a 'naa 'käa 'pʋ.»

32 Pɔɔlʋ 'nyʋää ‑sɩbhä 'dɩɩ,

batoo a 'likpïï ‑yɩ ‑glɛ a‑a 'gokpëa 'wʋʋ,

'n wa yiɛ ‑dɩ,

'n nyuu ‑nyaa yiɛ 'plɩ.

33 Zlɩ 'nɩɛ ‑bhlɛ nuë wälɛ,

'n Pɔɔlʋ yiɛ nɩkpaa 'wuë dlɩ 'wʋ 'tɛmanɩ,

wa 'kä ‑lu li,

ɔ lɛ naa:

«A 'ylɩ a kʋgbä ‑mʋänanɛɛ dɛ'ɛ,

sɛ a glɩ mä'ä batoo 'mö 'yize.

‑Maa ‑lɛ a ylɩ 'la 'wuë 'mö,

‑lu a'aa li.

34 Zaa,

'dɩ n nyanyɩɛ dɛ'ɛ nɩɩ,

a nɩ li ‑lu a 'kä 'mö 'tɛmanɩ,

‑maa a 'kä 'pʋ a dɔ'wʋ,

lilea kä dɛsɛ.

Sɛ'ɛ n gbää nɩɩ,

a gla'mö a nɩkpɛ ‑bhlʋ a'bhë ‑ɔ 'kää mä'ä ‑degleyi 'wʋ 'ngäzlɩnɩɩ,

ɔ'ɔɔ ‑bhölɩ.»

35 Pɔɔlʋ gbää sa'a 'wëë,

'n ɔ yiɛ 'fɔlɔ 'wʋ 'libhï,

wa 'wuë a 'yila 'klʋ 'n ɔ yiɛ Lagɔ bhälɩ 'wë 'n ɔ yuä 'mö ‑dɩdɩnɩ,

'n ɔ yiɛ li.

36 Ɔ liɛ,

nɩkpaa 'wuë 'n wa yiɛ 'yli yɔwʋ 'tɛmanɩ,

'n wa yiɛ limö.

37 ‑Maa ‑abhʋaa ‑wʋ a‑a ‑mä batoo 'la 'möö,

‑a 'wuë ‑a ‑bhli nɩkpa a gwlɩ kʋgbä ta nɩkpa kʋgbä gbʋplʋ (276).

38 ‑Maa nɩkpaa 'wuë wa liɛ wa lʋä 'wëë,

‑nyɔɔ a sɛ a lilea a ‑lɛgöö 'wuë batoo ‑su a‑a,

'n wa yiɛ 'wʋ 'libhï 'n wa yiɛ ‑mä 'nyu 'mö 'pä,

batoo 'käa 'wʋ fomanɩ.

Nyuu a ‑gbɔkwälɩɩ yɛ batoo wlɛ

39 Zlɩɩ bhɩɛ sasɛ 'möö,

‑a ‑wʋ ‑mä 'nyu 'klʋ,

'n batoolowluwaa yiɛ 'kïkë ‑bhlʋ 'ylɩmö.

‑Maa a 'klʋ a bhlɩɩ,

wa 'nɛɛ ‑yi 'lɩlɩlɩ.

Kïkë 'la 'klʋ,

‑mä nyuu 'pää sɛ'ɛ sɔ,

‑lɛ 'nɩɛ zɛmö dɩ‑ɩ zaa,

wa lɛ naa:

«A‑a nɩ mö ‑a 'kä ‑li 'mö yɛla ‑a 'kä ‑lɛ 'kïkë köbhä,

'n batoo ‑kä lɛ glu plɛnɩɩ,

yɩ nɛnɩ.»

40 'Wʋwɔlʋlii wa 'pä a‑a ‑mä 'nyu 'mö yɩ 'kä batoo 'nigbaa,

'n wa yiɛ yɩ 'likpï ‑dɩ 'n wa yiɛ ‑mä 'nyu 'mö tɩ.

Supɩɩ 'sɔ ‑kpɔ yɩ ‑glɛɛ ‑mä batoo gwë 'wʋ,

wa ‑sunuuä,

'n wa yiɛ 'wlu gïganɩ wa 'kä mö.

‑Mä batoo 'yuku a 'tɔfʋʋ 'n wa yu'ɛɛ 'wlu gïganɩmö,

'vuu 'kʋ nyɛmʋ 'mö 'pä,

batoo 'kä ‑gba 'mö 'bhöö.

Sa'a wa 'zʋä 'n batoo yiɛ kïkëa mönɩ.

41 ‑Maa ‑a ‑wʋ mö dɔ'wʋ cuu,

dɛ ‑bhlʋ dɛɛ 'nyu 'pänɩɛ bʋsɛɛ ‑blukwë 'möö,

'n batoo yiɛ ‑lɛ 'wlu libhï,

'n wʋ yiɛ glu plɛ.

Wʋ 'wukpëlea ma‑a plɛɛ glu 'lɩlɩlɩ,

a'aa'a ‑gba 'mö 'bhöö,

'n nyuu a ‑gbɔkwälɩ a 'mötɛɛnɔ yiɛ wʋ gwëa wlɛ.

42 Yɩ 'plɩɛ sa'a 'wʋʋ,

‑jiewaa 'wuë ‑wa ‑wʋ a‑a ‑mä batoo 'möö,

'slʋjaa yɩbhä wa 'kʋä 'wlu ‑dɩ wa tɩa ‑lɛ 'nyu 'klʋ bhlinɩ wa tɩa futo.

43 ‑Maa 'wa 'kifii,

ɔ'ɔɔ yɩbhä Pɔɔlʋ nɩ 'ku zaa,

'n ɔ yuë 'dɩ 'nyɛ ɔ lɛ naa:

«A nɩ tɩ sa'a zʋ.»

'N ɔ yiɛ nɩkpaa 'wuë 'dɩ 'nyɛ nɩɩ:

«‑Wa ‑kä lʋlʋsɛ ‑yii,

wa nɩ bhlinɩ tɛɛ ‑lɛ 'nyu 'klʋ wa 'kä ‑mä 'kïkë 'wlu mö.

44 ‑Muë'la ‑waaa wabhlɩ lʋlʋsɛ ‑yii,

wa nɩ pö supɩɩ 'klʋ sɛ,

ɛ ‑kä'ɛ batoo a pɩ ‑mimii,

wa nɩ pi 'klʋ sɛ wa 'kʋä ‑gänɩ.»

Sa'a ‑sɩbhä ‑a 'zʋä ‑a 'wuë a‑a yiɛ ‑mä 'kïkë 'klʋ ghlɛ,

‑bɛ 'nɩɛ 'ku.