Nʋnʋlii 26

Sɛ'ɛ Pɔɔlʋ bhïlaa ‑lɛ Aglipaa a 'yila 'klʋ ɔnyɩ a dɛ

Fɛtusɩ gbää sa'a 'wëë,

Aglipaa lɛ naa:

«Pɔɔlʋ,

‑n kä 'tɛnyɩ ‑n 'kä ‑nanyɩ a dɛ bhïla.»

Pɔɔlʋ 'kää 'mö ‑sɛnɩɛ yii 'n ɔ yiɛ sɔ ghäyɩ 'pä ɔ lɛ naa:

2 «‑Atʋ Aglipaa,

Zwiiföwaa,

kïbhïï wa suluuä ‑gömö sɛɛ,

sɛ n 'kää zɩ'ɛ dɛ'ɛ ‑na 'yila 'klʋ nanyɩ yɩ gbʋ ‑gömö ‑sɛ a za,

yɩ ‑bhöö 'mäna 'wʋ.

3 'Fʋ yɩ ‑nɩɩɛ 'mäna 'wʋ ‑bhö,

‑maa ‑nmö Aglipaa,

‑a'bhilɔɔ 'wuë,

‑n ‑yuu,

‑abhʋa Zwiiföwaa ‑lii ‑yɩ zʋä 'kwädlɩ ‑mä ‑aa jijo'wʋ kpɛnɩkpɛnɔɔ,

‑n ‑yii sasɛ.

Zaa,

‑yaya,

'libhï ‑na'a dlɩ a ‑dlɩ 'wʋ ‑n ‑kaa 'yukwli ‑pʋnɩ.

4 N nɛ naa,

tɛɛnɩ ‑mä na 'yuë dɔ'wʋ,

'na zɩkpaa,

sɛ n nʋmönʋmaa 'möö,

na 'bhɩa Zwiiföwaa 'wuë wa ‑yi ‑sɩbhä.

Ɛ'ɛ ‑bhö nyɩasɛ,

‑maa ‑mä wa jijo'wʋ,

‑mä Zeluzalɛɛmö,

‑mä n nʋnaa.

5 Wa 'wuë wa ‑yii,

ɛ'ɛ ‑bhö zɩɛ.

Wa ‑yi sɛ nɩɩ,

‑abhʋa Zwiiföwaa a ‑zɩkpöö 'wuë gla'mö a dɔ'wʋ,

‑zɩkpaa ‑a zʋä sasɛ ‑a'a Lagɔbʋbɔsaa 'klʋkpamöö,

Falizɩɛwaa,

wa gla'mö a ‑nɔ ‑bhlʋ n glɩnɩmö a‑a.

Wa ‑kä ‑mumuë glɩnɩɩ,

wa yi nɩɩ miɛ ‑tiamö nʋ.

6 ‑Maa ‑sɩkaa a dɔ'wʋ,

wa ‑kaaa'a dɛ'ɛ gbʋ ‑gömö 'zʋ 'n n ‑kä ‑zijle 'mö 'nɩgböö,

ɛ'ɛ ‑bhö fʋ,

‑maa ‑a 'wuë,

'saa Lagɔ gbä a‑a ɔ ‑kanyɩ 'nyɛɛ,

wɛlɩɩ ɔ 'nyɛ a‑a ‑aa dɩbawaa,

'mö n kää dlɩ 'wʋ,

nza n 'nɩgböä dɛ'ɛ ‑zijle 'mö.

7 ‑Abhʋa Yizlaɛlɩ a ‑nʋa a ‑gligbï kʋgbä'sɔ ‑kpɔ 'wʋ a ‑nʋa 'wuë,

ɛ yi zlɩgä oo,

ɛ yi sabʋ oo,

‑a 'kä wɛlɩ 'la a 'yliwlʋnɩdaa 'ylɩmö a za,

nza ‑a bʋbɔɔ 'kwädlɩ Lagɔ.

‑Atʋ Aglipaa,

‑lɛ a wɛlɩ 'la ‑bhʋlʋ ‑kpɔ,

sɛ n ‑kämiɛ dlɩ 'wʋ a za,

nza Zwiiföwaa kälaaa dɛ'ɛ.

8 A 'wuë abhʋaa glɩnɩmöä Zwiiföwaa,

sɛ yɩ ɔ 'mö 'n a nʋ bhä nɩɩ,

nɩkpɛ kä 'ku 'wëë Lagɔ 'kɔ glu ‑sɛ a wɛlɩɩ,

ɛ'ɛ da'a dlɩ'wʋkäli 'nɩ?

9 Na'bhë,

sɛ n 'kää 'zʋ,

Nazalɛɛtɩ a Zezwii,

n 'kä 'ɔ nglɩɩ sɛ ‑sɛ 'mö n ‑wʋ a‑a dlɩ 'wʋ 'pä dɔ'wʋ.

10 ‑Mä Zeluzalɛɛmö a'bhë,

‑mä n 'zʋnɩɛ ‑sɩbhä.

Lagɔbʋbɔwaa a 'kifiea,

n nɛ wa nɩ tieaa,

'n wa ‑yiiɛ ‑lɔ 'nyɛ,

wa 'nglɩ 'mö 'n n yiɛ Zezwii a ‑nʋä a ‑bɛ ‑jie 'mö 'pä.

Wa ‑kʋä gbʋ 'nyɛ wa ‑kʋä 'lɩbhä wa ‑kä 'kuu,

yɩ nɛnɩɩ a dlɩ yɔwʋ.

11 ‑Mä ‑a'a Lagɔbïdii 'wuë 'mö,

‑mä n mö a‑a 'kwädlɩ,

'n n nyɛɛ nɩkpa 'dɩ 'n wa köbhää Zezwii a ‑nʋa ‑wa ‑wʋä ‑mä,

'n wa 'yʋää 'klɩ,

nzɩɩ wa 'kä Zezwii a dɛ wɛlɩzoku bhïla klɩpaa.

'Na sɛ n ‑gbïluë a‑a tenyii,

‑sɩbhä 'nɩɛ a ‑sɩbhä a sɛ ‑wʋ.

‑Sɩbhä a za,

käböbhölɩ 'mö a ‑gwlɩ ‑mimii ‑gömö ‑mä n mö a‑a,

Zezwii a ‑nʋa ‑wa ‑wʋä ‑mä,

'n n zuë a‑a 'zwɩ.

Pɔɔlʋ yɛ'ɛ sɛ ɔ 'zʋmözʋmöä Zezwii a ‑nɔ 'mö a 'tɩtɩ ‑sɛ

12 ‑Sɩbhä a za,

nza n ‑sɔɔ 'ylɩ ‑bhlʋ 'mö 'wʋ,

'n n yiɛ Damasɩ mö.

Lagɔbʋbɔwaa a 'kifiea mʋa tieaaa,

wa nyɩaa 'bɔgʋ n 'kä wa 'nglɩ 'mö Zezwii a ‑nʋa ‑wa ‑wʋä ‑mä ‑lizoku 'wlu nʋ.

13 ‑Maa ‑Atʋ Aglipaa,

n nɛmö 'yio 'wʋ,

'ylʋ ‑wʋ 'du 'mö,

n lɛ zʋ a sɛ'ɛ cuu,

'n n yiɛ 'dɛlɩ 'ylɩmö,

yɩ 'bhöönɩ ‑mä ghäyɩ 'wʋ,

yɩ lɩ yɩ zi 'ylʋväla a 'dɛlɩ 'wʋ,

nɩkpaa n ‑nyɛɛ ‑bhlinɩɛ 'wʋʋ,

n ‑nyʋä 'sɔ 'n yɩ ‑yinyɩɛ 'wʋ ngäla.

14 ‑A 'wuë a‑a yiɛ zɛmö bhli.

'N n yiɛ Ebleegbʋ 'mö wɛlɩ ‑bhlʋ 'nʋ,

yɩ lɛ naa:

Sɔɔlʋ,

sɛ yɩ ‑wʋ ɔ 'mö n‑n 'yɩaa bhä 'klɩ 'nɩ?

'Dɩ n nyɩamöä dɛ'ɛ nɩɩ,

‑n ‑nyɛ Lagɔ ‑kä zɛlɩ yɔwʋ 'sibhïnɩɩ,

‑nanyɩ ‑n nʋä ‑lizoku 'wlu.

15 Wɛlɩɩ nʋä sa'aa,

n nɛ naa:

‑Alowli,

‑mɔ ‑n glɩnɩ bhä?

Ɔ lɛ naa:

‑Amö Zezwii ‑n 'yɩaa 'klɩɩ,

‑amöä.

16 ‑Sɔ 'wʋ,

'fʋ n ‑nɩmöä dɛ'ɛ 'ylimö ghlɛ,

‑maa n ‑kamö lɛ ‑sɛ ‑n 'kä na libho nʋ,

‑n 'kä nɩkpabhë a 'yila 'kʋ na dɛ bhïla,

‑lii ‑n 'yɩɛ dɛ'ɛ 'ylɩmö mi,

‑mi n ‑kamö'ɛɛ 'ylimö tulanɩ mi,

‑n 'kʋä yɩ 'dɩ 'nyɛ.

17 'Bhlɩbhëa 'wuë,

‑wa glɩnɩɛ Zwiiföwa oo,

‑waaa Zwiiföwaa glɩnɩ oo,

'mö n ‑kamöä 'wʋ tie.

Wa ‑ka wa ‑kamö ‑lizoku 'wlu nʋʋ,

na'bhë n ‑yimö 'wʋ ‑kʋ.

18 Nzɩɩ ‑n 'kʋä 'na wɛlɩɩ 'nyɛ,

yɩ 'kʋä 'wʋ ngäla,

'wa yilaa 'kä do,

wa tɩa'a 'yuylukwë 'mö ‑wʋ,

miɛ nɩɩ,

Sataa tuëa ‑gömö 'kämanɩ.

Sɛ wa 'tɛɛnɩɩɛ dlɩ a za,

Lagɔ 'kä 'wa 'nyinylolii a gbʋ 'yi 'tatinɩ,

nɩkpaa Lagɔ ‑sɛɛ ‑lɛ wa 'kä ɔ 'yize a ‑nʋä glɩnɩɩ,

wa 'kä ‑mä wa gla'mö ‑wʋmö.»

Pɔɔlʋ yɛ 'ɔ Lagɔlibhoo a dɛ bhïla

19 Zaa,

‑Atʋ Aglipaa,

Zezwii ghälaaa 'ylimö 'n ɔ ‑yiiɛ 'dɩ 'nyɛɛ,

n'n‑ä 'ɔ wɛlɩɩ 'klʋkpamö ‑sɛ.

20 N tɛɛ cuu,

‑mä Damasɩ ‑mä n bhïlanɩɛ Lagɔwɛlɩɩ,

'n n yiɛ ‑mä Zeluzalɛɛmö mö,

'n n yiɛ ‑mä bhïlanɩ,

‑mä Zwidee‑bhölɩɩ 'wuë 'mö n‑n yi'ɛɛ ‑mä bhïlanɩ,

‑waaa Zwiiföwa glɩnɩɩ,

'n n yia'aa ‑mä 'wa bhlɩɩ ‑gömö mö 'n n yuëë Lagɔ 'a wɛlɩɩ 'nyɛmö.

Wa 'wuë,

sɛ'ɛ n nyʋä 'dɩ nɩɩ,

wa nɩ ligba wa 'kä 'wa ‑lizokuu kɛ'mö ‑sɛ,

wa 'kä Lagɔ yɩbhlɩnɩ,

'wa nɛmönɛmösaa 'wuë,

‑sɩbhä 'kä 'ylimö tulanɩ nɩɩ,

wa yɛ ‑tiamö Lagɔ a ‑nʋä zʋ.

21 ‑Sɩbhä a za,

‑a'bhɩa Zwiiföwaa,

n ‑wʋ ‑mä Lagɔbudu 'Kɔdʋʋ 'mö,

'n wa ‑yiiɛ köbhä.

Wa yɩbhä a nyɩasɛ wa ‑kaa 'lɩbhä n 'kä 'ku.

22 ‑Maa Lagɔ mɔɔ 'pää na ngäzɩdlɩ,

mɔɔ kpëtiiɛ 'kwädlɩ 'wʋ,

nza n ‑bhölɩɛ 'yize,

nzɩɩ nɩkpaa 'wuë,

'kädɩ oo,

'tikïyie oo,

n 'kʋä Zezwii 'a wɛlɩɩ 'nyɛ.

Yɩ 'wuë 'mö,

käböwɛlɩ n'n‑ä bhïla,

‑maa Moyizɩ ‑nyɛ Lagɔ 'a 'möbhïlanɩwaa 'sɔ,

wɛlɩɩ wa gbä a‑a ‑yɩ 'kä 'yli 'wlʋnɩ,

‑yɩ 'wlʋnɩa'aa ‑sɩkaa 'ylii,

yɩ dɛ n bhïlaa.

23 Sɛ'ɛ wa gbä a‑a nɩɩ,

Puënyɔɔ Lagɔ ‑sɛɛ ‑lɛ,

ɔ yi 'zwɩ a ‑bɛ zi klɩpaa,

ɔ yi 'ku,

tɛkänɩkpɛɛ Lagɔ 'kää gäla ɔ 'kɔ glu ‑sɛ ɔ 'kä 'kwädlɩkwädlɩnɩ ‑bhölɩɩ,

'mö ɔ 'kää glɩnɩ,

nɩkpaa 'wuë ‑wa glɩnɩɛ Zwiiföwa oo,

‑waaa Zwiiföwa glɩnɩ oo,

ɔ 'kʋä 'dɩ 'nyɛ nɩɩ,

Lagɔ yuë puë.

Pɔɔlʋ lɛ Aglipaa nɩ 'tɛɛnɩ Zezwii dlɩ

24 Pɔɔlʋ bhïlaa kïbhë 'la cuu,

'n Fɛtusɩ yoo 'wʋ nylanɩ,

ɔ lɛ naa:

«Pɔɔlʋ,

‑nn‑ä ‑yɛ.

'Bɔgwɩbäbätɛ ‑n ‑zɛlɩɛ 'möö,

yɩ ‑kamö 'wlumö nyima.»

25 ‑Maa Pɔɔlʋ lɛ naa:

«‑Atʋ 'kɔdɔ Fɛtusɩ,

'wlumö ‑nɩɩɛ yɩ nyimo,

‑maa 'nɛɛnɩwɛlɩ a ‑mii kää gbëaa 'möö,

'mö n bhïlaa dɛ'ɛ.

26 Wɛlɩ 'la sɛ yɩ 'plɩɛ 'wʋʋ,

'bhlɩlowli Aglipaa,

ɔ ‑yi ‑sɩbhä.

Ɛ'ɛ ‑bhö ‑budukëte 'mö a wɛlɩɩ zaa,

n ‑yi sɛ nɩɩ,

yɩ kïbhë ‑ma ɔ'ɔɔ ‑yii,

a'aa ‑bhölɩ.

Nza n ‑kɔɔnyɩ dɛ'ɛ 'yila 'klʋ bhïlanɩ dɔ'wʋ ‑wʋʋ,

'n n 'nɩɛ nganɔ 'ku 'mö ‑kä.

27 ‑Atʋ Aglipaa,

‑na'bhë ‑nmö n yɩbhäa'aa dɛ'ɛ nimï nɩɩ:

Lagɔ 'a 'möbhïlanɩwaa,

'wa Lagɔwɛlɩɩ,

‑n 'ni bhä dlɩ 'wʋ ‑kä ‑a?

Na'bhë n ‑yi sɛ nɩɩ,

‑n kɩ dlɩ 'wʋ.»

28 Aglipaa lɛ naa:

«‑Na'a sɛ ‑n bhïlaa da'a a dɔ'wʋ,

‑n yɩbhä bhä ‑n ‑kaa klɩtɩɛ 'wʋ 'zʋa ‑a?»

29 Pɔɔlʋ lɛ naa:

«'Na sɛ n bhibhee Lagɔ,

‑sɩbhä ma‑a nɩɩ:

Ɛ yi zɩ'ɛ ma oo,

ɛ yi zɩkö ma oo,

‑nmö Aglipaa,

ɛ'ɛ ‑bhö ‑na 'yize,

‑maa a 'wuë sɛ a ‑pʋnɩɩɛ dɛ'ɛ 'yukwlii,

Lagɔ nɩ gbä a 'kä na sɛ a ‑nʋä zʋ.

N'n‑ä nɩɩ,

a 'kä na sɛ a ‑jiewa 'zʋ nʋ,

‑maa ɔ nɩ gbä a 'kä Zezwii a ‑nʋä 'zʋ.»

30 Pɔɔlʋ ‑sɛnɩɛ 'mö 'wëë,

'bhlɩlowli Aglipaa 'n ɔ yiɛ 'wʋ ‑sɔ,

‑gɔmla Fɛtusɩ mɔ,

Belenisɩ mɔ,

'n nɩkpaa ‑muë'la 'wuë ‑wa glɩmö a‑a ‑lɛ ‑zijle 'wʋʋ,

'n wa yiɛ 'wʋ ‑sɔmö 'n wa yiɛ ‑mä 'wlʋ.

31 Wa möä,

wa lɛ naa:

«'Lɩlɩlɩ a dɔ'wʋ,

nɩkpɛ nɩ,

'kïbhë a ‑maa 'kää 'nglɩ ‑kä,

'n wa 'kɔɔ 'lɩbhä ɔ 'kä 'kuu,

a'aa ‑bhölɩ.

'Kïbhë a ‑maa 'kä'ɛɛ 'nglɩ ‑kä a'bhë 'n ɔ 'kä ‑jie 'mö ‑wʋʋ,

a'aa'ɛ ‑bhölɩ.»

32 Aglipaa a'bhë,

'n ɔ yiɛ Fɛtusɩ 'dɩ 'nyɛ nɩɩ:

«Ɔ 'nɩ a ‑bhlɛ nɩɩ,

'bhlɩlowli 'kɔdɔɔ a'bhë mɔɔ nɩ ‑dɩ 'ɔ wɛlɩɩ 'wlu nʋʋ,

‑a yo a ‑jie 'mö ‑sɛ.»