Nʋnʋlii 25

Pɔɔlʋ lɛ Sezaa a'bhë mɔɔ nɩ 'yɩ 'ɔ wɛlɩɩ 'ylɩmö

Fɛtusɩ 'libhïä 'kämanɔɔ 'wʋ Felisɩ a 'bhle 'mö 'wëë,

'ylɩ ta 'plɩɛ,

'n ɔ yiɛ 'wʋ ‑sɔ,

ɔ 'bhööä ‑mä Sezalee,

'n ɔ yiɛ ‑mä Zeluzalɛɛmö mö.

2 Ɔ ‑Wʋ ‑mä,

Zwiiföwaa 'a Lagɔbʋbɔwaa a 'kifiea,

wa ‑nyɛ 'nglɩkäwa 'kädɩ 'sɔ,

'n wa yiɛ ‑lɛ ɔ yɔwʋ Pɔɔlʋ 'klɛnɩɛ yi,

wa lɛ naa:

3 «‑Jienyɔɔ Pɔɔlʋ,

‑ɔ ‑wʋä ‑mä Sezalee,

‑yayaya,

‑sɔɔ ‑mä ‑n 'kɔ mä'ä Zeluzalɛɛmö ‑lɛmö.»

'Fʋ wa'aa sa'a gbä,

‑maa wa yɛ 'dɩ 'zʋ 'wë nɩɩ,

Pɔɔlʋ ‑kä ‑mä Sezalee 'bhöö,

ɔ ‑kä ‑mä Zeluzalɛɛmö mö dɔ'wʋ ‑wʋʋ,

wa 'kɔ ‑mä 'yio 'wʋ 'lɩbhänɩ.

4 ‑Maa wa gbää sa'aa,

Fɛtusɩ lɛ naa:

«‑Mä Sezalee mä ɔ ‑wʋnɩɛ da'a ‑jie 'möö,

‑mä nɛnɩ.

Na'bhë 'ylɩya ‑kä ‑sɩkaa 'plɩɩ ‑mä n 'kää 'bɩwʋ mö.

5 Zaa,

n ‑kä möä yii,

'a 'kädɩɩ wa nya'mö nɩ mönɩ yɔwʋ,

‑a ‑kä ‑mä Sezalee ghlɛɛ,

nɩkpɛɛ a gaa da'aa,

‑lu ɔ ‑kä nyimaa,

wa 'kɔ ‑mä 'klɛnɩ.»

6‑7 Fɛtusɩ 'nɩɛ ‑mä Zeluzalɛɛmö gwälɛ.

'N ɛ 'nɩ ‑bhö 'ylɩ ‑gbʋäta,

ɛ yi 'ylɩ kʋgbä a sɛ,

'mö ɔ ‑sɛɛ ‑mä cuu,

'n ɔ yiɛ ‑mä Sezalee 'bɩwʋ mö.

Zwiiföwaa 'a 'kädɩɩ 'mämö.

Fɛtusɩ ghlɛɛ glɔ cuu,

zlɩ zɩɛ,

‑zijlea 'mö ɔ ‑dɩɛ.

'N ɔ yiɛ nɩkpa tie,

'n wa yiɛ Pɔɔlʋ kie mö.

Pɔɔlʋ yiɛ cuu,

Zwiiföwaa ‑wa 'bhööä ‑mä Zeluzalɛɛmö,

'n wa yoo binɩ,

'n wa yoo 'kïbhï a 'kädɩ ‑gömö sɛ slu.

‑Maa dɛ wa 'yɩnɔɔ 'ylɩmö 'n ɔ yiɛ ‑sɩbhä 'zʋʋ,

wa gla'mö a nɩkpɛ a ‑mɔ 'kä ‑lɛ sɩbhänɩɩ,

ɔ'ɔɔ ‑bhölɩ 'lɩlɩlɩ.

8 'N Pɔɔlʋ yiɛ ‑gömö ‑sɛ,

ɔ lɛ naa:

«‑Abhʋa Zwiiföwaa,

ɛ yi ‑a'a gböö mi oo,

ɛ yi Lagɔbudu 'Kɔdʋʋ mu oo,

'bhlɩlowli 'kɔdɔɔ ‑ɔ ‑wʋä ‑mä Ghlɔɔmö,

ɛ yi 'ɔ 'kämanɔɔ mu oo,

yɩ 'wuë a dɔ'wʋ n'n‑ä ‑bhlɛ tɛkäsɛ wɛlɩ nyima.»

Sa'a Pɔɔlʋ gbää.

9 ‑Maa Fɛtusɩ,

ɔ yɩbhä Zwiiföwaa 'kä ɔ 'dɩ a dɩ ‑sɛ zaa,

Pɔɔlʋ gbää sa'aa,

'n ɔ yoo nimï 'yɩbhä nɩɩ:

«‑N yɩbhä bhä ‑a nɩ mö ‑mä Zeluzalɛɛmö,

na'bhë a 'yila 'klʋ,

‑na'a wɛlɩɩ 'kä ‑mä bhïlonɩ ‑a?»

10 Ɔ gbää sa'aa,

Pɔɔlʋ lɛ naa:

«'Bhlɩlowli 'kɔdɔɔ 'a ‑zijlituwaa 'yila 'klʋ ‑lɛ n ‑wʋä dɛ'ɛ,

zaa dɛ'ɛ wa kää wa 'kä 'na wɛlɩɩ 'wlu ‑dɩnɩ.

‑Na'bhë ‑n ‑yi sɛ nɩɩ,

n'n‑ä ‑bhlɛ Zwiiföwaa a dɛ ‑lizoku nʋ.

11 'N 'kïbhïzoku a ‑mii 'kää 'nglɩ ‑kä wa 'kä nɩkpɛ 'lɩbhä ɔ 'kä 'ku 'mö n ‑kä nʋʋ,

yɩ gbʋʋ ‑kaa ‑gömö ‑wʋʋ,

‑lɛ a kwie,

n ngulu 'wʋ n 'kɛ 'ku.

‑Maa Zwiiföwa nɩ,

kïbhïï 'wuë wa suluuä da'a ‑gömö sɛɛ,

yɩ gla'mö a 'kïbhë ‑bhlʋ a'bhë ‑a 'kää gbëaa glɩnɩ 'n a 'nɩ ‑mä ‑wʋʋ,

nɩkpɛ 'nɩɛ bhɛnɩ ɔ ‑ka'muë kä'mö plɩnɩ.

Yɩ ‑kä ‑sɩbhä 'mö ‑wʋʋ,

'bhlɩlowli 'kɔdɔɔ ‑ɔ ‑wʋä ‑mä Ghlɔɔmö,

mɔɔ 'kää 'na ‑zijlëa tu.»

12 Pɔɔlʋ gbää sa'aa,

Fɛtusɩ ‑nyɛ 'ɔ 'nɛɛnɩwaa 'sɔ wa 'yɩɛ kïbhë 'la 'ylɩmö 'wëë,

'n ɔ yoo 'dɩ 'nyɛ nɩɩ:

«‑Na'a wɛlɩ nɩ,

‑n ‑nɛɛ 'bhlɩlowli 'kɔdɔɔ mɔɔ nɩ ‑dii 'wlu zaa,

‑mä ‑n 'kää ‑tiamö mö.»

Wa yɛ Pɔɔlʋ ‑lɛ Aglipaa a 'yila 'klʋ ‑lɛ

13 'Ylɩya 'plɩɛ,

'kämanɩnyɔ ‑mɔmɔɔ wa laa Aglipaa^a,

ɔ ‑nyɛ ɔ nglʋdaayu ‑bhlʋ wa laa Belenisɩ 'sɔ,

'n 'wa yiɛ ‑mä Sezalee yi,

wa 'kä Fɛtusɩ bhälɩ.

14 Wa ‑sɛɛ 'ylɩyaa 'n Fɛtusɩ yiɛ Aglipaa Pɔɔlʋ 'a tɩtɩɩ 'nyɛ,

ɔ lɛ naa:

«Felisɩ lɛ 'kää möä yii,

ɔ tɩ mä'ä nɩkpɛ ‑bhlʋ ‑jie 'mö.

15 Nɩkpɛ 'la,

‑zlɩ n möä ‑mä Zeluzalɛɛmö,

Zwiiföwaa 'a Lagɔbʋbɔwaa a 'kifiea,

wa ‑nyɛ 'wa 'nɛɛnɩwa 'kädɩɩ 'sɔ 'n wa ‑yi'mɔɔ yɔwʋ 'klɛnɩɛ yi,

wa lɛ n nɩ gwanɔɔ gbʋ ‑gömö.

16 ‑Maa wa gbää sa'aa,

'n n yuëë 'dɩ 'nyɛ nɩɩ,

‑abhʋa Ghlʋmɛɛwaa,

‑a'a ‑lɔɔ 'mö a dɔ'wʋ,

wa ‑kä nɩkpɛ 'klɛɛ,

n ‑a 'nɔ 'tɛnyɩ 'nyɛ,

ɔ 'kä ‑wa 'klɔɔ a'bhë a 'yila 'klʋ ɔnyɩ a dɛ bhïla ‑a 'kɩ sasɛ 'ylɩmö 'wëë,

‑aaa ‑kä ‑a 'kʋänyɩ kä'mö plɩnɩ.

17 ‑Sɩbhä a za,

n 'bhööä ‑mä Zeluzalɛɛmö,

n yiɛ mä'ä Sezalee 'bɩwʋʋ,

'n wa yiɛ yimö.

N ghlɛɛ glɔɔ,

n'n‑ä 'wuë bʋanɩ,

‑maa zlɩ zɩɛ cuu,

‑zijlëa 'mö n ‑dɩɛ,

'n n yiɛ nɩkpa tie,

'n wa yiɛ nɩkpɛ 'la kie mö.

18 Ɔ yiɛ ‑wa yo a‑a 'klɛɛ,

wa ‑sɛnɩ abhlɩ 'mö,

‑maa ‑lizokuu n ‑tɔnɩ a‑a na a ɔ nʋʋ,

wa'aa 'wuë yɩ gla'mö a 'kïbhë ‑bhlʋ a'bhë sɩbhänɩ 'lɩlɩlɩ.

19 Wa ‑nyɔɔ 'sɔ,

'wa Lagɔbʋbɔsaa a gbʋʋ 'mö wa kpɛnɩɛ 'mö,

'n nɩkpɛ ‑mɔmɔɔ ‑bhlʋ wa laa Zezwii ‑ɔ yɛ a 'ku 'wë,

Pɔɔlʋ gbää ‑ɔ yɛ glu 'wlʋ ‑ɔ ‑bhölɩ 'yize,

'ɔ wɛlɩɩ,

'n wa yi'ɛ 'mö kpɛnɩ.

20 Sa'a a wɛlɩɩ,

n'n‑ä na a sɛ n 'kɩ 'wlu ‑dɩɛ ‑yi zaa,

'n n yiɛ Pɔɔlʋ 'dɩ 'nyɛ nɩɩ,

ɔ ‑kä 'wʋ ngluu,

ɔ 'kä ‑mä Zeluzalɛɛmö mö,

‑zijlea 'kä ‑mä pälɔnɩ.

21 ‑Maa ɔ lɛ naa,

'bhlɩlowli 'kɔdɔɔ Sezaa a'bhë mɔɔ nɩ ‑dɩ 'ɔ wɛlɩɩ 'wlu.

‑Sɩbhä a za n gbää nɩɩ,

wa nɩ ‑koo ‑bhlɛ 'yize,

n 'kɔ zɩla'a ‑mä Ghlɔɔmö 'yio 'wʋ 'pä.»

22 Fɛtusɩ 'nyɛɛ sa'a Aglipaa 'dɩ 'wëë,

ɔ lɛ naa:

«N kɩ 'nʋ,

‑maa na'bhë,

n yɩbhä ɔ nɩ ‑sɛnɩ dɛ'ɛ na 'yila 'klʋ 'mö,

n 'kɔ 'yukwli ‑pʋnɩ.»

Fɛtusɩ lɛ naa:

«N kɩ 'nʋ,

zlɩ ‑kä zɩɩ,

‑n yo 'yukwli ‑pʋnɩ.»

23 Zlɩ zɩɛ,

Aglipaa ‑nyɛ Belenisɩ 'sɔ,

nɩkpa 'kɔkɔmlɛ ‑gänuë,

'n wa yiɛ ‑mä 'wluyɩbhäbudu 'mö plɛ,

wa ‑nyɛ 'slʋjaa a 'kifiea ‑nyɛ ‑mä Sezalee a 'nglɩkäwaa 'kädɩɩ 'sɔ.

'N Fɛtusɩ yiɛ nɩkpa tie 'n wa yiɛ Pɔɔlʋ kie mö,

'n wa ‑nyɔɔ yiɛ yi.

24 'N Fɛtusɩ yiɛ 'wʋ ‑sɔ,

ɔ lɛ naa:

«‑Atʋ Aglipaa,

n bhälɩmö.

A 'wuë abhʋaa ‑wʋmöä dɛ'ɛɛ,

n bhälanyɩ.

‑Maa nɩkpɛ nɩ ‑ɔ 'nɩgbönyɩɛ dɛ'ɛ 'yila 'klʋʋ,

'mö Zwiiföwaa 'kɔkɔmlɛ ‑yiiɛ yɔwʋ 'klɛnɩɛ.

Wa 'klɛnɩ'mɔ ‑mä Zeluzalɛɛmö yɔwʋ,

'n wa ‑yi'mɔ'ɛɛ mä'ä Sezalee yɔwʋ 'klɛnɩ.

'N wa kpaa 'mö nɩɩ:

wa nɩ 'lɩbhɔ ɔ 'kä 'ku.

25 Na 'yize a dɔ'wʋ,

'kïbhë a ‑maa 'kää 'nglɩ ‑kä wa 'kɔ 'lɩbhä ɔ 'kä 'kuu,

n 'nɔnyɩɛ ‑gömö ghlɩ.

‑Sɩbhä yɩ ‑wʋ 'mö,

‑maa ɔ'bhë ɔ lɛ nɩɩ,

'bhlɩlowli 'kɔdɔ Sezaa a'bhë ‑ɔ ‑wʋä ‑mä Ghlɔɔmö,

mɔɔ nɩ ‑dɩ 'ɔ wɛlɩɩ 'wlu.

Nza n gbää nɩɩ,

n yo ‑mä 'yio 'wʋ 'pä.

26 ‑Maa n ‑kɔɔ ‑Alowli 'yio 'wʋ 'pää yii,

'bɔgʋʋ n 'kɔɔ ‑gömö 'zʋʋ,

n'n‑ä sɛ n 'kʋ 'mö 'cɛlɩmöcɛlɩmöä ‑yi.

Nza n wäzɩnɔɔɔ dɛ'ɛ a 'yila 'klʋ,

‑nmö ‑Atʋ Aglipaa,

‑na za a'bhë n wäzɔɔɔ.

‑Lɛ a dɔ'wʋ,

ɔ ‑kä ‑sɩkaa 'mö ‑sɛnɩ,

‑a ‑kä sasɛ 'ɔ wɛlɩɩ 'ylɩmö 'wëë,

kïbhëa n 'kää ‑Alowli 'wʋ 'cɛlɩɩ,

'n n 'kaa yɩbhlɩnɩ.

27 ‑Maa wa ‑kä 'bhlɩlowli 'kɔdɔ ‑jienyɔ 'yio 'wʋ 'pää,

'n kïbhïï ‑yɩ ‑wɔɔɔ ‑gömö a'bhë,

wa 'ni sɩbhänɩ 'lɩlɩlɩ,

na dɔ'wʋ,

yɩ'ɩɛ nɛnɩ.»