Nʋnʋlii 28

Pɔɔlʋ ‑wʋ ‑mä gïnyɛlekpëa wa laa Malɩtɩ 'klʋʋ

‑A 'pʋä nyuu ngli 'wëë,

‑mä a nɩkpaa,

'n wa ‑yinyɩa'aa 'dɩ 'nyɛ nɩɩ,

gïnyɛlekpë 'la 'klʋ a bhlɩɩ,

ɛ nglɩɛ Malɩtɩ.

2 Malɩtɩ a nɩkpa 'la,

dlɩ zɛmö wa nɛnɩɛ tenyii ‑aa dɔ'wʋ.

‑Aa 'kɔkɔmlɛbhë 'la,

‑sɩbhä wa pälanyɩɛ.

'Nyizakwë lɩbhää zaa,

wëtlokwëa a za 'n wa yiɛ ‑kosugbagbʋ 'yi ‑dɩ,

a‑a yuë binɩ.

3 ‑A ‑wʋ 'wɔlɔ dɔ'wʋ,

'n Pɔɔlʋ yiɛ 'clɛkwa 'pili ɔ 'kɩ ‑mä ‑kosu 'mö 'pä,

‑maa yɩ kä 'bhʋtɩmɛ 'mö,

ɔ'ɔɔ sɛ ‑yi.

Ɔ 'piliɛ ɔ 'kɩ ‑mä ‑kosu 'mö 'pää,

'n kɔslʋ yiɛ 'bhʋtɩmɛɛ köbhä,

'n ɛ yiɛ 'ɔ kätɩkpaa glɛ.

4 ‑Glɔ 'la 'mö a nɩkpaa 'yɩɛ 'bhʋtɩmɛɛ 'ylɩmö,

ɛ ‑glɛɛ Pɔɔlʋ 'a kätɩkpaa,

wa lɛ naa:

«Nɩkpɛ nɩ 'kulɩbhänyɔ ɔ glɩnɩɛ ‑kamä.

Ɛ'ɛ ‑bhö nyɩasɛ,

‑maa ɔ yɛ gïnyɛɛ ngli 'pʋ abhlɩ,

‑maa Lagɔ,

'mö ɔ zlɔnɩɛ zaa,

ɔ'ɔɔ 'yɩbhä 'lɩlɩlɩ ɔ nɩ ‑bhölɩ.»

5 'N Pɔɔlʋ yiɛ 'ɔ kätɩkpaa 'mö vïti,

'n tɩmɛɛ yiɛ ‑mä ‑kosu 'mö bhlinɩ,

käbölu a'bhë 'nɔɔ ghlɩ 'lɩlɩlɩ.

6 Nɩkpa 'la wa ‑tɔnɩ wabhlɩ Pɔɔlʋ 'ghlɩ ɔ 'kä 'ghlɩ cuu ɔ 'kä bhli,

ɔ 'kä 'ku.

‑Maa ‑lɛ gwälɛɛ 'möö,

käbölu 'nɔɔ ghlɩ 'lɩlɩlɩ.

Wa 'bhɛlɔ'ɛɛ 'möö,

wa lɛ nɩkpɛ nɩ a'bhë,

‑lagɔ a ‑mumuu ɔ glɩnɩɛ.

Pɔɔlʋ yɛ nɩkpɛɛ wa laa Publiusɩ a dɩba yɛmanɩ

7 ‑Mi'la 'plɩɛ 'wëë,

nɩkpɛ 'kɔdɔɔ ‑ɔ 'kämanɩɛ bhlɩ 'la ‑gömöö,

ɔ nglɩɛ Publiusɩ,

ɔ glɩnɩdaa,

‑lɛ 'nɩɛ ‑glɔɔ dɛ 'bhʋɔnɩ zaa 'n ɔ ‑yinyɩɛ ‑mä 'ɔ 'ligbëa 'mö wäzɩnɩ,

'n ɔ ‑yinyɩɛ sasɛ päla 'tɩɩ,

‑a gʋʋnɩ ‑mä 'ylɩ ta.

8 ‑Maa Publiusɩ a dɩba,

ɔ'ɔɔ ‑yɛ.

‑Su ɔ suä tenyii,

dlumlɩɩ lɩbhɔɔ.

Nɩkpɛ 'la 'mö Pɔɔlʋ ghlɩɛ ‑mä,

'n ɔ yoo kätɩkpö 'wlu zʋ,

'n ɔ yoo 'wlumö bhibhe 'n ɔ yiɛ yɛmanɩ.

9 Guzuwa ‑mumuë ‑wa ‑wʋä ‑mä bhlɩ 'la 'möö,

wa 'nwiɛ,

'n wa yiɛ yi,

'n Pɔɔlʋ yuë yɛmanɩmö.

10 Malɩtɩ a nɩkpa 'la wa tulanɩnyɩ tenyii 'wa kɛgänɔɔ 'ylimö,

‑sɩbhä a za,

‑a lɛ 'kää möä yii,

'yiobhlinɩlii 'wuë,

mʋa nyɩanyiɛ.

Pɔɔlʋ yɛ ‑mä Ghlɔɔmö ghlɛ

11 ‑A ‑sɛ ‑mä Malɩtɩ‑bhölɩɩ 'mö 'cwɩ ta,

a‑a yiɛ 'wʋ ‑sɔ.

‑Maa Alɛzadlii glɔ 'mö a batoo ‑bhlʋ 'mö wa laa pʋwalagwɩ.

‑Mä Malɩtɩ a ‑glɔ ‑mumuu ‑bhlʋ yɔwʋ,

‑lɛ wʋ köbhänɩ a‑a 'kïkë.

Wʋ ‑glɛ ‑lɛ ‑këë,

'n wëtlokwë 'kädaa a cwɩɩ yiɛ 'plɩ.

Batoo 'la,

mö ‑a 'libhïä 'wʋ a‑a yiɛ mö.

12 ‑A möä,

glɔ ‑bhlʋ wa laa Silakusɩ a‑a yiɛ ‑mä 'kïkë köbhä,

‑a ‑sɛ ‑mä 'ylɩ ta.

13 ‑A 'bhööä ‑lɛ,

batoo ‑wʋ kïkëa tɩtlɩnɩ dɔ'wʋ ‑këë,

‑glɔɔ wa laa Ghlezio yɔwʋ,

a‑a yi'ɛɛ ‑lɛ 'kïkë köbhä.

Zlɩ zɩɛ,

‑mä gïnyɛ a pɩɔ 'yli,

'n 'vuu yiɛ ‑mä 'bhöönɩ.

Wʋ za batoo 'pulo wʋ 'puloa'aa.

'Ylɩ 'sɔ 'plɩɛ cuu,

‑glɔɔ wa laa Puzoolɩ yɔwʋ,

a‑a yiɛ ‑lɛ 'kïkë köbhä.

14 ‑Mä ‑glɔ 'la 'mö,

‑a ghlɩnɩ ‑mä Zezwii a ‑nʋä ‑mumuë.

‑A ghlɛɛ ‑mä wa lɛ ‑a nɩ ‑sʋä 'dimasi ‑bhlʋ yɔwʋ.

‑A 'bhööä ‑lɛ,

a‑a yiɛ ‑mä Ghlɔɔmö mö.

15 ‑Maa Zezwii a ‑nʋa ‑wa ‑wʋä ‑mä Ghlɔɔmö,

wa yɛ a ‑pa ‑aa 'tɩtɩ 'nʋ nɩɩ,

‑a ‑wʋ ‑mä yi dɔ'wʋ zaa 'n wa ‑yinyɩɛ 'yio 'wʋ yi.

Wa gla'mö a ‑mumuë yi ‑këë,

‑glɔɔ wa laa Apiusɩ a pɛlʋʋ 'wʋ,

'n wa yiɛ ‑mä ghlɛɛ,

‑mä wa ‑kʋnɩnyɩɛ.

‑Mumuë wabhlɩ,

dɛ wa laa Lɛgäwa a ‑bïdi taa,

‑lɛ wa 'bhlenɩɛ,

‑lɛ wa ‑kʋnɩnyɩɛ.

Nɩkpa 'la,

‑a ghölʋää yɔwʋʋ,

Pɔɔlʋ 'yuëë 'ylɩmöö,

'n swɩ yoo tenyii nyɛmʋ 'mö yi,

'n ɔ yiɛ Lagɔ a 'nglɩ 'ghlimanɩ.

16 A‑a yia'aa ‑mä Ghlɔɔmö glɔ ghlɛ.

‑A ghlɛɛ ‑mä,

‑gɔmlɩwaa,

wa'aa Pɔɔlʋ ‑jiebudu 'mö zʋ,

‑maa 'yi wa 'tatinɔɔ,

ɔ 'kä 'ɔ dɛ glɩ,

wa lɛ naa,

'slʋjeyi ‑bhlʋ mɔɔ nɩ ‑koo.

Pɔɔlʋ yɛ ‑mä Ghlɔɔmö Lagɔwɛlɩɩ bhïlanɩ

17 ‑A ghlɛɛ ‑mä Ghlɔɔmö 'wëë,

'ylɩ ta 'plɩɛ,

‑mä a Zwiiföwaa a 'yukugänɩwaa,

'n Pɔɔlʋ yuëë ‑mä 'ɔ mä'a wäzɩnɩ.

Wa 'yɩbhää ‑mä 'wluu,

'n ɔ yuëë 'tɩtɩ 'nyɛ,

ɔ lɛ naa:

«‑A'bhɩanyɩ,

‑jienyɔ n glɩnɩɛ dɛ'ɛ.

‑Aa dɩbawaa 'a ‑lɔɔ wa tɩɩnyɩɛ yɔwʋʋ,

n'n‑ä ‑bhlɛ wʋ dɛ ‑lizoku nʋ,

n'n‑ä'ɛ ‑bhlɛ ‑a'bhɩa Zwiiföwaa ‑lizoku 'wlu nʋ.

‑Maa ‑sɩbhä yɩ ‑wʋ 'mö,

‑mä Zeluzalɛɛmö,

wa'bhï 'n wa ‑yiiɛ köbhä 'n wa ‑yiiɛ Ghlʋmɛɛwaa kä'mö plɩnɩ.

18 Ghlʋmɛɛwaa 'la 'yɩɛ wabhlɩ 'na wɛlɩɩ 'ylɩmöö,

'kïbhë a ‑maa 'kää 'nglɩ ‑kä n 'kä 'lɩbhɔ 'n 'kä 'kuu,

wa ‑nɩ'maa ‑gömö ghlɩ zaa,

wa yɩbhä a nyɩasɛ wa ‑kaa 'yi 'tatinɩ.

19 ‑Maa ‑a'bhɩa Zwiiföwaa 'nɩɛ 'wʋ nglu 'lɩlɩlɩ.

‑Sɩbhä a za n gbää nɩɩ,

yɩ ‑kä ‑sɩbhä 'mö ‑wʋʋ,

'bhlɩlowli 'kɔdɔɔ Sezaa a'bhë mɔɔ nɩ ‑dɩ 'na wɛlɩɩ 'wlu.

Yɩ za n yiɛ mä'ä,

‑maa na'bhë n 'kʋä 'klɛ a za n'n‑ä yi.

20 ‑A'bhɩanyɩ,

wɛlɩɩ n kää 'mlɩɩ,

miɛ da'a,

nza n wäzanyɩɛ n 'kanyɩ 'dɩ 'nyɛ.

‑Maa sɛ'ɛ n gbää nɩɩ,

n ‑kä dɛ'ɛ ‑jienyɔ glɩnɩɩ,

ɛ'ɛ ‑bhö nyɩasɛ,

‑maa Puënyɔɔ Yizlaɛlɩ a ‑nʋa 'wuë ‑kʋnɩɛ,

sɛ n 'tɛɛnɔɔ dlɩ a za,

nza wa paaaa ‑jie 'mö.»

21 Pɔɔlʋ 'nyʋää sa'a 'dɩɩ,

wa lɛ naa:

«‑A kɩ 'nʋ,

‑maa ‑mä Zwidee‑bhölɩɩ 'mö,

'bɔgʋ a ‑muu ‑kanyɩɛ ‑na 'dɩ 'nyɛɛ,

wʋ'ʋä ‑bhlɛ ‑mä 'bhöönɩ.

‑A'bhɩa ‑wa ‑wʋä ‑mä,

wa ‑nɩnyɩɛ ‑bhlɛ ‑na za nɩkpɛ 'wʋ tie.

‑Aaa'ɛ ‑bhlɛ ‑na wɛlɩzoku pöpölɩ 'mö 'nʋnɩ.

22 ‑Maa ‑mi ‑a ‑yiɛ cuu miɛ nɩɩ,

‑zɩkpa nɩ ‑n ‑wʋmöä dɛ'ɛ 'möö,

a wɛlɩɩ,

‑a'bhɩa Zwiiföwaa ‑wa ‑wʋä saa 'wuë,

wa 'niɛ ‑wa.

‑Sɩbhä a za,

wɛlɩ 'la,

‑a yɩbhä nɩɩ,

‑na'bhë sɛ ‑n pää yɩ dɔ'wʋ dlɩɩ,

nyɩanyɩ ‑sɩbhä 'dɩ.»

23 Ylɩɩ Pɔɔlʋ ‑nyʋä 'sɔ wa 'kää 'sɔ 'wʋ gbanɩɩ,

'n wa yee ‑dɩ 'wë 'n wa yiɛ mö.

Ɛ ghlɛɛ,

wa'aa ‑mä tɩtɩnɩ,

'n wa yiɛ yi,

‑mä Pɔɔlʋ a mä'a 'n wa yiɛ ‑mä 'wlu 'yɩbhä.

Wa 'yɩbhää 'wlʋʋ,

tɛɛnɩ 'zɔkpɔ 'mö,

Pɔɔlʋ ‑wuë dlɩ ‑gömö ‑sɛsɛnɩ dɔ'wʋ ‑këë,

'n ‑kidosɛ yiɛ ghlɛ.

'Pɩwʋ mää Lagɔ 'kämanɩɛ a wɛlɩɩ 'mö ɔ nyʋää.

Sa'a ɔ 'nyʋää Zezwii a 'dɩ wa 'kä 'ɔ wɛlɩɩ 'wʋ nglu.

Ɔ ‑wuënyɩɛ 'nyɛ dɔ'wʋʋ,

Moyizɩ ‑nyɛ Lagɔ 'a bhla'mö a 'möbhïlanɩwaa 'sɔ 'wa Lagɔwɛlɩɩ a 'bɔgwɩɩ,

yɩ 'mö a kïbhï ‑mimii,

'mö ɔ libhïä 'wʋ 'n ɔ nyʋänyɩɛ.

24 Ɔ 'nyʋänyɩɛ,

‑mumuë ngwli 'wʋ,

‑mumuë 'niɛ 'wʋ nglu.

25 Wɛlɩ 'la,

wa 'yize 'n wa yiɛ 'mö kpɛnɩ,

‑muë nʋ 'wa sɛ,

‑muë nʋ 'wa sɛ.

Wa lɛ 'käa'aa yɔwʋ ‑sɛnɩɛ yii,

'kïbhë ‑bhlʋ 'mö Pɔɔlʋ tuëë 'yukwli 'mö,

ɔ lɛ naa:

«Nyɩasɛ 'Wugɔmʋʋ 'Wlɩlɩ 'nɩɛ a Lagɔ a 'möbhïlanɩnyɔ Ezayii 'mö ghlɛnɩ,

'n ɔ 'kä a a dɩbawa 'dɩ 'nyɛ nɩɩ:

26‑27 Ngëyii n ‑sɛɛ ‑lɛ 'mö a nɩkpaa,

wa yɛ 'wa dilaa 'mö 'tumanɩ,

'na wɛlɩɩ tuëa dila zɛmö plɛ.

Wa yɛ 'yukwïla 'wʋ 'su,

wa tɩa 'na wɛlɩɩ 'mö 'nʋ.

Wa yɛ 'yila 'wʋ ngämö,

wa tɩa ‑lu 'ylɩmö.

Wa'aa 'yɩbhä wa 'kä ligba wa ‑kaa yɩbhlɩnɩ,

n tuëa puë a za.

‑Sɩbhä a za,

mö ‑n 'kʋä 'dɩ 'nyɛ nɩɩ,

Lagɔ lɛ naa:

A yi 'na wɛlɩɩ 'yukwli ‑pʋnɩ ‑kë,

a 'naa 'kɩ 'mö 'nʋ.

'A yilaa yi lɩ ‑kë,

a 'naa 'kä ‑lu 'ylɩmö.^a

28 Zaa,

abhʋa n nyɛɛ dɛ'ɛ 'dɩ nɩɩ:

Lagɔ 'a 'pʋpʋɛ a wɛlɩɩ,

Lagɔ a'bhë kɩ ‑waaa Zwiiföwa glɩnɩ 'wʋ ghälaa,

mʋa 'kɩɛ wabhlɩ 'yukwli ‑pʋnɩ,

mʋa 'kɩɛ 'wʋ nglu.» [

29 Pɔɔlʋ gbää sa'aa,

Zwiiföwaa,

wa ‑wʋ tenyii kpɛnɩ dɔ'wʋ 'n wa yiɛ mö.]

30 ‑Maa Pɔɔlʋ ɔbhlɩ,

‑mä 'ɔ 'ligbë 'la 'mö,

ɔ ‑sɛ ‑mä 'ylʋbö 'sɔ.

‑Ɔ ‑kä ɔ 'kɔ 'ylɩmöö,

‑gɔmlɩwaa 'nɔɔ 'yio 'wʋ ‑sɛ.

31 Wa 'wuë,

'pɩwʋ mää Lagɔ 'kämanɩɛ a wɛlɩɩ 'mö ɔ nyʋää.

‑Alowli Zezwii Kliisɩ 'a wɛlɩɩ 'wuë,

mö ɔ ‑sɛsɛnuëë dlɩ ‑gömö gbëaa,

‑bɛ 'nɩ 'nyɛkɔ ‑këpë.