Zaa 14

'Yioo ‑wʋ kwää ‑mä Lagɔ yɔwʋʋ

'N Zezwii yiɛ ɔ ‑nʋa 'dɩ 'nyɛ nɩɩ:

«Dlɩ nɩ tanyɩ 'yli klɛ ‑maa a nɩ 'tɛɛnɩ Lagɔ dlɩ,

a nɩ 'tɛɛnɩɩ'ɛ dlɩ.

2 ‑Mä na dɩba Lagɔ a mä'a,

'bhli a ‑bɛ ‑wʋ ‑mä.

Zaa,

n yɛɛ ‑mä a 'bhli 'wlu gïganɩɛ mö.

Yɩ 'nɩ a ‑sɩbhä ‑wʋʋ,

'naa 'kanyɩ a sa'a 'dɩ 'nyɛ.

3 ‑Maa n ‑kä mö,

n ‑kä a 'bhli 'wlu gïganɩ 'wëë,

n yeanyɩ kie yi,

n ‑nyɛ abhʋa 'kä mö,

nzɩɩ 'na dɛ n ‑wʋä,

a 'kä ‑lɛ ‑wʋmö.

4 Mä n ‑wʋä dɛ'ɛ mö dɔ'wʋʋ,

'yioo a 'kää 'wʋ ghlɛnɩ a 'kä ‑mä möö,

a ‑yuu.»

5 Zezwii gbää sa'aa,

Tomaa lɛ naa:

«‑Alowli,

‑aaa yɩ mä ‑n möä ‑yi nɩɩ,

sɛ ‑a 'kä bhä ‑mä a 'yioo 'mö ‑yimöyimö 'nɩ?»

6 Zezwii lɛ naa:

«‑Amöö glɩnɩɛ 'yioo,

‑amöö glɩnɩɛ gbëaa,

‑amöö glɩnɩɛ ‑bhölɩbhölɛ.

Nɩkpɛ 'nɩɛ bhɛnɩ ɔ 'kä ‑mä na dɩba a mä'a mö 'n ɔ ‑nɩɩ 'mö ghlɛnɩ.

7 A ‑kaa a ‑yii,

a yi a na dɩba yɩbhlɩnɩ,

‑sɩkaa a dɔ'wʋ,

a ‑yoo,

a kɔ 'ylɩmö.»

8 Ɔ gbää sa'aa,

Filiipö lɛ naa:

«‑Alowli,

‑aa dɩba Lagɔ,

tulanɩnyɔ 'ylimö cuu,

‑a'a dilaa 'kä bhli.»

9 Zezwii lɛ naa:

«Filiipö,

a ‑nya'mö ‑bhlinɩɛ 'wʋ a daa yɛ 'mö gwälɛ,

‑n ‑nɩɩɛ bhä ‑bhlɛ yɩbhlɩnɩ 'yize ‑a?

Sɛ'ɛ n gbää nɩɩ,

‑ɔ ‑kaa 'ylɩmöö,

ɔ yɛ 'gämö na dɩba 'ylɩmö.

Sɛ yɩ ‑wʋ ɔ 'mö n‑n nʋ nɩɩ,

tulanɩnyɩ ‑aa dɩba Lagɔ 'ylimö 'nɩ?

10 ‑Nn bhä dlɩ 'wʋ ‑kä nɩɩ,

n ‑wʋ ‑mä na dɩba 'mö,

na dɩba ‑wʋʋ 'mö ‑a?

Wɛlɩɩ n nyanyɩɛ,

nanyɩgäsɛ ‑amö yɩ'ɩɛ 'mö 'bhöönɩ.

‑Maa na dɩba ‑ɔ ‑wʋʋä 'möö,

mɔɔ ghlɛnɩɩɛ 'mö 'n ɔ nʋä 'ɔ libhoo.

11 N ‑kä nɩɩ,

n ‑wʋ ‑mä na Dɩba 'mö,

'n na Dɩba ‑wʋä 'mö nʋʋ,

a nɩ kɩ ‑sɩbhä dlɩ 'wʋ.

‑Maa 'n a ‑nɩɩ a dlɩ 'wʋ ‑kää yi a'bhë ‑kë,

na dɩba 'a nʋnʋlii ɔ nʋnɩɩɛ 'mö a za,

a nɩ ‑kaaa dlɩ 'wʋ.

12 ‑Tiamö n nyanyɩɛ dɛ'ɛ 'dɩ nɩɩ,

‑ɔ ‑kaa dlɩ 'tɛɛnɩɩ,

'na nʋnʋlii n nʋä,

ɔ yi nʋmö.

Ɔ ‑nɩɩ ɔ 'kää na 'nglɩ 'mö nʋnɩ a'bhëë,

yɩ yi 'ghïli yɩ yi na ‑nɩɩ 'wʋ zi.

Ɛ'ɛ ‑bhö nyɩasɛ,

‑maa ‑amö na a,

na dɩba Lagɔ yɔwʋ,

‑mä n ‑wʋä mö dɔ'wʋ.

13 Zaa,

'saa a ‑kä na 'nglɩ 'mö 'yɩbhänɩ ‑kë,

n yu nʋ.

‑Lɛ a dɔ'wʋ,

Yuu yi Dɩba 'a 'ghïlinɔɔ 'yli 'wälanɩ.

14 Sɛ'ɛ n gbää nɩɩ,

'saa a ‑kä na 'nglɩ 'mö 'yɩbhänɩ ‑kë n yu nʋ.»

Zezwii lɛ ɔ yi ɔ ‑nʋa 'Wugɔmʋʋ 'Wlɩlɩ 'yio 'wʋ 'pä

15 «A ‑kaa ‑waa,

a yi 'na 'Gböö 'klʋkpamö zʋ.

16 ‑Amö na a,

n yi na dɩba yɔwʋ bhibhe,

ɔ 'kanyɩ kwänɩnyɔ ‑mɔmɔɔ 'yio 'wʋ 'pä.

Mɔɔ 'kanyɩɛ 'kwädlɩ ‑gömö ‑wʋ.

17 Gbëabhïlawugɔmʋʋ,

'mö n gaaa.

Nɩkpaa ‑wa glɩnɩɛ mä'ä 'pɩwʋ a 'yize a ‑nʋää,

wa 'naa 'kɔ 'ylɩmö,

wa 'naa 'kɔ yɩbhlɩnɩ zaa,

ɔ 'naa 'kʋä ‑gömö yi 'lɩlɩlɩ.

‑Maa abhʋa abhlɩ,

a ‑yoo.

Ɛ'ɛ ‑bhö nyɩasɛ,

‑maa abhʋa ɔ 'kää jijo'wʋ ‑wʋ,

ɔ 'kanyɩ ‑gömö ‑wʋ.

18 Sɛ'ɛ n gbää nɩɩ,

n 'naa 'kanyɩ mä'ä 'pɩwʋ kwɩyuë 'mö tɩ,

‑maa n yeanyɩ 'wʋ 'sɔ jijo'wʋ yinɩ.

19 ‑Lɛ ‑kä 'tikïyie 'wʋ 'mö gwälɛɛ,

nɩkpaa ‑wa glɩnɩɛ mä'ä 'pɩwʋ a 'yize a ‑nʋää,

wa 'naa ‑kaaa'a 'ylɩmö.

‑Maa abhʋa abhlɩ,

a ‑yii 'ylɩmö.

Ɛ'ɛ ‑bhö nyɩasɛ,

‑maa n ‑bhölɩ,

'n a'bhï a ‑yi ‑bhölɩmö.

20 ‑Lɛ a zlɩ 'la 'mö,

a yi 'mö 'nʋ nɩɩ,

na dɩba Lagɔ 'mö n ‑glɛɛ 'wʋ,

'n a ‑glaaa abhlɩ 'wʋ 'n n ‑gälanyɩ'ɛɛ na a 'wʋ.

21 Sɛ'ɛ n gbää nɩɩ,

'na 'gböö,

‑ɔ ‑kɩɩ 'wlumö zʋ,

sɛ yɩ gbää ‑ɔ ‑kä ‑sɩbhä nɛmöö,

mɔɔ ‑waaa ‑tiamö.

‑Ɔ ‑kaa sa'a ‑waa,

na dɩba Lagɔ yo ‑wamö,

n yo'ɛ na a ‑wamö,

n yo nanyɩ 'ylimö tulanɩ.»

22 Zezwii gbää sa'aa,

Zwiidɩ,

ɛ'ɛ ‑bhö Zwidaa^a Yisikalio mɔ,

ɔ lɛ naa:

«‑Alowli,

sɛ yɩ ‑wʋ ɔ 'mö,

nɩkpaa 'wuë,

n‑n 'naa 'kʋä bhä ‑nanyɩ 'ylimö tulanɩ wa ‑kamö 'ylɩmö,

n‑n gbä bhä ‑n ‑kanyɩ ‑aa 'yize ‑nanyɩ 'ylimö tulanɩ 'nɩ?»

23 Ɔ lɛ naa:

«'Fʋ n'n‑ä ‑sɩbhä gbä,

‑maa ‑ɔ ‑kaa ‑tiamö ‑waa,

'na wɛlɩɩ,

sɛ yɩ gbää,

ɔ yi ‑sɩbhä nɛmö.

‑Lɛ a dɔ'wʋ,

na dɩba Lagɔ yo ‑wamö.

N ‑nyɛ na dɩba Lagɔ 'sɔ,

‑a yi ‑mä 'ɔ mä'a mö,

‑a yi ‑mä ‑bhölɩnɩ.

24 Miɛ da'a,

‑maa ‑ɔ ‑nɩɩɛ ɔbhlɩ ‑waa,

mɔɔ 'nɩ 'zʋä 'na wɛlɩɩ 'klʋkpamöö.

‑Maa ‑lɛ a wɛlɩ 'la n nyanyɩɛ 'yizee,

nanyɩgäsɛ ‑amö yɩ'ɩɛ 'mö 'bhöönɩ,

‑maa na dɩba Lagɔ ‑ɔ tieaaa,

'mö yɩ 'bhöönɩɛ 'mö.

25 N ‑wʋanyɩɛ ‑bhlɛ dɛ'ɛ jijo'wʋ,

'n n yeanyɩɛ wɛlɩ nɩ wuë 'nyɛ.

26 ‑Maa n ‑kä mö 'wëë,

na 'nglɩ 'mö,

na dɩba Lagɔ yeanyɩ swɩnyɛmʋmöpänyɔ ‑mɔmɔɔ 'yio 'wʋ 'pä,

'Wugɔmʋʋ 'Wlɩlɩ mɔɔ.

Wɛlɩɩ 'wuë n 'nyanyɩɛ,

mɔɔ 'kanyiɛ 'wʋ ligbanɩ,

mɔɔ 'kanyiɛ dlɩ ‑gömö ‑sɛsɛnɩ.

27 N ‑wʋä dɛ'ɛ mö dɔ'wʋʋ,

'tɩɩglɩglɛ 'mö n tanyɩɛ yɔwʋ.

Nɩkpaa ‑wa glɩnɩɛ mä'ä 'pɩwʋ a 'yize a ‑nʋä,

'wa 'tɩɩglɩglɛɛ wa kää,

‑sɩbhä a ‑nɛ n 'nanyɩɛ yɔwʋ tɩ.

‑Maa 'tɩɩglɩglɛɛ ‑ɛ 'bhöönɩɩɛ 'mö,

'mö n tanyɩɛ yɔwʋ.

Zaa,

'a dilaa nɩ tɩ 'yli klɛ,

nganɔ nɩ tanyɩ 'lɩbhä.

28 N 'nyanyɩ a 'dɩ nɩɩ,

n yeanyɩ jijo'wʋ 'bhöö,

‑maa n yeanyɩ 'wʋ 'sɔ jijo'wʋ yinɩ.

'N a ‑kaa a ‑tiamö ‑waa,

sɛ n 'nyanyɩɛ 'dɩ nɩɩ,

‑mä na dɩba Lagɔ yɔwʋ ‑mä n ‑wʋä mö dɔ'wʋ,

‑sɩbhä yeanyɩ a 'mäna 'mö päla.

Ɛ'ɛ ‑bhö nyɩasɛ,

‑maa na dɩba Lagɔ mɔɔ 'ghïliɛ tenyii,

mɔɔ ziiiɛ 'wʋ.

29 ‑Lɛ a ‑li 'la 'wuë,

yɩ'ɩɛ ‑bhlɛ 'yli 'wlʋnɩ,

'n n nyanyɩɛ dɛ'ɛ yɩ 'dɩ,

nzɩɩ yɩ ‑käa'a 'yli 'wlʋnɩɩ,

a ‑kaa dlɩ 'wʋ ‑kä.

30 N ‑nyɛ abhʋa 'sɔ,

‑a 'naa 'käa'a ‑sɩkaa ‑bɛ 'wʋ bhïla.

Ɛ'ɛ ‑bhö nyɩasɛ,

‑maa zuzukuzoku a 'kifii ‑ɔ 'kämanɩɛ mä'ä 'pɩwʋ a nɩkpaa ‑gömöö,

ɔ ‑wʋ yi dɔ'wʋ.

'Lɩlɩlɩ a dɔ'wʋ ɔ ‑nɩɩɛ tɛkäsɛ ‑gömö bhɛnɩ.

31 ‑Maa 'bhlɩbhëa 'wuë 'kä sɛ yɩbhlɩmanɩ nɩɩ,

n ‑wa na dɩba Lagɔ nza sɛ ɔ nyɩaaa 'dɩɩ,

'n n zʋä ‑sɩbhä.

Zaa,

a nɩ ‑sɔ 'wʋ,

‑a 'kä mö.