A‑a nɩ ‑glɛ Zezwii 'wʋ
15
‑Tiamö a ghlɛzɛɛsuua,
‑amöä.
Na dɩba Lagɔ mɔɔ glɩnɩɛ wʋ ‑lowli.
2 Kïlaa ‑yɩɩ tlʋä,
'wʋ ɔ diɛ.
‑Maa kïlaa ‑yɩ tlʋä,
glumaa ɔ sɩɛ yɩ 'kä tenyii tlʋ.
3 Wɛlɩɩ n 'nyanyɩɛ,
yɩ kanyɩ glumaa yɔwʋ ‑sɛ 'wë a yɛ 'wlɩlɩ plɛ Lagɔ a 'yila 'klʋ a dɔ'wʋ.
4 Sɩbhä a za,
a nɩ ‑glaaa 'wʋ,
nzɩɩ n 'kanyɩ'ɛ na a 'wʋ ‑glɛ.
Ɛ'ɛ ‑bhö nyɩasɛ,
‑maa suklɩ 'nɩ ‑da 'yli ‑glɛɛ,
ɛ'ɛɛ bhɛnɩ ɛ 'kä 'bhë tlʋ.
Sɛ ‑bhʋlʋ ‑kpɔ 'la ‑sɩbhä a ‑nɩɩ 'wʋ ‑glɛɛ,
'n a 'nɩɛ bhɛnɩ a 'kä 'bhï tlʋ.
5 Sɛ'ɛ n gbää nɩɩ,
‑tiamö a ghlɛzɛɛsuu,
‑amöä,
abhʋa glɩnɩɛ 'na kïlaa.
‑Mɔ ‑kaa 'wʋ ‑glɛɛ,
'n ‑mɔ n ‑kä'ɛ na a 'wʋ ‑glɛɛ,
mɔɔ 'kää 'bhï a ‑bɛ tlʋ.
Ɛ'ɛ ‑bhö nyɩasɛ,
‑maa a ‑nɩɩ 'wʋ ‑glɛɛ,
a'aa bhɛnɩ a 'kä ‑lu nʋ.
6 ‑Ɔ ‑nɩɩ 'wʋ ‑glɛɛ,
suklɩ a ‑mɛ wa dɩ'ɛ 'wʋ,
wa pä'ɛ 'kwlɛ 'mö 'n ɛ yɛ'ɛɛ,
ɛ saa ‑sɩbhä ɔ ‑wʋä.
‑Maa ‑sɩbhä a sukïla 'la,
yɩ ‑käa'a yɛɛ,
'wʋ wa libhiɛ 'n wa zwiɛ ‑kosu 'mö,
'n yɩ siɛ.
7 A ‑kaa 'wʋ ‑glɛɛ,
a ‑kä 'wʋ nglu 'na wɛlɩɩ 'kanyɩ 'tɩɩ ‑suu,
'saa a ‑kä na dɩba Lagɔ 'yɩbhänɩ ‑kë,
ɔ yeanyu 'nyɛ.
8 A ‑kä 'bhï a ‑bɛ tlʋʋ,
mɩɩ 'ghlimanɩɛ na dɩba Lagɔ a 'nglɩ,
‑lɛ a dɔ'wʋ a yɛɛ na ‑gänɩwa 'zʋʋ.
9 Sɛɛ na dɩba Lagɔ ‑waaa,
sɛ ‑bhʋlʋ ‑kpɔ 'la ‑sɩbhä n ‑waanyɩɛ.
Sɛ n ‑waanyɩɛ 'kwädlɩ a da,
'a dilaa nɩ pö ‑lɛ.
10 Sɛɛ na dɩba Lagɔ nyɩaaa 'dɩɩ,
‑sɩbhä n zʋä zaa,
nza n ‑yiɛ sɛ nɩɩ ɔ ‑waa 'kwädlɩ,
a'bhï sɛ n nyanyɩɛ 'dɩ a ‑kä ‑sɩbhä 'zʋʋ,
a nɩ ‑yi sɛ nɩɩ,
n ‑waanyɩ 'kwädlɩ.
11 'Na sɛ n ‑wʋä 'mäna 'möö,
a 'käa ‑sɩbhä 'mäna 'mö ‑wʋmö,
nza n 'nyanyɩɛ ‑lɛ a wɛlɩ 'la.
‑Lɛ a dɔ'wʋ,
'a 'mäna yi 'klʋ yie.
12 Zaa,
sɛ'ɛ n gbää nɩɩ,
gba n 'panyɩɛ,
ma‑a nɩɩ,
sɛ n ‑waanyɩɛ,
a nɩ ‑wawanɩ ‑sɩbhä.
13 ‑Ɔ wlʋä ɔnyɩ 'mö ɔ 'kä ɔ bhɛya a 'wlumö 'kuu,
'ɔ ‑wawʋʋ mʋʋ 'ghïliɛ mʋʋ 'nɩɛ ‑sɩbhä a sɛ ‑wʋ.
14 Sɛ n nyanyɩɛ 'dɩ,
a ‑kä ‑sɩbhä 'zʋʋ,
‑lɛ a dɔ'wʋ,
na bhɛya a glɩnɩɛ.
15 ‑Ɔ glɩnɩɛ libhonʋnyɔɔ,
ɔ'ɔɔ ɔ 'bhidɩba 'a ‑lii a zɛmö ‑yi.
‑Maa abhʋa abhlɩ,
wɛlɩɩ 'wuë na dɩba Lagɔ nyɩaaa,
n kanyi sʋlʋnɩ 'wë.
‑Sɩbhä a za,
n 'nanyɩa'a na libhonʋwa la,
‑maa na bhɛya a glɩnɩɛ.
16 Abhʋa ‑nɩɩɛ ‑lɛ ‑sɛ,
‑maa ‑amöö ‑saanyɩɛ ‑lɛ,
'n n yeanyɩɛ tie a 'kä 'na libhoo nʋä mö.
Libho 'la 'kä 'bhï a ‑mii 'naa 'kää 'kwädlɩ 'yli bhɩɛ gwë glɛ.
'Saa a ‑kä na 'nglɩ 'mö na dɩba Lagɔ 'yɩbhänɩɩ,
ɔ yu nʋ.
17 ‑Maa 'dɩ n nyanyɩɛ dɛ'ɛ nɩɩ,
a nɩ ‑wawanɩ.
Mä'ä 'pɩwʋ a 'yize a ‑nʋa yeanyɩ ‑gblɩ
18 Nɩkpaa ‑wa glɩnɩɛ mä'ä 'pɩwʋ a 'yize a ‑nʋä,
wa ‑kaanyɩ ‑gblɩɩ,
a nɩ yɩbhlɩnɩ sɛ nɩɩ,
‑amö wa ‑gblɩɛ a za tɛɛ.
19 A ‑kä a mä'ä 'pɩwʋ a 'yize a ‑nʋä glɩnɩmöö,
wa 'bhɩa a glɩnɩ a‑a zaa,
wa yeanyɩ a ‑wa.
‑Maa ‑amöö ‑saanyɩɛ ‑lɛ mä'ä 'pɩwʋ a ‑nʋa jijo'wʋ nzɩɩ a 'kä na ‑nʋä glɩnɩ,
zaa a'a ‑bhöa'a mä'ä 'pɩwʋ a 'yize a ‑nʋä,
nza wa ‑gbïlanyɩɛ.
20 Wɛlɩɩ n 'nyanyɩ a‑a,
a nɩ ligbaniiɛ ‑ka 'wʋ.
Sɛ'ɛ n gbä'ɛ nɩɩ,
libhonʋnyɔ 'nɩɛ ‑zɩ 'ghïli ɔ 'kä ɔ 'bhidɩba 'wʋ zi.
Miɛ nɩɩ,
'n wa ‑kaa 'klɩ 'yɩaa,
wa yeanyɩ 'klɩ 'yɩamö.
Wa ‑kaa 'yukwli ‑pʋnɩ,
wa yeanyɩ 'yukwli ‑pʋnɩmö.
21 ‑Li 'la 'wuë,
sɛ a glɩnɩɛ na ‑nʋä a za,
nza wa 'kanyiɛ 'wlu nʋ.
Ɛ'ɛ ‑bhö nyɩasɛ,
‑maa ‑ɔ tieaaa,
wa 'nɔɔ ‑yi.
22 N 'nɩ a mä'ä wa jijo'wʋ yi n 'kʋä 'dɩ 'nyɛɛ,
wa'a a a gbʋ ‑gömö ‑kä.
‑Maa sɛ n yiɛ 'n n yuëë 'dɩ 'nyɛ 'wë,
'n wa ‑nɩɩɛ 'yukwli ‑pʋnɩ a za,
gbʋʋ ‑wʋ ‑wuëë ‑gömöö,
wʋ'ʋa'a ‑yayaya ‑kä.
23 Ɔ ‑kaa ‑gblɩɩ,
na dɩba Lagɔ 'mö ɔ ‑gblɩmöä.
24 ‑Wa ‑gblɩɩɛ sa'aa,
zɩzɛli a ‑mi käbönɩkpɛ 'nɩɛ bhɛnɩ ɔ 'kä nʋʋ,
n 'ni a mä'ä wa jijo'wʋ nʋnɩɩ,
'wa 'nyinylolii a gbʋʋ,
wʋ 'naa 'kʋä a ‑gömö tʋʋnɩ.
‑Maa ‑sɩkaa a dɔ'wʋ,
'na nʋnʋlii,
wa kɩ 'ylɩmö 'wë,
‑maa ‑sɩbhä yɩ ‑wʋ 'mö,
n ‑nyɛ na dɩba Lagɔ 'sɔ 'n wa ‑gblɩnyɩɛ 'yize.
25 Lagɔbɔgʋʋ wa ‑sʋä wa'bhïï,
wʋ 'mö a wɛlɩkïbhë ‑bhlʋ ‑a cɛlɩɛ ‑mä,
a 'kä 'yli 'wlʋnɩ a za,
nza ‑li 'la 'wuë 'plɩɛ sa'a 'wʋ.
Wɛlɩkïbhë 'la sɛ'ɛ a nʋä nɩɩ:
Nɩkpaa,
'fʋ wa ‑gblɩɩɛ.b
26 Miɛ abhlɩ da'a 'wë,
‑maa n ‑kä mö 'wëë,
‑ɔ 'kanyɩɛ swɩ nyɛmʋ 'mö 'pää,
ɔ yi yi.
Gbëabhïlawugɔmʋʋ,
‑ɔ 'bhöönɩɛ ‑mä na Dɩba dlɩ 'möö,
'mö n gaaa.
Mɔɔ 'kää na dɛ bhïla.
27 A'bhï,
a yi'ɛ na dɛ bhïlamö.
Ɛ'ɛ ‑bhö nyɩasɛ,
‑maa 'tɛnyɩ 'wuë n nʋnɩɛ mä'ä dʋdʋ 'wʋ Lagɔ 'a libhoo 'möö,
abhʋaa ‑nya'mö ‑bhlinɩ a‑a 'wʋ.