Zaa 13

Zezwii yɛ 'ɔ ‑gänɩwaa kʋgbä'sɔ ‑kpɔ kplɩ yɔwʋ wɔlʋ

Galɛ'möwlʋfɛtɩɩ ghlɛɛ,

Zezwii ‑yi sɛ nɩɩ,

ɔ 'kä mä'ä 'pɩwʋ 'bhöö,

ɔ 'kä ‑mä ɔ dɩba yɔwʋ mö a 'tɛnyɩ yɛ ghlɛ.

Zaa,

ɔ ‑nʋa ‑wa ‑wʋä mä'ä dʋdʋ 'wʋʋ,

sɛ ɔ ‑wʋä a‑a,

'n ɔ yuëë ‑sɩbhä 'ylimö tulanɩ.

2 Ɔ ‑nyɛ wa kʋgbä'sɔ ‑kpɔ 'sɔ 'n wa yiɛ 'wʋ linɩ.

‑Lɛ a 'tɛnyɩ 'la 'mö,

Simɔɔ Yisikalio a yowli Zwidaa,

Sataa kɔ 'wlumö nyima 'wë,

ɔ 'kä Zezwii Zwiiföwaa kä'mö plɩnɩ.

3 ‑Maa Zezwii ɔbhlɩ,

ɔ ‑yi sɛ nɩɩ,

Lagɔ mɔɔ 'nyɔɔ 'kämanɔ,

ɔ 'kä ‑lii 'wuë ‑gömö 'kämanɩ.

'N ɔ ‑yi'ɛ sɛ nɩɩ,

Lagɔ dlɩ 'mö ‑mä ɔ 'bhöönɩɛ,

‑mä ɔ lɛ 'kää 'bɩwʋ mö.

4 Ɔ ‑sɔɔ ‑lɛ lilidaa 'wʋʋ,

'n ɔ yiɛ 'ɔ ‑bäna 'kädaa 'mö ‑sɛ,

'n ɔ yiɛ 'tabhë 'käda 'wʋ 'libhï,

'n ɔ yeaa 'mlɩ gwanɩ.

5 'N ɔ yiɛ 'bëë 'mö 'nyu pälɩ,

'n ɔ yiɛ ɔ ‑gänɩwaa kplɩ yɔwʋ wɔlʋ.

Ɔ ‑kä ‑mɔ kplɩ yɔwʋ wɔlʋ 'wëë,

'n ɔ libhïä 'tabhëa ɔ gwanɩ a‑a 'mlɩ 'wʋ 'n ɔ sɩɔ kplɩ yɔwʋ.

6 Sa'a ‑këë 'n ɔ yiɛ Simɔɔ Piɛlɩ 'wʋ ghlɛ,

ɔ 'kɔ kplɩ yɔwʋ wɔlʋmö.

‑Maa Pɩɛlɩ lɛ naa:

«‑Alowli,

‑nmö ‑kaa bhä kplɩ yɔwʋ wɔlʋ ‑a?»

7 Zezwii lɛ naa:

«'Saa n ‑wʋä dɛ'ɛ nʋ dɔ'wʋ,

‑n 'niɛ ‑bhlɛ 'mö 'nʋ,

‑maa ‑n yi bhäla 'mö 'nʋä yi.»

8 Ɔ lɛ:

«'Lɩlɩlɩ!

‑Alowli,

‑nmö 'nɩɛ ‑kä ‑n ‑kaa kplɩ yɔwʋ wɔlʋ.»

Zezwii lɛ naa:

«N ‑nɩmö kplɩ yɔwʋ wʋlʋ,

‑nn‑ä bhɛnɩ ‑n ‑nya'mö 'käa'a 'wʋ ‑wʋnɩ.»

9 Ɔ lɛ:

«‑Alowli,

sa'a yɩ ‑kä 'mö ‑wʋʋ,

'na kplɩɩ a 'yize mö ‑n nɩ tɩ wɔlʋ,

‑maa wɔlʋmö 'na kätɩkpöö ‑nyɛ 'na 'wukpëlea 'sɔ.»

10 Zezwii lɛ naa:

«Nɩkpɛ ‑käa'a bido 'wëë,

ɔ 'wuë ɔ ‑wʋ 'wlɩlɩ zaa,

ɔ'ɔɔ 'wʋ 'sɔ bidonɩ,

‑maa kplɩ yɔwʋ a 'yize ɔ wʋlʋä.

'Lɩlɩlɩ a dɔ'wʋ,

a yɛ 'wlɩlɩ plɛ Lagɔ a 'yila 'klʋ a dɔ'wʋ,

‑maa a 'wuë,

abhʋa n'n‑ä gaaa.»

11 Nyɩasɛ Zezwii 'nɩɛ sa'a gbä,

‑maa ‑mä 'ɔ ‑gänɩwaa gla'mö a dɔ'wʋ,

ɔ ‑yi ‑mɔɔ 'kɔ 'ɔ ‑gblɩwaa kä'mö plɩnɩɩ,

nza ɔ gbää ‑sɩbhä.

12 Ɔ wɔluëë kplɩ yɔwʋ 'wëë,

'n ɔ yiɛ 'ɔ ‑bänaa 'mö päla 'n ɔ yiɛ sɛ glɩ.

Ɔ lɛ naa:

«'Saa n nʋanyɩɛ dɛ'ɛ 'wluu,

a 'nwi bhä 'mö?

13 N nɛ naa,

‑amö a libhïä a 'cɩanyɔ 'mö 'wʋ,

‑amö a laa a ‑lowli.

Nn miɛ,

'mö n glɩnɩɛ ‑tiamö.

14 Zaa,

a yɩɛ ‑amö a ‑lowli,

‑amö a 'cɩanyɔ,

‑amöö wɔlanyɩɛ kplɩ yɔwʋ zaa,

a'bhï a nɩ ‑bhɩɔ 'mö,

a 'kä ‑sɩbhä kplɩ yɔwʋ wɔlʋwɔlʋnɩ.

15 'Saa n nʋanyɩɛ dɛ'ɛ 'wluu,

a nɩ 'zwi 'wlumö,

a 'kä ‑sɩbhä 'zʋmö.

16 ‑Tiamö n nyanyɩɛ dɛ'ɛ 'dɩ nɩɩ,

libhonʋnyɔ a ‑mɔɔ 'kää 'ghïli,

‑ɔ 'kää ɔ 'bhidɩba 'wʋ zii,

ɔ'ɔɔ ‑bhölɩ.

Nɩkpɛ a ‑mɔ wa tiee,

ɔ'ɔɔ ‑zɩ dɛsɛ ‑kä,

ɔ 'kä ‑ɔ tioo 'wʋ zi.

17 A yɩɛ,

‑li 'la 'wuë n kanyi sʋlʋnɩ 'wë,

a ‑yiia'a ‑sɩkaa.

'Na wɛlɩɩ sɛ yɩ gbää,

a ‑kä ‑sɩbhä nɛmöö,

'a ‑jɔlʋ!

18 ‑Maa sɛ'ɛ n gbää nɩɩ,

a 'wuë abhʋa n'n‑ä gaa.

Na ‑nʋa n ‑sɛɛ ‑lɛ,

n ‑yuë 'tɩɩ.

‑Maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

N ‑nyɛɛ linɩɛ 'wʋ a'bhëë,

ɔ yɛ na gbʋ a nyɔ 'zʋ.^a

‑Lɛ a wɛlɩ 'la,

yɩ kä yɩ 'kä 'yli 'wlʋnɩ.

19 ‑Maa yɩ'ɩɛ ‑bhlɛ 'yli 'wlʋnɩ a'bhë 'n n nyanyɩɛ dɛ'ɛ 'dɩ,

nzɩɩ yɩ ‑kä 'yli 'wlʋnɩɩ,

a 'käa sɛ ‑yi nɩɩ,

‑mɔ n glɩnɩɛ 'mö n glɩnɩɛ.

20 ‑Tiamö n nyanyɩɛ dɛ'ɛ 'dɩ nɩɩ,

nɩkpɛ a ‑mɔ n tiee,

‑ɔ ‑kɔɔ pälaa,

‑amö ɔ yɛɛ pälamö.

'N sɛ ɔ pälaaa da'a a za,

‑ɔ tieaaa 'mö ɔ yɛ'ɛɛ pälamö.»

Zezwii lɛ naa Zwidaa mɔɔ 'kɔɔ plɩ

(Matie 26.20‑25; Maakö 14.17‑21; Lwiikö 22.21‑23)

21 Zezwii gbää sa'a 'wëë,

'n dlɩ yoo 'yli klɛ 'n ɔ yiɛ nɩɩ:

«‑Tiamö n nyanyɩɛ dɛ'ɛ 'dɩ nɩɩ,

a gla'mö a ‑nɔ ‑bhlʋ,

ɔ ‑yii 'na ‑gblɩwaa kä'mö plɩnɩ.»

22 Ɔ gbää sa'aa,

wa 'wuë 'n wa yiɛ 'klʋ yɩlɩylɩnɩ,

wa'aa ‑mɔ a'bhë ɔ gaaa ‑yi.

23 ‑Maa wa kʋgbä'sɔ ‑kpɔ a gla'mö a ‑nɔ ‑bhlʋ,

‑ɔ ‑glɛɛ tenyii Zezwii dlɩ 'wʋʋ,

mɔɔ glɩɛ Zezwii yɔwʋ.

24 Zaa,

'mö Simɔɔ Piɛlɩ 'nyɛnɩɛ 'ylizuzu 'mö 'dɩ,

ɔ 'kä Zezwii nimï 'yɩbhä,

‑mɔ ɔ gaaa ɔ 'kɔnyɩ sʋlʋnɩ.

25 Nɩkpɛ 'la 'n ɔ yiɛ sasɛ Zezwii yɔwʋ 'dio,

ɔ lɛ naa:

«‑Alowli,

‑mɔ ‑n gaa bhä 'nɩ?»

26 Zezwii lɛ naa:

«'Fɔlɔkïbhë nɩ n 'kää ‑mä ‑zɛpʋ 'mö 'ngwaa,

‑mɔ n 'kaa yowʋ 'nyɛɛ,

mɔɔ.»

Ɔ 'libhïä 'fɔlɔkïbhëa 'wʋ,

ɔ 'ngwaa ‑mä ‑zɛpʋ 'möö,

Simɔɔ Yisikalio ‑yowli Zwidaa,

'n ɔ yonyɩɛ yowʋ 'nyɛ.

27 Zwidaa 'libhïä 'fɔlɔkïbhë 'la 'wʋ 'wë cuu,

'n Sataa yoo ‑gömö bhlinɩ.

Zezwii lɛ naa:

«Zwidaa,

‑na'a libhoo,

'päpanɩ 'wʋ,

‑n 'kʋ nʋ.»

28 ‑Maa wa 'wuë,

'saa kää 'nglɩ 'n Zezwii yiɛ Zwidaa 'dɩ 'nyɛ nɩɩ,

'päpanɩ 'wʋ ‑n 'kä ‑na'a libhoo nʋʋ,

wa 'niɛ 'mö 'nʋ.

29 Zwidaa mɔɔ ‑suä moni zaa,

wa gla'mö a ‑mumuë a ‑bɛ,

wa ‑tɔnɩ wabhlɩ sɛ'ɛ Zezwii gbä nɩɩ,

Zwidaa nɩ mö 'fɛtɩ a ‑lii pɩaa,

‑mumuë ‑tɔnɩ'ɛ sɛ'ɛ Zezwii gbä nɩɩ,

Zwidaa nɩ mö 'pʋäwaa ‑lu 'nyɛɛ.

30 ‑Maa Zwidaa ɔbhlɩ,

ɔ 'libhïä 'fɔlɔkïbhëa 'wʋ 'wë cuu,

'n ɔ yiɛ ‑mä 'wlʋ.

‑Lɛ a 'tɛnyɩ 'la 'mö,

swe yɛ ylu 'wë.

Zezwii yɛ ɔ ‑nʋa gbalele 'pä

31 Zwidaa 'wlʋä ‑mä 'wëë,

Zezwii lɛ naa:

«Nɩkpɛ a 'Yu,

'ɔ 'ghïlinɔɔ yɛa'a ‑sɩkaa 'yli 'wlʋnɩ,

nzɩɩ Lagɔ 'a 'nglɩɩ 'kä ‑mä ɔ 'mö 'ghlimanɩ.

32 Ɔ dɩba 'a 'ghïlinɔɔ ‑kä ‑mä ɔ 'mö 'yli 'wlʋnɩɩ,

Lagɔ a'bhë yi Nɩkpɛ a 'Yu 'a nglɩɩ 'ghlimanɩ.

Nn!

Ɔ yia'a ‑pa 'ghlimanɩ.

33 Na 'yuënyɩ,

‑lɛ 'naa 'käa'a ‑sɩkaa 'mö gwälɛ 'lɩlɩlɩ,

'n n 'kanyɩɛ jijo'wʋ 'bhöö.

‑Maa n ‑kä mö 'wëë,

a ‑yii sɛ tɛlɩ.

‑Maa sɛ n 'nyɛ a‑a Zwiiföwaa a 'kädɩɩ 'dɩɩ,

‑sɩbhä n nyanyɩɛ dɛ'ɛ 'dɩ nɩɩ,

dɛ n 'kää mö,

a'aa bhɛnɩ a 'kä ‑lɛ 'mämö.

34 Zaa,

gbalelea n panyɩɛ ma‑a nɩɩ,

a nɩ ‑wawanɩ.

Sɛ n ‑waanyɩɛ,

a nɩ ‑wawanɩ ‑sɩbhä.

35 A ‑kä ‑sɩbhä ‑wawanɩɩ,

‑lɛ a dɔ'wʋ nɩkpaa 'wuë yi sɛ yɩbhlɩmanɩ nɩɩ,

na ‑gänɩwa a glɩnɩɛ.»

Zezwii lɛ Piɛlɩ yo cɛlɩ

(Matie 26.31‑35; Maakö 14.27‑31; Lwiikö 22.31‑34)

36 Zezwii gbää sa'aa,

Simɔɔ Piɛlɩ lɛ naa:

«‑Alowli,

dɛ ‑n 'kä bhä mö 'nɩ?»

Zezwii lɛ naa:

«Sɛ'ɛ n gbää nɩɩ,

dɛ n ‑wʋä mö dɔ'wʋʋ,

‑nn‑ä ‑bhlɛ bhɛnɩ ‑n 'kä ‑lɛ 'mämö,

‑maa ‑n yi bhäla ‑lɛ mö.»

37 Simɔɔ Piɛlɩ lɛ naa:

«‑Alowli,

dɛ n glɩɛ dɛ'ɛ,

n ngulu yɩ 'wʋ,

n 'kä ‑na za 'ku a'bhë nɩɩ,

sɛ yɩ ‑wʋ ɔ 'mö n‑n nʋ nɩɩ,

dɛ ‑n ‑wʋä mö dɔ'wʋ,

'naa 'kä ‑sɩkaa ‑lɛ 'mämö 'nɩ?»

38 Zezwii lɛ naa:

«Sɛ ‑n gbää da'a ‑n yi na za 'kuu,

‑tiamö bhä ‑a?

‑Tiamö n nyɩamöä dɛ'ɛ 'dɩ nɩɩ,

‑kɔkɔbhɛlʋ 'naa 'kä ‑bhlɛ wɛlɩ 'pä,

‑nmö Piɛlɩ,

n‑n 'kää 'wʋ taa cɛlɩnɩ nɩɩ,

‑n ‑nɩɩɛ ‑yi.»