Matie 26

Zwiiföwaa 'a 'kädɩɩ yɛ ylɩ plɛ wa 'kä Zezwii köbhä

(Maakö 14.1‑2; Lwiikö 22.1‑2; Zaa 11.45‑57)

Zezwii 'nyɛɛ 'ɔ ‑gänɩwaa wɛlɩ 'la 'wuë 'wëë,

'n ɔ yuë'ɛɛ 'dɩ 'nyɛ,

ɔ lɛ naa:

2 «A'bhï a ‑yi sɛ nɩɩ,

ylɩ sɔɔ tʋä ‑mä Galɛ'möwlʋfɛtɩɩ 'kä ghlɛ.

Nɩkpɛ a 'Yu,

‑lɛ wa 'kɔɔ nɩkpa kä'mö plɩnɩ,

wa 'kɔ su 'klʋ kʋnɩ.»

3 ‑Lɛ a 'tɛnyɩ 'la 'mö,

Zwiiföwaa 'a Lagɔbʋbɔwaa a 'kifiea,

wa ‑nyɛ 'wa 'nɛɛnɩwa 'kädɩɩ 'sɔ,

Lagɔbʋbɔnyɔ 'kɔdɔɔ wa laa Kayiifö a 'ligbë 'mö,

'n wa yiɛ ‑mä 'wlu 'yɩbhä wa 'kä ylɩ plɛ.

4 Wa 'wuë 'n wa yiɛ 'wʋ nglu,

wa 'kä Zezwii ylʋsɛ köbhä,

wa 'kɔ 'lɩbhä ɔ 'kä 'ku.

5 Wa lɛ naa:

«‑A 'naa 'kɔ 'fɛtɩ a'bhë 'wʋ köbhä,

nɩkpa ‑tɩnyɩa tʋ ‑lɛ.»

'Nglɔ yɛ Zezwii palɩfɛɛ 'wlu pälɩ

(Maakö 14.3‑9; Zaa 12.1‑8)

6 'Tɛnyɩ ‑bhʋlʋ ‑kpɔ 'la 'mö,

Zezwii ‑wʋ ‑bhlɛ ‑mä Betanii glɔ 'mö,

‑mä nɩkpɛ ‑bhlʋ wa laa Simɔɔ,

'zla 'lɩbhä a‑a bhla'mö a 'ligbë 'mö.

7 Ɔ ‑wʋ li dɔ'wʋ,

'n 'nglɔ ‑bhlʋ yoo ‑mä ghlɩ.

Ɔ ‑su 'kplekii.

Ɔ kä 'pɛlʋtɛɛpalɩfɛ a 'ke ‑bhlʋ 'mö.

Ɔ ghlɛɛ ‑lɛ Zezwii yɔwʋʋ,

ɛ 'wuë,

'n ɔ yonyɩɛ 'wlu slu.

8 ‑Maa Zezwii 'a ‑gänɩwaa,

wa 'yiɛ 'ylɩmöö,

wa'aa ‑wa 'lɩlɩlɩ,

wa lɛ naa:

«‑Ɔɔɔ!

'Saa‑li a nyimanyimu bhä sa'a 'nɩ?

9 Palɩfɛɛ nɩ,

wa kä a wa 'kɛ moni a ‑bɛ 'mö 'pɛlʋ 'pä,

wa 'kä ɛ moni 'pʋäwa 'nyɛ.»

10 Zezwii yɩbhlɩnɩɛ sɛ wa gbää,

ɔ lɛ naa:

«Nglɔ nɩ,

sɛ yɩ ‑wʋ ɔ 'mö 'n a 'kuanɔ bhä swɩ yɔwʋ 'nɩ?

'Saa ɔ nʋʋʋä dɛ'ɛ 'wluu,

‑li a ‑liɛ.

11 Ɛ'ɛ ‑bhö nyɩasɛ,

‑maa 'pʋäwaa a gaaa da'aa,

a ‑nyʋä 'sɔ 'wʋ a glɩnɩɛ 'kwädlɩ.

‑Maa ‑amö na a,

n 'naa 'kanyɩ 'kwädlɩ gla'mö ‑wʋ.

12 ‑Maa n ‑kä 'ku,

wa ‑kä 'na ‑gäzɛɛ zizaa yi a sɛ wa 'kɛɛ palɩfɛɛ yɔwʋ 'zʋʋ,

‑sɩbhä ɔ 'zʋä da'a.

13 Zaa,

‑tiamö n nyanyɩɛ dɛ'ɛ 'dɩ nɩɩ,

nglɔ nɩ,

‑li a ‑lii ɔ nʋä dɛ'ɛɛ,

wa yi 'kwädlɩ yɩ dɛ bhïla.

Saa 'wuë sɛ wa 'kää 'Mänatɩtɩɩ biaa möö,

wa yo 'wʋ ligbanɩ.»

Zwidaa yɛ Zezwii Zwiiföwaa kä'mö plɩnɩ

(Maakö 14.10‑11; Lwiikö 22.3‑6)

14 Yɩ 'plɩɛ sa'a 'wëë cuu,

Zezwii 'a ‑gänɩwaa kʋgbä'sɔ ‑kpɔ a gla'mö a ‑nɔ ‑bhlʋ wa laa Zwidaa Yisikalio,

'n ɔ yiɛ 'wʋ ‑sɔ 'n ɔ yiɛ mö.

Lagɔbʋbɔwaa a 'kifiea 'n ɔ yuëë ‑mä ghlɩ.

15 Ɔ lɛ naa:

«N yɩbhä n 'kanyɩ Zezwii kä'mö plɩnɩ,

‑maa ‑zɩmö a ‑kaa bhä 'nyɛ?»

Wa lɛ naa:

«Fälɛgö a glʋ ‑bhlʋ fälɛgö kʋgbä,

miɛ dɛ'ɛ,

'libhi 'wʋ.»

'N Zwidaa yiɛ 'wʋ 'libhï.

16 'Bhöönɩa'a da'a,

'n ɔ pää sɛ ɔ 'kää 'zʋ,

'n ɔ 'kʋää Zezwii kä'mö plɩnɩ a 'slɛlɛ.

Zezwii yɛ ɔ ‑gänɩwa 'sɔ tie wa 'kä 'fɛtɩ a lilea 'wlu gïganɩ

(Maakö 14.12‑21; Lwiikö 22.7‑14,21‑23; Zaa 13.21‑30)

17 Zwiiföwaa 'a 'fɛtɩ 'kädɛɛ ‑ɛnyɩ dɔ'wʋ wa liɛ 'fɔlɔ wa'a ngunɩɛ levii,

'n ɛ tɛkäzlɩɩ yiɛ ghlɛ.

'N Zezwii 'a ‑gänɩwaa yoo nimï 'yɩbhä,

wa lɛ naa:

«‑Atʋ,

dɛ ‑n yɩbhä bhä ‑a nɩ pinɩ fɛtɩɩ a lilea?»

18 Wa 'yɩbhɔɔ sa'a nimïï,

'n ɔ yuëë ‑mä Zeluzalɛɛmö glɔ 'mö a nɩkpɛ ‑bhlʋ 'pänɩ,

ɔ lɛ naa:

«Nɩkpɛ 'la n 'pänanyɩɛ dɛ'ɛɛ,

a nɩ mö ‑mä ɔ 'ligbë 'mö a 'kɔ 'dɩ 'nyɛ nɩɩ:

‑Atʋ lɛ naa,

'ɔ 'tɛnyɩɩ Lagɔ ‑dɩɛ,

ɛ yɛ ghlɛ 'wë.

Zaa,

ɔ ‑nyɛ 'ɔ ‑gänɩwaa 'sɔ,

‑mä ‑na'a mä'a,

‑mä wa 'kää 'fɛtɩɩ ‑sɛnɩ.»

19 Nɩkpa 'la,

'n wa yiɛ mö.

Sɛ'ɛ Zezwii 'nyʋä a‑a 'dɩɩ,

'n wa yiɛ ‑sɩbhä 'zʋ.

'Fɛtɩɩ a lilea,

'n wa yeaa pi.

20 ‑Kidosɛ ghlɛɛ,

Zezwii ‑nyɛ 'ɔ ‑gänɩwaa kʋgbä'sɔ ‑kpɔ 'sɔ,

'n wa yiɛ 'wʋ linɩɛ 'mö.

21 Wa ‑wʋ li dɔ'wʋ,

'n Zezwii yiɛ gbʋ ‑dɩ,

ɔ lɛ naa:

«‑Tiamö n nyanyɩɛ dɛ'ɛ 'dɩ nɩɩ,

a gla'mö a nɩkpɛ ‑bhlʋ,

ɔ ‑yii 'na ‑gblɩwaa kä'mö plɩnɩ.»

22 Ɔ gbää ‑sɩbhää,

wa 'wuë kɔmanɩ wa kɔmanɩɛ tenyii,

'n wa yɩbhɔɔ bhʋlʋbhlʋ nimï nɩɩ:

«‑Alowli,

‑amö bhä ‑a?»

23 Ɔ lɛ naa:

«N ‑nyɛɛ 'sɔ ‑a fäfänɩɛ dɛ'ɛ kɛ ‑gömöö,

mɔɔ.

24 Nɩkpɛ a 'Yu,

sɛ yɩ cɛlɩɛ ɔ dɛ ‑mä Lagɔbɔgʋʋ 'möö,

‑sɩbhä yɩ 'kää yɩ 'wuë 'wʋ 'plɩ ɔ 'kä 'ku.

‑Maa ‑ɔ 'kɔɔ nɩkpa kä'mö plɩnɩɩ,

ɔ ‑nɩɩ yi tenyii 'mö 'tɛɛ.

'N ɔ 'nɩ a 'pɩwʋ yii,

yɩ nɛnɩ a.»

25 Zezwii gbää sa'aa,

Zwidaa,

‑ɔ lɛ 'kɔɔ plɩɩ,

'n ɔ yiɛ gbʋ ‑dɩ,

ɔ lɛ naa:

«‑Atʋ ‑amö bhä ‑a?»

Zezwii lɛ naa:

«‑Na'bhë,

sɩbhä ‑n gbää.»

Lagɔlilea a tɛɛnɩdaaɩ

(Maakö 14.22‑26; Lwiikö 22.15‑20; 1 Kolɛɛtɩ 11.23‑26)

26 Wa ‑wʋ ‑bhlɛ li dɔ'wʋ 'yize,

'n Zezwii yiɛ 'fɔlɔbhë 'wʋ 'libhï.

'N ɔ yiɛ a za Lagɔ bhälɩ 'wë,

'n ɔ yeaa 'mö ‑dɩdɩnɩ,

'n ɔ yuënyɩɛ yowʋ 'nyɛ.

Ɔ lɛ naa:

«A 'libhï 'wʋ a 'kä li,

‑maa 'fɔlɔbhë nɩ,

'na kpökpaa ma‑a.»

27 'N ɔ yi'ɛɛ duvɛɛkɔpʋ 'wʋ 'libhï,

'n ɔ yiɛ wʋ za Lagɔ bhälɩ,

'wë,

'n ɔ yuënyɩɛ yɔwʋ 'nyɛ.

Ɔ lɛ naa:

«A 'wuë,

a 'libhï 'wʋ,

a 'kä 'nɩmä.

28 ‑Maa duvɛɛ nɩ,

'na dluu ‑wʋ 'kää nɩkpabhë a 'wlumö kwli,

Lagɔ 'kä 'wa 'nyinylolii a gbʋ 'yi 'tatinɩɩ,

muä.

Lagɔ ‑nyɛ nɩkpaa 'sɔ wa 'kä mɛnɩnɩ a dluä.

29 Tɛɛnɩ dɛ'ɛ,

'naa 'käa'a ‑sɩkaa duvɛɛ 'nɩmä,

'n ɛ 'nɩ ‑bhö 'pɩwʋ mää na Dɩba 'kämanɩɛ ma‑a,

‑mä n ‑nyɛ abhʋa 'sɔ,

‑a 'kɛɛ 'wʋ 'sɔ 'nɩmänɩ.»

30 Ɔ gbää sa'a 'wëë,

'n wa yiɛ Lagɔ 'a 'nglɩghlimanɩlwɩ bhlɩ,

'n wa yiɛ ‑mä Olivieswii a ‑gägaa 'wlu a 'bɛyɩ mönɩ.

Zezwii lɛ Piɛlɩ yo cɛlɩ

(Maakö 14.27‑31; Lwiikö 22.31‑34; Zaa 13.36‑38)

31 Wa ‑wʋ mö dɔ'wʋ,

'n Zezwii yuëë 'dɩ 'nyɛ ɔ lɛ naa:

«Abhʋa na ‑nʋa,

a 'wuë,

sabɔɔ nɩ,

a ‑yiia 'bɩwʋ 'bhöö.

Ɛ'ɛ ‑bhö nyɩasɛ,

‑maa sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

N yi wïlaa a 'ylizʋnɩnyɔɔ 'lɩbhä,

wïlaa yi yɔwʋ ‑sɛnɩ.^a

32 ‑Maa n ‑kä 'ku n ‑kä glu 'wlʋ 'wëë,

‑mä Galilee‑bhölɩɩ 'mö,

‑mä n 'kää mö,

a ‑kaa ‑mä ghlɩnɩ.»

33 'Zezwii 'nyʋää sa'a 'dɩɩ,

Piɛlɩ lɛ naa:

«‑Muë'la 'wuë,

wa ‑yimö 'bɩwʋ 'bhöö ‑kë,

‑amö na a,

'naa ‑kamö 'bɩwʋ 'bhöö 'lɩlɩlɩ.»

34 Piɛlɩ gbää sa'aa,

Zezwii lɛ naa:

«‑Tiamö n nyɩamöä dɛ'ɛ 'dɩ,

zɩ'ɛ a sabʋ,

‑kɔkɔbhɛlʋ 'naa 'kä ‑bhlɛ wɛlɩ 'pä,

‑nmö Piɛlɩ,

n‑n 'kää 'wʋ taa cɛlɩnɩ nɩɩ,

‑n ‑nɩɩɛ ‑yi.»

35 Ɔ lɛ:

«‑Atʋ,

ɛ ‑kä kwiee mɛɛ,

n ‑nyɛmö 'sɔ ‑a ye 'ku,

‑maa 'naa ‑kamö 'kwädlɩ cɛlɩ.»

Sɛɛ Piɛlɩ gbää da'aa,

ɔ 'bhɩa ‑muë'la 'wuë,

‑sɩbhä wa gbämöä.

Zezwii yɛ ‑mä Zɛsɩmanee bhibhee mö

(Maakö 14.32‑42; Lwiikö 22.39‑46)

36 Dɛ ‑bhlʋ dɛ wa laa Zɛsɩmanee,

Zezwii ‑nyɛ 'ɔ ‑gänɩwaa 'sɔ wa ghlɛɛ lɛ,

ɔ lɛ naa:

«A nɩ glɩ ‑bhlɛ dɛ'ɛ sɛ,

n 'kä mä'a Lagɔ bhibhee mö.»

37 'N ɔ yiɛ wa gla'mö a nɩkpa ta ‑sɛ,

Piɛlɩ mɔ,

'n Zebedee ‑yowluwa 'sɔ ‑kpɔ,

ɔ ‑nyʋä 'sɔ 'n wa yiɛ mö.

Wa ‑wʋ mö dɔ'wʋ,

'n nganɔ yoo tenyii 'lɩbhä,

'n ɔ yiɛ kɔmanɩ.

38 Ɔ lɛ naa:

«'Saa lɛ ‑kaaa ghlɩɩ,

n ‑kɩɩ dlɩ 'wʋ 'pää,

na dlɩ lɛ 'kä ‑mä do.

A glɩ dɛ'ɛ sɛ,

a tɩa ngämö,

a ‑nya'mö 'sɔ ‑a 'kä ‑gä.»

39 'N ɔ yuëë 'tikïyie 'wʋ gwë 'dionɩ,

'n ɔ yiɛ ‑kokomïladigbï glu 'pä,

'n ɔ yiɛ 'wlu sɛ glɛ,

'n ɔ yiɛ Lagɔ bhibhe,

ɔ lɛ naa:

«‑Atʋ Lagɔ,

‑n ‑kä 'wʋ nguluu,

'klɩyɩyɛ a ‑dɔkɔ nɩ n 'kää dɛ'ɛ 'nɩmää,

'dianɩ'mu gwë.

Miɛ abhlɩ da'a ‑maa,

‑na'a sɛ ‑n yɩbhää,

‑sɩbhä ma‑a nɩ 'wlʋnɩ 'yli,

‑maa ɛ nɩ tɩ 'na dlɩpäsaa ma.»

40 Ɔ bhibhee ‑sɩbhä 'wëë,

'n ɔ yiɛ 'ɔ ‑gänɩwaa ta ‑kpɔ yɔwʋ 'bɩwʋ mö.

Ɔ lɛ 'bhöö'ɛ,

wa ngämö.

'N ɔ yuëë gäla.

Ɔ lɛ naa:

«Piɛlɩ,

a ‑nya'mö 'sɔ,

‑a 'kä ‑gä ‑këë 'gïle ‑bhlʋ a 'yize 'kä 'plɩ a dɔ'wʋ,

a'a bhä bhɛnɩ 'lɩlɩlɩ ‑a?

41 A nɩ tɩ ngämö,

a nɩ bhibhe Lagɔ,

‑mäpäpʋ ‑kaanyɩ ghlɩ a tɩa ‑mä bhlinɩ.

Nɩkpɛ 'yɩbhä a‑a nyɩasɛ ɔ 'kä ‑li a ‑li nʋ ‑maa 'ɔ nɩkpɛglɩnɩsaa a za,

ɔ'ɔɔ bhɛnɩ.»

42 'N ɔ yuë'ɛɛ gwë 'dionɩ,

'n ɔ yi'ɛɛ Lagɔ bhibhe,

ɔ lɛ naa:

«‑Atʋ,

n‑n ‑kä nɩɩ,

n nɩ 'nɩmä 'klɩyɩyɛ a ‑dɔkɔ nɩ klɩpaa nʋʋ,

‑na'a sɛ ‑n yɩbhää,

‑sɩbhä nɩ 'wlʋnɩ 'yli.»

43 Ɔ bhibhee 'wëë,

'n ɔ yi'ɛɛ 'ɔ ‑gänɩwaa ta ‑kpɔ yɔwʋ 'bɩwʋ mö.

Ɔ lɛ 'bhöö 'lɛ,

'yɛla lɩbhʋä tenyii zaa wa ngämö.

44 'N ɔ yuëë gwë 'dionɩ,

'n ɔ yi'ɛɛ 'wʋ tanadɔ'wʋ Lagɔ bhibhe.

Sɛ ɔ bhibhe a‑a,

‑sɩbhä ɔ bhibhee 'yize.

45 Ɔ bhibhee 'wëë,

'n ɔ yia'aa yi,

ɔ lɛ naa:

«Ngämö a ngämö bhä abhlɩ?

Nyɛpɛ a nyɛpɛ bhä 'yize ‑a?

A yɩɛ,

Nɩkpɛ a 'Yu,

'ɔ da yɛ ghlɛ,

wa 'kɔ 'nyinylolinʋwaa kä'mö plɩnɩ.

46 Zaa a ‑sɔ 'wʋ ‑a 'kä mö,

a yɩɛ!

‑Ɔ ‑ka'muë kä'mö plɩnɩɩ,

ɔ ‑wʋ yi dɔ'wʋ.»

Wa yɛ Zezwii köbhä

(Maakö 14.43‑52; Lwiikö 22.47‑53; Zaa 18.1‑11)

47 Zezwii kɩ ngli cuu,

Zwidaa ‑ɔ glɩnɩmöä 'ɔ ‑gänɩwaa kʋgbä'sɔ ‑kpɔ gla'mö a ‑nɔ ‑bhlʋʋ,

'n ɔ yiɛ ‑lɛ 'wʋ ghlɛnɩ.

Ɔ ‑su nɩkpa a ‑bʋbʋ 'bɩwʋ,

wa ‑su ‑gbëlie,

wa ‑su swi.

Nɩkpa 'la,

Lagɔbʋbɔwaa a 'kifiea ‑nyɛ Zwiiföwaa a 'nɛɛnɩwa 'kädɩɩ 'sɔ,

mʋa tuëë.

48 Zwidaa,

‑ɔ plɩnɩɛ Zezwii 'ɔ ‑gblɩwaa kä'möö,

sɛ'ɛ ɔ 'nyʋä a‑a 'dɩ nɩɩ:

«‑A ‑kä mö a nɩkpɛ n 'kää dlɩ gbönɩɩ,

mɔɔ,

a nɩ gbulo 'wʋ.»

49 Zaa,

wa ghlɛɛ ‑lɛ cuu,

'n ɔ yiɛ Zezwii mönɩ,

'n ɔ yoo bhälɩ,

ɔ lɛ:

«‑Atʋ ‑ayo!»

'N ɔ yoo dlɩ gbönɩ.

50 ‑Maa Zezwii lɛ naa:

«'Tua,

‑na'a 'saa ‑n yiɛ nʋä,

nu!»

Ɔ 'nyɔɔ ‑sɩbhä 'dɩ cuu,

nɩkpa ‑muë'la,

'n wa yiɛ Zezwii yɔwʋ 'dio,

'n wa yoo 'wʋ gbulo.

51 ‑Maa wa gbuloo 'wʋʋ,

Zezwii a ‑gänɩwaa a gla'mö a nɩkpɛ ‑bhlʋ,

'n ɔ yiɛ 'ɔ ‑gbälɛɛ 'ba 'mö ‑sɛ,

'n ɔ yiɛ Lagɔbʋbɔnyɔ 'kɔdɔɔ a libhonʋnyɔɔ a 'yukwlii ‑lɛ ‑dɩ.

52 ‑Maa Zezwii lɛ naa:

«Piɛlɩ,

‑na'a ‑gbälɛɛ,

fɛ ‑mä 'ba 'mö,

‑maa ‑ɔ ‑kä ɔ 'li ‑gbälɛ 'mö 'lɩbhää,

‑gbälɛ 'mö wa 'kɔɔ 'lɩbhä ɔ 'kä 'ku.

53 Nn bhä sɛ ‑yi nɩɩ,

'n n ‑kä a 'yɩbhää,

n yi a na dɩba Lagɔ 'mö 'winɩ,

ɔ ‑kaa 'wʋ yi.

'N n ‑kɔɔ a 'mö 'winɩɩ,

‑Gba ‑bhlʋ ‑kpɔ 'mö,

ɔ ‑yi a Lagɔzuzuku a ‑zɩkpö 'kädɩ kʋgbä'sɔ ‑lɛmö.

54 ‑Maa n ‑kä a ‑sɩbhä 'zʋʋ,

wɛlɩɩ yɩ cɛlɩɛ na dɛ ‑mä Lagɔbɔgʋʋ 'möö,

sɛ yɩ 'kä a bhäa'a 'yli 'wlʋnɩ 'nɩ?

[Sɛ'ɛ yɩ cɛlɩɛ ‑mä nɩɩ,

'saa ghölɩɩɛ dɛ'ɛ 'wuë,

yɩ kä yɩ 'kä ‑sɩbhä 'wʋ 'plɩ klɩpaa.]»

55 'N Zezwii yia'aa ‑bʋbʋʋ 'mö a ‑nʋa 'yi gö.

Ɔ lɛ naa:

«Jɛzlʋnyɔ n glɩnɩ bhä zaa,

nza a ‑su ‑gbëlie ‑nyɛ swi 'sɔ,

'n a ‑yii köbhä ‑a?

Zilaa 'wuë 'mö,

‑mä Lagɔbudu 'Kɔdʋʋ 'mö,

‑mä n ‑wʋ a‑a 'kwädlɩ,

'n n 'cɩa a‑a nɩkpa Lagɔwɛlɩɩ,

‑maa a ‑nɩɩɛ a ‑mä köbhänɩ.

56 Nyɩasɛ yɩ'ɩɛ ‑sɩbhä 'wʋ 'plɩ,

‑maa Lagɔ 'a bhla'mö a 'möbhïlanɩwaa,

'wa bhïlawɛlɩɩ ‑yɩ cɛlɩɛ ‑mä Lagɔbɔgʋʋ 'möö,

yɩ 'kä 'yli 'wlʋnɩ a za,

nza yɩ 'plɩɛ ‑sɩbhä 'wʋ.»

Ɔ gbää sa'aa,

'ɔ ‑gänɩwaa 'wuë,

'n wa yoo yɔwʋ 'bhöö,

'n wa yiɛ futo.

Wa yɛ Zezwii ‑mä Zwiiföwaa a ‑zijlituwa 'kädɩɩ a 'yila 'klʋ kwä

(Maakö 14.53‑65; Lwiikö 22.54‑55,63‑71; Zaa 18.12‑14,19‑24)

57 ‑Wa köbhä a‑a Zezwii,

wa ‑sooo,

'n wa yoo ‑mä Lagɔbʋbɔnyɔ 'kɔdɔɔ Kayiifö a mä'a kwä.

Moyizɩ 'a Gböö a 'cɩawaa ‑nyɛ Zwiiföwaa a 'nɛɛnɩwa 'kädɩɩ 'sɔ,

wa yɩbhä ‑mä 'wlu.

58 Wa ‑wɔɔɔ ‑mä kwä dɔ'wʋʋ,

Piɛlɩ ‑gä ‑mä nimïnimï ‑këë,

'n wa yiɛ ‑mä 'ligbë 'mö ghlɛ.

Wa plɛɛ ‑mä,

'n ɔ yiɛ ‑mä plɛmö,

‑mä 'ligbëkʋwaa jijo'wʋ 'n ɔ yiɛ ‑mä sɛ glɩ,

sɛɛ Zezwii 'a wɛlɩɩ 'kää 'wʋ bhlii,

ɔ 'kä ‑sɩbhä 'ylɩmö.

59 ‑Maa wa ‑nyɛ Zezwii yiɛ ‑mä Kayiifö a 'ligbë 'möö,

Lagɔbʋbɔwaa a 'kifiea ‑nyɛ ‑zijlituwa 'kädɩɩ 'sɔ,

kïbhë a ‑maa 'kää Zezwii a dɛ 'zokwë glɩnɩ,

‑anyɩɩ za wa 'kɔɔ gbʋ 'wlumö 'pä wa 'kɔ 'lɩbhä ɔ 'kä 'kuu,

'mö wa tɛlɩɛ sɛ,

‑maa wa 'naa ghlɩ.

60 Nɩkpa a ‑bɛ,

wa ‑sɛnɩɛ 'möö,

wa 'zʋ 'wa 'kïbhïzoku Zezwii ‑gömö,

‑maa yɩ 'wuë 'mö 'kïbhë a ‑maa 'kɔɔ gbʋ köbhaa,

wa 'naa ghlɩ.

Wa bhïlaa 'wë 'lɩlɩlɩɩ,

'n nɩkpa 'sɔ yiɛ 'wʋ ‑sɔ,

61 wa lɛ naa:

«Nɩkpɛ nɩ,

ɔ lɛ,

Lagɔbudu 'Kɔdʋʋ,

ɔ bhɛnɩ ɔ 'kʋ wlɛ,

ɔ 'kʋ 'ylɩ ta 'mö 'sɩbhänɩ.»

62 Wa gbää sa'aa,

'n Lagɔbʋbɔnyɔ 'kɔdɔɔ yiɛ 'wʋ ‑sɔ 'n ɔ yiɛ Zezwii nimï 'yɩbhä,

ɔ lɛ naa:

«‑Mi'la 'wuë wa bhïlaa da'a ‑na dɛɛ,

‑nn ‑sɩɩ bhä ‑gömö ‑a?»

63 ‑Maa Zezwii 'nɔɔ ngli pälɩ.

Zaa,

ɔ lɛ naa:

«Lagɔ ‑ɔ ‑bhölɩ a 'nglɩ 'mö,

n yɩbhamöä dɛ'ɛ nimï nɩɩ,

Puënyɔɔ Lagɔ ‑sɛɛ ‑lɛ,

Lagɔ 'a Yuu,

mö ‑n glɩnɩ bhä ‑a?

Mö ‑n ‑kä glɩnɩɩ,

zligo ‑n ‑kaa 'dɩ 'nyɛ.»

64 Zezwii lɛ naa:

«‑Na'bhë ‑sɩbhä ‑n gbäa'aa da'a.

‑Maa sɛ'ɛ n nʋä nɩɩ,

tɛɛnɩ dɛ'ɛ,

Nɩkpɛ a 'Yu,

‑mä 'mötɛɛnɩLagɔ a luukɛ 'wʋ,

ɔ yi ‑mä sɛ glɩɛ mö.

‑Zlɩ ɔ ‑kä ‑mä 'bhöönɩ,

zlɩ ‑kä nuë do,

ɔ kä yi dɔ'wʋ ‑wʋʋ,

a'bhï a yo 'ylɩmö.»

65 Ɔ gbää sa'aa,

Lagɔbʋbɔnyɔ 'kɔdɔɔ,

'n ɔ yiɛ ɔnyɩ ‑banɩɩ ku 'mö ghlɛnɩ.

Ɔ lɛ naa:

«Sɛ ɔ nyimaa da'a Lagɔ a 'nglɩɩ,

a'bhï a 'nʋ ‑sɩbhä.

Zaa,

wɛlɩ ‑mii 'kɔɔ gbʋ köbhaa,

a‑a nɩ tia'a ‑bhlɛ sɛ tɛlɩ.

66 Zaa,

sɛ a gbä bhä sɛ ‑a nɩ 'zo?»

Wa 'wuë wa lɛ naa:

«Ɔ kä ɔ 'kä 'ku.»

67 'N wa yia'aa Zezwii 'dɔ 'klʋ ngwla,

'n wa yoo ‑kwïli 'mö 'lɩbhä.

Wa gla'mö a ‑mumuë 'n wa pɔɔ kɛ 'yukwïla 'mö,

'n wa nʋä:

68 «Puënyɔɔ Lagɔ ‑sɛɛ ‑lɛ,

‑ɔ lɩbhamöä,

yɩbhlɩnɔɔ ‑n 'kɔ 'nglɩ ‑dɩ.»

Piɛlɩ yɛ Zezwii cɛlɩ

(Maakö 14.66‑72; Lwiikö 22.56‑62; Zaa 18.15‑18,25‑27)

69 ‑Maa ‑lɛ a 'tɛnyɩ 'la 'wuë 'mö,

Piɛlɩ ɔbhlɩ,

‑mä 'pɩwʋ,

‑mä 'ligbë 'mö,

ɔ glɩ ‑mä 'yize.

Ɔ glɩ ‑lɛ,

Lagɔbʋbɔnyɔ 'Kɔdɔɔ a libhonʋnglɔ ‑bhlʋ,

'n ɔ yoo yɔwʋ 'dio,

ɔ lɛ naa:

«‑Nmö nɩ,

‑n ‑gänɩmö a Galileeyi 'la wa laa Zezwii.»

70 Nglɔ gbää sa'aa,

nɩkpabhë a 'yila 'klʋ,

'n Piɛlɩ yiɛ Zezwii cɛlɩ,

ɔ lɛ naa:

«N'n a'bhë 'saa ‑n bhïla da'a ‑yi.»

71 Ɔ gbää sa'a 'wëë,

'n ɔ yiɛ ‑lɛ ‑kosu yɔwʋ 'bhöö,

‑mä 'ligbëa a ngloluë 'wʋ 'n ɔ yiɛ ‑mä mönɩ.

'N libhonʋnglɔ ‑mɔmɔɔ yo'ɛɛ yɩbhlɩnɩ.

‑Wa ‑wʋmöä ‑lɛ,

'n ɔ yuëë 'dɩ 'nyɛ,

ɔ lɛ naa:

«Ɔ‑ɔ nɩ 'dɛɛ,

ɔ ‑gänɩmö a Nazalɛɛtɩyi 'la wa laa Zezwii.»

72 'N Piɛlɩ yi'ɛɛ cɛlɩ,

ɔ lɛ naa:

«N zligo nɩɩ,

nɩkpɛ 'la,

n 'nɔɔ tɛkäsɛ ‑yi.»

73 Lɛ gwälɛ'ɛɛ 'tikïyie 'wʋ 'möö,

‑wa ‑wʋmö a‑a ‑lɛ 'n wa yiɛ Piɛlɩ yɔwʋ 'dio,

wa lɛ naa:

«‑Wa ‑gänɩ a‑a Galileeyi 'la a gla'mö a ‑nɔ ‑bhlʋ ‑n glɩnɩɛ ‑tiamö.

Ɛ'ɛ ‑bhö nyɩasɛ,

‑maa ‑n ‑kä bhïlaa,

ɛ 'kä ‑bhɩɛ Galileyii bhïla.»

74 Ɔ lɛ:

«'N n ‑kä yiodɩ ‑sɛɛ,

n nɩ 'ku,

‑maa nɩkpɛ 'la,

n 'nɔɔ tɛkäsɛ a'bhë ‑yi.»

‑Gba 'la ‑bhʋlʋ ‑kpɔ 'mö,

'n ‑kɔkɔbhɛlʋ yiɛ gbʋ.

75 Wɛlɩɩ Zezwii 'nyɔ a‑a,

nɩɩ:

«‑Nmö Piɛlɩ,

‑kɔkɔbhɛlʋʋ 'naa 'kä ‑bhlɛ wɛlɩ 'pä,

n‑n ‑kaa 'wʋ taa cɛlɩnɩ,»

'n Piɛlɩ yiɛ 'wʋ ligbanɩ,

'n ɔ yiɛ ‑mä 'wlʋ 'n ɔ yiɛ 'mɩɔkɔslʋ 'wi.