Matie 27

Wa yɛ Zezwii ‑lɛ Pilaatɩ a 'yila 'klʋ kwä

(Maakö 15.1; Lwiikö 23.1‑2; Zaa 18.28‑32)

Zlɩ zɩɛ,

'zɔkpɔ 'pii 'mö,

Lagɔbʋbɔwaa a 'kifiea ‑nyɛ Zwiiföwaa 'a 'nɛɛnɩwa 'kädɩɩ 'sɔ,

'n wa yiɛ'ɛɛ 'wlu 'yɩbhä,

'n wa yiɛ Zezwii 'a wɛlɩɩ 'wlu ‑dɩ,

wa lɛ naa,

wa nɩ 'lɩbhɔ ɔ 'kä 'ku.

2 'N wa yoo gwa,

‑gɔmla 'kɔdɔɔ Ghlɔmɛɛyii wa laa Pilaatɩ a mä'a,

'n wa yoo ‑mä kwä.

Zwidaa yɛ ɔnyɩ glɛ

(Nʋnʋlii 1.18‑19)

3 Zwidaa ‑ɔ plɩnuë a‑a Zezwii kä'möö,

ɔ 'yɩɛ sɛ wa ‑dɩɛ Zezwii 'a wɛlɩɩ 'wlu 'ylɩmöö,

'n ɔ dlɩɩ yiɛ 'mö 'bhɛlɔ.

Lagɔbʋbɔwaa a 'kifiea ‑nyɛ Zwiiföwaa a 'nɛɛnɩwa 'kädɩɩ 'sɔ,

fälɛgöö a glʋ ‑bhlʋ fälɛgö kʋgbä ‑kpɔ wa 'nyɔ a‑a,

'n ɔ yuënyɩɛ ‑mä kwä.

4 Ɔ ghlɛɛ ‑mä,

ɔ lɛ naa:

«'A monii mɛɛ dɛ'ɛ,

‑maa n yɛ 'nyinyloli a 'kädɩ nʋ.

Nɩkpɛ a ‑mɔ ‑ɔɔɔ gbʋ ‑gömö ‑kä,

'mö n plɩnanyɩɛ kä'mö.»

Wa lɛ naa:

«Zaa,

‑mɔ yɩ yɩlɩ bhäa'a 'wʋ 'nɩ?

‑Na 'yize a 'wʋ a ‑liɛ da'a.»

5 Wa 'nyɔɔ sa'a 'dɩɩ,

‑mä Lagɔbudu 'Kɔdʋʋ 'mö 'n ɔ yuëë ‑mä monii 'yli 'pä,

'n ɔ yiɛ ‑mä 'wlʋ 'n ɔ yiɛ ɔnyɩ glɛɛ mö.

6 Zwidaa 'wlʋä ‑mä 'wëë,

Lagɔbʋbɔwaa a 'kifiea 'n wa yiɛ monii 'wʋ 'libhï,

wa lɛ naa:

«‑Mä Lagɔbudu 'Kɔdʋʋ a monii a ‑lokwlii 'mö,

‑a ‑kä ‑mä moni nɩ 'zʋʋ,

‑a'a gböö a dɔ'wʋ,

yɩ'ɩɛ nɛnɩ.

Ɛ'ɛ ‑bhö nyɩasɛ,

‑maa moni nɩ,

dlu a moniɛ.»

7 Wa 'zʋniɛ yɔwʋ ‑këë,

wa lɛ naa:

«Moni nɩ,

'lagblɛɛ wa laa mamanyɔɔ 'a 'lagblɛɛ,

mö ‑a 'kɛɛ 'mö pɩa,

nzɩɩ lɛgäwaa ‑kä mä'ä ‑a 'bhele 'kunɩ,

‑a 'kʋä ‑mä ziza.»

8 Nza ɛ nglɩɩ pa‑aa dlu a 'lagblɛ,

'n wa lɛɛ ‑bhlɛ zɩ'ɛ ‑sɩbhä 'yize.

9 Wɛlɩɩ Lagɔ 'a 'möbhïlanɩnyɔɔ Zelemii cɛlɩɛ a‑a ‑mä 'ɔ Lagɔbɔgʋʋ 'möö,

sa'a ‑sɩbhä yɩ 'wlʋnɩɛ 'yli.

Sɛ'ɛ ɔ gbä a‑a nɩɩ:

Fälɛgöö a glʋ ‑bhlʋ fälɛgöö kʋgbä,

'mö wa pɩa nɩkpɛ a ‑mɔ zlɔnɩɛ 'mö a 'pɩwʋ 'mö.

Moni 'la a 'zʋzʋgbʋʋ,

'mö Yizlaɛlɩ'a ngëyi 'mö a ‑nʋa ngluä 'wʋ.

10 'Mö wa 'libhïä 'wʋ,

sɛɛ Lagɔ nyɩaa a‑a 'dɩ,

'n wa yiɛ ‑sɩbhä mamanyɔɔ 'a 'lagblɛɛ pɩa.^a

Pilaatɩ yɛ Zezwii nimï 'yɩbhä

(Maakö 15.2‑5; Lwiikö 23.3‑5; Zaa 18.33‑38)

11 ‑Mä ‑gɔmla 'kɔdɔɔ Pilaatɩ a mä'a,

wa kwää ‑mä Zezwii,

'n ɔ yoo nimï 'yɩbhä,

ɔ lɛ naa:

«‑Nmö glɩnɩ bhä Zwiiföwaa a 'bhlɩlowli?»

Zezwii lɛ naa:

«‑Na'bhë ‑sɩbhä ‑n gbää da'a.»

12 Lagɔbʋbɔwaa a 'kifiea,

wa ‑nyɛ Zwiiföwaa 'a 'nɛɛnɩwa 'kädɩɩ 'sɔ,

'n wa yo'ɛɛ 'kïbhïzoku ‑mimii ‑gömö 'zʋ.

‑Maa yɩ 'wuë ɔ 'niɛ gbʋ 'wʋ ‑dɩ 'lɩlɩlɩ.

13 Sɩbhä a za Pilaatɩ lɛ naa:

«'Kïbhï 'la 'wuë,

wa 'bhöömöä da'a ‑gömö 'zʋä ‑n 'ni bhä ‑ngö ‑a?»

14 ‑Maa ɔ 'nɔɔ ngli pälɩ 'lɩlɩlɩ.

Zaa,

'n yɩ yiɛ Pilaatɩ ngli yɩa.

Zwiiföwaa lɛ wa nɩ kʋnɩ Zezwii su 'klʋ

(Maakö 15.6‑15; Lwiikö 23.13‑25; Zaa 18.39–19.16)

15 'Ylʋbö 'wuë 'mö,

Galɛ'möwlʋfɛtɩɩ ‑kä ghlɛɛ,

‑gɔmla Pilaatɩ,

'n ɔ sɛ 'kwädlɩ nɩkpɛ ‑bhlʋ ‑jie 'mö.

Nɩkpɛ a ‑mɔ nɩkpabhë gbää ɔ nɩ ‑sɛ ‑mä.

16 ‑Maa ‑lɛ a 'ylʋba 'la 'mö,

nɩkpɛ ‑bhlʋ,

nɩkpa 'wuë ‑yiɛ 'ɔ ‑lizoku 'kädɩɩ ɔ nʋä a za‑a,

ɔ ‑wʋ a ‑mä ‑jie 'mö.

'Mö wa laa Balabasɩ.

17 'N Pilaatɩ yiɛ nɩkpaa ‑wa suä ‑lɛ 'ligbëa nuë 'wʋ nimï 'yɩbhä,

ɔ lɛ naa:

«Nɩkpɛ wa laa Balabasɩ,

ɔ ‑nyɛ Zezwii wa laa Puënyɔɔ Lagɔ ‑sɛɛ ‑lɛ 'sɔ,

wa 'sɔɔ a dɔ'wʋ,

‑mɔ a 'yɩbhä bhä n nɩ ‑sɛ ‑jie 'mö?»

18 Nyɩasɛ Pilaatɩ 'niɛ ‑sɩbhä gbä,

‑maa ɔ ‑yi sɛ nɩɩ,

Zezwii,

Zwiiföwaa a 'kädɩɩ,

'yli ɔ këluëë,

nza wa plɩnɔnyɩɛ kä'mö.

19 Ɔ ‑wʋ Zezwii a ‑zijlea plɛ dɔ'wʋ,

'n ɔ 'lɛnglɛ yo'ɛɛ 'dɩ 'wʋ 'pä nɩɩ:

«Nɩkpɛ 'la,

ɔ'ɔɔ ‑lu nyima.

Sabɔɔ nɩ a'bhë,

ɔ za,

'nyinylɔyɛla 'käda n ghlɛɛ.

Zaa,

‑sɛa ɔ wɛlɩɩ kɛ'mö.»

20 ‑Maa ɔ 'yɩbhää nɩkpaa nimïï,

Lagɔbʋbɔwaa a 'kifiea,

wa ‑nyɛ Zwiiföwaa 'a 'nɛɛnɩwa 'kädɩɩ 'sɔ,

'n wa yiɛ nɩkpa 'la 'wlumö nyima,

wa lɛ naa:

«A nɩ gaa Balabasɩ,

ɔ 'kɔ ‑jie 'mö ‑sɛ,

‑maa a nɩ 'nyɔ 'dɩ nɩɩ,

Zezwii 'mö wa nɩ 'lɩbhä ɔ 'kä 'ku.»

21 'N Pilaatɩ yi'ɛɛ 'wʋ 'sɔ ‑bʋbʋʋ nimï 'yɩbhänɩ,

ɔ lɛ naa:

«Nɩkpa nɩ 'sɔ ‑kpɔ a dɔ'wʋ,

‑mɔ a 'yɩbhä bhä,

n nɩ 'tatinɩ 'yi?»

Wa 'wuë wa lɛ naa:

«Balabasɩ,

mö ‑n nɩ 'tatinɩ 'yi aa!»

22 Pilaatɩ lɛ naa:

«N kɩ 'nʋ,

‑maa Zezwii wa laa Kliisɩ,

sɛ a gbä bhä,

sɛ n nɩ 'zo 'nɩ?»

Wa 'wuë wa lɛ naa:

«Wa nɩ kʋnɔɔ su 'klʋ aa!»

23 'N ɔ yuëë nimï 'yɩbhä nɩɩ:

«‑Lizoku ‑mi ɔ nʋ bhä 'nɩ?»

'N wa yi'ɛɛ tenyii 'mö 'kpa,

wa lɛ:

«Wa nɩ kʋnɔɔ su 'klʋ aa!»

24 Sɛɛ nɩkpa a dila sumanɩɛ sa'a tenyii 'yize,

Pilaatɩ 'yɩɛ ‑sɩbhä 'ylɩmöö,

ɔ ‑yi sɛ nɩɩ ɔ'ɔɔ ɔ 'kä 'wa dila 'mö 'bhɛla zaa,

'n ɔ yiɛ 'nyu 'wʋ 'libhï,

wa 'wuë a 'yila 'klʋ,

'n ɔ yiɛ kɛ wɔlʋ.

Ɔ lɛ naa:

«Nɩkpɛ nɩ 'nɩɛ gbʋ ‑gömö ‑kä.

Zaa,

'ɔ kwiee a gbʋʋ,

‑amöö 'nuaa na a ‑kä,

a 'yize a 'wʋ a ‑lia‑a.»

25 Ɔ gbää sa'aa,

wa 'wuë wa lɛ naa:

«'Ɔ kwiee a gbʋʋ,

‑a ‑nyɛ ‑a'a yuëa 'sɔ,

wʋ nɩ mɛanyɩ ‑gömö.»

26 'N Pilaatɩ yia'aa Balabasɩ 'yi 'tatinɩ.

'N ɔ yiɛ 'slʋja 'dɩ 'nyɛ nɩɩ,

wa nɩ 'sɛlɩ Zezwii,

wa 'kɔ su 'klʋ kʋnɩɛ mö.

'Slʋjaa yɛ Zezwii ‑di zia

(Maakö 15.16‑20; Lwiikö 23.11; Zaa 19.2‑3)

27 Pilaatɩ 'a 'slʋjaa 'n wa yiɛ Zezwii 'wʋ 'libhï,

'n wa ‑nyɔɔ yiɛ ‑mä 'ɔ 'ligbëa a jijo'wʋ 'dio.

'N wa yiɛ wa 'bhɩaslʋja 'wuë wäzɩ 'n wa yiɛ Zezwii binɩ.

28 'N wa yoo 'ɔ ‑banɩɩ 'mö ‑sɛ,

'n wa yoo ‑bäna 'käda 'mö päla.

Sanyɩ‑na 'bhlɩlowluwaa ‑suä 'möö,

a 'zɩzla.

29 'N wa yiɛ ‑dɛglaglipë lɩbhä 'tɩɩ,

'n wa yonyɩɛ 'wlu zʋ,

'n wa yo'ɛɛ ‑peyi luukɛ 'mö zʋ 'nglɩmönyɔ a sɛ.

Wa 'zoo sa'a 'wëë,

'n wa pää ‑lɛ ɔ dlɩ 'mö ‑kokomïladigbï glu,

'n wa nɛpɔɔ,

'n wa nʋä:

«Zwiiföwaa a 'bhlɩlowli,

‑na nyɛmʋ nɩ zumanɩ!»

30 'N wa ngwlɔɔ 'dɔ 'klʋ,

'n wa sɔɔ ‑peyii kä'mö,

'n wa ‑dɩnɔnyɩɛ 'wlu yɔwʋ.

31 Wa nɛpɔɔ sa'a 'wëë,

‑bäna wa pälɔɔ a‑a 'möö,

'n wa yonyɩɛ 'mö ‑sɛ,

'n wa yoo 'ɔ ‑banɩɩ 'mö päla,

'n wa ‑nyɔɔ yia'aa mö wa 'kɔ su 'klʋ kʋnɩ.

Wa yɛ Zezwii su 'klʋ kʋnɩ

(Maakö 15.21‑32; Lwiikö 23.26‑43; Zaa 19.17‑27)

32 Wa ‑nyɛ Zezwii ‑wʋ mö dɔ'wʋ,

'n wa ‑nyɛ nɩkpɛ ‑bhlʋ yiɛ ‑mä 'yio 'wʋ 'wʋ gbanɩ.

Ɔ nglɩɛ Simɔɔ.

Glɔ ‑bhlʋ wa laa Silɛɛnɩ,

‑mä a nɩkpɛɛ.

Nɩkpɛ 'la 'n wa yoo 'wlumö köbhänɩ,

suu wa 'kää Zezwii 'klʋ kʋnɩɩ,

'n wa yonyɩɛ sula.

33 Wa möä,

'n wa yiɛ dɛ ‑mämaa ‑bhlʋ ghlɛ.

‑Lɛ wa laa Gogotaa,

mɩɩ sɛɛ zɛmö nɩɩ 'wutɔkʋ.

34 Wa ghlɛɛ ‑lɛ 'n wa yiɛ Zezwii nʋ 'nyɛ ɔ 'kä 'nɩmä.

Nʋ 'la,

‑gwäzɩ wʋ kää 'mö.

Zaa,

ɔ yuä nglii,

ɔ lɛ ɔ 'naa nɩmʋ.

35 'N wa yoa'aa 'wʋ 'libhï,

'n wa yoo ‑lɛ suu 'klʋ kʋnɩ.

Wa kʋnɔɔɔ ‑lɛ 'wëë,

'n wa yiɛ 'ɔ ‑banɩɩ ‑nɩgbɩ 'wʋ 'pä wa 'kɩ dlinɩ.

36 Wa 'pää ‑nɩgbɩ 'wëë,

'n wa yiɛ sɛ glɩ wa 'kɔ ‑kʋ.

37 Suu wa kʋnɩɛ Zezwii 'klʋʋ,

wʋ ghäyɩdaa,

'kïbhë ‑bhlʋ ‑a slʋnɩɛ nɩkpa 'ɔ 'lɩbhälɩbhʋʋ a zɛmöö,

'mö wa mɩanɩɛ ‑mä.

Sɛ'ɛ a nʋä nɩɩ:

Zezwii,

Zwiiföwaa a 'bhlɩlowli.

38 Wa kʋnɩmö'ɛ ‑lɛ jɛzlʋwa 'sɔ 'wa swii 'klʋ.

‑Bhlʋ ‑wʋ mä'ä ɔ luukɛ 'wʋ,

‑bhlʋ ‑wʋ mä'ä ɔ kɔpɛ 'wʋ.

39 ‑Maa dɛ wa kʋnɩɛ da'a Zezwii,

nɩkpaa wa ghlɛnɩɛ ‑lɛ,

wa ‑kɔɔ 'ylɩmöö,

nimïla wa kplisanɔɔ,

'n wa bɩtɩɛ 'wlu,

'n wa zio ‑di,

40 'n wa nʋä:

«Ee ‑la!

‑Nmö gbä'ɛ nɩɩ,

‑n yi Lagɔbudu 'Kɔdʋʋ wlɛ,

‑n yi 'ylɩ ta ‑mumuu 'sɩbhänɩ,

‑n ‑kä ‑tiamö Lagɔ 'a Yuu glɩnɩɩ,

'bhöö yɩ ‑lɛ su 'klʋ,

‑n 'kä sɛ 'sibhë,

‑n 'kä ‑nanyɩ puë.»

41 Sɛ ‑bhʋlʋ ‑kpɔ 'la,

Lagɔbʋbɔwaa a 'kifiea muë,

Moyizɩ 'a Gböö a 'cɩawaa muë,

'n 'nɛɛnɩwa 'kädɩɩ,

‑sɩbhä wa nɛpɔmöä Zezwii.

Wa lɛ naa:

42 «Ɔ yɛ nɩkpa a ‑bɛ puë,

‑maa ɔ'ɔɔ ɔnyɩ a puëpuu bhɛnɩ.

Mɔɔ glɩnɩ'ɛ Yizlaɛlɩ a 'bhlɩlowlii,

ɔ nɩ kwliɛ ‑ka ‑lɛ suu 'klʋ,

‑a 'kɔ 'ylɩmö,

‑a 'kɔ dlɩ 'wʋ ‑kä.

43 Ɔ lɛ Lagɔ 'mö ɔ 'tɛɛnɩ dlɩ 'n ɔ yi'ɛɛ nɩɩ,

Lagɔ 'a Yuu 'mö ɔ glɩnɩɛ nʋ.

Zaa,

‑a nɩ 'tatinɔɔ ‑ka 'yi,

Lagɔ ‑kɔɔ puëë yii,

‑a 'kɩ 'ylɩmö.»

44 Jɛzlʋwa 'la 'sɔ ‑kpɔ wa kʋnɩmö a‑a ‑lɛ ɔ yɔwʋ swi 'klʋʋ,

‑sɩbhä wa nɛpɔmɔ'ɛɛ wabhlɩ.

Zezwii a nyɛmʋ yɛ bhɩɛ

(Maakö 15.33‑41; Lwiikö 23.44‑49; Zaa 19.28‑30)

45 'Ylʋ ‑wʋ 'du 'mö,

'n 'yuylukwëa yiɛ bhlɩɩ 'wuë ‑gömö yi.

A ‑sɛ 'gïle ta.

46 ‑Maa ‑kidogïle ta 'mö a sɛ,

'n Zezwii yiɛ tenyii 'mö 'kpa,

ɔ lɛ:

«Eli,

Eli,

lɛma sabatani?^b

» Mɩɩ sɛɛ zɛmö nɩɩ:

«‑Atʋ Lagɔ,

‑Atʋ Lagɔ,

'saa bhä n‑n ‑yii 'wʋ ylɛ?»

47 Zezwii 'kpaa 'möö,

‑wa ‑wʋmöä ‑lɛ,

wa gla'mö a ‑mumuë,

wa lɛ naa:

«A ‑pʋnɩ 'yukwli,

‑maa ɔ wäzɩ Lagɔ a 'möbhïlanɩnyɔ Elii.»

48 Wa gla'mö a nɩkpɛ ‑bhlʋ,

'n ɔ yiɛ guë,

'n ɔ yiɛ ‑yʋkʋdudukwë kie mö,

'n ɔ yeaa ‑mä nʋʋ ‑wʋ kää nɩnɩ 'mö 'ngwa,

'n ɔ yeaa ‑peyi 'yli gwanɩ,

ɔ yiɛ,

'n ɔ yiɛ Zezwii ‑peyii nuë 'wʋ 'zʋ,

ɔ 'kä ‑yʋkʋdudukwëa ngʋngwanɩ,

ɔ 'kä 'nɩmä.

49 ‑Maa ‑muë'la lɛ nɩɩ:

«'Nɩgbö,

'n Elii ‑kɔɔ ‑lɛ su 'klʋ ‑sɛɛ yii,

‑a 'kɩ 'ylɩmö.»

50 'N Zezwii yi'ɛɛ tenyii 'mö 'kpa 'n 'ɔ nyɛmʋʋ yiɛ bhɩɛ.

51 ‑Maa Lagɔbudu 'Kɔdʋʋ a 'kïbhëa ‑a ‑wʋä tenyii 'wlɩlɩɩ,

ghlidoo 'kɔdʋʋ ‑bhlʋ muu zizaa ‑mä 'wʋ.

Zezwii bhliɛ nyɛmʋ cuu,

ghlidoo 'la,

'n wʋ yiɛ jijo'wʋ 'mö ghlɔnɩ ‑bioo,

tɛɛnɩ ‑mä ghäyɩ 'wʋ ‑këë mä'ä zɛmö.

'N dʋdʋʋ yiɛ tɩtlɛnɩ,

'n kpayaa yiɛ 'mö ghɔlɔ,

52 'n lesikpï yiɛ nuë do.

Bhla'mö a Lagɔnɩkpa a ‑bɛ ‑wa 'ku a‑a 'n wa yiɛ gɔlɔ,

53 ‑zlɩ Lagɔ gälaa Zezwii,

'n ɔ yoo glu ‑sɛ 'wëë,

nɩkpa 'la,

'n wa yiɛ ‑mä lesikpï 'mö 'wlʋ,

'n wa yiɛ ‑mä Zɛluzalɛɛmö glɔ 'mö plɛ,

nɩkpa a ‑bɛ 'yuë 'ylɩmö.

54 'Slʋjaa ‑wa ‑kʋ a‑a Zezwii,

wa ‑nyɛ 'wa 'kifii 'sɔ,

wa 'yɩɛ dʋdʋʋ ‑wʋ tɩtlɛnɩɛ ‑nyɛ 'saa 'plɩɛ 'wʋ 'sɔ 'ylɩmöö,

'n nganɔ yuëë köbhä tenyii,

wa lɛ naa:

«Nɩkpɛ nɩ,

Lagɔ 'a Yuu 'mö ɔ glɩnɩ a‑a ‑tiamö.»

55 ‑Maa 'ngwlɩ a ‑bɛ ‑wa ‑gänɩmö a‑a Zezwii,

'n wa yi a‑a ‑mä Galilee‑bhölɩɩ 'mö 'bhöö,

‑wa ‑wɔɔ a‑a 'ylii,

wa ‑wʋmö a ‑lɛ.

Wa 'nɩgbö 'yukudɛ 'n wa ylɛɛ.

56 Wa gla'mö,

Madalaa a 'ylikwii Malii mɔ,

Zaakö ‑nyɛ Zɩzɛɛfʋ 'sɔ a ‑da Malii mɔ,

'n Zebedee ‑yowluwa a ‑da,

wa ‑wʋmö a ‑lɛ.

Wa yɛ Zezwii a ‑gäzɛɛ ziza

(Maakö 15.42‑47; Lwiikö 23.50‑56; Zaa 19.38‑42)

57 Zezwii 'kuä 'wë a ‑kidosɛ,

nɩkpɛ ‑bhlʋ wa laa Zɩzɛɛfʋ,

'n ɔ yiɛ yi.

Wʋlʋnɩnyɔ ɔ glɩnɩɛ.

Glɔ ‑bhlʋ wa laa Alimatee,

‑mä a nɩkpɛɛ.

Zezwii 'mö ɔ ‑gänɩmö a 'yɛɛ ɔbhlɩ.

58 Nɩkpɛ 'la,

'n ɔ yiɛ ‑mä Pilaatɩ ghlɩ,

ɔ lɛ naa:

«N bhiamö,

n 'kä Zezwii a ‑gäzɛɛ kie mö,

'n 'kɛ ziza.»

'N Pilaatɩ yiɛ nɩkpa 'dɩ 'nyɛ,

wa 'kä ‑gäzɛɛ kie mö,

wa 'kɛ Zɩzɛɛfʋ yowʋ 'nyɛ.

59 Nɩkpɛ 'la,

'n ɔ yiɛ ‑gäzɛɛ 'wʋ 'libhï,

'n ɔ yee lekwi 'pɩpɛ 'pɩpɛ bibe 'tɩɩ,

60 'n ɔ yee zizaa mö.

Ɔnyɩa 'a lesikpëa wa 'bhlu a‑a ‑budubheyi a sɛ ‑mä kpayi a ‑gägaa 'möö,

‑mä ɔ zizaa Zezwii a ‑gäzɛɛ.

'N ɔ yiɛ kpiyi 'kädɛ 'bhisa 'n ɔ yee ‑lɛ lesikpëa a ngloluë 'wʋ 'zʋ,

'n ɔ yiɛ ‑lɛ ‑gba 'n ɔ yiɛ mö.

61 ‑Maa ɔ ‑wʋä Zezwii a ‑gäzɛɛ ziza dɔ'wʋʋ,

Madalaa a 'ylikwii Malii,

ɔ ‑nyɛ Malii ‑mɔ'la 'sɔ,

wa ‑wʋmö a ‑lɛ.

Wa glɩ ‑lɛ lesikpëa yɔwʋ,

'n ɔ yee ziza.

Wa yɛ Zezwii 'a lesikpëa 'slʋja nuë 'wʋ zʋ

62 Zlɩ ‑ka zɩɩ,

‑gwlɛnɩzlɩɛ zaa,

Lagɔbʋbɔwaa a 'kifiea,

wa ‑nyɛ Falizɩɛwaa 'sɔ,

'n wa yiɛ ‑mä Pilaatɩ ghlɩ.

63 Wa lɛ naa:

«‑Atʋ 'kɔdɔ,

‑a'a dilaa yɛ ‑lɛ bhlinɩ nɩɩ,

yionyɔ 'la ‑ɔ 'kuä ‑kido 'wʋʋ,

dɛ ɔ ‑bhölɩ a‑a ‑bhlɛ,

sɛ'ɛ ɔ nyɛ a‑a nɩkpa 'dɩ nɩɩ,

ɔ ‑kä 'ku 'wë a ylɩ a tanɛɛ 'mö,

ɔ yi gɔlɔ ɔ yi glu 'wlʋ.

64 Zaa,

'nyɛ nɩkpa 'dɩ,

wa 'kä 'ɔ lesikpëa ‑kʋä mö ‑këë ylɩ 'la ta ‑kpɔ 'kä 'plɩ,

nzɩɩ 'ɔ ‑gänɩwaa tɩa ɔ ‑gäzɛɛ 'wi ghlie yi 'wë,

wa tɩa ɔ 'tɩtɩ bia nɩɩ ɔ yɛ gɔlɔ ɔ yɛ glu 'wlʋ.

‑Maa n‑n 'nɩa ‑sɩbhä 'zʋʋ,

widɩ 'la wa 'käa'aa ‑sɩkaa ‑sɛ,

sɛ yɩ 'kää nɩkpa 'wlumö nyima,

‑sɩbhä yia 'mö 'tɛɛ,

‑sɩbhä yia tɛkädɔ'wʋ 'wʋ zi.»

65 'N Pilaatɩ yuëë 'slʋja yo'wʋ 'nyɛ,

ɔ lɛ naa:

«Nɩkpa muëë dɛ'ɛ,

wa 'kä lesikpëa ‑kʋ.

A ‑kä möö,

a sɛ a bhɛnɩɛ,

a nɩ ‑kʋ ‑sɩbhä lesikpëa.»

66 Nɩkpa 'la 'n wa ‑nyɛ 'slʋjaa yiɛ mö.

Wa möä,

lesikpëa a ngloluëa 'n wa yeaa sasɛ ‑gba,

'n wa yiɛ ‑lɛ kpiyii mɩanɩ 'wë 'tɩɩ,

'n wa yiɛ ‑lɛ ɛ 'klʋ yɩblɩnɩdɛ 'zʋ,

'n wa yiɛ 'slʋjaa 'dɩ 'nyɛ wa 'ka ‑kʋ.