Maakö 15

Wa yɛ Zezwii ‑lɛ Pilaatɩ a 'yila 'klʋ kwä

(Matie 27.1‑2,11‑14; Lwiikö 23.1‑5; Zaa 18.28‑38)

Zlɩ zɩɛ,

'zɔkpɔ 'pii 'mö,

Lagɔbʋbɔwaa a 'kifiea muë,

Zwiiföwaa 'a 'nɛɛnɩwa 'kädɩɩ muë,

Moyizɩ 'a Gböö a 'cɩawaa muë,

Zwiiföwaa 'a ‑zijlituwaa 'wuë kökä 'n wa yiɛ 'wlu 'yɩbhä wa 'kä Zezwii 'a wɛlɩɩ 'wlu ‑dɩ.

Wa 'yɩbhää 'wlu 'wëë,

'n wa yiɛ Zezwii gwa,

'n wa yoo ‑mä ‑gɔmla 'kɔdɔɔ Pilaatɩ a 'yila 'klʋ kwä.

2 Wa ‑nyɔɔ ghlɛɛ ‑mä,

'n Pilaatɩ yoo nimï 'yɩbhä,

ɔ lɛ naa:

«Zwiiföwaa a 'bhlɩlowli mö ‑n glɩnɩ bhä ‑a?»

Zezwii lɛ naa:

«‑Na'bhë,

‑sɩbhä ‑n gbää da'a.»

3 Lɛ Pilaatɩ a 'yila 'klʋ,

'n Lagɔbʋbɔwaa a 'kifiea yiɛ 'kïbhï a ‑bɛ Zezwii ‑gömö 'zʋ.

4 'N Pilaatɩ yoo 'wʋ 'sɔ nimï 'yɩbhänɩ nɩɩ:

«'Kïbhï 'la 'wuë wa 'bhöömöä da'a ‑gömö 'zʋää,

‑naa 'kɩ bhä ‑gömö ‑sɛ ‑a?»

5 ‑Maa Zezwii 'nɔɔ ngli pälɩ.

'N yɩ yiɛ Pilaatɩ ngli yɩa.

Pilaatɩ lɛ wa nɩ kʋnɩ Zezwii su 'klʋ

(Matie 27.15‑26; Lwiikö 23.13‑25; Zaa 18.39–19.16)

6 'Kwädlɩ a dɔ'wʋ,

Galɛ'möwlʋfɛtɩɩ ‑kä ghlɛɛ,

nɩkpɛ ‑bhlʋ,

‑mɔ Zwiiföwaa yɩbhää,

'mö Pilaatɩ sɛɛ ‑jie 'mö.

7 ‑Lɛ a 'ylʋba 'la 'mö,

wa 'pä a nɩkpa ‑mumuë ‑jie 'mö.

Nɩkpa la,

‑gɔmlɩwaa 'mö wa kwä a‑a tʋ.

Wa 'lɩbhä a nɩkpɛ ‑bhlʋ 'n ɔ yiɛ 'ku.

Tʋkwäwa 'la a gla'mö a ‑nɔ ‑bhlʋ 'mö wa laa Balabasɩ.

8 Zaa,

'n nɩkpa a ‑bʋbʋ yiɛ ‑mä Pilaatɩ ghlɩ,

ɔ 'kä 'kwädlɩ a saa Galɛ'möwlʋfɛtɩɩ ‑kä ghlɛɛ,

nɩkpɛ ‑bhlʋ ‑jie 'mö ‑sɛ.

9 Wa ghlɛɛ ‑lɛ,

'n Pilaatɩ yuëë nimï 'yɩbhä nɩɩ:

«Zwiiföwaa a 'bhlɩlowli 'mö n nɩ 'tatinɩ bhä 'yi ‑a?»

10 Ɔ ‑yi sɛ nɩɩ,

'ylikälɩsɛ Lagɔbʋbɔwaa a 'kifiea gbää wa 'kɔ 'lɩbhä nza wa ‑lɛmɔɔnyɩɛ.

11 Nɩkpa 'la,

‑bʋbʋʋ 'mö wa 'pää wɛlɩ ngli nɩɩ,

Balabasɩ 'mö wa nɩ ‑sɛ ‑jie 'mö.

12 'N Pilaatɩ yuë'ɛɛ 'wʋ 'sɔ nimï 'yɩbhänɩ,

nɩɩ:

«Nɩkpɛ 'la a laa Zwiiföwaa a 'bhlɩlowlii,

sɛ a gbä bhä sɛ n nɩ 'zo?»

13 Wa 'wuë 'n wa yiɛ 'mö 'kpa,

wa lɛ:

«Kʋnɔɔ su 'klʋ aa!»

14 'N Pilaatɩ yuëë nimï 'yɩbhä nɩɩ:

«‑Lizoku ‑mi ɔ nʋ bhä 'nɩ?»

'N wa yi'ɛɛ tenyii 'mö 'kpa,

wa lɛ:

«Wa nɩ kʋnɔɔ su 'klʋ aa!»

15 Wa gbää sa'aa,

Pilaatɩ 'kä ɔnyɩ ‑bʋbʋʋ dlɩ yɔwʋ nɛmanɩ zaa 'n ɔ yiɛ 'wʋ nglu 'n ɔ yiɛ Balabasɩ ‑jie 'mö ‑sɛ.

'N ɔ yiɛ 'slʋja 'dɩ 'nyɛ nɩɩ,

wa nɩ 'sɛlɩ Zezwii,

wa 'kɔ su 'klʋ kʋnɩɛ mö.

'Slʋjaa yɛ Zezwii ‑di zia

(Matie 27.27‑31; Zaa 19.2‑3)

16 'N 'slʋjaa yiɛ Zezwii 'wʋ 'libhï,

'n wa ‑nyɔɔ yiɛ ‑mä ‑gɔmla Pilaatɩ 'a 'ligbëa a jijo'wʋ 'dio.

'N wa yiɛ wa 'bhɩaslʋja 'wuë wäzɩ.

17 'N wa yoo 'ɔ ‑banɩɩ 'mö ‑sɛ,

'n wa yoo ‑bäna 'käda 'mö päla,

sanyɩ‑na 'bhlɩlowluwaa ‑suä 'möö,

a 'zɩzla.

'N wa yiɛ ‑dɛglaglïpë lɩbhä,

'n wa yonyɩɛ 'wlʋ zʋ.

18 'N wa bhälɩnɔɔ glapälɩsɛ 'klʋ,

'n wa nʋä:

«Zwiiföwaa a 'bhlɩlowlii,

‑na nyɛmʋ nɩ zumanɩ!»

19 'N wa 'sɛlɩnɔɔ ‑peyi 'wlu.

'N wa pɔɔ 'dɔ 'wʋ.

‑Lɛ ɔ dlɩ 'mö 'n wa pää ‑lɛ ‑kokomïladigbï glu.

20 Wa nɛpɔɔ sa'a 'wëë,

‑bäna 'kädaa wa pälɔɔ a‑a 'möö,

'n wa yonyɩɛ 'mö ‑sɛ,

'n wa yoo 'ɔ ‑banɩɩ 'mö päla.

'N wa ‑nyɔɔ yiɛ mö,

wa 'kɔ su 'klʋ kʋnɩ.

Wa yɛ Zezwii su 'klʋ kʋnɩ

(Matie 27.32‑44; Lwiikö 23.26‑43; Zaa 19.17‑27)

21 Wa ‑nyɛ Zezwii ‑wʋ mö dɔ'wʋ,

'n wa ‑nyɛ nɩkpɛ ‑bhlʋ yiɛ 'wʋ gbanɩ.

Ɔ 'bhöö 'kwlɛ 'mö.

Ɔ nglɩɛ Simɔɔ.

Glɔ ‑bhlʋ wa laa Silɛɛnɩ,

‑mä a nɩkpɛɛ ɔ glɩnɩɛ.

Alɛzaadlɩ ‑nyɛ Ghlufusɩ 'sɔ,

wa dɩba mɔɔ.

Nɩkpɛ 'la,

'mö 'slʋjaa sulaa ‑glasɛ suu wa 'kää Zezwii 'klʋ kʋnɩɩ.

22 Dɛ ‑bhlʋ dɛ wa ‑nyɛ Zezwii ‑wʋä mö dɔ'wʋʋ,

‑lɛ wa laa Gogotaa,

mɩɩ sɛɛ zɛmö nɩɩ 'wutɔkʋ.

23 Wa ghlɛɛ ‑lɛ,

gwäzɩɩ wa laa miilɩ,

'mö wa pälɩɛ duvɛɛ 'mö,

wa 'kɔnyɩ 'nyɛ ɔ 'kä 'nɩmä.

‑Maa ɔ 'nɛɛ 'nɩmä.

24 'N wa yoa'aa 'wʋ 'libhï,

'n wa yoo su 'klʋ kʋnɩ.

'N wa yiɛ 'ɔ ‑banɩɩ ‑nɩgbɩ 'wʋ 'pä wa 'kɩ dlinɩ.

25 'Ylʋväla 'wlʋä glu 'wëë,

'gïle ta yɛ 'plɩ 'wë,

'n wa yoo su 'klʋ kʋnɩ.

26 Suu wa kʋnɔɔ 'klʋʋ,

‑lɛ wʋ ghäyɩdaa,

'kïbhë ‑bhlʋ ‑a slʋnɩɛ nɩkpa 'ɔ 'lɩbhälɩbhägbʋʋ a zɛmöö,

ma‑a mɩanɩɛ ‑lɛ.

Sɛ'ɛ kïbhë 'la nʋä nɩɩ:

Zwiiföwaa a 'bhlɩlowli.

27 Wa kʋnɩɛ Zezwii su 'klʋʋ,

wa kʋnɩmö jɛzlʋwa 'sɔ wa ‑nɩ 'klʋ.

‑Bhlʋ ‑wʋ mä'ä ɔ luukɛ 'wʋ,

‑bhlʋ ‑wʋ mä'ä ɔ kɔpɛ 'wʋ. [

28 ‑Mä Lagɔbɔgʋʋ 'mö,

wɛlɩkïbhë ‑bhlʋ cɛlɩɛ ‑mä,

sɛ'ɛ a nʋä nɩɩ:

Jɛzlʋnyɔ a sɛ wa 'kɔɔ 'zʋ.^a

Wɛlɩkïbhë 'la,

ma‑a 'wlunɩɛ da'a 'yli.]

29 Dɛ wa kʋnɩɛ Zezwii su 'klʋʋ,

nɩkpaa ‑wa ghlɛnɩɛ ‑lɛ,

wa ‑kɔɔ 'ylɩmöö,

nimïla wa kplisanɔɔ,

'n wa zioo ‑di,

'n wa nʋä:

«Ee ‑la!

‑Nmö gbä'ɛ nɩɩ,

‑n yi Lagɔbudu 'Kɔdʋʋ wlɛ 'wë,

‑n yu 'ylɩ ta 'mö 'sɩbhänɩɩ,

30 puë yɩ ‑nanyɩ.

'Bhöö ‑lɛ su 'klʋ ‑n 'kä sɛ 'sibhë.»

31 Sɛ ‑bhlʋ ‑kpɔ 'la,

‑sɩbhä Lagɔbʋbɔwaa a 'kifiea ‑nyɛ Moyizɩ 'a Gböö a 'cɩawaa 'sɔ,

wa nɛpɔmöä Zezwii.

'N wa nʋä:

«Ɔ yɛ ‑mumuë puë 'wë,

ɔ'ɔɔ bhɛnɩ ɔ 'kä ɔnyɩ puë.

32 Mɔɔ glɩnɩ'ɛ Puënyɔɔ Lagɔ ‑sɛɛ ‑lɛ,

Yizlaɛlɩ a 'bhlɩlowlii,

ɔ nɩ kwliɛ yɩ ‑ka ‑lɛ su 'klʋ,

‑a kɔ 'ylɩmö,

‑a 'kɔ dlɩ 'wʋ ‑kä.»

Jɛzlʋwa 'la 'sɔ ‑kpɔ wa kʋnɩmö a‑a ‑lɛ ɔ yɔwʋ swi 'klʋʋ,

‑sɩbhä wa nɛpɔmɔ'ɛɛ wabhlɩ.

Zezwii 'a nyɛmʋ yɛ bhɩɛ

(Matie 27.46‑56; Lwiikö 23.44‑49; Zaa 19.28‑30)

33 'Ylʋ ‑wʋ 'du 'mö,

'n 'yuylukwëa yiɛ bhlɩɩ 'wuë ‑gömö yi.

A ‑sɛ 'gïle ta.

34 ‑Kidogïle ta 'mö,

'n Zezwii yiɛ 'mö 'kpa,

ɔ lɛ:

«Eloyi,

Eloyi,

lɛma sabatani?»

Mɩɩ sɛɛ zɛmö nɩɩ:

«‑Atʋ Lagɔ,

‑Atʋ Lagɔ,

'saa bhä n‑n ‑yii 'wʋ ylɛ?» ^b

35 Zezwii 'kpaa 'möö,

‑wa ‑wʋ a‑a ‑lɛ a gla'mö a ‑mumuë,

wa lɛ:

«A ‑pʋnɩ 'yukwli,

‑maa ɔ wäzɩ Lagɔ a 'möbhïlanɩnyɔ Elii.»

36 'N ‑bhlʋ yiɛ guë,

'n ɔ yiɛ ‑yʋkʋdudukwë kie mö,

'n ɔ yeaa ‑mä nʋʋ ‑wʋ kää nɩnɩ 'mö 'ngwa,

'n ɔ yeaa ‑peyi 'yli gwanɩ,

'n ɔ yeaa Zezwii nuë 'wʋ 'zʋ,

ɔ 'ka 'mö ngʋngwanɩ.

Ɔ lɛ naa:

«A 'nɩgbö,

Elii ‑kɔɔ ‑lɛ su 'klʋ ‑sɛɛ yii,

‑a 'kɩ 'ylɩmö.»

37 'N Zezwii yiɛ 'mö 'kpa,

'n 'ɔ nyɛmʋʋ yiɛ bhɩɛ.

38 'Tɛnyɩ 'la ‑bhlʋ ‑kpɔ 'mö,

Lagɔbudu 'Kɔdʋʋ a 'kïbhëa,

‑a ‑wʋä tenyii 'wlɩlɩɩ,

a nuë 'wʋ a ghlidoo 'kɔdʋʋ ‑wʋ ‑wʋä ‑lɛ,

'n wʋ yiɛ jijo'wʋ 'mö ghɔlɔnɩ,

tɛɛnɩ ‑mä ghäyɩ ‑këë mä'ä zɛmö.

39 'Slʋjaa a 'kifii ‑ɔ 'nɩgbö a‑a ‑lɛ Zezwii a 'yila 'klʋʋ,

ɔ 'yɩɛ sɛ ɔ nyɛmʋ bhɩɛ 'ylɩmöö,

ɔ lɛ naa:

«Nɩkpɛ nɩ,

Lagɔ 'a Yuu 'mö ɔ glɩnɩ a‑a ‑tiamö.»

40 Ngwlɩ ‑mumuë ‑wʋmö a ‑lɛ,

wa 'nɩgbö ngëbleblu 'n wa ylɛɛ.

Wa gla'mö,

Madalaa a 'ylikwii Malii mɔ,

Malii,

Zaakö 'tikëyi ‑nyɛ Zoozɩ 'sɔ a ‑da mɔ,

'n Salomee,

wa ‑wʋmö a ‑lɛ.

41 'Tɛnyɩ 'mö Zezwii ‑wʋ a‑a ‑bhlɛ ‑mä Galilee‑bhölɩɩ 'möö,

ngwlɩ 'la,

mʋa ‑gänɩmɔ a‑a 'n wa ‑wɔɔ a‑a 'yli.

Ngwlɩ ‑mumuë a ‑bɛ ‑wa ‑nyɛ Zezwii 'sɔ mä a‑a ‑mä Zeluzalɛɛmö,

wa ‑wʋmö a ‑lɛ.

Wa yɛ Zezwii a ‑gäzɛɛ zizaa

(Matie 27.57‑61; Lwiikö 23.50‑56; Zaa 19.38‑42)

42 Zlɩ ‑kä zɩ ‑gwlɛnɩzlɩɛ zaa,

Zezwii 'kuä 'wëë a ‑kidosɛ,

43 ‑glɔɔ wa laa Alimatee,

nɩkpɛ ‑bhlʋ ‑wʋ ‑mä,

'mö wa laa Zɩzɛɛfʋ,

Zwiiföwaa 'a ‑zijlituwa 'kädɩɩ gla'mö ‑mä ɔ ‑wʋmöä.

Nɩkpɛ a ‑mɔ kää dlɩ 'wʋ nɩɩ,

Lagɔ 'a 'kämanɔɔ yi ‑pa 'yli 'wlʋnɩɩ,

'mö ɔ glɩnɩɛ.

Nɩkpɛ 'la mɔɔ kämanɩɛ 'mö,

'n ɔ yiɛ ‑mä Pilaatɩ ghlɩ,

'n ɔ yoo Zezwii a ‑gäzɛɛ 'yɩbhänɩ ɔ 'kɛ ziza.

44 Zɩzɛɛfʋ gbää sa'aa,

Pilaatɩ,

ngli kɔ mla.

Ɛ'ɛ ‑bhö nyɩasɛ,

‑maa ɔ'ɔɔ sɛɛ Zezwii yɛ a 'kuä ‑yi.

Zaa,

'n ɔ yiɛ 'slʋjaa a 'kifii wäzɩ,

'n ɔ yoo nimï 'yɩbhä nɩɩ:

«Ɔ yɛ a bhä ‑pa 'ku ‑a?»

45 'Slʋjeyi 'nyɔɔ 'dɩ nɩɩ,

ɔ yɛ a nyɛmʋ bhlii,

'n Pilaatɩ yiɛ Zezwii a ‑gäzɛɛ bhʋ ‑gömö ‑sɛ.

'N Zɩzɛɛfʋ yee kie 'mö.

46 Ɔ möä,

'n ɔ yiɛ lekwi 'pɩpɛ pɩa.

'N ɔ yiɛ Zezwii a ‑gäzɛɛ ‑lɛ suu 'klʋ ‑sɛ,

'n ɔ yee lekwii bibe.

Lesikpëa wa 'bhluä ‑mä kpayi a ‑gägaa 'möö,

'n ɔ yee ‑mä ziza.

'N ɔ yiɛ kpiyi 'kädɛ 'bhisa,

'n ɔ yee ‑lɛ lesikpëa a ngloluë 'wʋ zʋ.

47 Wa ‑wʋä Zezwii ziza dɔ'wʋʋ,

Madalaa a 'ylikwii Malii ‑nyɛ Zoozɩ a ‑da Malii 'sɔ,

wa ‑wʋ a ‑lɛ,

nzɩɩ wa 'kä sɛ wa zizoo 'ylɩmö.