Maakö 16

Zezwii yɛ glu 'wlʋ

(Matie 28.1‑8; Lwiikö 24.1‑12; Zaa 20.1‑10)

‑Gwlɛnɩzlɩ 'plɩɛ 'wëë,

Madalaa a 'ylikwii Malii mɔ,

Zaakö a ‑da Malii mɔ 'n Salomee,

kpöö ‑yɩ 'pää nglɛ a nglɛ,

'n wa yiɛ pɩa,

wa 'kɩ Zezwii a ‑gäzɛɛ yɔwʋ 'zʋ.

2 Zlɩ zɩɛ,

'dimasi a 'zɔkpɔ 'pii 'mö,

ylʋʋ 'wlʋä glu cuu,

'n wa yiɛ ‑mä Zezwii a lesikpë 'wʋ mö.

3 Wa ‑wʋ mö dɔ'wʋ,

'n wa 'yɩbhäyɩbhänɩɛ nimï nɩɩ:

«Kpiyii ɛ ‑wʋä ‑lɛ lesikpëa a ngloluë 'wʋʋ,

‑ɔ 'kɛ bhä ‑lɛ ‑sɛ 'nɩ?»

4 ‑Maa wa ghlɛɛ ‑lɛ lesikpëa yɔwʋʋ,

wa lɛ zʋ a sɛ'ɛɛ,

kpiyikädɛbhë 'la,

ɛ sa‑a ‑lɛ.

5 Wa ghlɛɛ ‑lɛ,

'n wa yiɛ ‑mä lesikpëa 'mö plɛ.

'N wa yiɛ ‑mä wa luukɛ 'wʋ nyɛgbayu 'ylɩmö,

ɔ gölɩ sɛ.

Ɔ ‑pla ‑bäna 'pöpa 'mö,

'n nganɔ yuëë 'lɩbhä.

6 'N nyɛgbayuu yuëë gbʋ 'wʋ ‑dɩ,

ɔ lɛ naa:

«Nganɔ nɩ tanyɩ 'lɩbhä.

N ‑yi sɛ nɩɩ,

Nazalɛɛtɩ a Zezwii wa kʋnɩ a‑a su 'klʋʋ,

ɔ ‑gäzɛɛ 'mö a tɛlɩɛ sɛ.

Ɔ yɛ glu 'wlʋ.

Ɔ'ɔa'a mä'ä ‑wʋ.

A'bhï dɛ wa 'zʋ a‑a ɔ ‑gäzɛɛ,

‑lɛ a yɩlɩɛ da'a 'wʋ.

7 Zaa,

a nɩ mö,

a 'nyɛ 'ɔ ‑gänɩwaa Piɛlɩ ‑nyɛ ɔ 'bhɩa 'sɔ 'dɩ nɩɩ,

ɔ ‑gä ‑mä Galilee‑bhölɩɩ 'mö 'yuku,

‑mä a 'kɔɔ ghlɩnɩ.

Ɔ'bhë ‑sɩbhä ɔ 'nyanyɩ a‑a 'dɩ.»

8 Nyɛgbayuu 'nyʋää ‑sɩbhä 'dɩɩ,

nganɔɔ a za wa'aa wanyɩ ‑yi.

Wa yɔwʋ ‑wʋ tɩtlɛnɩ dɔ'wʋ,

'n wa yiɛ ‑mä lesikpëa 'mö 'wlʋ,

'n wa yiɛ mö.

Nganɔɔ a za,

tɩtɩɩ nyɛgbayuu 'nyʋä a‑a,

wa 'niɛ ‑sɛ.

Zezwii yɛ ɔnyɩ Madalaa a 'ylikwii Malii 'ylimö tulanɩ

(Matie 28.9‑20; Lwiikö 24.13‑35; Zaa 20.11‑18)

[

9 'Dimasi a 'zɔkpɔ 'pii 'mö,

Zezwii 'wlʋä gluu,

nglɔ ‑bhlʋ,

Madalaa a 'ylikwii Malii,

ɔ kpëti a‑a zuzukuzokuu ngbi'sɔ ‑kpɔ ‑gömöö,

'mö ɔ tulanɩɛ ɔnyɩ 'ylimö tɛɛ.

10 Nglɔ 'la,

ɔ 'yɩɛ Zezwii 'ylɩmö 'wëë,

Zezwii 'a ‑gänɩwaa 'mö ɔ kwää 'dɩ.

Ɔ lɛ 'bhöö 'lɛ wa ‑kɔnɩ,

wa ‑wʋ ‑bhlɛ 'wi dɔ'wʋ.

11 Ɔ 'nyʋä 'dɩ nɩɩ,

ɔ'bhë ɔ yɛ Zezwii 'ylɩmö,

‑maa ɔ yɛ glu 'wlʋʋ,

wa 'niɛ dlɩ 'wʋ ‑kä.

Zezwii yɛ ɔnyɩ ɔ ‑gänɩwa 'sɔ 'ylimö tulanɩ

12 Zezwii tulanɩɛ ɔnyɩ Malii 'ylimö 'wëë,

'n ɔ yiɛ ɔnyɩ 'ɔ ‑gänɩwaa a gla'mö a nɩkpa 'sɔ 'ylimö tulanɩ.

Wa 'bhöönɩ ‑mä Zeluzalɛɛmö.

13 Wa yɩbhlɩnɔɔ,

'n wa yiɛ ‑mä glɔ 'mö nimï mö,

'n wa yiɛ wa 'bhɩa ‑muë'la 'dɩ 'nyɛ.

‑Maa wa 'niɛ'ɛ ‑bhlɛ dlɩ 'wʋ ‑kä 'yize.

Zezwii yɛ ɔnyɩ 'ɔ ‑gänɩwaa kʋgbä ‑bhlʋ ‑kpɔ 'ylimö tulanɩ

(Matie 28.16‑20; Lwiikö 24.36‑49; Zaa 20.19‑23)

14 Yɩ 'plɩɛ sa'a 'wëë,

Zezwii 'a ‑gänɩwaa kʋgbä ‑bhlʋ ‑kpɔ,

wa ‑wʋ li dɔ'wʋ,

'n ɔ yuëë 'ylimö ghlɛ,

'n ɔ yuëë 'lʋnɩ,

ɛ'ɛ ‑bhö nyɩasɛ,

‑maa ɔ 'wlʋä glu 'wëë a nɩkpaa ɔ tulanɩ ɔnyɩ 'ylimöö,

wa 'nyʋää 'dɩɩ,

wa 'niɛ dlɩ 'wʋ ‑kä.

Ɔ lɛ 'nyɩɛ a dilaa 'tuu 'mö.

15 'Wë,

'n ɔ yuëë tie nɩɩ:

«Dʋdʋʋ a këtiea 'wuë 'wʋ,

a nɩ mö ‑mä a 'kä 'bhlɩbhëa 'wuë 'na 'Mänatɩtɩɩ 'nyɛ.

16 ‑Ɔ ‑kɩɩ 'wʋ nglu,

'n wa ‑kɔɔ 'wlu wɔlʋʋ,

ɔ yi 'pʋ.

‑Maa ‑ɔ 'ni 'wʋ ngluu,

Lagɔ yo gbʋ köbha.

17 ‑Wa 'tɛɛnɩɩɛ dlɩɩ,

zɩzɛ wa 'kʋää 'mö yɩbhlɩnɩɩ,

mɛɛ nɩɩ:

Na 'nglɩ 'mö,

wa yi zuzukuzoku nɩkpa ‑gömö kpëti.

Gbɩ a ‑mii wa'aa ‑yi,

wa yi 'mö bhïlanɩ.

18 Wa nɩ tɩmɛ ‑tɔnɩ,

wa ‑kɛɛ 'wʋ gbulo ‑kë,

ɛ 'naa 'kʋä ‑lu nʋ,

nɩkpɛ yi wa lile gu 'mö zʋ ‑kë,

wʋ 'naa 'kʋä ‑lu nʋ.

Wa ‑kä guzuwa kätɩkpö 'wlu zʋ,

wa ‑kä wa 'wlumö bhibhee,

wa yi yɛmanɩ.»

19 Zezwii 'nyʋää sa'a 'dɩ 'wëë,

'n ɔ yiɛ 'wlu libho 'n ɔ yiɛ ghäyɩ mö,

‑mä Lagɔ a luukɛ 'wʋ,

'n ɔ yiɛ ‑mä sɛ glɩɛ mö.

20 'Bhöönɩa'a ‑lɛ,

Zezwii 'a ‑gänɩwaa,

'n wa yiɛ saa 'wuë 'ɔ 'Mänatɩtɩɩ biaa mö.

Wa ‑kɩɩ bhïlaa,

Zezwii ‑wuë 'kwädlɩ ‑gömö 'yize,

'n wa bhɛɛ 'ɔ 'mötɛɛnɔɔ 'mö zɩzɛli,

mɩɩ nyɛɛ nɩkpa 'dɩ nɩɩ,

'wa wɛlɩɩ,

‑tiawɛlɩɛ.]