Matie 28

Zezwii yɛ glu 'wlʋ

(Maakö 16.1‑8; Lwiikö 24.1‑12; Zaa 20.1‑10)

‑Gwlɛnɩzlɩɩ 'plɩɛ 'wëë,

'dimasi a 'zɔkpɔ 'pii 'mö,

Madalaa a 'ylikwii Malii ‑nyɛ ɔ 'tʋɔ Malii 'sɔ,

'n wa yiɛ Zezwii a lesikpëa 'wʋ mö.

2 Wa ‑wʋ ‑lɛ,

wa lɛ zʋ a sɛ'ɛ cuu,

'n dʋdʋ yiɛ tenyii tɩtlɛnɩ.

'N Lagɔzuzukwë ‑bhlʋ yiɛ ‑mä ghäyɩ 'wʋ 'bhöö,

'n a yiɛ ‑lɛ lesikpëa nuë 'wʋ sɛ 'sibhë,

'n a yiɛ kpiyii 'bhisa,

'n a yee ‑lɛ ngloluë 'wʋ ‑sɛ,

'n a yee ‑gömö sɛ glɩ.

3 Lagɔzuzukwë 'la,

‑n ‑kaa 'ylɩmöö,

lɩ a lɩɛ ‑gbägbadɛ a 'dɛlɩ a sɛ.

'A ‑banɩɩ a ‑plaa 'möö,

yɩ 'wuë yɩ ‑wʋ buuu ‑yɩsɩpupukwë a sɛ.

4 ‑Maa 'slʋjaa ‑wa ‑kʋ a‑a lesikpëa,

wa 'yɩɛ ‑li 'la 'ylɩmöö,

wa 'wuë nganɔ a za tɩtlɛnɩ wa tɩtlɛnɩɛ 'n wa yiɛ sɛ 'sulo,

wa 'kä ‑bhɩɛ 'ku wa yɛ 'ku.

5 ‑Maa ngwlɩɩ wabhlɩ 'n Lagɔzuzukwëa yuëë 'dɩ 'nyɛ,

a lɛ naa:

«Nganɔ nɩ tanyɩ 'lɩbhä.

N ‑yi sɛ nɩɩ,

Zezwii wa kʋnɩ a‑a su 'klʋʋ,

ɔ ‑gäzɛɛ,

'mö a tɛlɩɛ sɛ.

6 Ɔ'ɔɔ mä'ä ‑wʋ,

ɔ yɛ glu 'wlʋ 'wë,

sɛ ɔ 'nyanyɩ a‑a 'dɩɩ.

Zaa,

a yi,

dɛ wa 'zʋ a‑a ɔ ‑gäzɛɛ,

a 'kä ‑lɛ 'ylɩmö.

7 A nɩ mö,

a nɩ 'pulo,

a 'kä 'ɔ ‑gänɩwaa 'dɩ 'nyɛ nɩɩ,

ɔ yɛ glu 'wlʋ.

‑Maa ‑mä Galilee‑bhölɩɩ 'mö ‑mä ɔ 'kää mö,

‑mä a 'kɔɔ ghlɩnɩ.

Wɛlɩ n yeanyɩ a‑a 'nyɛɛ,

miɛ da'a.»

8 Lagɔzuzukwëa 'nyʋää sa'a 'dɩ 'wë cuu,

‑sɩkaa ‑sɩkaa 'n wa yiɛ lesikpëa yɔwʋ 'bhöö,

wa guë,

wa 'wuë nganɔ ‑wuë ‑bhlɛ ku 'mö,

'mäna a dɔ'wʋ wa'aa'ɛ ‑sɩbhä a sɛ ‑wʋ,

'n wa yiɛ Zezwii 'a ‑gänɩwaa 'dɩ kwä.

9 Wa ‑wʋ mö dɔ'wʋ cuu,

Zezwii a'bhë 'n ɔ yuëë gbanɩɛ yi,

ɔ lɛ naa:

«N bhälanyɩ!»

'N wa yoo yɔwʋ 'dio,

'n wa yiɛ ‑lɛ ɔ dlɩ 'mö ‑kokomïlaladigbï glu 'pä,

'n wa yiɛ 'ɔ kplɩɩ kɛ 'wʋ köbhä 'n wa yoo 'wlu 'nyɛ.

10 'N ɔ yuëë 'dɩ 'nyɛ nɩɩ:

«Nganɔ nɩ tanyɩ 'lɩbhä.

‑Maa a nɩ mö a 'kä na ‑daayuë 'dɩ 'nyɛ nɩɩ,

wa nɩ mö ‑mä Galilee‑bhölɩɩ 'mö.

‑Mä wa ‑kaaa 'ylɩmönɩ.»

11 Ngwlɩɩ nɛmö ‑bhlɛ 'yio 'wʋ,

'slʋjaa ‑wa ‑kʋ a‑a lesikpëa,

wa gla'mö a ‑mumuë,

'n wa yiɛ ‑mä glɔ 'mö mö,

'n wa yiɛ ‑mä Lagɔbʋbɔwaa a 'kifiea ghlɩ,

sɛɛ wɛlɩɩ 'wuë 'plɩɛ 'wʋʋ,

'n wa yuëë ‑sɩbhä 'tɩtɩ 'nyɛ.

12 Lagɔbʋbɔwaa a 'kifiea wa ‑nyɛ Zwiiföwaa 'a 'nɛɛnɩwa 'kädɩɩ 'sɔ,

wa 'yɩbhää 'wluu,

'n wa yiɛ ‑mä moni a ‑bɛ ‑sɛ,

'n wa yee 'slʋjaa 'nyɛ.

13 Wa lɛ naa:

«A ‑kä 'tɩtɩ ‑sɛɛ,

a nɩ nʋ nɩɩ:

‑A ngämö sabʋ,

'n 'ɔ ‑gänɩwaa yiɛ yi,

'n wa yiɛ ɔ ‑gäzɛɛ 'wi ghli.

14 ‑Maa ‑gɔmlaa ‑kɩɩ 'nʋʋ,

‑a ‑yi sɛ ‑a 'kɔ 'dɩ 'nyɛ 'n a 'naa 'kä gbʋ ghlɩɩ.»

15 'N 'slʋjaa yiɛ moni 'wʋ 'libhï,

sɛɛ Zwiiföwaa a 'kädɩ 'la gbä a‑a wa nɩ gbä 'tɩɩ,

'n wa yiɛ ‑sɩbhä gbä.

‑Lɛ a wɛlɩ 'la mɩɩ mlɩmanɩɛ Zwiifö‑bhölɩɩ 'wuë ‑gömö.

‑Sɩbhä wa sɩɛ ‑bhlɛ zɩ'ɛ 'yize.

Zezwii yɛ 'ɔ ‑gänɩwaa ɔnyɩ 'ylimö tulanɩ

(Maakö 16.14‑19; Lwiikö 24.36‑51; Zaa 20.19‑23)

16 Zezwii 'a ‑gänɩwaa kʋgbä‑bhlʋ ‑kpɔ,

sɛɛ Zezwii 'nyʋä a‑a 'dɩɩ,

‑mä Galilee‑bhölɩɩ 'mö a ‑gägaa ɔ 'pänuë a‑a,

‑mä a 'wlu,

'n wa yiɛ ‑mä mö.

17 Wa ghlɛɛ ‑mä,

wa lɛ zʋ a sɛ'ɛ,

Zezwii ‑wʋ ‑mä.

Wa 'yoo 'ylɩmöö,

'n wa yiɛ ‑lɛ ɔ dlɩ 'mö ‑kokomïladigbï glu 'pä 'n wa yoo 'wlu 'nyɛ.

‑Maa ‑sɩbhä yɩ ‑wʋ 'mö,

wa gla'mö a ‑mumuë,

gʋgɔgʋgʋʋ ‑wuëë dila zɛmö.

18 'N Zezwii yuëë yɔwʋ 'dio,

ɔ lɛ naa:

«‑Mä zlɩ 'mö,

'n mä'ä dʋdʋ 'wʋ,

‑amö Lagɔ 'nyɛɛ 'mötɛɛnɔ ‑lii 'wuë ‑gömö.

19 Sɩbhä a za,

a nɩ mö ‑mä 'bhlɩbhëa 'wuë ‑gömö,

nɩkpa 'wuë,

a nɩ 'zuuë na ‑gänɩwa 'wʋ.

A nɩ wɔluë 'wlu,

Dɩbaa a 'nglɩ 'mö,

Yuu a 'nglɩ 'mö,

'n 'Wugɔmʋʋ 'Wlɩlɩ a 'nglɩ 'mö.

20 Wɛlɩɩ 'wuë n 'cɩanyɩɛ,

a nɩ 'nyʋä 'dɩ wa 'kɩ 'klʋkpamö 'zʋ.

‑Maa a nɩ kɩ 'kwädlɩ dlɩ 'wʋ nɩɩ,

zila 'wuë 'mö,

n yeanyɩ jijo'wʋ ‑këë,

'n 'pɩwʋ 'kää 'yli bhɩɛ.»