Zaa 8

Gbɩsɛtɛlɩnglɔɔ a wɛlɩɩ

Zezwii ‑sɔɔ 'wʋʋ,

‑mä Olivieswii a ‑gägaa 'wlu ‑mä ɔ möä.

2 'Zɔkpɔ 'pii 'mö,

'n ɔ yiɛ ‑mä Lagɔbudu 'Kɔdʋʋ a 'ligbëa 'mö 'bɩwʋ yi.

'N nɩkpa a ‑bɛ yoo yɔwʋ yi,

'n ɔ yiɛ sɛ glɩ,

'n ɔ yuëë 'cɩa.

3 Ɔ ‑wuë 'cɩa dɔ'wʋ,

Moyizɩ 'a Gböö a 'cɩawaa ‑nyɛ Falizɩɛwaa 'sɔ,

wa gla'mö a ‑mumuë,

'n wa ‑nyɛ 'nglɔ ‑bhlʋ yiɛ yi.

Nglɔ 'la,

nɩkpɛ wa köbhänɔɔɔ ‑gömö.

Wa yiɛ,

‑lɛ nɩkpabhë a 'yila 'klʋ,

'n wa yoo ‑lɛ 'nigba.

4 'N wa yiɛ Zezwii 'dɩ 'nyɛ,

wa lɛ naa:

«‑Atʋ,

nglɔ nɩ,

nyɩbhɛlʋ wa köbhänɔɔɔ ‑gömö.

5 ‑A'a Gböö a dɔ'wʋ,

sɛ'ɛ Moyizɩ nyɩanyɩɛ 'dɩ nɩɩ:

Sɛ'ɛ a ngwlɩɩ,

wa nɩ 'lɩbhʋä 'kpɩ 'mö,

wa 'kä 'ku.

Zaa,

sɛ ‑n gbä bhä?»

6 Nyɩasɛ wa 'nɔɔ ‑sɩbhä nimï 'yɩbhä,

‑maa wa yɩbhä wa 'kɔ ‑mä 'pä,

nzɩɩ wa 'kɔ ‑zijle 'nyɛ.

Wa 'yɩbhɔɔ sa'a nimïï,

'n ɔ yiɛ 'wlu kwlinɩ,

'ɔ wïleyii 'mö,

'n ɔ yiɛ ‑lɛ dʋdʋ 'wʋ 'cɛlɩ.

7 Ɔ ‑wʋ 'cɛlɩ dɔ'wʋ,

‑sɩbhä wa yɩbhɔɔ nimï 'yize.

'N ɔ yiɛ 'wlu 'libhï,

ɔ lɛ naa:

«A 'wuë,

a gla'mö a ‑mɔɔ 'nɩɛ ‑bhlɛ tɛkäsɛ 'nyinyloli nʋʋ,

mɔɔ nɩ 'lɩbhä tɛɛ nglɔɔ kpiyi 'mö.»

8 Ɔ gbää ‑sɩbhä 'wëë,

'n ɔ yi'ɛɛ 'wlu kwlinɩ,

'n ɔ yiɛ ‑lɛ dʋdʋ 'wʋ 'cɛlɩ.

9 ‑Maa wa 'wuë,

sɛɛ Zezwii gbää da'a a za,

yɔwʋ wa ‑sɛnɩɛ bhʋlʋbhlʋ,

'kädɩɩ a'bhï mʋa möä tɛɛ.

Sa'a ‑këë,

'n Zezwii a 'yize yiɛ ‑lɛ tʋʋ.

Dɛɛ nglɔɔ 'nɩgbö a‑a,

ɔ 'nɩgbö ‑lɛ 'yize.

10 Zezwii 'libhïä 'wluu,

'n ɔ yiɛ nglɔɔ nimï 'yɩbhä nɩɩ:

«Dɛ wa ‑wʋ bhä?

‑Bɛ ‑nɩmö bhä gbʋ köbha ‑a?»

11 Ɔ lɛ:

«Nn,

‑Alowli,

‑bɛ ‑nɩɩɛ gbʋ köbha.»

Zezwii lɛ naa:

«Na'bhë,

n ‑nɩmö'ɛ na a gbʋ köbha.

Zaa,

mö,

‑maa tɩa'a ‑sɩkaa 'nyinyloli nʋ.»]

Zezwii mɔɔ glɩnɩɛ lɩlɛɛ

12 Yɩ 'plɩɛ sa'a 'wëë,

'n Zezwii yi'ɛɛ nɩkpaa a ‑bʋbʋʋ yi gö,

ɔ lɛ naa:

«‑Amö ‑ɔ ngla 'bhlɩbhë 'wʋ,

‑amöä dɛ'ɛ.

‑Ɔ ‑kaa ‑gänɩɩ,

ɔ 'naa 'kä 'yuylukwë 'mö nɛmönɩ,

‑maa n yo 'wʋ ngäla,

ɔ yi ‑bhölɩbhölɛ ghlɩ.»

13 Ɔ gbää sa'aa,

Falizɩɛwaa lɛ naa:

«‑Nanyɩ a 'dɩ a ‑dɩ ‑n sɛɛ zaa,

‑na'a wɛlɩɩ ‑n bhïlaa da'aa,

yɩ'ɩ ‑bhö dlɩ'wʋkäli.»

14 Zezwii lɛ naa:

«N yi nanyɩ a 'dɩ a ‑dɩ ‑sɛ ‑kë,

'na wɛlɩɩ,

dlɩ'wʋkäliɛ.

Ɛ'ɛ ‑bhö nyɩasɛ,

‑maa na'bhë,

n ‑yi dɛ n yɛ 'bhöönɩ,

'n n ‑yi'ɛ dɛ n mönɩɩ.

‑Maa abhʋa abhlɩɩ,

a'aa dɛ n yɛ 'bhöönɩɛ ‑yi,

a'aa 'yɛ dɛ n mönɩɛ ‑yi.

15 A ‑kä wɛlɩ 'mö ‑dɩnɩɛ yii,

'a sɛ a pää dlɩ cuu,

‑sɩbhä a bhïlaa,

‑maa ‑amö na a,

n'n ‑dɩnɩ nɩkpɛ a wɛlɩ 'mö.

16 ‑Mä yɩ 'mö,

'n n ‑kä a nɩkpɛ a wɛlɩɩ 'mö ‑dɩnɩɛ yii,

'mözlɔnɩsɛ n 'kɩ a 'mö ‑dɩnɩ.

Ɛ'ɛ ‑bhö nyɩasɛ,

‑maa na 'yize ‑amöö 'niɛ 'mö ‑dɩnɩ,

‑maa na dɩba ‑ɔ tieaaa,

mɔɔ ‑wʋʋä nimï.

17 A'bhï a ‑yi sɛ,

'a gböö a ‑gänɩɛ,

sɛ'ɛ yɩ nʋä nɩɩ,

nɩkpa 'sɔ ‑kä wɛlɩkïbhë ‑bhʋlʋ bhïlaa,

'wa wɛlɩɩ,

dlɩ'wʋkäliɛ.

18 'Na wɛlɩɩ a dɔ'wʋ,

‑amö mɔ,

na dɩba ‑ɔ tieaaa mɔ,

‑a 'sɔ ‑kpɔ a‑a bhïlaa na dɛ.»

19 Zezwii gbää sa'aa,

wa lɛ naa:

«‑Na dɩba ‑n gaaa da'aa,

dɛ ɔ ‑wʋ bhä 'nɩ?»

Ɔ lɛ naa:

«A ‑nɩɩɛ ‑yi,

a'aa'ɛ na dɩba ‑yimö.

‑Maa a ‑kaa a ‑yii,

a yi a na dɩba ‑yimö.»

20 Zezwii ‑wʋ ‑mä Lagɔligbëa 'mö Lagɔwɛlɩɩ 'cɩanɩ dɔ'wʋ,

ɔ glɩ ‑lɛ ‑dɔkwɩɩ wa zʋä moni 'mö yɔwʋ 'n ɔ yuëë ‑sɩbhä 'dɩ 'nyɛ.

‑Maa ‑bɛ 'nɔɔ kɛ 'wʋ fä 'lɩlɩlɩ,

ɛ'ɛ ‑bhö nyɩasɛ,

‑maa 'ɔ 'tɛnyɩɩ 'nɩɛ ‑bhlɛ ghlɛ.

Zezwii lɛ dɛ ɔ 'kää möö Zwiiföwaa 'nɩɛ bhɛnɩ wa 'kä ‑lɛ mö

21 'N Zezwii yi'ɛɛ Zwiiföwaa 'dɩ 'nyɛ nɩɩ:

«N yeanyɩ jijo'wʋ 'bhöö.

A ‑yii sɛ tɛlɩ ‑maa dɛ n 'kää möö,

a'aa bhɛnɩ a 'kä ‑lɛ mö.

'A 'nyinylolii a gbʋʋ,

‑gömö wʋ 'kanyɩɛ tʋʋnɩ,

a 'kä 'yli bhɩɛ.»

22 Ɔ gbää sa'aa,

Zwiiföwaa lɛ nɩɩ:

«'Ɔ!

Zaa,

ɔnyɩ ɔ 'kä bhä 'lɩbhä nza ɔ nʋ nɩɩ,

dɛ ɔ 'kää möö,

‑aaa bhɛnɩ ‑a 'kä ‑lɛ mö ‑a?»

23 Zezwii lɛ naa:

«Abhʋa abhlɩ,

mä'ä dʋdʋ 'wʋ a ‑nʋä a glɩnɩɛ,

‑maa ‑amö na a,

‑mä ghäyɩ 'wʋ ‑mä n 'bhöönɩɛ.

N'n ‑bhö mä'ä 'pɩwʋ a ‑nɔ,

‑maa abhʋa abhlɩ,

mä'ä 'pɩwʋ a ‑nʋä a glɩnɩɛ.

24 Nza n 'nyanyɩɛ 'dɩ nɩɩ,

'a 'nyinylolii 'mö,

‑mä a 'kää 'kunɩ.

Sɛ'ɛ n gbää nɩɩ,

'n a 'ni dlɩ 'wʋ ‑kä nɩɩ,

‑mɔ n glɩnɩɛ 'mö n glɩnɩɛ^a,

'a 'nyinylolii 'mö,

‑mä a 'kää 'kunɩ.»

25 Wa lɛ naa:

«‑N ‑nɛɛ 'saa ‑n glɩnɩ ɔ a'bhë?»

Ɔ lɛ naa:

«Sɛ n 'nyanyɩ a‑a tɛkädɔ'wʋ 'dɩ nɩɩ,

‑mɔ n glɩnɩ,

'mö n glɩnɩɛ 'yize.

26 N kä a 'kïbhï a ‑bɛ dlɩ 'wʋ n 'kanyɩ a 'nyɛɛ,

‑mimii 'mö,

n yeanyɩ a gbʋ köbha.

‑Maa ‑ɔ tieaaa,

gbëaa ɔ kää ngli zaa,

sɛ ɔ nyɩaaa 'dɩɩ,

‑sɩbhä n nyɛɛ nɩkpa 'dɩ cuu.»

27 ‑Maa ɔ gbää sa'aa,

wa'aa ‑bhlɛ 'mö 'nʋ 'yize nɩɩ,

ɔ dɩba Lagɔ 'mö ɔ gaaa.

28 ‑Sɩbhä a za,

'n ɔ yuë'ɛɛ 'dɩ 'nyɛ nɩɩ:

«Nɩkpɛ a 'Yu,

‑zlɩ a ‑kɔɔ ghäyɩ bizaa,

‑lɛ a 'kää sɛ yɩbhlɩmanɩ nɩɩ,

‑mɔ n glɩnɩɛ 'mö n glɩnɩɛ.

A yi'ɛ sɛ yɩbhlɩmanɩ nɩɩ,

n'n nʋ ‑lu nanyɩ a 'nglɩ 'mö,

‑maa na Dɩba,

'saa ɔ sʋlʋnɩɩɛ,

'mö n bhïlaa.

29 ‑Ɔ tieaaa,

ɔ ‑wʋʋ nimï.

'Saa nɛnɔɔ dlɩ yɔwʋ 'mö n nʋä 'kwädlɩ zaa,

ɔ ‑nɩɩɛ tɛkäsɛ nimï 'bhöö.»

30 Zezwii 'nyʋää sa'a 'dɩɩ,

‑mumuë a ‑bɛ,

'n wa yiɛ 'wʋ nglu wa 'kɔ dlɩ 'wʋ ‑kä.

Lagɔ 'a wɛlɩɩ mɩɩ sɛɛ nɩkpa galɛ 'mö

31 Zwiiföwa 'la ‑wa nglu a‑a 'wʋ wa 'kä Zezwii dlɩ 'wʋ ‑kää,

'n ɔ yuëë 'dɩ 'nyɛ nɩɩ:

«'Na wɛlɩɩ n 'nyanyɩɛ,

sɛ yɩ gbää,

a ‑kä ‑sɩbhä nɛmöö,

a yi ‑tiamö na ‑nʋä glɩnɩ.

32 A yi gbëaa yɩbhlɩnɩ 'wë,

gbëaa yeanyɩ galɛ 'mö ‑sɛ.»

33 Wa lɛ:

«‑Abhʋa,

Ablaamö a 'yuë a yuë ‑a glɩnɩɛ,

‑aaa ‑bhlɛ tɛkäsɛ nɩkpɛ a göwa 'zʋ.

Sɛ yɩ ‑wʋ ɔ 'mö,

n‑n nʋ bhä nɩɩ,

yɩ ‑yinyɩ galɛ 'mö ‑sɛ 'nɩ?»

34 Zezwii lɛ nɩɩ:

«‑Tiamö n nyanyɩɛ dɛ'ɛ 'dɩ nɩɩ,

nɩkpɛ a ‑mɔɔ nʋä 'nyinylolii,

yɩ gïyi ɔ glɩnɩɛ.

35 Gïyi 'nɩɛ 'bhidɩba yɔwʋ tʋʋnɩ.

‑Maa 'bhidɩba a ‑yowli ɔbhlɩ,

'kwädlɩ ɔ ‑wʋä ‑lɛ ɔ dɩba yɔwʋ.

36 Zaa,

Lagɔ 'a Yuu mɔɔ ‑kaanyɩ galɛ 'mö ‑sɛɛ,

a galibhu yɛ ‑tiamö do.

37 Nn,

Ablaamö a 'yuë a 'yuë a glɩnɩɛ n ‑yi sɛ,

‑maa ‑sɩbhä yɩ ‑wʋ 'mö,

'na Lagɔwɛlɩɩ n nyanyɩɛ,

yɩ 'nanyɩɛ dlɩ zɛmö plɛ zaa,

a yɩbhä a ‑kaa 'lɩbhä n 'kä 'ku.

38 ‑Amö na a,

'saa na Dɩba sʋlʋnɩɩɛ,

'mö n bhïlaa,

abhʋa abhlɩ,

sɛɛ a dɩba nyanyɩɛ 'dɩɩ,

‑sɩbhä a zʋä.»

39 Wa lɛ naa:

«Ablaamö mɔɔ glɩnɩɛ ‑aa dɩba.»

Zezwii lɛ naa:

«A ‑kä a ‑tiamö Ablaamö a 'yuë a 'yuë glɩnɩɩ,

'ɔ 'saa ɔ nʋ a‑a,

a yu a nʋ.

40 Gbëaa Lagɔ sʋlʋnɩɩɛ,

'mö n 'nyanyɩɛ,

‑maa ‑sɩbhä yɩ ‑wʋ 'mö,

a yɩbhä a ‑kaa 'lɩbhä n 'kä 'ku.

Ablaamö 'nɩɛ a sa'a a ‑li nʋ 'lɩlɩlɩ.

41 ‑Ɔ glɩnɩɛ ‑tiamö a dɩba,

'ɔ sɛ ɔ zʋä,

‑sɩbhä a 'zʋmöä da'a.»

Wa lɛ:

«Lagɔ,

ɔ 'yize 'tɩɩ,

mɔɔ glɩnɩɛ ‑aa dɩba,

‑maa ‑aa ‑bhö 'wiyuë.»

42 Zezwii lɛ naa:

«Lagɔ mɔɔ ‑kä a ‑tiamö a dɩba glɩnɩɩ,

a ‑yii a ‑wa.

Ɛ'ɛ ‑bhö nyɩasɛ,

‑maa ‑mä ɔ dlɩ 'mö,

‑mä n 'bhöönɩɛ 'n n yiɛ yi.

Nanyɩ a 'nglɩ 'mö n'n‑ä yinɩ,

‑maa ɔ'bhë mɔɔ tieaaa.

43 Sɛ yɩ ‑wʋä 'mö 'n a 'nɩ 'nʋä 'na wɛlɩɩ 'möö,

‑sɩbhä ma‑a nɩɩ,

a'aa bhɛnɩ a ‑kaa sasɛ 'yukwli ‑pʋnɩ.

44 Ɛ'ɛ ‑bhö nyɩasɛ,

‑maa Sataa,

ɔ ‑nʋä a glɩnɩɛ,

mɔɔ glɩnɩɛ a dɩba.

Zaa,

'saa ɔ yɩbhää a 'yize 'mö a yɩbhää a 'kä nʋmö.

Ɔbhlɩ,

tɛɛnɩ ‑mä 'pɩwʋ a tɛɛnɩdɛ,

'kulɩbhänyɔ ɔ glɩnɩɛ 'kwädlɩ.

Ɔ'ɔɔ gbëaa 'mö ‑kä 'lɩlɩlɩ zaa,

‑lu a ‑muu ‑wʋä gbëaa 'möö,

ɔ 'nuä ‑wa 'lɩlɩlɩ.

Ɔ 'wuë yionyɔ a 'yize ɔ glɩnɩɛ.

'Mö yio 'wuë 'bhöönɩɛ 'mö.

Zaa,

ɔ ‑kä 'ɔ widɩɩ ‑sɛ dɔ'wʋ ‑wʋʋ,

'ɔ ‑wʋwʋsaa ‑sɩbhä ɔ 'wälanɩɛ 'yli.

45 ‑Maa ‑amö na a,

'saa ‑wʋä gbëaa 'möö,

'mö n bhïlaa,

nza a'a ngluä na dlɩ'wʋkägbʋ.

46 N yɛ bhä tɛkäsɛ 'nyinyloli nʋ ‑a?

A gla'mö a ‑mɔɔ ‑kaa bhä dɛ'ɛ yɩ gbʋ köbha 'nɩ?

'N n ‑kä gbëaa bhïlaa,

sɛ yɩ ‑wʋ bhä 'mö,

'n a 'nɩ ‑kaa yɩa'a dlɩ 'wʋ 'nɩ?

47 ‑Ɔ glɩnɩɛ Lagɔ a ‑nɔɔ,

mɔɔ ngluä Lagɔ 'a wɛlɩɩ 'wʋ.

‑Maa abhʋa abhlɩ,

a'a ‑bhö ɔ ‑nʋä,

nza a'a ngluä 'ɔ wɛlɩɩ 'wʋ.»

Zezwii lɛ naa ɔ ‑bhölɩ 'n Ablaamö yiɛ gwëlio

48 Zezwii gbää ‑sɩbhää,

Zwiiföwaa lɛ naa:

«Sa'a a za ‑a gbää nɩɩ,

‑n 'kä ‑bhɩɛ Samaliiyi,

zuzukwëzokwë ‑n kää ‑gömö.

Ɛ'ɛ ‑bhö bhä ‑tiamö ‑a?»

49 Zezwii lɛ naa:

«N'n‑ä zuzukwëzokwë ‑gömö ‑kä,

na Dɩba 'mö n zʋä 'klʋkpamö cuu,

‑maa 'ylimö a fälanɩɩɛ abhlɩ.

50 Na'bhë,

n'n‑ä nanyɩ 'nglɩ möa,

‑maa ‑ɔ möaaa 'nglɩ,

‑ɔ tuä ‑zijli,

ɔ ‑bhölɩ.

51 ‑Tiamö n nyanyɩɛ dɛ'ɛ 'dɩ nɩɩ,

‑ɔ ‑kä 'na wɛlɩɩ 'klʋkpamö zʋʋ,

ɔ 'naa 'kä 'kwädlɩ 'ku.»

52 Wa lɛ naa:

«‑A ‑yia'a ‑sɩkaa sɛ nɩɩ,

zuzukwëzokwë ‑n kää ‑gömö.

Ablaamö a'bhë,

ɔ 'ku,

Lagɔ 'a bhla'mö a 'möbhïlanɩwaa,

wa 'ku.

N‑n nʋä ‑naa nɩɩ,

‑ɔ ‑kä ‑na'a wɛlɩɩ 'klʋkpamö zʋʋ,

ɔ 'naa 'kä 'ku.

53 ‑Aa dɩba Ablaamö,

ɔ 'ku,

‑n ‑nyɔɔ 'sɔ a dɔ'wʋ,

‑nmö 'ghïli bhä n‑n zo bhä 'wʋ ‑a?

Lagɔ 'a 'möbhïlanɩwaa wa 'ku a yɩ nɩɩ,

‑nmö ‑naa,

‑mɔ ‑n libhï bhä 'lɩlɩlɩ a dɔ'wʋ ‑nanyɩ 'mö 'wʋ 'nɩ?»

54 Zezwii lɛ naa:

«N ‑kä a nanyɩ a 'nglɩ 'ghlimanɩɩ,

'na nglɩɩ,

yɩ'ɩɛ yɩ 'kä a ‑lu glɩnɩ.

‑Maa na Dɩba,

a laa da'a a Lagɔ,

mɔɔ 'ghlimanɩɛ na 'nglɩ.

55 'Mö n gbää a'a ‑yi.

‑Maa ‑amö na a,

n ‑yoo.

N ‑kä a nɩɩ,

n 'nɔɔ ‑yi nʋʋ,

a sɛ a yionyɔ n yɛ a‑a 'zʋmö.

‑Maa n ‑yoo.

'Ɔ wɛlɩɩ 'mö n zʋä 'klʋkpamö.

56 A dɩba Ablaamö,

ɔ ‑yi a sɛ nɩɩ,

ɔ yi 'na yiyizlɩɩ 'ylɩmö,

nza ɔ nʋ a‑a 'mäna.

‑Sɩkaa a dɔ'wʋ ɔ kɛ 'ylɩmö 'wë zaa,

ɛ 'mäna 'mö ɔ ‑wʋä 'mö.»

57 Ɔ gbää ‑sɩbhää,

wa lɛ naa:

«‑Nn‑ä ‑bhlɛ 'ylʋbö a gwlɩ 'sɔ 'ylʋbö kʋgbä a'bhë ghlɩ,

n‑n nʋ bhä ‑n 'yɩ Ablaamö 'ylɩmö ‑a?»

58 Ɔ lɛ naa:

«‑Tiamö n nyanyɩɛ dɛ'ɛ 'dɩ nɩɩ,

dɛɛ Ablaamö a'bhë 'nɩɛ a‑a ‑bhlɛ gwëlioo,

n ‑bhölɩ a.»

59 Zezwii gbäa'aa ‑sɩbhää,

'n wa yiɛ 'kpɩ 'libhï wa 'kɔnyɩ 'mö 'lɩbhä.

‑Maa zizo ɔ zizoo,

'n ɔ yiɛ ‑mä Lagɔbudu 'Kɔdʋʋ 'mö 'wlʋ.