1 Piɛlɩ 3

Sɛ'ɛ Piɛlɩ 'zʋä 'ngwlɩ ‑nyɛ 'luwluwa 'sɔ 'dɩ 'mö

Sɛ ‑bhʋlʋ ‑kpɔ 'la,

abhʋa ngwlɩɩ,

a nɩ 'zʋ a 'luwluwa 'klʋkpamö,

nzɩɩ wa gla'mö,

'n ‑mumuë 'nɩ Lagɔwɛlɩɩ ‑gänɩɩ,

'a nɛmönɛmösaa 'kʋa 'mö 'nua,

wa 'kɩ ‑gänɩmö.

A ‑kä ‑sɩbhä 'zʋʋ,

a 'nuë Lagɔwɛlɩɩ ngli 'nyɛnɩ ‑kë,

2 ‑maa sɛɛ 'a nɛmönɛmösaa 'nɩɛ ‑maa yɔwʋ ‑kä 'n a zʋä ‑lɛ nɩkpa 'tɩɩ,

wa yi ‑sɩbhä 'ylɩmö,

‑sɩbhä yuë dlɩ plu.

3 Sɛ a 'kää bhʋlʋbhlʋ 'a kpökpa bɔlɔ a 'kä 'ylimö nɛnɩɩ,

mɩɛ nɩɩ,

'a nyukwëa a 'wlugïganɩsaa ma,

bɔlɔbɔlɔlii a kii 'wuë ‑nyɛ 'pɛlʋtɛɛlokuu a ‑suswee 'sɔ,

mɩɩ nɩ tanyɩ tenyii dɛsɛ ‑kä.

4 ‑Maa a ‑kä a 'kä 'ylimö nɛnɩ nʋʋ,

'a dilaa mö a nɩ nɛmanɩ 'ylimö.

'Ngwlɩ a ‑muë nɛnɩɛ dila zɛmö,

‑wanyɩɩ dilaa ‑wʋä ‑pälɛpälɛ nɩkpaa 'wuë ‑gömöö,

'mö a nɩ glɩnɩ.

‑Sɩbhä ma‑a kää tenyii dɛsɛ Lagɔ a dɔ'wʋ.

5 Bhla'mö a Lagɔgänɩngwlɩɩ ‑wa 'tɛɛnɩ a‑a Lagɔ dlɩɩ,

'wa ‑baa ma a‑a wabhlɩ da'a.

Wa 'luwluwa 'mö wa zʋ a‑a 'klʋkpamö.

6 Ablaamö a 'lɛnglɛ Salaa,

‑sɩbhä ɔ ‑wʋ a‑a.

Ɔ 'luwli 'mö ɔ zʋ a‑a 'klʋkpamö 'n ɔ lɔ a‑a ɔ ‑lowli.

Zaa,

abhʋa ngwlɩɩ,

a nɩ tɩ nɩkpa a nganɔ a za 'saa Lagɔ yɩbhää a nʋnwɛ kɛ'mö ‑sɛ,

nzɩɩ a 'käa ‑tiamö a ‑da Salaa 'a gbäpöö ‑gänɩ.

7 Sɛ ‑bhʋlʋ ‑kpɔ 'la,

abhʋa 'luwliwaa,

a nɩ yɩbhlɩnɩ sɛ nɩɩ,

ngwlɩ a 'mötɛɛnɔ 'nɩɛ ‑zu,

wʋ 'kä nyɩbhɛlɩ a ‑nʋ 'wʋ zi,

zaa a nɩ tuë ‑pɩɩpɩ 'mö bhɩɛ.

Sɛɛ Lagɔ 'pää nyɩbhɛlɩ a ngäzɩdlɩ 'n ɔ yuë ‑tiamö ‑bhölɩbhölɛ 'nyɛɛ,

‑sɩbhä ɔ 'pämöä ngwlɩɩ a ngäzɩdlɩ.

Zaa,

a nɩ tɩ a 'lɛnglɛwaa 'ylimö fälanɩ,

‑maa a nɩ 'zuë ‑lɛ.

A nɩ 'zʋ ‑sɩbhä,

nzɩɩ a ‑kä Lagɔ bhibhee,

ɔ 'kanyɩa 'yukwli ‑pʋnɩ.

A nɩ ‑wawanɩ ‑daayuësɛ

8 Yɩ 'wuë 'mö a dɔ'wʋ,

a 'wuë a nɩ kä dlɩ ‑bhʋlʋ,

a nɩ 'päpänɩ dlɩ 'wʋ,

a nɩ ‑wawanɩ ‑daayuë a sɛ,

a nɩ kä ngäzɩdlɩ,

a nɩ tɩ anyɩ 'kädɩ 'mö 'wʋ 'libhï.

9 Nɩkpɛ ‑kaanyɩ ‑lizoku 'wlu nʋʋ,

a nɩ to ‑lizoku 'wlu nʋmö.

‑Ɔ ‑kaanyɩ ‑di zia,

a nɩ to ‑di ‑ziamö,

‑maa a nɩ 'pɔ Lagɔ a 'nglɩ 'mö 'nyu.

Ɛ'ɛ ‑bhö nyɩasɛ,

‑maa a'bhï Lagɔ 'kanyɩa 'ɔ 'nyupälɩ 'wʋ ghäla a za,

nza ɔ 'zʋanyɩɛ ɔ ‑nʋä 'wʋ.

10 Nza Lagɔwɛlɩɩ gbää nɩɩ:

‑N ‑kä ‑n 'kä ‑jɔlʋ 'mö ‑kä,

‑n 'kä sasɛ ‑bhölɩɩ,

tɩ wɛlɩzokuu bhïla

yio nɩ ‑tɩmö mɩɔ 'wʋ ghlɛnɩ.

11 ‑Lizoku a kii 'wuë,

panii ‑gömö,

‑n 'kä ‑li a ‑li a 'yize nʋ.

‑Wanɩwanɛ mö ‑n nɩ tɛlɩ sɛ,

ɛ gbʋʋ mʋʋ nɩ plɛnɩmö.

12 Ɛ'ɛ ‑bhö nyɩasɛ,

‑maa ‑Alowli Lagɔ,

'saa nɛnɔɔ dlɩ yɔwʋ,

‑wa nwiɛ,

'mö ɔ yɩlɩɛ 'klʋ,

'wa bhibhewɛlɩɩ,

'mö ɔ ‑pʋnɩɛ 'yukwli.

‑Maa ‑wa nʋä ‑lizokuu,

'klʋ yɔwʋ ɔ sʋää.^a

13 ‑Atʋayuënyɩ,

nɩkpɛ,

‑li a ‑li a nʋnʋgbʋ ‑kɔɔ plɛɛ,

wa yo bhä yɩ za 'klɩ 'yɩa ‑a?

14 ‑Maa 'saa Lagɔ yɩbhää,

a ‑kɩɩ nʋ dɔ'wʋ ‑wʋ 'n wa ‑kaanyɩ yɩ za 'klɩ 'yɩaa,

'mäna nɩ 'lɩbhanyɩ.

Wa ‑kaanyɩ ‑sɩbhä 'klɩ 'yɩa dɔ'wʋ ‑wʋʋ,

'a dilaa nɩ tɩ 'mö wɔlɔnɩ,

swɩ nɩ tanyɩ wa nganɔ a za yɔwʋ 'kunɩ.

15 A nɩ 'zwi ‑mä a dila zɛmö nɩɩ,

Kliisɩ a 'yize,

mɔɔ glɩnɩɛ a ‑lowli.

Zaa,

'saa kää 'nglɩ 'n 'a dilaa 'tɛɛ 'wʋʋ,

nɩkpɛ ‑kaanyi 'wʋ 'yɩbhänɩ,

a 'kɔ 'dɩ 'nyɛ a dɔ'wʋ,

a nɩ ‑bhɩɔ 'kwädlɩ 'mö.

16 A ‑kɔɔ 'dɩ 'nyɛ dɔ'wʋ ‑wʋʋ,

a nɩ 'nyɛnɔ dlɩwätɛ 'mö 'dɩ.

'Saa nɛnɩɛ a ‑yiɛ,

'mö a nɩ nʋ 'kwädlɩ.

‑Lɛ a dɔ'wʋ,

nɩkpaa ‑wa nyimaa sɛ a ‑gänɩɛ Kliisɩ a za 'a nglɩɩ,

a yuë nuë 'wʋ ‑gba.

17 Sɛ'ɛ n gbää nɩɩ,

a ‑kä ‑li a ‑li nʋ 'n a ‑kä ‑sɩbhä a za 'klɩ 'yɩɩ,

Lagɔ a'bhë mɔɔ 'yɩbhɩɛ ‑sɩbhä,

zaa mɩɩ nɛnɩɛ mɩɩ ziɛ ‑n 'kä ‑lizokunʋza 'klɩ 'yɩ 'wʋ.

18 A ‑yi sɛ nɩɩ,

Kliisɩ,

'wʋ ‑bhlʋ ‑kpöö ɔ 'kunɩɛ nɩkpa a 'nyinyloli a za.

Ɔnyɩ,

‑ɔ zlɔnɩɛ 'möö,

mɔɔ 'kuä ‑waaa 'mö zlɔnɩ a 'wlumö,

nzɩɩ ‑a ‑nyɛ Lagɔ 'kä 'wʋ ‑wʋnɩ.

'Ɔ kpökpaa ma‑a 'kuä,

‑maa 'ɔ 'Wugɔmʋʋ ‑bhölɩ.

19 'Wugɔmʋ 'la,

mɔɔ möä ‑mä 'kudu 'wʋ mää ‑wa 'kuä a zuzukuu ‑wʋä ‑jie 'möö,

'n ɔ yiɛ Lagɔwɛlɩɩ 'nyɛ.

20 Nɩkpa 'la,

bhlagɔgɔ'mö a Lagɔnɩkpɛ wa laa Nowee a 'tɛnyɩ 'mö,

‑lɛ wa ‑sɛnɩ a‑a Lagɔ 'klʋkpamö.

‑Lɛ a 'tɛnyɩ 'la 'mö,

Lagɔ dlɩ 'mö ɔ ‑kpaanɩ a‑a tenyii,

‑maa nɩkpaa 'nɩɛ a 'yɩbhä wa 'kɔ yɩbhlɩnɩ.

Zaa,

batoo Nowee tɛlɩɛ 'mö,

nɩkpa ‑gbʋäta a 'yize 'n wa yiɛ ‑mä plɛ,

wa 'yize ‑kpöö mʋa 'pʋä nyuu ngli.

21 Sɛɛ Lagɔ ‑sʋää da'a nyuu nglii,

‑sɩkaa a dɔ'wʋ,

'a 'wluwɔlʋwlɛɛ 'mö ‑sɩbhä ‑nyɛɛ 'wlʋnɩɛ.

'Wluwɔlʋwlɛ 'la mɛɛ puëanyɩɛ.

Miɛ abhlɩ,

‑maa 'a kpökpaa 'kä 'wlɩlɩ plɛ nza wa 'nanyɩɛ 'wlu wɔlʋ,

‑maa Lagɔ 'mö a yɩbhää nɩɩ,

ɔ nɩ wɔlʋ ‑mä a dila zɛmö ‑mä 'kä ‑pälɛpälɛ ‑wʋ.

Zezwii Kliisɩ Lagɔ gälaa ɔ ‑sɛɛ gluu,

mɔɔ kää 'nglɩ 'n yɩ plɩɛ ‑sɩbhä 'wʋ.

22 Mɔɔ möä ‑mä zlɩ 'mö,

ɔ glɩ ‑mä Lagɔ a luukɛ 'wʋ.

Lagɔzuzukuu ‑nyɛ zuzukuu a kii 'wuë ‑yɩ 'tɛɛ 'mö ‑yɩ 'kämanɩɛ 'sɔ,

Zezwii Kliisɩ mɔɔ 'kämaniɛ ‑gömö.