1 Piɛlɩ 2

Zaa,

a nɩ ‑sɛ 'kpʋkpʋlii 'wuë kɛ 'mö.

A nɩ tɩ yio ngli ‑kä.

A nɩ tɩ 'kwlɩsɔkäwa glɩnɩ.

A nɩ tɩ 'yli kälɩkälɩnɩ.

A nɩ tɩ zɛmö ‑dɩdɩnɩ.

2 ‑Maa sɛɛ 'yu 'pʋpɔ 'nyɛnyɛtʋ lɩbhɔ'ɛ 'kwädlɩɩ,

Lagɔ 'a wɛlɩɩ ‑yɩ glɩnɩɛ gbëaa a 'yize,

yɩ 'tʋ nɩ ‑wʋanyɩ ‑sɩbhä dila zɛmö 'yize,

nzɩɩ yɩ 'kanyɩ 'jɩbhɛa a 'kä ‑mä 'gbë 'wʋ ghlɛ,

Lagɔ 'kanyɩ 'ɔ 'pʋpʋɛɛ 'wuë 'nyɛ.

3 Nyɩasɛ n'n‑ä ‑sɩbhä gbä ‑maa,

sɛɛ ‑Alowli Lagɔ nɛnɩɛ dlɩ zɛmöö,

a'bhï a yɛ ‑sɩbhä 'ylɩmö.

'Saa glɩnɩɛ Lagɔyu a dlɩ'wʋtɛɛnɔ

4‑5 Zezwii Kliisɩ ‑nyɛ ɔ ‑nʋa 'sɔ,

Lagɔbudu a ‑mu Lagɔ ‑wʋ 'sɩbhä dɔ'wʋ 'ɔ 'Wugɔmʋʋ 'kʋ 'mö glɩɩ,

'mö n päluëë 'wʋ.

Kliisɩ,

nɩkpaa tlinɩ a‑a kplɩ sɛɛ,

'mö Lagɔ ‑sɛɛ ‑lɛ 'n ɔ yoo 'wʋsɩbhäkpiyi ‑ɛ kää tenyii dɛsɛ 'wʋ 'zʋa.

Zaa,

a'bhï,

'mö a nɩ ‑glɛ 'wʋ,

nzɩɩ a 'käa ‑lɛ a ‑budu 'la a 'wʋsɩbhäkpɩ a ‑nɩ a ‑nɩ glɩnɩmö,

Zezwii Kliisɩ a bɔɔmö a za,

ɔ 'kanyɩ Lagɔbʋbɔwa a ‑muë ‑wanyɩɩ bʋbɔbʋbɔli nɛnɩɛ Lagɔ dlɩ yɔwʋ 'wʋ 'zʋa.

6 Ɛ'ɛ ‑bhö nyɩasɛ ‑maa,

sɛ'ɛ yɩ cɛlɩɛ ɔ dɛ ‑mä Lagɔbɔgʋʋ 'mö nɩɩ,

Lagɔ lɛ naa:

‑Mä Siɔɔ^aglɔ 'mö,

‑mä n 'zʋä 'nglɩmökpiyi n ‑sɛɛ ‑lɛ,

‑ɛ glɩnɩɛ 'sɩbhäsɩbhäwa a dɛ dɛsɛkäkpiyii,

‑ɔ ‑kɛɛ dlɩ 'tɛɛnɩ,

zʋ 'naa 'kɔ 'lɩbhä.^b

7 Yɩ za,

abhʋaa 'tɛɛnɩɛ Lagɔ dlɩɩ,

nglɩɛ 'n a yiɛ ghlɩ.

‑Maa ‑wa 'nɔɔ dlɩ 'tɛɛnɩ a za,

kpiyii,

'sɩbhäsɩbhäwaa gbä a‑a ‑ɛɛ nɛnɩɩ,

mɛɛ 'zʋa'aa ‑sɩkaa dɛsɛkäkpiyii.^c

Sɛ'ɛ kïbhë ‑mämaa nʋ'ɛɛ nɩɩ:

8 Kpiyi 'la,

nɩkpa a sɛbhlɩkpiyiɛ,

‑ɔ ‑kɛɛ gozoo,

bhli ɔ 'kää bhli.^d

Nɩkpaa wa'aa 'yɩbhä wa 'kä Lagɔ 'a wɛlɩɩ 'klʋkpamö zʋ,

mʋa gozwee,

mɩɩ 'kʋä a‑a ghlɩ 'kɩ.

9 ‑Maa abhʋa abhlɩ,

Ɔ'bhë mɔɔ ‑saanyɩɛ ‑lɛ,

a 'kä ɔ 'yize a ‑nʋä glɩnɩ.

A 'kä ɔ bʋbɔbʋbɔwa glɩnɩ.

Guylukwëa 'mö,

mä a ‑wʋ a‑a,

mɔɔ ‑saanyɩɛ ‑mä,

mɔɔ 'zʋanyɩɛ ‑mä 'ɔ lɩlɛ 'kädɛɛ ‑ɛɛ ‑sɩbhä a sɛ ‑wʋ a zɛmö.

Nzɩɩ,

'ɔ ‑li a ‑li 'kädɩɩ ɔ nʋanyɩɛ 'wluu,

a 'kä yɩ 'tɩtɩ bia.

10 Bhla'mö a dɔ'wʋ,

a'a ‑bhö a 'ɔ ngëyii ɔ ‑sɛɛ ‑lɛ 'mö a ‑nʋä,

‑maa ‑sɩkaa a dɔ'wʋ,

ɛ 'mö a ‑nʋä a glɩnɩa'aa.

Nɩkpa a ‑muë ‑wanyɩ ngäzɩdlɩɩ ɔ pä a‑a,

'mö a 'nɩɛ a glɩnɩ.

‑Maa ‑sɩkaa a dɔ'wʋ,

'mö a glɩnɩa'aa.

'A nɛmönɛmösaa nɩ 'ghlimanɩ Lagɔ a 'nglɩ

11 Na dlɩsɛkäwanyɩ,

mä'ä 'pɩwʋ mä ‑a ‑wʋä,

lɛgäwaa ‑a glɩnɩɛ,

'plɩɛ ‑a yiɛ.

Nza n zʋanyɩɛ 'dɩ 'mö nɩɩ:

Mä'ä 'pɩwʋ a ‑lii a 'tʋzokwëa ‑a ‑wʋanyɩɛ dila zɛmö,

‑a yɩbhää a 'kanyɩ Lagɔ 'a 'yioo 'wʋ ‑sɛɛ,

a nɩ ta 'klʋkpamö zʋ.

12 Nɩkpaa ‑waaa Lagɔ ‑yi a ‑wʋä jijo'wʋ a 'yila 'klʋ,

'a nɛmönɛmösaa nɩ ‑wʋ 'tɩɩ.

Nzɩɩ wa ‑kaanyɩ ‑lizokuu a kii 'wuë ‑gömö 'pä dɔ'wʋ ‑wʋʋ,

wa 'kä 'a ‑li a ‑lii a nʋä 'ylɩmö,

‑zlɩ Lagɔ ‑kä yii,

wa 'kä ɔ 'nglɩ 'ghlimanɩ.

13 'Kämanɩwaa 'wuë ‑wa 'kämanɩɛ mä'ä dʋdʋ 'wʋʋ,

‑Alowli Lagɔ mɔɔ 'zuëë ‑lɛ zaa,

a nɩ 'zʋ 'wa 'kämanɔɔ 'klʋkpamö.

'Bhlɩlowli 'kɔdɔɔ ‑ɔ glɩnɩɛ 'kämanɩwaa 'wuë a 'wukpëlee,

a nɩ 'zʋ 'ɔ 'kämanɔɔ 'klʋkpamö.

14 'Kämanɩwa ‑muë'la ɔ 'zʋä ɔnyɩ zɛmö,

nzɩɩ wa 'kä 'kpʋkpʋwa 'wa ‑lizokuu a 'pɛna 'nyɛ,

wa 'kä'ɛ ‑wa nʋä ‑li a ‑li bhɩzɩɩ,

wa 'wuë,

a nɩ 'zʋ 'wa 'kämanɔɔ 'klʋkpamö.

15 Sɛɛ Lagɔ yɩbhää,

‑sɩbhä ma‑a nɩɩ,

a nɩ nʋ 'kwädlɩ ‑li a ‑li,

nzɩɩ nɩkpaa ‑waaa Lagɔ 'a wɛlɩɩ 'mö ‑ngö,

‑waaa 'nɛɛnɔ ‑kä,

a 'kʋä nuë 'wʋ ‑gba.

16 A nɩ ‑bhölɩ nɩkpa a ‑muë wa'aa ‑kä wa 'kä 'wlumö köbhänɩ a sɛ.

Miɛ abhlɩ,

‑maa a nɩ tɩ nɩɩ,

anyɩ a 'kämanɩɛ zaa,

a 'kä ‑lizoku nʋ nʋ.

‑Maa Lagɔ 'mö a ‑wʋä 'yli zaa,

sɛ ɔ yɩbhää,

‑sɩbhä a nɩ ‑bhölɩ.

17 Nɩkpaa 'wuë,

a nɩ 'zuë ‑lɛ.

A 'bhɩa Lagɔgänɩwaa,

a nɩ ‑wʋä.

A nɩ kä Lagɔ a nganɔ ku 'mö.

'Bhlɩlowli 'kɔdɔɔ,

a nɩ 'zo 'klʋkpamö.

A nɩ ‑gänɩ Zezwii 'a gbäpöö

18 Abhʋa 'yliwʋwaa,

a nɩ kä a 'bhidɩbawa a nganɔ ku 'mö,

a 'kʋä 'klʋkpamö 'zʋ.

Ɛ'ɛ ‑bhö ‑wa nɛnɩɛ dlɩ zɛmö,

‑wa kää dlɩwätɛ a 'yize muë,

‑maa ɛ yi ‑wa ‑nyuä 'mlɩ a'bhë muë ‑kë,

a nɩ 'zuë 'klʋkpamö.

19 N‑n 'nɩ ‑lizoku nʋ a'bhë ‑kë,

'n wa ‑kamö 'klɩ 'yɩa,

'n ‑na'a sɛ ‑n zʋä Lagɔ 'klʋkpamö a za,

‑n ‑kä 'mlɩ 'kunɩ 'yizee,

yɩ nɛnɩ tenyii Lagɔ dlɩ yɔwʋ.

20 Sɛ'ɛ n gbää nɩɩ,

‑n ‑kä ‑lizoku nʋ,

'n wa ‑kamö yɩ za 'klɩ 'yɩa dɔ'wʋ ‑wʋ,

n‑n ‑kä 'mlɩ 'kunɩ a'bhë ‑kë,

yɩ'ɩɛ ‑na 'nglɩ a nglɩ 'mö ‑kä.

‑Maa ‑n ‑kä ‑li a ‑li nʋ,

wa ‑kamö yɩ za 'klɩ 'yɩa dɔ'wʋ ‑wʋ,

n‑n ‑kä 'mlɩ 'kunɩ 'yizee,

mɩɩ nɛnɩɛ Lagɔ dlɩ yɔwʋ.

21 Sɛɛ Lagɔ yɩbhää a dɔ'wʋʋ,

‑sɩbhä ma‑a da'a.

Kliisɩ a'bhë,

'klɩ ɔ 'yɩɛ a 'wlumö,

mɩɩ sʋlʋnanyɩɛ sɛ a 'kää 'zʋ,

zaa a nɩ ‑gänɩ 'ɔ gbäpöö.

22 A ‑yi sɛ nɩɩ,

ɔ'ɔɔ 'nyinyloli nʋ 'lɩlɩlɩ.

Yiowɛlɩ 'nɔɔ ‑zɩ ngli ghlɛnɩ.^e

23 ‑Zlɩ 'ɔ ‑gblɩwaa ziooo ‑dii,

ɔ 'nuëë wɛlɩzoku bhïlanɩ 'lɩlɩlɩ.

Wa ‑wɔɔɔ 'klɩ 'yɩa dɔ'wʋʋ,

ɔ'ɔɔ gbʋ ‑dɩ,

‑maa Lagɔ ‑ɔ tuä 'mözlɔnɩsɛ nɩkpa ‑zijlii,

'mö ɔ 'nyɛɛ yɩ 'wuë yowʋ.

24 Sɛ'ɛ n gbää nɩɩ,

Zezwii Kliisɩ mɔɔ 'yɩnɩɛ ‑lɛ su 'klʋ ‑a'a 'nyinylolii a za 'klɩ

'n ɔ yiɛ yɩ za ‑lɛ 'kunɩ,

ɔ ‑kanyɩ yɩ gbʋʋ ‑gömö ‑sɛ,

nzɩɩ ‑a ‑nyɛ 'nyinyloli 'kä 'ylimö ‑sɛnɩ,

a'a ‑bhölɩbhölɩsaa 'kä Lagɔ dlɩ yɔwʋ nɛnɩ.

Sɛ wa 'lɩbhɔɔ da'a 'n 'ɔ dluu yiɛ kwlii,

‑sɩbhä ma‑a kää 'nglɩ,

'n a yiɛ 'pʋ.

25 Bhla'mö a dɔ'wʋ,

wïla a ‑mii yɛɛ 'kwlɛ 'mö tʋʋnɩ 'wë a saa ‑sɩbhä a ‑wʋ a‑a.^f

‑Maa ‑sɩkaa a dɔ'wʋ,

A yɛ wïlaa a 'ylizʋnɩnyɔɔ yɔwʋ 'bɩwʋ yi,

mɔɔ kpëteanyɩa'aa 'wʋ.