1 Piɛlɩ 4

A nɩ nɛmö nɩkpalili a sɛ

A ‑yi sɛ nɩɩ,

Kliisɩ a'bhë,

‑mä 'ɔ nɩkpɛglɩnɩsaa 'mö,

'klɩ ɔ 'yɩɛ,

zaa,

yɩ nɩ ‑wʋ ‑sɩbhä ‑mä a 'wlu 'mö nɩɩ,

'klɩ a 'kää 'yɩmö.

Nyɩasɛ n'n‑ä ‑sɩbhä gbä,

‑maa nɩkpɛ a ‑mɔ 'yɩɛ 'klɩɩ,

'nyinylolii 'mö ɔ ‑nyɛɛ ‑sɛnɩɛ 'ylimö,

2 nzɩɩ ‑lii a kii 'wuë a 'tʋzokwëa,

ɔ zʋ a‑a bhla'mö 'klʋkpamöö,

ɔ taa'a 'klʋkpamö zʋ,

‑maa 'saa Lagɔ yɩbhää a 'yize 'mö ɔ 'käa'a ‑mä 'ɔ zɩkpaa 'wuë 'mö nʋ.

3 Bhla'mö a dɔ'wʋ,

nɩkpaa ‑waaa Lagɔ ‑yi a saa,

‑sɩbhä a nɛmö a‑a ‑këë 'n a yiɛ 'klɛ ‑sɛ.

‑Lizokuu 'a dilaa 'pänanyɩɛ 'wʋ 'mö a nʋ a‑a,

‑lii a 'tʋzokwëa ma‑a su a‑a ‑mä a dila zɛmö,

nʋnɩmäwa a glɩnɩ a‑a,

'fɛtilea wa ‑kä ‑sɛ 'n wa liɛ ‑këë 'n wa doo wlu 'kpulu 'n nʋʋ lɩbhʋää,

'mö a sɛmö a‑a.

'Fʋ a ‑lagwɩɩ a bʋbɔbʋbʋ ‑wʋ ‑bhöä Lagɔ ‑nyɛnɩ 'wʋʋ,

wʋ libhoo 'mö a kä a‑a.

4 ‑Li 'la 'wuë a kɩa'a ‑sɩkaa kɛ'mö ‑sɛ.

‑Maa nɩkpaa ‑waaa Lagɔ ‑yi ‑wa nʋä ‑bhlɛ ‑lɛ a zʋ'wʋbhöli 'la 'wuë 'yizee,

a ‑nyʋä 'nɩa'a bhʋ ‑bhʋlʋ yɩ zaa,

wa ‑kaanyɩ 'wʋ yɩlɩɩ,

nglii yʋää,

'n wa nyimaa ‑sɩbhä a za a 'nglɩ.

5 ‑Maa Lagɔ,

nɩkpaa 'wuë ‑wa ‑bhölɩɛ ‑bhlɛ oo,

‑wa yɛɛ 'ku 'wë oo,

‑ɔ 'kʋää ‑zijli tuu,

ɔ yuë 'ylɩ ‑bhlʋ 'mö 'wa nʋnʋlii 'wuë 'wʋ 'yɩbhänɩ.

6 ‑Yɩ kää 'nglɩ 'n wa yiɛ ‑wa glɩnɩa'a ‑sɩkaa 'kuduwaa 'Mänatɩtɩɩ 'nyɛ 'wë 'n wa yiɛ 'kuu miɛ nɩɩ,

wa ‑kʋä 'pɩwʋ a nɩkpa a sɛ ‑zijli tu 'wëë,

Lagɔsɛ a dɔ'wʋ,

'wa 'zuzukuu 'kä ‑bhölɩ.

A‑a nɩ ‑wʋwʋnɩ 'yli

7 Mä'ä 'pɩwʋ a ‑lii 'wuë a 'bhlenɩdaa yɛ tenyii 'dio 'wë.

Zaa,

a nɩ ‑bhölɩ 'nɛɛnɩwa a sɛ,

a nɩ köbha anyɩ 'yli nzɩɩ a 'käa 'kwädlɩ Lagɔ bhibhe.

8 A nɩ ‑wawanɩ 'kwädlɩ.

Mɩɩ kää tenyii dɛsɛ.

Ɛ'ɛ ‑bhö nyɩasɛ,

‑maa nɩkpa a ‑wawʋʋ,

'nyinyloli a ‑bɛ wʋ 'tatinɩɛ 'yi.

9 A nɩ pälaplanɩ 'mänasɛ.

10 A 'wuë,

'nyupälɩ Lagɔ ghälaanyɩɛ bhʋlʋbhlʋ 'wʋʋ,

a nɩ 'libhi 'wʋ a 'kä 'yli ‑wʋwʋnɩ.

‑Lɛ a dɔ'wʋ,

'nyupälɩ 'la a ki 'wuë yi 'nglɩ ‑kä a yi ɔ libhonʋwa a ‑nʋä a ‑nʋä glɩnɩ.

11 Lagɔ ‑kamö 'nyu 'pä ‑n 'kä 'ɔ wɛlɩɩ bhïlaa,

sɛ ɔ nyɩamiɛ,

‑sɩbhä ‑n nɩ bhïlii cuu.

Lagɔ ‑kamö 'nyu 'pä ‑n 'kä ‑na 'bhɩa 'yli ‑wʋʋ,

libho 'la,

nʋnuu 'mötɛɛnɔɔ Lagɔ nyɩamöä 'mö.

'Saa a ‑kä nʋ ‑kë,

a nɩ nu Zezwii Kliisɩ a za,

yɩ 'kä Lagɔ a 'nglɩ 'ghlimanɩ.

Zezwii Kliisɩ a 'yize mɔɔ 'ghïliɛ mɔɔ 'kämanɩɛ 'kwädlɩkwädlɩnɩ.

Nn miɛ!

Wa ‑kaanyɩ Zezwii Kliisɩ a za 'klɩ 'yɩaa 'mäna nɩ 'lɩbhanyɩ

12 Na dlɩsɛkäwanyɩ,

'klɩ 'kädɛ 'la a ‑wʋä da'a 'yɩ dɔ'wʋʋ,

nyɩasɛ ɛ 'nanyɩɛ ghlɩ,

‑maa a ‑kä ‑tiamö Lagɔ dlɩ 'tɛɛnɩɩ,

yɩ 'kä 'ylɩmö 'yoo,

nza ɛ ghïlanyɩɛ.

Yɩ kä yɩ 'kä ‑sɩbhä a dɛ ‑wʋ klɩpaa,

zaa 'a dilaa nɩ tɩ 'mö wɔlɔnɩ.

13 Sɛ'ɛ n gbää nɩɩ,

sɛɛ Kliisɩ 'yɩ a‑a 'klɩɩ,

‑sɩbhä a ‑wʋä da'a 'klɩ 'yɩmö dɔ'wʋ,

zaa 'mäna nɩ 'lɩbhanyɩ.

‑Lɛ a dɔ'wʋ,

‑zlɩ 'ɔ 'ghïlinɔɔ ‑kä gbëdanguu bhlii,

'mäna yeanyɩ tenyii 'wlu 'mänanɩ.

14 ‑Maa ‑sɩkaa a dɔ'wʋ,

sɛ a glɩnɩɛ ɔ ‑gänɩwa a za,

wa ‑kaanyɩ ‑di ziaa,

Lagɔ 'a 'Wugɔmʋʋ ‑ɔnyɩ nglɩɩ 'ghïliɛ,

mɔɔ ‑wʋanyɩɛ ‑gömö,

zaa 'a ‑jɔlʋ!

15 Miɛ abhlɩ da'a,

‑maa a gla'mö a nɩkpɛ nɩ tɩ 'ku 'lɩbhä,

ɔ nɩ tɩ 'wi ghli,

ɔ nɩ tɩ ‑lizoku nʋ,

ɔ nɩ tɩ ɔnyɩ ɔ 'bhɩa a gbɩ 'mö 'pä,

wa toa sa'a a ‑lizoku a za 'klɩ 'yɩa.

16 ‑Maa sɛ a glɩnɩɛ klɩtɩɛwa a za wa ‑kaanyɩ 'klɩ 'yɩaa,

mɩɩ 'nɩɛ zʋ 'wʋ ‑bhö.

Zaa,

a ‑kä ‑sɩbhä 'klɩ 'yɩ dɔ'wʋ ‑wʋʋ,

a nɩ 'ghlimanɩ Lagɔ a 'nglɩ sɛ a kää Zezwii a 'nglɩ ‑gömö a za.

17 Lagɔ 'a ‑zijle 'kädaa a zlɩɩ,

ɛ yɛ ghlɛ 'wë.

‑Abhʋa ɔ ‑nʋa,

‑a ‑kä sɛ'ɛ 'klɩ 'yɩ dɔ'wʋ ‑wʋʋ,

'ɔ ‑zijle 'kädaa a tɛɛnɩdaa ma‑a.

‑Maa ‑abhʋa ɔ ‑nʋa,

ɔ ‑kanyɩ ‑sɩbhä mö zlɔmanɩɩ,

mɛɛ 'kä zi'e nɩkpaa ‑waa 'zʋä 'ɔ 'Mänatɩtɩɩ 'klʋkpamöö,

sɛɛ wa ‑nɩɩ 'kä bhäa'a wabhlɩ 'mö ‑wʋ 'nɩ?

18 Sɛ'ɛ Lagɔwɛlɩɩ nʋä nɩɩ:

‑Wa zlɔnɩɛ 'möö,

Lagɔ 'kʋä puëë yi a dɔ'wʋ ‑lɛ 'tɛɛ'ɛ tenyii 'möö,

mɛɛ 'kä zi'e nɩkpaa ‑wa fälanɔɔ 'ylimö ‑nyɛ 'nyinylolinʋwaa 'sɔ,

sɛɛ 'wa wɛlɩɩ 'kä bhäa'a wabhlɩ ‑wʋ 'nɩ?^a

19 Nza n gbää nɩɩ,

Lagɔ a'bhë,

ɔ ‑kä 'klɩyɩyɛ 'yi 'tatinɩ 'n ɛ ‑kaanyɩ ghlɩɩ,

mɔɔ 'yɩbhɩɛ ‑sɩbhä,

zaa ‑li a ‑li a nʋnʋ dɔ'wʋ,

swɩ nɩ tanyɩ yɔwʋ 'kunɩ.

Lagɔ ‑ɔ 'wälanyɩɛ,

sɛ ɔ gbää,

‑sɩbhä ɔ zʋä,

zaa a nɩ 'nyɔ anyɩ yowʋ.