1 Piɛlɩ 1

Tɛkäbɔgʋʋ

Piɛlɩ

'cɛlɩɛ

Bhälɩwɛlɩɩ

‑Amö Zezwii Kliisɩ a tietienyɔ Piɛlɩ,

‑amöö cɛlɩɛ dɛ'ɛ 'bɔgʋ nɩ.

Abhʋa Lagɔ a ‑nʋa,

abhʋaa mlɩnɩɛ ‑mä Pɔɔ‑bhölɩɩ 'mö,

‑mä Galatii‑bhölɩɩ 'mö,

‑mä Kapadɔɔsɩ,

‑mä Azii,

'n ‑mä Bitinii,

abhʋaa glɩnɩɛ mä a dɔ'wʋ lɛgäwaa,

a 'wuë abhʋa n cɛlɩɛ dɛ'ɛ 'wʋ.

2 ‑Aa dɩba Lagɔ a'bhë mɔɔ ‑saanyɩ a‑a ‑lɛ,

a 'kä ɔ ‑nʋä glɩnɩ.

'Ɔ sɛ ɔ 'yɩbhää ‑sɩbhä ma‑a.

'Ɔ 'Wugɔmʋʋ mɔɔ 'zʋanyɩɛ ɔ 'yize a ‑nʋä 'wʋ,

a 'käa Zezwii Kliisɩ 'kwädlɩnɩ 'klʋkpamö zʋ.

'Ɔ dluu 'kanyɩ 'wlɩlɩ päla.

‑Atʋayuënyɩ,

Lagɔ 'a 'tɩɩglɩglɛɛ ‑nyɛ 'ɔ 'nyupälɩɩ 'sɔ,

yɩ nɩ ghlanyɩ tenyii 'wʋ.

Zezwii Kliisɩ mɔɔ glɩnɩɛ ‑aa dlɩtɛɛnɩdɛ

3 ‑Alowli Zezwii Kliisɩ a dɩba Lagɔ,

a‑a nɩ 'ghlimanɩ ɔ 'nglɩ.

Mɔɔ 'pää tenyii ‑aa ngäzɩdlɩ.

Zezwii Kliisɩ 'a gluwlʋwlɛɛ 'mö ɔ ghlɛnɩɛ 'mö 'n ɔ ‑yinyɩɛ zɩkpalele 'nyɛ.

Zaa,

‑sɩkaa a dɔ'wʋ,

‑aa dila 'tɛɛ 'wʋ 'kwädlɩ,

4 a‑a ‑kʋnɩɛ ‑lii Lagɔ ‑kanyɩɛ 'nyɛɛ.

‑Li 'la ɔ 'kanyɩɛ zɩla'a 'nyɛɛ,

yɩ 'naa 'kä nyimo,

yɩ 'naa 'kä fɩ plɛ,

yɩ 'naa 'kä 'wʋ bhɩɛ 'lɩlɩlɩ,

ɛ'ɛ ‑bhö nyɩasɛ,

‑maa ‑mä ɔ yɔwʋ ‑mä yɩ ‑wʋä.

5 A 'wuë abhʋaa 'tɛɛnɔɔ dlɩɩ,

'ɔ 'mötɛɛnɔ 'kɔdʋʋ a za ɔ yeanyɩ 'wʋ ‑kʋ ‑këë,

'ɔ 'pʋpʋɛɛ 'wuë ‑ɛ 'kää 'pɩwʋ a 'ylibhɩɛdaa 'wʋ gbëdanguu bhlii,

a ye ghlɩ.

6 ‑Sɩbhä a za n gbää nɩɩ,

mä'ä 'pɩwʋ maanyɩ 'tɛnyɩɩ 'nɩɛ 'mö 'bhʋɔɔ,

a ‑kä ‑bhlɛ ‑mä klɩɩ a kii 'wuë 'yɩnɩ dɔ'wʋ ‑wʋ a'bhë ‑kë,

'mäna nɩ 'lɩbhanyɩ.

7 ‑Sikaa,

dɛsɛkälu a glɩnɩɛ zaa,

‑kosu 'mö wa nguaa wa 'ka 'mö 'kplɩ.

'A dlɩtɛɛnɩtɛnɛ ɛbhlɩ,

ɛ kä tenyii dɛsɛ ɛ zi ‑sikaa ‑a glɩnɩɛ 'ylibhɩɛla 'wʋ.

‑Sɩbhä a za a kää a 'kä 'klɩ 'yɩ,

nzɩɩ 'a dlɩtɛɛnɩtɛnɛ 'la,

ɛ ‑kä ‑tiamö a ‑leyi glɩnɩɩ,

ɛ 'kä 'ylɩmö 'yoo.

‑Lɛ a dɔ'wʋ,

‑zlɩ Zezwii Kliisɩ 'a 'ghïlinɔɔ ‑kä gbëdanguu bhlii,

ɔ yeanyɩ ‑lɛ 'zʋ,

ɔ yeanyɩ bhɩzɩ,

ɔ yeanyɩ 'wʋ 'pä.

8‑9 Zezwii Kliisɩ a'bhë,

a 'nɔɔ ‑bhlɛ tɛkäsɛ 'ylɩmö 'n a ‑wɔɔɔ tenyii.

‑Sɩkaa a'bhë ‑bhlɛ ‑kë,

a 'nɔɔ 'wʋ yɩlɩ 'n a 'tɛɛnɔɔ dlɩ.

'A dlɩtɛɛnɩtɛnɛ 'la,

Lagɔ 'a 'pʋpʋɛɛ 'wuë 'mö ɛ ‑glɛɛ gwë,

nza 'mäna 'käda ‑aaa ‑sɩbhä a sɛ ‑wʋʋ,

a lɩbhanyɩɛ ‑bhlɛ.

10 'Pʋpʋɛ 'la Lagɔ 'yɩbhä a‑a ɔ 'kanyɩ 'ɔ ngäzɩdlɩɩ a za 'nyɛɛ,

'ɔ bhla'mö a 'möbhïlanɩwaa,

sɛ ɛ 'kää 'mö ‑wʋwʋnɩ,

dlɩ sɛ wa bhlɩɛ 'n wa yiɛ ‑sɩbhä sɛ tɛlɩ,

'n wa yiɛ ɛ dɛ bhïla.

11 Kliisɩ 'a 'Wugɔmʋʋ ‑ɔ bhïlanuë a‑a 'möö,

sɛ'ɛ ɔ nʋ a‑a nɩɩ:

Puënyɔ Lagɔ ‑sɛɛ ‑lɛ,

ɔ yi 'zwɩ a ‑bɛ zi 'wë,

'n ɔ 'kää bhäla 'ɔ 'ghïlinɔɔ 'wʋ 'libhï.

‑Maa 'tɛnyɩ ‑lɛ a ‑li 'la 'kää 'mö 'yli 'wlʋnɩɩ,

wa 'nɛɛ a ‑yi.

Sɛ yɩ 'kää 'mö 'plɩmöplɩmöö,

wa tɛlɩ a sɛ wa 'kä ‑sɩbhä yɩbhlɩnɩ.

12 ‑Maa Lagɔ a'bhë sɛ'ɛ ɔ 'nyʋä a‑a 'dɩ nɩɩ,

wɛlɩ 'la ɔ 'nyʋää,

'wa 'tɛnyɩɩ 'mö ‑lɛ yɩ'ɩɛ yɩ 'kä 'yli 'wlʋnɩ,

‑maa 'a 'tɛnyɩɩ 'mö ‑lɛ yɩ 'kää 'yli 'wlʋnɩ.

Zaa,

a za ɔ 'nyʋänyɩɛ 'n wa yiɛ 'cɛlɩ.

Zezwii 'a 'Mänatɩtɩɩ a 'nʋä,

‑wa 'nyanyiɛ,

'Wugɔmʋʋ 'Wlɩlɩ ‑ɔ 'bhöönɩɛ ‑mä Lagɔ dlɩ 'mö,

Lagɔ 'zuëë ‑gömöö,

ɔ 'nglɩ 'mö wa 'nyanyiɛ.

‑Maa wɛlɩɩ a yɩbhlɩnɩɛ da'aa,

Lagɔzuzukuu a'bhï,

yɩ yɩbhä tenyii yɩ 'kɩ yɩbhlɩnɩmö.

A nɩ ‑bhölɩ Lagɔsɛ

13 Nza n gbää nɩɩ,

a nɩ ‑ligba a 'kä ‑lɛ glɩ,

a 'kä 'kwädlɩ 'nɛɛnɩli nʋ.

‑Zlɩ Zezwii Kliisɩ ‑kä zɩla'a 'yli 'wlʋʋ,

sɛɛ Lagɔ 'kää ‑lɛ a zlɩ 'la 'mö a ngäzɩdlɩ 'pä ɔ 'kanyɩ puëë,

‑sɩbhä a 'yize ma‑a nɩ glɩnɩ a dlɩtɛɛnɩdɛ.

14 Bhla'mö a dɔ'wʋ a'aa a Lagɔ ‑yi.

‑Lɛ a 'tɛnyɩ 'la 'mö,

'a dlɩpäsɛzokwëa ‑a 'pänanyɩ a‑a ‑lizokuu 'wʋʋ,

'mö a 'zʋ a‑a 'klʋkpamö.

‑Maa ‑sɩkaa a dɔ'wʋ,

Lagɔ a 'yuë a glɩnɩɛ zaa,

'mö a nɩ 'zʋ 'klʋkpamö.

15‑16 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

‑Amö Lagɔ,

'wlɩlɩ n ‑wʋä,

n'n‑ä ‑lizoku 'mö ‑kä,

zaa abhʋa na ‑nʋa,

a nɩ ‑wʋmö ‑sɩbhä.^a

Lagɔ ‑ɔ ‑wʋä 'wlɩlɩ ‑ɔɔɔ ‑lizoku 'mö ‑kää,

mɔɔ ‑saanyɩɛ ‑lɛ,

a 'kä ɔ 'yize a ‑nʋä glɩnɩ zaa,

'a nɛmönɛmösaa 'wuë nɩ ‑wʋ Lagɔsɛ.

17 Lagɔ,

a ‑kɔɔ 'kwädlɩ bhibhee,

a dɩba a lɔɔ.

Miɛ,

‑maa a nɩ ‑yi sɛ nɩɩ,

'ɔ ‑zijlitutwe 'mö a dɔ'wʋ,

ɔ'ɔ gbäzɩ nɩkpa 'mö.

Zaa,

a ‑kä ‑bhlɛ mä'ä dʋdʋ 'wʋ ‑wʋʋ,

a nɩ kä ɔ nganɔ ku 'mö,

sɛ ɔ yɩbhää a 'kä ‑sɩbhä 'zʋ.

18 A dɩbawa a dɩbawa,

'wa sɛ wa ‑bhölɩ a‑a,

sɛ wa tanyɩɛ yɔwʋʋ,

‑sɩbhä 'nɩɛ ‑lu 'ylimö ‑kä.

A ‑yi sɛ nɩɩ,

Kliisɩ 'kanyɩɛ ‑lɛ a ‑bhölɩbhölɩsɛ 'la a galɛ 'mö ‑sɛɛ yii,

‑sika ‑nyɛ moni 'sɔ ‑yɩ 'kää 'zɩgblɛ 'yli bhɩɛɛ,

'mö ɔ 'nɩɛ 'wäla.

19 ‑Maa ɔnyɩ ɔ 'wlʋä 'mö,

'bhlawadɩgba ‑aaa 'kpa yɔwʋ ‑kä,

‑aaa ‑maa yɔwʋ ‑kä 'lɩlɩlɩɩ,

'n ɔ yiɛ a sɛ a bʋbɔnɩlu 'zʋ.

'Ɔ dluu a'bhë,

mʋʋ ‑saanyɩɛ ‑lɛ a galɛ 'la 'mö.

20 Lagɔ a'bhë,

ɔ'ɔɔ a ‑bhlɛ 'pɩwʋ a ‑lii 'wuë 'wäla,

'n ɔ yo a‑a ‑lɛ ‑sɛ,

ɔ 'kä ‑lɛ a bʋbɔnɩlu 'la zʋ.

'Tɛnyɩ ‑mɛ nɩ ‑ɛ glɩnɩɛ mä'ä 'pɩwʋ a 'gbëbhlenɩtɛnyɩɩ,

ɛ 'mö,

‑mä ɔ 'wälanɔɔ 'yli,

ɔ 'kanyɩ puë a za.

21 'Mö Lagɔ gälaa 'n ɔ yoo glu ‑sɛ,

'n ɔ yoo ‑mä ɔ yɔwʋ 'ghïlinɔ 'nyɛ.

Mɔɔ kää 'nglɩ 'n a 'tɛɛnɩɛ Lagɔ dlɩ

'n a dila 'tɛɛ 'wʋ.

22 ‑Atʋayuënyɩ,

a sɛ a ngluä 'wʋ a 'kä Lagɔ 'a ‑tiawɛlɩɩ 'klʋkpamö zʋ a za,

'a dlɩpäsaa yɛ Lagɔsɛ 'zʋ,

zaa a bhɛnɩa'a a 'kä ‑tiamö ‑daayuësɛ ‑wawanɩ.

Nza n gbää nɩɩ:

‑wawʋ a dɔ'wʋ,

'a dilaa nɩ tɩ 'kwädlɩ 'mö ‑dlinɩ,

a 'kä ‑wawanɩ 'yize.

23 Lagɔ 'a wɛlɩɩ ɔ 'nyanyɩɛ ‑yɩɩ bhɩɛɛ 'wʋ,

‑yɩ nyɛɛ nɩkpɛ ‑tiamö a ‑bhölɩbhölɛɛ,

mɩɩ 'nyanyɩɛ zɩkpalele.

Zɩkpalele 'la,

'kukunyɔ a'aa 'mö 'bhöönɩ,

‑maa ‑aa dɩba Lagɔ ‑ɔɔ bhɩɛɛ 'wʋʋ,

ɔ'bhë mɔɔ 'nyanyaa.

24 Nza Lagɔwɛlɩɩ nʋä nɩɩ:

Nɩkpaa 'wuë,

‑titi a sɛ wa ‑wʋä.

'Wa ‑baa,

‑titi a 'ba a sɛ a ‑wʋɛ'ɛɛ.

‑Titii,

yɛ yɩ yɛɛ,

'n yɩ ba bhliɛ,

‑sɩbhä nɩkpaa ‑wʋä.

25 ‑Maa ‑Alowli Lagɔ 'a wɛlɩɩ,

yɩ 'yize,

mɩɩ 'nɩ bhɩɛ 'yli.^b

‑Maa Lagɔ 'a wɛlɩ 'la,

Zezwii 'a 'Mänatɩtɩɩ wa 'nyanyɩɛ,

miɛ.