Ebleewaa 9

Tɛkämɛnɩnɔɔ 'mö a Lagɔbʋbɔsaa

Tɛkämɛnɩnɔɔ 'mö a Lagɔbʋbɔsaa kä a 'a gböö 'n dɛ wa 'kää mä'ä dʋdʋ 'wʋ Lagɔ bʋbɔnɩɩ,

‑lɛ ‑bhölɩ a.

2 Lagɔgligbë wa 'sɩbhää,

a kä 'kibhï 'sɔ.

Tɛkäkïbhëa,

'mö wa laa dɛ ‑wʋ 'wlɩlɩ.

‑Mä a 'mö,

‑sikawapɛɛ ‑ɛ kää ‑kwësi ngbi'sɔ 'ylii,

‑mä ɛ ‑wʋä.

'Tebhlea ‑a kää bʋbɔnɩfɔlɔɔ 'klʋʋ,

‑mä a ‑wʋmö'ɛɛ.

3 Tɛkäkïbhë 'la,

a ‑nyɛ 'sɔnaa 'sɔ a jijo'wʋ,

ghlidoo 'kɔdʋʋ ‑wʋä ‑lɛ.

'Sɔnakïbhëa,

'mö wa laa dɛ ‑wʋ tenyii 'wlɩlɩ.

4 A 'mö,

‑mä ‑sikatebhlea wa sianɩɛ wlɩɩ 'klʋ ‑wʋä.

Mɛnɩnɔɔ a ‑lokwlii,

‑mä ɛ ‑wʋmöä.

Ɛ 'klʋ 'wuë ‑sika.

‑Mä ɛ 'mö ‑sikadɔkɔɔ ‑wʋ kää Lagɔlilea wa laa maanɩ 'mö mu,

Aghlɔɔ 'a ‑peyii ‑ɛ 'pä a‑a ‑gbɔkwälɩ mɛ,

'n kpɩya 'sɔ ‑kpɔ ‑yɩ cɛlɩɛ mɛnɩnɔɔ a wɛlɩɩ 'klʋ mi,

‑li 'la 'wuë,

mɩɩ ‑wʋä ‑mä.

5 ‑Lɛ ‑lokwlii 'klʋ,

'nglɩmölagɔzuzuku 'sɔ wa bhlɛɛ,

yɩ 'nɩgbö ‑lɛ.

Mɩɩ sɛɛ zɛmö nɩɩ,

dɛɛ ‑lokwli 'la ‑wʋä,

Lagɔ a'bhë mɔɔ ‑wʋä ‑lɛ.

Dɛɛ Lagɔbʋbɔnyɔ 'kɔdɔɔ 'mlɩɛ nɩmadlu ɔ ‑kä nɩkpa a 'nyinyloli a za Lagɔ ‑lii bʋbɔnɩɛ yii,

Yɩ ‑këpïï,

mɩɩ wɛnɩɛ ‑lɛ 'wʋ.

Miɛ da'a,

‑maa ɛ'ɛ ‑bhöa'a ‑bhlɛ ‑sɩkaa ‑li 'la 'wuë a 'mö ‑sɛsɛnɩtɛnyɩ.

6 Sa'a ‑sɩbhä Lagɔgligbëa sɩbhää.

A tɛkäkïbhëa 'mö,

zila oo ‑zila,

‑mä Lagɔbʋbɔwaa plɛɛ 'n wa nʋä 'wa Lagɔbʋbɔlibhoo.

7 ‑Maa 'sɔnaa abhlɩ,

‑mä a 'mö,

Lagɔbʋbɔnyɔ 'kɔdɔɔ a 'yize mɔɔ plɛɛ ‑mä.

'Ylʋba ‑bhlʋ 'mö,

ɔ plɛnɩ ‑mä 'wʋ ‑bhlʋ ‑kpöö.

Ɔ ‑su nɩmadlu 'n ɔ plɛɛ ‑mä.

Ɔ'bhë,

ɔ ‑nyɛ ngëyi 'wuë 'sɔ,

'nyinylolii wa'aa ‑tɔnɩ wa nʋä a za,

ɔ 'kʋ Lagɔ bʋbɔnɩ.

8 'Wugɔmʋʋ 'Wlɩlɩ mɔɔ slʋnɩɛ nɩɩ,

'n bhla'mö a Lagɔgligbëa ma‑a nɩ ‑kä a ‑bhlɛ ‑bhölɩɩ,

a kïbhëa 'sɔnaa a dɛɛ ‑wʋä tenyii 'wlɩlɩ a 'yio,

wʋ 'naa 'kä a këlio.

9 ‑Li 'la 'wuë,

mɩɩ 'cɩanyɩɛ zɩ'ɛ nɩɩ,

nɩma ‑nyɛ bʋbɔnɩli ‑mimii 'sɔ wa bʋbɔnɩ a‑a,

yɩ'ɩɛ a bhɛnɩ yɩ 'kä nɩkpɛ 'nyinyloli a gbʋ ‑gömö ‑sɛ ɔ dlɩ 'kä 'mö yi.

10 ‑Wa bʋbɔnɩɛ ‑li 'la,

gbö a ‑bɛ wa ‑gänɩɛ.

Lilili a gbö mi,

nʋnɩmänɩmʋ a gbö mi,

'n sɛ wa 'kää 'wa kpökpaa 'wlɩlɩ päla,

‑sɩbhä a gböö 'mö wa ‑gänɩɛ.

‑Maa ‑li 'la 'wuë nɩkpa a 'päpägböä,

sa'a yɩ ‑wʋä ‑këë 'n Lagɔ yiɛ 'lilili yɩ 'bhle 'mö zʋ.

Mɛnɩnɔluluu 'mö a Lagɔbʋbɔsaa

11 ‑Maa Kliisɩ ‑ɔ yiɛ,

mɔɔ glɩnɩɛ ‑li a ‑li 'la ‑yɩ 'kää yi a Lagɔbʋbɔnyɔ 'kɔdɔɔ.

Lagɔgligbëa ‑a 'ghïliɛ,

‑a kää 'nglɩ ‑gömö,

‑a ‑wʋä ‑kpöö,

nɩkpɛ 'nɩɛ 'sɩbhää,

mɩɩ sɛɛ zɛmö nɩɩ,

‑aaa mä'ä dʋdʋ 'wʋ a ‑na glɩnɩɩ,

‑mä a 'mö,

‑mä ɔ plɛɛ ɔbhlɩ.

12 Ɔ plɛɛ ‑mää,

väkö a dlu ɔ'ɔɔ ‑su.

'Bhilabhɛlɩ a dlu ɔ'ɔɔ'ɛ ‑su.

‑Maa ɔ'bhë,

'ɔ dluu 'mö ɔ ‑suä.

'Wʋ ‑bhlʋ ‑kpöö ɔ plɛnɩɛ ‑mä.

Mɩɩ ‑sanyɩɛ 'gämö ‑gämö ‑a'a 'nyinylolii a gbʋʋ ‑gömö.

13 Bhla'mö a Lagɔbʋbɔsaa a dɔ'wʋ,

'väkadlu ɛ ‑kä'ɛ 'bhilidlu 'n ɛ ‑kä'ɛ 'bhilinglɔdɩgba wa siaa a 'tʋtɔɔ,

'mö wa mlɩɛ nɩkpaa ‑wa sɛɛ Moyizɩ 'a Gböö 'klʋkpamö 'wʋ.

'N ‑yɩ'la ‑kä 'wa kpökpaa 'wlɩlɩ pälaa,

14 mɛɛ 'kä zi'e Kliisɩ ‑ɔɔɔ ‑maa yɔwʋ ‑kä,

Lagɔ 'a 'Wugɔmʋʋ ‑suä 'n ɔ yiɛ ɔnyɩ Lagɔ bʋbɔnɩɩ,

'ɔ dluu ‑wʋ kwliɛ,

mʋʋ 'naa kä a bhä tenyii ‑a'a dilaa 'wlɩlɩ pälaa wʋ 'kä ‑li 'la 'wuë 'wʋ zi ‑a?

‑Tiamö,

mʋʋ bhɛnɩɛ wʋ 'kä ‑tiasɛ ‑a'a dila 'wlɩlɩ päla,

nzɩɩ nyɩasɛlii 'wuë ‑a nʋä ‑yɩnyɩ za ‑a 'kää 'yli bhɩɛɛ,

‑a tia'a nʋ,

‑a 'kä sasɛ Lagɔ ‑ɔ ‑bhölɩ bʋbɔ.

15 Nza n gbää nɩɩ,

Kliisɩ a za Lagɔ ‑nyɛ nɩkpa 'sɔ a jijo'wʋ mɛnɩnɔlulu yiɛ ‑lɛ.

Tɛkämɛnɩnɔɔ a 'tɛnyɩ 'mö,

nɩkpaa 'klʋkpamö wa sɛ a‑a Lagɔ.

‑Maa Kliisɩ mɔɔ 'kuä wa 'wlumö,

nzɩɩ 'wa 'nyinylolii a gbʋʋ 'kʋäa ‑gömö 'bhöö,

sɛɛ Lagɔ ‑sʋää ‑lɛ wa 'kä 'ɔ 'pɩwʋlelea 'wʋ a ‑lii ‑yɩ 'naa 'kää 'yli bhɩɛ ghlɩɩ,

‑sɩbhä 'kä Kliisɩ 'a kwiea a 'nglɩ 'mö ‑tiamö 'yli 'wlʋnɩ.

16‑17 ‑A ‑yi sɛ nɩɩ,

nɩkpɛ ‑kä 'bɔgʋ 'cɛlɩ nɩɩ,

n ‑kä 'ku 'wë wa nɩ 'zʋ sɛ'ɛ 'na ‑lii 'wuë,

ɔ 'maa 'kää 'ku 'wë,

'n wa kää wa 'kä ‑sɩbhä 'zʋ.

‑Maa ɔ 'nɩɛ ‑bhlɛ 'kuu,

sɛ ɔ 'cɛlɩ a‑a,

‑bɛ 'nɩɛ bhɛnɩ ɔ 'kä ‑sɩbhä 'zʋ.

18 ‑Sɩbhä a za Lagɔ ‑nyɛ ɔ ‑nʋa 'sɔ a Tɛkämɛnɩnɔɔ a'bhë 'kää tɛɛ yii,

dlu 'sulo a‑a sɛ.

19 Gböö Lagɔ 'nyɛ a‑a Moyizɩ yowʋʋ,

Moyizɩ ‑nyɩɩ yiɛ,

nɩkpaa 'wuë a 'yila 'klʋ ‑lɛ ɔ zɛlɩniiɛ 'mö.

Yɩ 'wuë,

sɛ yɩ cɛlɩɛ,

‑sɩbhä ɔ zɛliiɛ 'mö 'tɩɩ.

Ɔ zɛliiɛ 'mö 'wëë,

'bhiladɩgbö ‑nyɛ väkö 'sɔ wa ‑dɩɛ 'wlu a dluu,

'n ɔ yuä 'nyu 'mö zʋ,

suke wa laa Yizɔɔpö a ‑titigblagblaa 'n ɔ yeaa wïladebïlizɛlɩ yɔwʋ gwanɩ,

'n ɔ yeaa ‑mä dlu 'la 'mö 'ngwa 'n ɔ yuä 'bɔgʋʋ Lagɔ 'a Gböö cɛlɩɛ 'mö 'wʋ 'mlɩ 'n ɔ yu'ɛɛ nɩkpaa 'wuë 'wʋ 'mlɩ.

20 Ɔ ‑wʋä ‑sɩbhä 'zʋ dɔ'wʋʋ,

ɔ lɛ naa:

«Mɛnɩnɔɔ Lagɔ 'zʋä ‑lɛ a ‑nyɔɔ 'sɔ a jijo'wʋʋ,

wʋ dluu muä dɛ'ɛ.»^a

21 Ɔ gbää sa'a 'wëë,

Lagɔgligbëa ‑nyɛ Lagɔbʋbɔlibhoo a ‑lii 'wuë 'sɔ,

'n ɔ yiɛ dluu 'wʋ 'mlɩ.

22 Moyizɩ 'a Gböö a dɔ'wʋ,

‑li a ‑mi wa'a pälanɩɛ dlu 'mö 'wlɩlɩɩ,

yɩ'ɩɛ ‑zu,

‑maa 'nyinylolii a gbʋʋ 'kä nɩkpɛ ‑gömö 'bhöö a dɔ'wʋ,

'n dlu 'nɩ sɛ 'sulo 'wëë,

Lagɔ 'naa 'kʋ 'yi 'tatinɩ.

Kliisɩ mɔɔ bʋbɔnɩɛ ɔnyɩ Lagɔ nɩkpa a 'nyinylolii a za

23 Mä'ä dʋdʋ 'wʋ a ‑li 'la,

‑yɩ glɩnɩɛ ‑mä ghäyɩ 'wʋ a ‑nɩɩ a dɩdlɛnaa,

wa kä a wa 'kɩ ‑sɩbhä 'wlɩlɩ päla.

Miɛ abhlɩ,

‑maa yɩ ‑gbaabhï ‑yɩ ‑wʋä ‑mä ghäyɩ 'wʋʋ,

yɩ 'wlɩlɩpälasaa kä a 'kä tenyii dɛsɛ ‑kä,

a 'kä mä'ä dʋdʋ 'wʋ a ‑naa 'wʋ zi.

24 'Lɩlɩlɩ a dɔ'wʋ,

Kliisɩ,

Lagɔgligbë a ‑ma nɩkpa 'sɩbhää,

‑a glɩnɩɛ ‑mä ghäyɩ 'wʋ a ‑naa a dɩdlɛnaa,

‑mä a 'mö,

‑mä ɔ'ɔɔ mö,

‑maa ‑mä Lagɔ yɔwʋ a'bhë,

‑mä ɔ möä,

ɔ 'kɔ ‑aa za 'wlu gäla.

25 Zwiiföwaa 'a Lagɔbʋbɔwa 'kädɩɩ,

sɛɛ 'ylʋba yiɛ,

‑sɩbhä wa möä ‑mä 'wa Lagɔgligbëa 'mö nɩmadlu Lagɔ bʋbɔnɩɛ.

‑Maa Kliisɩ ɔbhlɩ,

ɔ möä ‑mä Lagɔ yɔwʋʋ,

ɔnyɩgäsɛ 'a dluu 'mö ɔ ‑suä.

Ɛ'ɛ ‑bhö ɔ 'kɔ ɔnyɩ ‑bɛ 'wʋ bʋbɔnɩ a za.

26 Ɛ ‑kä a ‑sɩbhä,

tɛɛnɩ ‑mä 'pɩwʋ a tɛɛnɩdɛ 'mö,

'kwädlɩ ɔ 'kä a‑a 'klɩ 'yɩ ɔ 'kä 'ku 'yize.

‑Maa ‑a'a 'tɛnyɩ ‑mɛ nɩ ‑ɛ glɩnɩɛ 'pɩwʋ a 'gbëbhlenɩtɛnyɩɩ,

ɛ 'mö ‑mä ɔ 'wlʋnɩɛ 'yli,

'n ɔ yiɛ ɔnyɩ 'wʋ ‑bhlʋ ‑kpöö Lagɔ bʋbɔnɩ.

Sa'a ‑sɩbhä ɔ bhɩa 'nyinylolii a gbʋʋ 'yli.

27 Sɛɛ nɩkpa 'wuë 'kunɩɛ 'wʋ ‑bhlʋ ‑kpöö,

‑wa ‑kä 'ku 'wëë,

'n Lagɔ 'a ‑zijle 'kädaa ‑kʋnuëë,

28 ‑sɩbhä Kliisɩ bʋbɔnɩɛ ɔnyɩ 'wʋ ‑bhlʋ Lagɔ,

ɔ 'kä nɩkpa a bäbätɛ 'wa 'nyinylolii a gbʋʋ ‑gömö ‑sɛ.

‑Maa 'ylɩ ‑bhlʋ 'mö ɔ yi 'wʋ 'sɔ mä'ä dʋdʋ 'wʋ yinɩ.

Ɔ ‑kä yii,

ɛ'ɛ ‑bhöa'a nɩkpa a 'nyinyloli a gbʋgömösɛza,

‑maa ‑wa ‑kʋnɩɛ 'ɔ yiyee,

ɔ 'kʋä puë a za,

nza ɔ 'kää yi.