Ebleewaa 8

Zezwii mɔɔ glɩnɩɛ ‑a'a Lagɔbʋbɔnyɔ 'kɔdɔɔ

Wɛlɩɩ 'wuë n cɛlanyɩɛ dɛ'ɛ 'wʋʋ,

yɩ kïbhëa ‑a kää tenyii dɛsɛ ma‑a nɩɩ:

Sa'a a Lagɔbʋbɔnyɔ 'kɔdɔɔ ‑a kää.

‑Mä ghäyɩ 'wʋ,

‑Alowli Lagɔ ‑ɔ 'kämanɩ ‑lii 'wuë ‑gömöö,

'ɔ 'nglɩmöklikpëa a luukɛ 'wʋ,

‑mä ɔ möä sɛ glɩɛ.

2 'Ɔ Lagɔbʋbɔlibhoo ɔ nʋä,

‑tiamö a Lagɔgligbëa ‑a ‑wʋä ‑mä ghäyɩ 'wʋ,

Lagɔ a'bhë 'sɩbhää,

‑mä a 'mö,

‑mä ɔ nʋnuä,

‑maa Lagɔgligbë a ‑ma nɩkpa 'sɩbhä 'mö,

‑mä ɔ 'nuä nʋnɩ.

3 ‑A ‑yi sɛ nɩɩ,

‑a'a mä'ä dʋdʋ 'wʋ a Lagɔbʋbɔwa 'kädɩɩ,

wa 'kä Lagɔ nɩma ‑nyɛ 'nyɛnyɛli ‑mimii 'sɔ bʋbɔnɩ,

nza wa ‑wʋä ‑lɛ.

Sɛ ‑bhʋlʋ ‑kpɔ 'la,

'saa Zezwii 'kä'ɛɛ ɔbhlɩ Lagɔ bʋbɔnɩɩ,

wʋ kä wʋ 'kä ‑bhölɩ.

4 'N Zezwii ‑kä a mä'ä dʋdʋkpäta 'wʋ glɩɩ,

ɔ 'naa 'kä a Lagɔbʋbɔnyɔ 'zʋ.

Ɛ'ɛ ‑bhö nyɩasɛ,

‑maa Lagɔbʋbɔwa ‑wʋ mä'ä dʋdʋ 'wʋ,

sɛɛ Moyizɩ 'a Gböö gbää wa nɩ bʋbɔ Lagɔɔ,

mʋa bʋbɔɔ ‑sɩbhä.

5 Wabhlɩ,

'wa Lagɔgligbëa wa nʋnɩɛ 'wa libhoo 'möö,

Moyizɩ 'ka a‑a 'sɩbhää yii,

sɛ'ɛ Lagɔ 'nyɔ a‑a 'dɩ nɩɩ:

«Moyizɩ,

‑pʋnɩ 'yukwli.

Lagɔgligbëa n gbää 'sɩbhää,

sɛ n nyɩamö a‑a ‑mä Sinayii a ‑gägaa 'wlu 'dɩɩ,

‑sɩbhä ‑n nɩ 'sɩbha 'tɩɩ.»^a

Mɩɩ sɛɛ zɛmö nɩɩ,

Lagɔgligbëa Moyizɩ 'sɩbhää,

a ‑nyɛ Lagɔbʋbɔlibhoo ‑wʋnyɩ dɛ Moyizɩ 'a Gböö bhïlaa 'sɔ,

‑mä ghäyɩ 'wʋ a ‑nɩɩ a dɩdlɛna a 'yize yɩ glɩnɩɛ,

‑maa ɛ'ɛ ‑bhö yɩ ‑gbaabhï mi.

6 Nza n gbää nɩɩ,

Zezwii 'a Lagɔbʋbɔlibhoo ɔ nʋä,

mʋʋ kää dɛsɛ mʋʋ ziɛ bhla'mö a Lagɔbʋbɔwaa a ‑nʋʋ 'wʋ.

Ɔ za Lagɔ ‑nyɛ nɩkpa 'sɔ mɛnɩnɩa'aa ‑tiamö.

Mɛnɩnɔluluu,

mʋʋ kää dɛsɛ mʋʋ ziɛ bhla'mö a ‑nʋʋ 'wʋ.

Ɛ'ɛ ‑bhö nyɩasɛ,

‑maa 'saa Lagɔ gbää ɔ yi ɔ ‑nʋa ‑mä mɛnɩnɔlulu 'la 'mö 'nyɛɛ,

mʋʋ kää dɛsɛ mʋʋ ziɛ Tɛkämɛnɩnɔɔ 'mö a 'saa ɔ gbää ɔ 'kʋä 'nyɛ 'wʋ.

7 'N Tɛkämɛnɩnɔɔ 'nɩ a 'klʋkpamösɛsʋ 'mö ‑kä,

Lagɔ 'naa 'kä a ‑mumuu wʋ 'bhle 'mö zʋ.

8 ‑Maa 'klʋkpamösɛsʋ 'la a za,

'lʋnɩ ɔ 'lʋnuëë 'n ɔ yiɛ wa dɛ nɩɩ:

'Tɛnyɩ ‑mɛmɛɛ yi ghlɛ,

Yizlaɛlɩ 'a ‑gligbii ‑nyɛ Zwidaa 'a ‑gligbii 'sɔ,

n ‑nyʋä yi 'wʋ 'sɔ mɛnɩnɩ.

9 Mɛnɩnɔlulu 'la,

wʋ 'naa 'kä Tɛkämɛnɩnɔɔ a saa ‑wʋ.

Ɛ'ɛ ‑bhö nyɩasɛ,

‑maa ‑zlɩ n 'libhï a‑a wa dɩbawa 'wʋ,

'n n yuë a‑a ‑mä Ezipötɩ‑bhölɩɩ 'mö galɛ 'mö ‑sɛɛ,

ɛ mɛnɩnɔɔ n ‑nyʋä mɛnɩnɩ a‑a,

'klʋkpamö wa ‑sʋʋä.

‑Sɩbhä a za n ‑sʋä'ɛɛ na a kɛ'mö.

‑Amö wa ‑lowli Lagɔ,

‑amöö gbää ‑sɩbhä.

10 Ylɩ 'la ‑kä 'plɩ 'wë a mɛnɩnɔɔ n ‑nyɛ Yizlaɛlɩ a ‑nʋa 'kää mɛnɩnɩɩ,

muä dɛ'ɛ:

N yuë 'nɛɛnɔ 'nyɛ wa 'käa sasɛ 'na wɛlɩɩ yɩbhlɩnɩ,

na'bhë,

‑mä n 'kɩɛ wa dila zɛmö 'cɛlɩ.

‑Lɛ a dɔ'wʋ,

n yi ‑tiamö wa ‑Lowli glɩnɩ,

wa yi'ɛ wabhlɩ ‑tiamö na ‑nʋä glɩnɩ.

11 Wa gla'mö a ‑nɔ ‑bhlʋ a'bhë,

ɔ 'naa 'käa'a ɔ 'lilɛ sʋlʋnɩ nɩɩ:

Yɩbhlɩnɩ ‑Alowli Lagɔ.

Ɛ'ɛ ‑bhö nyɩasɛ,

‑maa wa 'wuë,

'yuë oo,

'kädɩ oo,

wa ‑yii sasɛ ‑yi.

12 Wa ‑saa abhlɩ ‑tiamö 'klʋkpamö,

‑maa n yi wa ngäzɩdlɩ 'pä,

n 'naa 'kä 'wa 'nyinylolii 'wʋ ligbanɩ.^b

13 Lagɔ ‑kä sa'a mɛnɩnɔlulu a dɛ bhïlaa,

mɩɩ sɛɛ zɛmö nɩɩ,

Tɛkämɛnɩnɔɔ,

ɔ kʋ sɩɛka 'wʋ 'zʋa.

‑Lu a ‑mu wa 'zʋaa sɩɛka 'wʋʋ,

wʋ yɛ gɔ,

zaa,

'yli wʋ 'kää bhɩɛ.