Ebleewaa 4

Miɛ abhlɩ da'a,

‑maa wɛlɩɩ Lagɔ bhïla a‑a bhla'mö nɩɩ,

ɔ yi ɔ ‑nʋä ‑tiamö a 'tɩɩglɩglɛ 'nyɛɛ,

yɩ kä ‑bhlɛ zɩ'ɛ ‑aa dɔ'wʋ dɛsɛ 'yize.

‑Sɩbhä a za,

‑a 'wuë,

a‑a nɩ 'nɛmanɩ ‑anyɩ 'wʋ,

‑aa gla'mö a ‑nɔ ‑bhlʋ a'bhë tɩa 'yio 'wʋ tʋʋ,

ɔ tɩa ‑lɛ a 'tɩɩglɩglɛ 'la 'mö bɔ.

2 Sɛɛ Lagɔ nyɩanyɩɛ zɩ'ɛ 'ɔ 'Mänatɩtɩɩ,

‑sɩbhä ɔ 'nyɩ a‑a ‑aa dɩbawa a dɩbawa,

‑maa 'fʋ wa ‑pʋnii a‑a 'yukwli,

wa 'niɛ a dlɩ 'tɛɛnɩ,

nza wa bɔ a‑a 'tɩɩglɩglɛ 'la 'mö.

3 ‑Maa ‑abhʋa ‑abhlɩ,

‑abhʋaa 'tɛɛnɩɛ Lagɔ dlɩɩ,

‑tiamö a 'tɩɩglɩglɛ 'la,

‑a ye ghlɩ.

'Tɩɩglɩglɛ 'la a dɔ'wʋ,

Lagɔ lɛ naa:

'N n yiɛ 'klɛ 'pä,

'n n yiɛ zligo nɩɩ:

Bhlɩɩ n gbä a‑a n 'kʋä 'nyɛ,

mä wa 'kää ‑tiamö a 'tɩɩglɩglɛ 'mö ‑wʋnɩɩ,

wa 'naa 'kɛa'a 'mö plɛmö.^a

Miɛ abhlɩ,

‑maa sɛɛ Lagɔ 'maa 'kä a 'yɛ 'pɩwʋ a ‑lii 'wuë ‑bhɛ 'wëë,

'tɩɩglɩglɛ ‑bhölɩ 'kwädlɩ ‑mä ɔ yɔwʋ.

4 Dɛ ‑mämaa a dɔ'wʋ,

sɛ'ɛ Lagɔwɛlɩɩ nʋä nɩɩ:

'Ylɩ ngbi'sɔzlɩɩ 'mö,

Lagɔ,

‑gwlɛnɩ ɔ ‑gwlɛnɩɛ.^b

5 Sɛ'ɛ Lagɔwɛlɩɩ nʋ'ɛɛ nɩɩ:

Bhlɩɩ n gbä a‑a n 'kʋä 'nyɛ,

mä wa 'kää ‑tiamö a 'tɩɩglɩglɛ 'mö ‑wʋnɩɩ,

wa 'naa 'kɛa'a 'mö plɛ 'lɩlɩlɩ.^c

6 ‑Wa 'nʋ a‑a tɛɛ 'Mänatɩtɩ 'la,

'wa sɛ wa 'niɛ dlɩ 'tɛɛnɩ a za,

wa'aa ‑mä 'tɩɩglɩglɛ 'la 'mö plɛ.

‑Sɩbhä yɩ ‑wʋ 'mö,

‑maa ‑mumuë yi wabhlɩ ‑mä plɛ.

7 Nza Lagɔ 'nyʋää 'tɛnyɩ ‑mɛmɛɛ,

'mö ɔ laa «zɩ'ɛ a zlɩ nɩ 'mö.»

‑Lɛ yɛ ‑mä gwälɛ 'wë,

'n Lagɔ yiɛ Daviidɩ 'mö bhïlanɩ nɩɩ:

Zɩ'ɛ a zlɩ nɩ 'mö,

a ‑kä 'na bhïlawɛlɩɩ 'nʋʋ,

a nɩ tɩ 'a dilaa 'mö 'tumanɩ.^d

8 'Lɩlɩlɩ a dɔ'wʋ,

'n Zozwie ‑kä a Yizlaɛɛlɩ a ngëyii ‑tiamö a 'tɩɩglɩglɛ 'nyɛɛ,

Lagɔ 'naa 'kä a ylɩ ‑mɛmɛɛ a dɛ bhïlaa.

9 Mɩɩ sɛɛ zɛmö nɩɩ,

‑gwlɛnɩzlɩ ‑mɛmɛɛ Lagɔ ‑sɛɛ ‑lɛ 'ɔ yuëa a za‑a,

ɛ ‑bhölɩ.

10 Ɛ'ɛ ‑bhö nyɩasɛ,

‑maa ‑ɔ ‑kä ‑mä Lagɔ 'a 'tɩɩglɩglɛɛ 'mö plɛɛ,

sɛɛ Lagɔ nʋä 'libho 'n ɔ yiɛ nyɛpɛɛ,

libho 'la ɔ nʋ a‑a,

ɔ yu kɛ'mö ‑sɛ ɔ yi ‑sɩbhä nyɛpɛmö.

11 ‑Sɩbhä a za,

‑a 'wuë,

a‑a nɩ 'tɛmanɩ 'yli yɔwʋ ‑a 'käa 'tɩɩglɩglɛ 'la ghlɩ.

‑Aa gla'mö a ‑nɔ ‑bhlʋ a'bhë nɩ tɩ ‑muë'la a saa Lagɔ 'a dlɩtɛɛnɩtɛnɛ kɛ'mö ‑sɛ,

ɔ tɩa wa saa 'yio 'wʋ tʋʋ.

12 Ɛ'ɛ ‑bhö nyɩasɛ,

‑maa Lagɔwɛlɩɩ,

‑bhölɩbhölɩwɛlɩɛ 'n yɩ kää 'mötɛɛnɔ.

Yɩ ‑plɛ yɩ zi 'yilasɔkägbälɛ 'wʋ.

Dlɩɩ ‑nyɛ 'wugɔmʋʋ 'sɔ a jijo'wʋ,

‑lɛ yɩ plɛ.

Nɩmaa a gönasaa,

‑sɩbhä yɩ plɛ'ɛɛ.

Yɩ dɩ kwaa 'mö 'n yɩ ghlɩɛ kwaa 'mö a claa.

Nɩkpɛ a nʋnʋlii ‑nyɛ 'ɔ dlɩpäsaa 'wuë 'sɔ,

'mö yɩ pää 'pɩwʋ.

13 Lagɔ ‑ɔ nyɛɛ nɩkpa 'ɔ wɛlɩɩ,

‑lu ‑bhlʋ a'bhë 'nɔɔ 'ylimö zizaanɩ.

'Ɔ ‑bhɛbhɛlii 'wuë gbëdanguu yɩ pöä ɔ 'yila 'klʋ,

sɛ yɩ ‑wʋä 'tɩɩ,

ɔ ‑yii ‑sɩbhä bhʋlʋbhlʋ.

Mɔɔ ‑kanyɩɛ 'ylɩ ‑bhlʋ 'mö ‑a'a zɩkpaa 'wuë 'wʋ 'yɩbhänɩ.

Zezwii mɔɔ glɩnɩɛ Lagɔbʋbɔnyɔ 'kɔdɔɔ

14 ‑A kä Lagɔbʋbɔnyɔ 'kɔdɔ.

‑Mä ghäyɩ 'wʋ,

Lagɔ dlɩ 'mö a'bhë ‑mä ɔ möä.

Mɔɔ Lagɔ 'a Yuu Zezwii mɔ.

Wɛlɩ 'la,

a 'tɛɛnɩɛ dlɩ,

a nyɛɛ nɩkpaa,

a nɩ 'tɛmanɩ 'yli yɔwʋ,

sɛ yɩ gbää a 'kä ‑sɩbhä nɛmö.

15 Ɛ'ɛ ‑bhö nyɩasɛ,

‑maa ‑a'a Lagɔbʋbɔnyɔ 'kɔdɔ 'la,

nɩkpɛ a ‑mɔ ‑ɔɔɔ ‑aa yɔlɔylʋ ‑yii,

'mö ɔ 'nɩɛ glɩnɩ.

‑Aa saa,

mäpäpʋ a kii 'wuë ghïlo,

‑maa ɔ'ɔɔ ɔbhlɩ tɛkäsɛ 'nyinyloli nʋ 'lɩlɩlɩ.

16 Zaa,

dlɩ'wʋkänɔ 'mö,

a‑a nɩ 'dionɩ ‑lɛ Lagɔ 'a 'nglɩmöklikpëa yɔwʋ,

‑lɛ ‑wawʋʋ ‑wʋä,

nzɩɩ ɔ 'kä ‑aa ngäzɩdlɩ 'pä,

‑a ‑kä yɔlɔylʋ 'mö ‑wʋʋ,

ɔ ‑kanyɩ 'wʋ yi.