Ebleewaa 5

‑A'a 'kwädlɩ a Lagɔbʋbɔwa 'kädɩɩ,

nɩkpaa 'wuë a sɛ a nɩkpa wa glɩnɩmöä.

Wa ‑kä 'kwädlɩ Lagɔbʋbɔnyɔ 'kɔdɔ ‑sɛɛ,

ɔ 'kä Lagɔ a 'yila 'klʋ nɩkpa a 'wlumö bhïla,

nza wa sɔɔ.

Ɔ ‑su 'nyɛnyɛli,

ɔ ‑su bʋbɔnɩli,

'n ɔ möä Lagɔ 'wlu gälaa.

2 Ɔ'bhë nɩkpɛ ɔ glɩnɩɛ,

ɔ nʋmö 'nyinyloli zaa ɔ 'bhɩa ‑kä 'nyinyloli 'mö bhlinɩɩ,

ɔ yi 'mö 'nʋ,

wa ngäzɩ yo 'lɩbhä.

3 Sɛ ɔ glɩnɩɛ ɔ'bhë 'nyinylolinʋnyɔ a za,

ɔ ‑kä Lagɔ ‑li bʋbɔnɩɛ mö,

ɔ 'kɔ nɩkpabhë a 'nyinylolii a za yɔwʋ bhibhee,

ɔ'bhë ɔ kä ɔ 'kä ɔ ‑nɩ ‑sumö.

4 Nɩkpɛ 'nɩɛ ‑zɩ ɔnyɩ Lagɔbʋbɔnyɔ 'kɔdɔ 'wʋ 'zʋa.

‑Maa Lagɔ a'bhë mɔɔ sɔɔ ‑lɛ.

‑Sɩbhä ɔ ‑sɛ a‑a Aghlɔɔ.

5 Kliisɩ,

‑sɩbhä ɔ ‑wʋmöä.

Ɔnyɩgäsɛ mɔɔ 'nɩɛ ɔnyɩ 'ghlimanɩ ɔ 'kä ɔnyɩ Lagɔbʋbɔnyɔ 'kɔdɔɔ 'wʋ 'zʋa.

‑Maa Lagɔ a'bhë mɔɔ ‑sɔɔɔ ‑lɛ.

Sɛ'ɛ ɔ 'nyɔɔ 'ylɩ ‑bhlʋ 'mö 'dɩ nɩɩ:

‑Nmöö glɩnɩɛ 'na Yuu,

Tɛɛnɩ zɩ'ɛ dɛ'ɛ,

‑amöö glɩnɩɛ ‑na dɩba.^a

6 'N ɔ yi'ɛɛ ɔ dɛ nɩɩ:

Mɛlɩkisedɛkö a sɛ a Lagɔbʋbɔnyɔ‑n 'kää 'kwädlɩkwädlɩnɩ glɩnɩ.^b

7 Dɛɛ Zezwii ‑wʋ a‑a mä'ä dʋdʋ 'wʋʋ,

ɔ ‑yi a sɛ nɩɩ,

Lagɔ bhɛnɩ ɔ 'kɔ 'kwie ngli ‑sɛ.

Zaa,

'n ɔ yoo bhibhe,

'n ɔ yoo ngäzɩsɛ 'mö 'winɩ tenyii,

'n 'mɩɔ yoo 'ylimö ghlɛ.

'Ɔ Lagɔ a 'klʋkpamözʋzwɛɛ a za,

Lagɔ nglu 'ɔ bhibhewɛlɩɩ 'wʋ.

8 Zezwii,

Lagɔ 'a Yuu 'mö ɔ glɩnɩɛ abhlɩ ‑tiamö,

‑maa klɩɩ 'wuë ɔ 'yɩɛ 'mö,

‑mä ɔ 'cɩɛnɩɛ Lagɔ 'a 'klʋkpamözʋzwɛɛ.

9 Sɛ ɔ bhɩɛ Lagɔ 'a 'klʋkpamözʋzwɛɛ 'wuë zɛmö 'tɩɩ,

‑sɩbhä ma‑a kää 'nglɩ nza ɔ bhɛnɩɛ ɔ 'kä nɩkpa 'wuë ‑wa zoo 'klʋkpamö puë,

wa 'kä 'kwädlɩ ‑bhölɩ.

10 Nza Lagɔ 'zoo'ɛɛ Mɛlɩkisedɛkö a sɛ a Lagɔbʋbɔnyɔ 'kɔdɔ 'wʋ.

A‑a nɩ ‑jɩbhɛ Lagɔsɛ

11 Wɛlɩ 'la,

'mö yɩ ‑zuä tenyii.

N 'kanyi zɛmö ‑sɛnɩ a 'kɩ 'mö 'nʋ a dɔ'wʋ,

'mö yɩ 'tɛɛ.

Ɛ'ɛ ‑bhö nyɩasɛ,

‑maa a'a 'nʋ ‑li 'mö ‑pa.

12 Abhʋaa 'käa'ɛ ‑sɩkaa Lagɔwɛlɩɩ a 'cɩawa glɩnɩɩ,

Lagɔwɛlɩɩ a tɛkäkïbhïï wa cɩɛɛ tɛɛ,

a 'niɛ ‑bhlɛ sasɛ ‑yi 'yize.

Lilea 'kädɩɩ liɛ,

sɛɛ 'yuë 'nɩɛ bhɛnɩ wa 'ka li 'n wa nyɛ'ɛ lɩbhʋ a 'yizee,

‑sɩbhä a ‑wʋä ‑bhlɛ Lagɔ 'a wɛlɩɩ 'mö a dɔ'wʋ.

13 Sɛ'ɛ n gbää nɩɩ,

'yuë 'pɩpɩɩ,

mʋa nyɛɛ lɩbhʋ a 'yize,

'saa zlɔnɩɛ 'mö a dɔ'wʋ,

wa'aa 'nɛɛnɔ ‑kä.

14 ‑Maa 'kädɩɩ,

'mö wa nyɛɛ 'wʋtɛɛlilee.

'Kädɩ 'la,

‑mä nʋnʋlii 'mö mʋa cɩɛɛ ‑mii nɛnɩɛ 'n ‑mii 'nɩɛ nɛnɩ.