Ebleewaa 3

Zezwii mɔɔ 'ghïliɛ mɔɔ ziɛ Moyizɩ 'wʋ

‑Sɩbhä a za,

Lagɔdaayuënyɩ,

abhʋa Lagɔ wäzɩmöä,

ɔ ‑nʋä a glɩnɩɛ,

zaa Zezwii 'mö a nɩ yɩlɩ 'klʋ,

'mö Lagɔ tieanyɩɛ 'wʋ,

mɔɔ 'zʋä a za Lagɔbʋbɔnyɔ 'kɔdɔɔ,

'mö a 'tɛɛnɩɛ dlɩ.

2 Libhoo ‑wʋnyɩɩza Lagɔ ‑sɔɔ,

ɔ nu sasɛ Moyizɩ a saa.

Sɛ'ɛ yɩ cɛlɩɛ Moyizɩ a dɛ nɩɩ:

Libhoo Lagɔ 'nyɔɔ ‑mä 'ɔ ‑buduu 'wuë 'möö,

ɔ nu sasɛ 'tɩɩ^a.

3 ‑Maa wa 'sɔɔ a dɔ'wʋ,

Zezwii mɔɔ 'ghïliɛ mɔɔ ziɛ Moyizɩ 'wʋ.

Nyɩasɛ n'n‑ä sɩbhä gbä ‑maa,

nɩkpɛ ‑kä ‑budu 'sɩbhää,

'ɔ nglɩɩ mɩɩ möä tenyii 'n yɩ ziɛ ‑buduu a ‑nɩɩ 'wʋʋ.

4 ‑A'bhï ‑a ‑yi sɛ nɩɩ ‑budu kä 'sɩbhänyɔ,

‑maa ‑lii 'wuë a 'wälanyɔ,

Lagɔ mɔɔ.

5 Moyizɩ ɔblɩ,

libhoo Lagɔ gbä a‑a ɔ nɩ nʋ ‑mä 'ɔ ‑buduu 'wuë 'möö,

'yliwʋnyɔ a sɛ ɔ nuë sasɛ,

nzɩɩ 'ɔ nʋnʋlii 'kä ‑lii yɩ 'kää bhäla 'yli 'wlʋnɩ a dɛ bhïla.

6 ‑Maa Kliisɩ ɔbhlɩ,

Lagɔ 'a Yuu 'mö ɔ glɩnɩɛ.

'Mö Lagɔ 'zʋaa ‑buduu a ‑gömökämanɩnyɔ 'wʋ,

'n ɔ yiɛ ‑mä wʋ 'mö sasɛ libho nʋ.

Zaa,

'n ‑aa dila ‑kä 'wʋ 'tɛɛ,

a‑a ‑kɔɔ 'mänasɛ dlɩ 'tɛɛnɩ ‑këë ‑mä 'gbë ‑wʋʋ,

Lagɔ 'a ‑budu 'la,

‑abhʋaa.

Lagɔ yi 'ylɩ ‑bhlʋ 'mö ɔ ‑nʋa 'tɩɩglɩglɛ 'nyɛ

7 ‑Sɩbhä a za 'Wugɔmʋʋ 'Wlɩlɩ gbä a‑a nɩɩ:

Zɩ'ɛ a zlɩ nɩ 'mö,

a ‑kä Lagɔ 'a bhïlawɛlɩɩ 'nʋʋ,

8 sɛɛ a dɩbawa a dɩbawa ‑pälɔɔ a‑a 'klɛ 'mö ‑mä 'muse 'klʋʋ,

a nɩ tɩ ‑sɩbhä 'a dilaa 'mö 'tumanɩ.

Lagɔ lɛ naa:

9 'mö wa yɛla a‑a,

'n ‑maa 'saa n nʋa wa dɛ 'ylʋbö a gwlɩ 'sɔ 'möö,

wa yu 'ylɩmö.

10 ‑Sɩbhä a za dlɩɩ ylinɩɩɛ 'mlɩ,

'n n yiɛ nɩɩ,

'wa dlɩpäsaa 'zokwë a 'yize a glɩnɩɛ,

wa'aa 'na 'yioo bhli.

11 Zaa,

'n n yiɛ 'klɛ 'pä,

'n n yiɛ zligo nɩɩ:

Bhlɩɩ n gbä a‑a n 'kʋä 'nyɛ,

mä wa 'kää ‑tiamö a 'tɩɩglɩglɛ 'mö ‑wʋnɩɩ,

wa 'naa 'kɛa'a 'mö plɛmö.^b

12 ‑Atʋayuënyɩ,

a nɩ 'nɛmanɩ anyɩ 'wʋ,

a gla'mö a ‑nɔ ‑bhlʋ a'bhë tɩa 'ɔ dlɩ 'mö 'tumanɩ,

ɔ tɩa Lagɔ a dlɩtɛɛnɩtɛnɛ kɛ'mö ‑sɛ,

yɩ toa Lagɔ ‑ɔ ‑bhölɩ a 'yio 'wʋ ‑sɛ.

13 ‑Maa sɛɛ zila zɩɛ 'yize,

a nɩ 'päpänɩ swɩ nyɛmʋ 'mö,

bhälɛ wa nʋä ‑bhlɛ zɩ'ɛ a zlɩ nɩ 'mö,

nzɩɩ a gla'mö ‑nɔ ‑bhlʋ a'bhë 'nyinyloli toa dula ɔ tɩa 'ɔ dlɩɩ 'mö 'tumanɩ.

14 Nyɩasɛ n'n‑ä ‑sɩbhä gbä ‑maa,

dlɩ'wʋkänɔɔ ‑a kä a‑a tɛkädɔ'wʋʋ,

a‑a ‑kʋʋ ‑su ‑këë ‑a ‑kä ‑mä 'gbë 'wʋ ghlɛɛ,

Kliisɩ mö ‑a ‑glɛɛ 'wʋ.

15 Lagɔwɛlɩɩ lɛ naa:

Zɩ'ɛ a zlɩ nɩ 'mö,

a ‑kä 'ɔ bhïlawɛlɩɩ 'nʋʋ,

sɛɛ a dɩbawa a dɩbawa ‑sɔɔ a‑a 'klʋkpamöö,

a nɩ tɩ ‑sɩbhä 'a dilaa 'mö 'tumanɩ.^c

16 ‑Maa nɩkpa 'la ‑wa 'nʋ a‑a Lagɔ 'a bhïlawɛlɩɩ 'wë ‑wa ‑sɔɔ a‑a 'klʋkpamöö,

a'bhï a ‑yuë.

Nɩkpaa Moyizɩ ‑gänɩ a‑a 'yuku 'n wa yi a‑a ‑mä Ezipötɩ galɛ 'mö 'wlʋʋ,

wa 'wuë muëë.

17 Nɩkpaa Lagɔ 'pänɩɛ a‑a 'klɛ yɔwʋ 'ylʋbö a gwlɩ 'sɔ 'möö,

a ‑yuë.

Nɩkpaa ‑wa nʋ a‑a 'nyinyloli,

'n wa yi a‑a ‑mä 'muse 'klʋ 'kunɩɩ,

muëë.

18 Lagɔ zligo a‑a nɩɩ,

bhlɩɩ n gbä a‑a n 'kʋä 'nyɛ,

mä wa 'kää ‑tiamö a 'tɩɩglɩglɛ 'mö ‑wʋnɩ,

wa 'naa 'kɛa'a 'mö plɛmöö,

‑muë ɔ gaa a bhä 'nɩ?

‑Wa ‑sɔɔ a‑a 'klʋkpamö 'mö ɔ gaa a‑a.

19 ‑Atʋayuënyɩ,

‑a 'kää 'mö 'nʋʋ,

miɛ nɩɩ,

'wa sɛ wa'a a‑a Lagɔ dlɩ 'tɛɛnɩɩ,

‑sɩbhä ma‑a kää 'nglɩ,

bhlɩɩ Lagɔ gbä a‑a ɔ 'kʋä 'nyɛ,

mä wa 'kää ‑tiamö a 'tɩɩglɩglɛ 'mö ‑wʋnɩɩ,

'n wa 'nɛɛ 'mö plɛmö.