Ebleewaa 2

'Pʋpʋɛ Lagɔ nyɩanyɩɛ 'ghïli ɛ 'ghïliɛ

Sa'a ‑sɩbhä Zezwii 'ghïliɛ.

‑Sɩbhä a za wɛlɩɩ ɔ nyɩanyɩɛ,

a‑a nɩ nyɔnwi kɛ,

‑a tɩa 'kwlɛ bhli.

2 Bhla'mö a dɔ'wʋ,

Lagɔ 'a wɛlɩɩ 'ɔ zuzukuu 'nyɛ a‑a nɩkpaa^a,

dɛsɛ yɩ kä a‑a tenyii zaa,

nɩkpaa ‑wa 'ni a‑a 'yukwli ‑pʋnɩ,

‑wa ‑sɩɩ a‑a 'klʋkpamöö,

'wa 'klʋkpamösɛsʋ a 'pɛna,

'mö Lagɔ 'nyʋä a‑a.

3 ‑Sɩkaa a dɔ'wʋ,

'ɔ 'pʋpʋɛɛ a wɛlɩɩ,

‑Alowli Zezwii a'bhë mɔɔ ‑nyɩɩ yiɛ tɛɛ.

Nɩkpaa ɔ 'nyɩɛ,

‑wa ngwliɛ 'wʋʋ,

mʋa nyɩanyɩɛ 'dɩ nɩɩ,

dlɩ'wʋkäwɛlɩɛ,

zaa dɛsɛ yɩ kää tenyii.

‑Sɩbhä a za,

‑a 'ni 'klʋkpamö zʋʋ,

Lagɔ ‑yinyɩ ‑a'a 'klʋkpamösɛsʋ a 'pɛna 'nyɛ.

4 ‑Wa ‑lɛmöä Lagɔ 'a 'pʋpʋɛ a wɛlɩ 'laa,

Lagɔ a'bhë mɔɔ 'nyʋää 'ɔ 'mötɛɛnɔɔ,

'n wa yiɛ zɩzɛli a 'ki a ‑bɛ nʋ.

'Wugɔmʋʋ 'Wlɩlɩ a 'nyupälɩɩ a kii 'wuë,

sɛɛ 'ɔ dlɩɩ 'yɩbhää,

'n ɔ yi'ɛɛ ‑sɩbhä ɔ ‑nʋa bhʋlʋbhlʋ 'wʋ ghäla.

Sa'a ‑sɩbhä ɔ 'zʋä 'wa bhïlawɛlɩɩ kɛ ‑gömö nɩɩ,

‑tiawɛlɩɛ.

‑Ɔ kwää nɩkpa 'pʋpʋɛ 'wʋʋ

5 Lagɔ 'a 'pɩwʋlelea ‑a ‑gää nimï ‑anyɩɩ dɛ ‑a ‑wʋä dɛ'ɛ bhïla dɔ'wʋʋ,

Lagɔzuzukuu 'mö Lagɔ 'nɩɛ a ‑gömökämanɩwa 'wʋ 'zʋa.

6 Nyɩasɛ n'n‑ä ‑sɩbhä gbä,

‑maa ‑mä Lagɔbɔgʋʋ 'mö,

sɛ'ɛ yɩ cɛlɩɛ ‑mä nɩɩ:

'Saa nɩkpɛ glɩnɩ bhä 'n ‑na dlɩ bhlinɩ bhä ɔ dɛ 'nɩ?

'Saa nɩkpɛgwälɩyu glɩnɩ bhä n‑n 'zʋnɔ bhä sa'a 'yli 'nɩ?

7 Ɔ ‑nyɛ Lagɔzuzukuu 'sɔ a dɔ'wʋ,

dʋdʋ wʋ ‑n ‑lɛmɔɔ

ɔ 'kä yɩ dɔ'wʋ 'tɛnyɩke 'mö 'tikëyii glɩnɩ.

Ɛ 'plɩɛ 'wëë,

n‑n yoo 'zʋ,

n‑n yoo 'nglɩ 'kädɩ 'nyɛ.

8 ‑Nmö 'zuoo ‑lii 'wuë a ‑gömökämanɩnyɔ 'wʋ.^b

Sa'a yɩ cɛlɩɛ ‑mä.

Wa ‑kä nɩɩ mɔɔ 'kämanɩɛ 'pɩwʋ a ‑lii 'wuë ‑gömö nʋʋ,

mɩɩ sɛɛ zɛmö nɩɩ,

‑lu ‑bhlʋ a'bhë ‑wʋ 'naa 'kɔɔ 'klʋkpamö zʋʋ,

wʋ'ʋä ‑bhölɩ.

Miɛ abhlɩ,

‑maa ‑a ‑kä mä'ä 'pɩwʋ a ‑lii 'wʋ yɩlɩɩ,

sɛɛ Zezwii 'kämanɩɛ ‑tiamö yɩ 'wuë ‑gömöö,

‑aaa ‑bhlɛ sasɛ ‑sɩbhä 'ylimö 'ylɩmönɩ.

9 ‑Maa ‑a ‑yi sɛ nɩɩ,

Zezwii,

Lagɔ zoo Lagɔzuzukuu a dɔ'wʋ 'tɛnyɩke 'mö 'tikëyi 'wʋ 'wëë,

'wʋ ɔ 'libhoo 'n ɔ yiɛ ‑mä ɔ yɔwʋ ɔ 'nglɩ 'ghlimanɩ tenyii.

Nyɩasɛ Lagɔ 'nɩɛ ‑sɩbhä 'zʋ,

‑maa Zezwii,

nɩkpaa 'wuë a 'wlumö 'klɩ ɔ 'yɩɛ tenyii 'n ɔ yiɛ 'ku.

Sɛɛ Lagɔ kää nɩkpaa 'wuë a ngäzɩdlɩ a za,

nza Zezwii 'kuä wa 'wlumö.

10 'Pɩwʋ a ‑lii 'wuë,

Lagɔ mɔɔ ‑bhɩɩɛ,

ɔ za yɩ ‑bhölɩɛ.

Zaa,

ɔ yɩbhä nɩkpabhë nɩ 'zʋ ɔ yuë wa ‑nyɔɔ 'kä ‑mä 'ɔ 'pɩwʋlelea 'wʋ ‑wʋmö.

‑Sɩbhä a za,

Zezwii 'mö ɔ ‑sɛɛ ‑lɛ ɔ 'kä wa 'yukuga glɩnɩ,

ɔ za wa 'kää ‑mä ghlɛ.

‑Maa Zezwii 'kä ‑tiamö a Puënyɔ 'zʋ a dɔ'wʋ,

ɔ kä a ɔ 'kä 'zwɩ a ‑bɛ zi.

11 Mɔɔ ‑sɛɛ nɩkpa 'wa 'nyinylolii a gbʋʋ ‑gömö,

'n wa yiɛ 'wlɩlɩ plɛ.

‑Maa ɔ ‑nyɛ ‑muë ɔ pälaa 'wlɩlɩ 'sɔ,

dɩbaa ‑bhʋlʋ ‑kpɔ 'mö wa ‑gbɔɔ 'wʋ.

‑Sɩbhä a za,

ɔ 'kʋä ɔ ‑daayuë la a dɔ'wʋ,

zʋ 'nɔɔ 'lɩbhä.

12 Ɔ'bhë,

sɛ'ɛ ɔ nʋä nɩɩ:

‑Atʋ Lagɔ,

'saa ‑n glɩnɩɛ 'tɩɩ,

n yi yɩ 'dɩ na ‑daayuë 'nyɛ.

‑Na ‑nʋa 'wuë a 'yila 'klʋ,

n ‑yimö 'mö bhlɩnɩ.^c

13 'N ɔ yi'ɛɛ nɩɩ:

‑Nmö Lagɔ,

‑nmö n 'kää 'kwädlɩnɩ dlɩ 'tɛɛnɩ.

'N ɔ yi'ɛɛ nɩɩ:

‑Amöä dɛ'ɛ,

n ‑nyɛ yuëa Lagɔ nyɩaaa yowʋ 'sɔ.^d

14 ‑Maa yuë 'la a saa,

mä'ä dʋdʋ 'wʋ a nɩkpɛ ɔ 'zʋä.

Nzɩɩ,

'ɔ kwiea 'mö,

'mötɛɛnɔɔ Sataa ‑sunɩɛ 'kwie 'möö,

ɔ 'kʋ 'yli bhɩa,

15 ɔ 'kä'ɛ nɩkpa 'kwie a nganɔ ku 'mö ‑sɛ.

Ɛ'ɛ ‑bhö nyɩasɛ,

‑maa sɛɛ gïyi ‑ngänɩ'ɛ ɔ 'bhidɩbaa,

‑sɩbhä nɩkpaa guä ‑mä 'wa zɩkpaa 'wuë 'mö 'kwie.

16 ‑Muë ɔ yiɛ sa'a 'wʋʋ,

ɛ'ɛ ‑bhö Lagɔzuzukuu mi,

‑maa mä'ä dʋdʋ 'wʋ a nɩkpaa,

Ablaamö 'a yuëa a yuëa muëë.

17 Mä'ä dʋdʋ 'wʋ a nɩkpa 'la ‑wa glɩnɩɛ ɔ ‑daayuëë,

ɔ 'kʋä puë a dɔ'wʋ,

sɛ wa ‑wʋä 'tɩɩ,

ɔ kä a ɔ 'kä ‑sɩbhä ‑wʋ,

nza ɔ 'zʋä wa sɛ a nɩkpɛ,

'n wa ngäzɩ yoo tenyii 'lɩbhä,

'n ɔ yiɛ Lagɔbʋbɔnyɔ 'kɔdɔɔ a ‑mɔ wa 'kä dlɩ 'tɛɛnɩ 'zʋ,

Lagɔ 'kä ɔ za 'wa 'nyinylolii a gbʋʋ 'yi 'tatinɩ.

18 Ɔ'bhë ɔ 'yɩ a 'klɩ a ‑bɛ,

‑mäpäpʋ a ‑bɛ ghïlo a.

Zaa,

‑mäpäpʋ ‑kanyɩ ghlɩɩ,

ɔ bhɛnɩ ɔ ‑kanyɩ 'wʋ yi.