1 Timotee 2

A nɩ bhibhee nɩkpa 'wuë a 'wlumö

‑Lii 'wuë 'mö a dɔ'wʋ,

'dɩmözʋwɛlɩɩ ‑yɩ kää tenyii dɛsɛ,

n nyɛɛ Zezwii a ‑nʋa 'wuë,

miɛ nɩɩ:

'Saa a ‑kä nɩkpaa 'wuë a dɔ'wʋ 'yɩbhää,

a nɩ 'nyɛ Lagɔ yɩ 'dɩ.

A nɩ bhibheoo 'kwädlɩ,

a 'kɔ wa 'wuë a 'wlumö ‑bɛlɩ 'pä.

A ‑kä ‑sɩbhä 'zʋ dɔ'wʋ ‑wʋʋ,

a nɩ bhälɔɔ 'gämö 'ɔ kɛgänɔɔ a za.

2 'Bhlɩlowluwa 'kädɩɩ,

'kämanɩwaa 'wuë,

a nɩ bhibhe wa 'wlumö,

nzɩɩ bhlɩɩ wa 'kämanɩɛ ‑gömöö,

ɛ 'kä 'tɩɩglɩglɛ 'mö ‑kä,

‑a 'kä ‑pälɛpälɛ ‑lɛ glɩ,

‑a 'kä 'kwädlɩ Lagɔ bʋbɔ,

'saa zlɔnɩɛ 'möö,

‑a 'kʋ nʋ.

3 ‑Sɩbhä ma‑a nɛnɩɛ.

‑Aa Puënyɔɔ Lagɔ,

‑sɩbhä ma‑a nɛnɔɔ dlɩ yɔwʋ.

4 'Ɔ 'saa ɔ yɩbhää,

miɛ nɩɩ,

nɩkpaa 'wuë wa nɩ ghlɩ 'ɔ 'pʋpʋɛɛ,

wa nɩ yɩbhlɩnɩ 'ɔ ‑tiamö a wɛlɩɩ ‑yɩ glɩnɩɛ gbëaa a 'yizee.

5 ‑A ‑yi sɛ nɩɩ,

Lagɔ,

ɔ ‑bhli ‑bhlʋ ‑kpöö.

‑Ɔ kää 'nglɩ 'n nɩkpaa 'wuë ‑nyɛ Lagɔ 'sɔ wa 'kää wamanɩɩ,

ɔ ‑bhli'ɛ ɔbhlɩ ‑bhlʋ ‑kpöö.

Zezwii Kliisɩ ‑ɔ 'zʋä ‑aa sɛ a nɩkpɛ mɔɔ.

6 Mɔɔ 'wlʋä ɔnyɩ 'mö,

'n ɔ yiɛ 'bhlɩbhëa 'wuë zeti.

Sa'a ‑sɩbhä ɔ tulanɩɛ 'ylimö nɩɩ,

Lagɔ yɩbhä ‑tiamö ɔ 'kä nɩkpaa 'wuë puë.

Wɛlɩ 'la,

'tɛnyɩ Lagɔ ‑dɩ a‑a,

ɛ ghlɛɛ 'n yɩ yiɛ 'yli 'wlʋnɩ.

7 Yɩ biabialibhoo,

'mö Lagɔ nyɩaaa,

'n ɔ ‑yiiɛ ɔ tietienyɔ 'wʋ 'zʋa.

N ‑kä sa'a nʋʋ,

‑tiawɛlɩ n bhïlaa,

n'n‑ä yio ‑kä.

Lagɔ 'a wɛlɩɩ ‑yɩ ‑wʋä gbëaa 'mö,

nɩkpaa 'wuë kää wa 'kä dlɩ 'wʋ ‑kää,

yɩ 'cɩanyɔ n glɩnɩɛ ‑mä ‑waaa Zwiiföwa glɩnɩ jijo'wʋ.

Zezwii a ‑nʋa 'a 'wluyɩbhäyɩbhʋʋ a dɔ'wʋ sɛ'ɛ Pɔɔlʋ 'zʋëë 'dɩ 'mö

8 ‑Gwlɩɩ 'wuë ‑gömö,

Zezwii a ‑nʋa ‑kä 'wlu 'yɩbhää,

nyɩbhɛlɩɩ,

mʋa nɩ bhibhe Lagɔ.

'Wa kätɩkpöö wa pää ghäyɩ 'n wa bhibhee Lagɔ,

wa nɩ ti 'nyinyloli 'mö nʋnɩ.

Wa nɩ tɩ 'lʋlʋwa glɩnɩ,

wa nɩ tɩ 'klɛkäwa glɩnɩ.

9 Wa gla'mö a ngwlɩɩ,

sɛ'ɛ n nyʋää 'dɩ nɩɩ:

Wa ‑kä 'mö pälaa,

'wa 'möpälalii,

yɩ nɩ tɩ nɩkpa 'klʋ 'mö 'kpëakpëanɩ,

yɩ nɩ tɩ zʋ 'wʋ ‑bhö.

‑Mä 'wa 'möpälasaa ‑nyɛ 'wa nyukuu a 'wlugïganɩsaa 'sɔ 'mö,

wa nɩ tɩ 'yila sɛ tɛlɩ.

Bɔlɔbɔlɔlii a kii 'wuë,

yɩ ‑nyɛ 'pɛlʋtɛɛloku 'sɔ,

wa nɩ ti 'mö pälamö.

10 ‑Maa ‑li a ‑li 'mö wa nɩ nʋ,

nglwɩɩ ‑wa zʋä Lagɔ 'klʋkpamö a saa.

11 Wa ‑kä Lagɔwɛlɩɩ bhïlaa,

ngwlɩɩ nɩ ‑wʋ vlɩɩ wa 'kä 'yukwli ‑pʋnɩ,

wa nɩ 'zʋ nyɩbhɛlɩɩ 'klʋkpamö 'tɩɩ.

12 Zezwii a ‑nʋa ‑kä 'wlu 'yɩbhä wa 'kä Lagɔwɛlɩɩ 'yukwli ‑pʋnɩɩ,

n'n‑ä 'yɩbhä 'nglɔ nɩ 'cɩɩ.

'Nglɔ nɩ tɩ nyɩbhɛlʋ ‑gömö 'kämanɩ.

13 'Lɩlɩlɩ a dɔ'wʋ,

Adaa 'mö Lagɔ ‑bhɛɛ 'wë 'n ɔ yia'aa bhäla ɔ 'lɛnglɛ Ɛɛvö ‑bhɛ.

14 Lagɔ ‑bhɩʋää 'wëë,

Adaa 'mö Sataa 'nɩɛ dula,

‑maa Ɛɛvö 'mö ɔ dulaa,

mɔɔ ‑sɛɛ Lagɔ 'a bhïlawɛlɩɩ 'klʋkpamö.

15 ‑Sɩbhä yɩ ‑wʋ 'mö,

‑maa 'nglɔ,

'ɔ dlɩtɛɛnɩtɛnɛɛ ‑nyɛ ‑wawʋʋ 'sɔ,

ɔ 'ni kɛ'mö ‑sɛ,

ɔ 'nɩ ɔnyɩ 'kɔdɔ 'mö 'wʋ 'libhï,

sɛɛ nɛnɩɛ Lagɔ dlɩ yɔwʋ,

ɔ ‑kä ‑sɩbhä nɛmöö,

Lagɔ yo puë 'yugwälɩza.