1 Timotee 3

Zezwii a ‑nʋa a 'yukugänɩwaa a wɛlɩɩ

Wa ‑kä nɩɩ,

Zezwii a ‑nʋa a ‑zɩkpa a 'yukugänɩtʋ ‑kä nɩkpɛ 'lɩbhä,

libho a ‑libho ɔ yɩbhää nʋʋ,

‑tiamöä.

2 ‑Maa ‑ɔ glɩnɩɛ Zezwii a ‑nʋa a 'yukugänɩnyɔɔ,

ɔ nɩ glɩnɩ nɩkpɛ a ‑mɔ ‑ɔɔɔ ‑maa yɔwʋ ‑kä.

Ɔ nɩ kä 'nglɔ ‑bhlʋ ‑kpöö,

ɔ nɩ ‑yi 'ɔ dlɩɩ a 'wʋ ‑pɩɛnɩ sɛ,

ɔ nɩ 'nɛɛ,

nɩkpɛ a ‑mɔɔ ‑ɔɔ nyimaa ɔnyɩ a 'nglɩɩ,

'mö ɔ nɩ glɩnɩ.

Ɔ nɩ päla sasɛ lowluwa,

ɔ nɩ ‑yi Lagɔwɛlɩɩ a 'cɩasɛ.

3 Ɔ nɩ tɩ nʋnɩmänyɔ glɩnɩ,

ɔ nɩ tɩ ‑glakänyɔ glɩnɩ.

'Ɔ dlɩɩ nɩ ‑wʋ ‑pälɛpälɛ nɩkpaa 'wuë ‑gömö,

ɔ nɩ tɩ 'lʋlʋnyɔ glɩnɩ.

Moni a 'tʋ nɩ to 'wlumö ‑sunɩ.

4 Ɔ nɩ glɩnɩ 'ligbëlowli a ‑nɔ a ‑nɔ,

‑ɔ ‑yiɛ sasɛ ɔ ‑nʋa a ‑susɛ.

'Ɔ yuëa nɩ 'zo ‑lɛ,

wa 'nɩ 'zʋ 'klʋkpamö.

5 Ɛ'ɛ ‑bhö nyɩasɛ,

‑maa nɩkpɛ 'nɩ ɔ ‑nʋa a ‑susɛ ‑yii,

ɔ'ɔɔ bhɛnɩ ɔ 'kä Lagɔ a ‑nʋa a ‑zɩkpa a 'ylizʋnɩsɛ ‑yi.

6 Nɩkpɛ a ‑mɔɔ 'zʋä 'lilili 'wʋ Zezwii a ‑nɔɔ,

ɔ nɩ tɩ 'yukugänɩnyɔ 'zʋ bhabhʋ toa sɛ bhlɩ,

Lagɔ toa Sataa a saa gbʋ köbha.

7 ‑Ɔ ‑gänɩɛ Zezwii a ‑nʋa 'yukuu,

'ɔ nɛmönɛmösaa nɩ kä 'nglɩ,

‑waaa Zezwii a ‑nʋä glɩnɩ,

wa 'kä ɔ 'dɩ a dɩ ‑sɛ,

wa toa 'ylimö fälanɩ,

Sataa toa ‑kälɛ 'mö 'pä.

Ngäzɩwaa a 'yliwʋlibhoo a wɛlɩɩ

8 ‑Wa kää ‑mä Zezwii a ‑nʋa jijo'wʋ ngäzɩwaa a 'yliwʋlibhoo,

wa nɩ nʋmö'ɛ wabhlɩ 'klʋkpamözʋli,

wa nɩ glɩnɩ nɩkpa a ‑muë wa 'kä dlɩ 'wʋ ‑kä.

Wa nɩ tɩ nʋnɩmäwa glɩnɩ,

wa nɩ tɩ moni ‑bi 'mö linɩ.

9 ‑Tiamö a wɛlɩɩ Lagɔ kälɩnɩnyɩɛ kɛ 'klʋʋ,

wa nɩ kɩ dlɩ 'wʋ 'tɩɩ,

yɩ dɔ'wʋ 'wa dilaa nɩ tɩ 'mö ‑dlinɩ.

10 Wa ‑kʋä libho 'la 'nyɛɛ yii,

wa nɩ yɩlɩ sasɛ 'wa nɛmönɛmösaa 'wʋ 'wë,

wa 'nɩ ‑maa yɔwʋ ‑kä,

wa 'käa'a bhäla ngäzɩwaa a 'yliwʋlibho 'la nʋ.

11 'Ngwlɩ a ‑muë wa zʋ 'klʋkpamö,

'mö 'wa ngwlɩɩ nɩ glɩnɩ.

Wa nɩ tɩ 'ngwlɩ a ‑muë bhïla 'zokwësɛ glɩnɩ,

wa nɩ ‑känɩ wanyɩ kpämɩɔ,

‑mä ‑lii 'wuë 'mö a dɔ'wʋ,

wa nɩ glɩnɩ 'ngwlɩ a ‑muë wa 'kä dlɩ 'wʋ ‑kä.

12 Nɩkpɛ a ‑mɔɔ kää ngäzɩwaa a 'yliwʋlibhoo,

ɔ nɩ kä 'nglɔ ‑bhlʋ ‑kpöö.

Ɔ nɩ ‑yi 'ɔ yuëa ‑nyɛ 'ɔ 'ligbëa 'mö a ‑lii 'wuë 'sɔ a ‑susɛ.

13 Ngäzɩwaa a 'yliwʋnyɔɔ,

ɔ ‑kä sasɛ 'ɔ libho nʋʋ,

nɩkpa yo tenyii 'zʋ,

‑lɛ a dɔ'wʋ,

Zezwii Kliisɩ a dlɩtɛɛnɩtɛnɛ a wɛlɩɩ,

ɔ yi 'mänasɛ bhïla.

Wɛlɩ a ‑wɛlɩɩ Lagɔ kälɩnɩnyɩɛ kɛ 'klʋʋ

14 Timotee,

wɛlɩ 'wuë 'mö n cɛlɩmöä abhlɩ dɛ'ɛ 'wʋ,

‑maa n kɩ dlɩ 'wʋ nɩɩ,

na'bhë n ‑yimöa'a ‑pa 'ylɩmöä yi.

15 ‑Maa 'n n 'nɩ ‑pa yii,

Lagɔgligbëa ‑a glɩnɩɛ Zezwii a ‑nʋa a ‑zɩkpaa,

a 'yila 'klʋ sɛ ‑n kää ‑n 'kä nɛmöö,

'bɔgʋ nɩ mʋʋ ‑kamöä ‑sɩbhä sʋlʋnɩ.

‑Abhʋaa ‑gänɩɛ Zezwii 'a wɛlɩɩ,

Lagɔ ‑ɔ ‑bhölɩ mɔɔ glɩnɩɛ ‑Alowli.

'Ɔ ‑tiamö a wɛlɩɩ,

‑abhʋa ɔ ‑nʋa 'wuë ‑abhʋa ɔ 'nyɩɛ,

‑a 'kɩ 'wʋ gwɩ.

16 ‑Tiamö,

wɛlɩ Lagɔ kälɩnɩnyɩɛ kɛ 'klʋ ‑a kää dlɩ 'wʋʋ,

yɩ'ɩɛ ‑sɩbhä a sɛ ‑wʋ.

Sɛ'ɛ yɩ nʋä Zezwii Kliisɩ a dɛ nɩɩ:

‑Aa sɛ a nɩkpɛ ɔ 'zʋä,

'n ɔ yiɛ mä'ä dʋdʋ 'wʋ yi.

'Wugɔmʋʋ 'Wlɩlɩ lɛ naa,

mɔɔ nɛnɩɛ Lagɔ dlɩ yɔwʋ.

Lagɔzuzukuu 'yɩ ɔ 'ghïlinɔɔ 'ylɩmö.

Ngäya 'wuë gla'mö,

wa bia ‑mä ɔ 'dɩ,

mä'ä 'pɩwʋ,

'n wa 'tɛɛnɔɔ dlɩ.

‑Mä ghäyɩ 'wʋ,

'n wa yiɛ ɔ 'nglɩ 'ghlimanɩ.