Libhoo Pɔɔlʋ nʋä ‑mä Tesaloniikö
2
‑Atʋayuënyɩ,
a'bhï a ‑yi sɛ nɩɩ,
fʋ ‑aa ‑mä 'a mä'a yi.
2 A ‑yi'ɛ sɛ nɩɩ,
‑mä Filiipö glɔ 'mö,
wa ‑kanyɩ nɛpɔ,
wa ‑kanyɩ 'zwɩ zia 'wë,
a‑a yiɛ ‑mä 'a ‑glɔɔ 'mö ghlɛ.
‑A ghlɛɛ ‑mä,
‑a'a libhoo ‑a nʋä,
nɩkpa a ‑bɛ yɩbhä a wa 'kʋ ‑kplikpli 'yli klɛnɩ.
‑Maa ‑sɩbhä yɩ ‑wʋ 'mö 'n Lagɔ ‑yinyɩɛ swɩ nyɛmʋ 'mö 'pä,
a‑a yeanyɩɛ 'ɔ 'Mänatɩtɩɩ 'nyɛ.
3 Wɛlɩɩ ‑a nyɛɛ nɩkpaa,
yiowɛlɩ a ‑mii nɩkpa sɛ 'wlumö 'mö yɩ 'nɩɛ glɩnɩ.
‑A ‑kɩɩ bhïla dɔ'wʋ ‑wʋʋ,
'zokwësɛ ‑aaa dlɩ 'pä,
nɩkpa ‑aaa ylʋ nʋ.
4 ‑Maa Lagɔ a'bhë ɔ ‑yi sɛ nɩɩ,
‑a bhɛnɩ,
nza ɔ tieanyɩɛ ‑a 'kä 'ɔ 'Mänatɩtɩɩ bia.
Zaa,
‑a ‑kɩɩ bhïla dɔ'wʋ ‑wʋʋ,
nɩkpa ‑kanyɩ bhɩzɩ mö ‑a 'nɩɛ sɛ tɛlɩ,
‑maa Lagɔ ‑ɔ ‑yiɛ ‑a'a 'mlɩ a dilaa,
‑a 'kɔ dlɩ yɔwʋ nɛnɩ mö ‑a tɛlɩɛ sɛ.
5 A'bhï a ‑yi sɛ nɩɩ,
wɛlɩɩ a ‑mii mɛnɩɛ ‑yɩ 'kanyɩɛ ‑lu 'mö ‑sɛɛ,
mö ‑a 'nanyɩɛ 'nyɛ.
Lagɔ 'a libhoo ‑a nʋä,
moni a 'tʋ a za ‑a 'nuä nʋ.
Ɔ'bhë ɔ ‑yii ‑sɩbhä.
6 Ɛ yi abhʋa oo,
ɛ yi käbönɩkpa oo,
a gla'mö a nɩkpɛ ‑bhlʋ a'bhë 'kä ‑aa 'nglɩ 'ghlimanɩ,
mö ‑a 'nɩɛ'ɛ sɛ tɛlɩ.
7 'Lɩlɩlɩ a dɔ'wʋ,
‑a yi a nɩɩ,
Kliisɩ a tietiewa ‑a glɩnɩɛ zaa,
‑a kä a ‑a 'kanyɩ 'kämanɩsɛ ‑su nʋ,
‑maa ‑aaa ‑sɩbhä 'zʋ.
‑Maa dɛɛ ‑a ‑wʋ a‑a ‑ma a jijo'wʋʋ,
dlɩ wʋ ‑a yɔnɩ a‑a.
Sɛɛ gwanglɔ 'zʋnɩ'ɛ ɔ 'yu 'ylii,
‑sɩbhä ‑a 'zʋnanyɩ a‑a 'yli.
8 Sɛ ‑a ‑waanyɩɛ tenyii a za,
‑a 'kanyɩ Lagɔ 'a 'Mänatɩtɩɩ 'nyɛ a 'yize mö ‑a 'nɩɛ a 'wʋ nglu,
‑maa ɛ ‑kä a 'yɛ nɩɩ,
‑a 'kä a 'wlumö 'ku a'bhë ma ‑kë,
‑a yi a 'yɛ 'wʋ nglu.
‑Tiamö,
dlɩsɛ a ‑kanyɩɛ tenyii.
9 ‑Atʋayuënyɩ,
sɛ ‑a yɔlɔɔ Lagɔ 'a libhoo a za‑a,
a'bhï a ‑yi ‑sɩbhä.
Dɛ ‑a ‑wʋ a‑a ‑mä 'a mä'a,
a‑a nyanyɩ a‑a Lagɔ 'a 'Mänatɩtɩɩ,
‑a tɩa a gla'mö a ‑nɔ ‑bhlʋ a'bhë a 'gblukwë glɩnɩ a za,
‑anyɩgäsɛ ‑a'a kätɩkpöö mö ‑a libhï a‑a 'wʋ,
ɛ yi sabʋ oo,
ɛ yi zlɩgä oo,
a‑a nʋ a‑a libho.
10 Abhʋaa ngluä 'ɔ wɛlɩɩ 'wʋʋ,
‑a'a sɛ ‑a nɛmöä ‑mä a jijo'wʋʋ,
a ‑yi ‑sɩbhä.
A yi sɛ nɩɩ,
tɩɩ ‑a nɛmöä,
‑a'a nɛmönɛmösaa ‑sɩbhä 'mö a zlɔnɩɛ,
‑sɩbhä 'nɩɛ ‑maa yɔwʋ ‑kä.
Lagɔ a'bhë,
ɔ ‑yimö'ɛ ‑sɩbhä sɛ.
11 A ‑yi'ɛ sɛ nɩɩ,
sɛɛ nɩkpɛ 'zʋnɩ'ɛ ɔ 'yuë 'ylii,
a 'wuë,
bhʋlʋbhlʋ ‑sɩbhä ‑a 'zʋnanyɩɛ 'yli.
12 ‑A 'zʋanyɩ 'dɩ 'mö,
‑a 'panyɩ swɩ nyɛmʋ 'mö,
‑a 'titilanyɩ kä'mö nɩɩ,
Lagɔ mɔɔ ‑saanyɩɛ ‑lɛ a 'kä ɔ ‑nʋä glɩnɩ ɔ 'kanyɩ ‑gömö 'kämanɩ,
a 'kä 'ɔ 'ghïlinɔɔ 'ylɩmö.
Zaa,
sɛɛ ‑ngwaa ɔ ‑nʋa 'wʋʋ,
a nɩ nɛmö ‑sɩbhä.
13 'Saa kä'ɛ 'nglɩ a‑a bhälɩɛ 'kwädlɩ a za Lagɔ miɛ nɩɩ:
Lagɔwɛlɩɩ ‑a 'nyanyɩɛ,
a 'niɛ nɩkpɛ a 'wlumösɛwɛlɩ 'mö 'wʋ 'libhï,
‑maa sɛ yɩ glɩnɩɛ ‑tiamö Lagɔ 'a wɛlɩɩ,
‑sɩbhä a 'libhiɛ 'wʋ 'n a yiɛ 'wʋ nglu,
nza yɩ nʋa'aa ‑mä 'a dilaa zɛmö libho.
14 ‑Atʋayuënyɩ,
a ‑kä ‑sɩkaa Lagɔ 'a wɛlɩɩ a za 'klɩ 'yɩ dɔ'wʋ ‑wʋʋ,
ɔ ‑nʋa a ‑zɩkpö ‑yɩ ‑wʋä ‑mä Zwidee‑bhölɩɩ 'mö,
'saa ghli a‑a,
mɩɩ ghlɩmanyɩɛ da'a.
Miɛ nɩɩ,
sɛ wa glɩnɩɛ Zezwii Kliisɩ a ‑nʋä a za,
sɛɛ wa 'bhɩa Zwiiföwaa a'bhï ziuë a‑a 'zwɩɩ,
‑sɩbhä a 'bhele a ‑nʋa ziamanyɩɛ da'a 'zwɩ.
15 Zwiiföwaa mʋa 'lɩbhää ‑Alowli Zezwii,
mʋa 'lɩbhä'ɛɛ Lagɔ 'a bhla'mö a 'möbhïlanɩwaa,
mʋa zianyɩ'ɛɛ 'zwɩ.
'Wa sɛ wa zʋä da'a a za,
wa'aa Lagɔ dlɩ yɔwʋ nɛnɩ.
'Bhlɩbhëa 'wuë 'mö wa ‑gblɩɛ.
16 Wa yɩbhä wa ‑kanyɩ ‑kplikpli 'yli klɛnɩ,
Lagɔ 'a wɛlɩɩ ‑yɩ lɛmöä nɩkpɛ Lagɔ 'a 'pʋpʋɛ 'wʋʋ,
‑a tia ‑waaa Zwiiföwa glɩnɩ 'nyɛmö.
Wa ‑nyɛ wa dɩbawa 'sɔ,
'wa ‑lizokuu wa nʋ a‑a 'kwädlɩ 'yize,
sa'a wa yiiɛ 'klʋ.
‑Maa Lagɔ kʋäa'a yɩ gbʋʋ köbhä.
Pɔɔlʋ lɛ Tesaloniikö a ‑nʋa a 'tʋ lɩbhɔ
17 ‑Atʋayuënyɩ,
dɛ ‑a 'bhöanyɩ a‑a yɔwʋʋ,
‑lɛ a 'tɛnyɩ yɛ 'tikïyie 'wʋ 'mö gwälɛ.
‑Maa ‑a 'nanyɩ ‑sɩkaa dɛ'ɛ yɔwʋ ‑wʋ ‑kë,
a ‑glɛ ‑a'a dilaa 'wʋ 'yize.
‑Tiamö,
a 'tʋ lɩbhanyɩ tenyii,
zaa ‑a 'pä a 'kpɔɔ ‑a 'käa 'wʋ 'sɔ ‑mä 'a mä'a yinɩ.
18 ‑A 'wuë ‑a yɩbhä a nyɩasɛ ‑a 'kä ‑mä 'a mä'a yi.
Na'bhë,
n yɛla ‑bɛ 'wʋ ‑li 'mö,
‑maa Sataa mɔɔ klɛnɩnyɩɛ ‑kplikpli 'yli.
19 Miɛ abhlɩ da'a,
‑maa nɩkpaa ‑muë ‑wanyɩɩ za ‑a'a dilaa 'tɛɛ bhä 'wʋ?
‑Wa glɩnɩ bhä ‑a'a 'mänaa?
Abhʋaa.
‑Alowli Zezwii ‑kä zɛla'a mä'ä dʋdʋ 'wʋ 'bɩwʋ yii,
‑lɛ ɔ 'yila 'klʋ,
abhʋaa ‑a 'kää 'mö tɛkpɔnɩ.
20 Nn,
abhʋaa ‑a tɛkpɔnɩɛ 'mö,
abhʋaa glɩnɩɛ ‑a'a 'mänaa.