3
‑Atʋayuënyɩ,
sɛ ‑aa la a 'tɩtɩ 'nʋ 'lɩlɩlɩɩ,
tenyii ‑sɩbhä 'tɛmanɩnyɩ a‑a kɛ'mö.
‑Sɩbhä a za,
n ‑nyɛ Silasɩ 'sɔ,
a‑a yiɛ nɩɩ,
yɩ nɛnɩ ‑a 'kä ‑mä ‑a 'yize Atɛɛnɩ tʋʋ,
2 ‑aa ‑daayu Timotee ‑a ‑nyɛɛ 'sɔ ‑a nʋä Lagɔ 'a libho,
a‑a biaa Kliisɩ 'a 'Mänatɩtɩɩ,
a‑a yeanyɔ a‑a 'wʋ tie nzɩɩ ɔ 'kanyɩ swɩ nyɛmʋ 'mö 'pä,
swɩ 'kanyɩ yɔwʋ plɛ 'a dlɩ'wʋkänɔɔ 'käa nyɔnʋ.
3 Nzɩɩ zwɩɩ 'wuë ‑a ‑wʋä da'a zi dɔ'wʋ a za,
a gla'mö a ‑nɔ ‑bhlʋ a'bhë tɩa Zezwii 'a wɛlɩɩ kɛ'mö ‑sɛ.
A'bhï a ‑yi sɛ nɩɩ,
sa'a a zwɩ 'la Lagɔ 'mö yɩ 'bhöönɩɛ 'mö.
4 Dɛ ‑a ‑wʋ a‑a ‑bhlɛ ‑mä a jijo'wʋʋ,
sɛ'ɛ ‑a 'nyanyɩ a‑a 'dɩ nɩɩ,
‑abhʋa Zezwii a ‑nʋa,
'zwɩ a ‑bɛ wa ‑kanyɩɛ zia.
‑Lɛ a wɛlɩ 'la mɩɩ 'wlʋnɩɛ 'yli,
a'bhï 'mö a 'yɩɛ da'a 'ylɩmö.
5 Sɛ'ɛ n gbää nɩɩ,
sɛ n'n a‑a a 'tɩtɩ 'nʋ 'lɩlɩlɩɩ,
tenyii ‑sɩbhä 'tɛmanɩɩ a‑a kɛ'mö.
'Na dlɩɩ 'mö ɛ ‑ki a‑a tenyii.
N ‑tɔnɩ a nɩɩ Sataa kanyɩ ‑mä 'pä,
a yɛ Zezwii 'a wɛlɩɩ kɛ'mö ‑sɛ.
‑Sɩbhä yɩ ‑kä a ‑wʋ a dɔ'wʋʋ,
'fʋ ‑a yɛ a‑a a dɔ'wʋ yɔlɔ,
nza n tieanyɩɛ Timotee 'wʋ,
a ‑kä sasɛ Lagɔ dlɩ 'tɛɛnɩ 'yize,
ɔ 'kä ‑sɩbhä 'ylɩmö.
Timotee yɛ Pɔɔlʋ Tesaloniikö a ‑nʋa a 'tɩtɩ a ‑tɩtɩ 'nyɛ
6 ‑Maa ‑sɩkaa a dɔ'wʋ,
Timotee yiɛ,
ɔ nyɩanyɩ a 'tɩtɩ a ‑tɩtɩ.
Ɔ lɛ a 'tɛɛnɩ sasɛ Lagɔ dlɩ,
'ɔ ‑wawʋ ‑wʋanyɩ dlɩ zɛmö 'yize,
a paanyɩ 'mänasɛ dlɩ 'wʋ.
Sɛɛ a 'tʋ lɩbhanyɩɛ dɛ'ɛɛ,
ɔ lɛ ‑aa 'tʋ 'lɩbhämanyɩ ‑sɩbhä.
7 ‑Atʋayuënyɩ,
‑a ‑wʋ abhlɩ ‑tiamö yɔlɔylʋ 'mö,
wa 'yɩanyɩ 'klɩ.
‑Maa 'a sɛ a 'tɛɛnɩɛ Zezwii dlɩ 'yize a tɩtɩɩ,
ɔ nyɩanyiɛ,
swɩ nyɛmʋ 'mö yɩ paanyɩɛ.
8 ‑A ‑yia'a ‑sɩkaa sɛ nɩɩ,
‑mä ‑Alowli Zezwii 'a wɛlɩɩ 'mö a dɔ'wʋ,
a ‑nyɔnʋ glu zaa,
‑aa ‑li yɛ nyɛmʋ 'mö yi.
9 'A sɛ a ‑bhönyɩɛ sa'a tenyii 'mäna 'wʋ a za,
‑aaa'a sɛ a'bhë ‑a 'kä Lagɔ 'mö bhälɩmöbhälɩmöä ‑yi.
10 Sɛɛ zlɩ zɩɛ,
sɛɛ swe yluä,
‑sɩbhä ‑a bhibhee Lagɔ tenyii nɩɩ,
ɔ nɩ nglu 'wʋ ‑a 'kä 'wʋ 'sɔ ‑mä a jijo'wʋ yinɩ,
'ɔ wɛlɩɩ ‑yɩ bhïlaa dlɩ'wʋkänɔ a dɛɛ,
a'aa ‑bhlɛ sasɛ yɩbhlɩnɩɩ,
‑a 'kanyi sʋlʋnɩ,
'a dlɩ'wʋkänɔɔ 'kä 'klʋ yie.
11 Sɛ'ɛ n gbää nɩɩ,
‑aa dɩba Lagɔ a'bhë,
ɔ ‑nyɛ ‑Alowli Zezwii 'sɔ,
wa nɩ nyɩanyɩ 'tɛnyɩ ‑a 'kä ‑mä 'a mä'a yi.
12 ‑Alowli nɩ gbä,
abhʋaa Zezwii a ‑nʋa,
sɛ a ‑wawanɩɛ ‑sɩbhä 'kä 'yukusɛ mö.
Sɛ a ‑wamöä nɩkpa 'wuë,
‑sɩbhä 'kä'ɛ 'yukusɛ mö.
13 Ɔ nɩ 'panyɩ swɩ nyɛmʋ 'mö 'yize,
a 'kä ɔ 'yize a ‑nʋä a sɛ nɛmö,
‑lɛ a dɔ'wʋ,
'ɔ yiyizlɩ 'kädɛɛ ‑kä ghlɛɛ,
ɔ ‑nyɛ ɔ ‑nʋa 'wuë ‑wa ‑wʋä ‑mä ɔ yɔwʋ 'sɔ,
wa ‑kä yii,
‑aa dɩba Lagɔ tanyɩa ‑maa yɔwʋ ghlɩ.