1 Tesaloniikö a ‑nʋa 4

Nɛmönɛmösaa sɛɛ nɛnɩɛ Lagɔ dlɩ yɔwʋʋ

‑Atʋayuënyɩ,

kïbhëa ‑a 'kanyɩɛ 'yukwli 'mö tʋʋ ma‑a nɩɩ:

Nɛmönɛmösaa sɛɛ nɛnɩɛ Lagɔ dlɩ yɔwʋʋ,

‑a kanyɩ ‑sɩbhä sʋlʋnɩ,

‑a ‑yi sɛ nɩɩ a nɛmö abhlɩ ‑sɩbhä,

‑maa ‑Alowli Zezwii a 'nglɩ 'mö,

dɩ mö ‑a zʋanyɩɛ dɛ'ɛ nɩɩ,

‑a bhianyɩ,

a nɩ nɛmö 'kwädlɩ ‑sɩbhä,

a nɩ mö 'yukusɛ 'yize.

2 Sɛ'ɛ n gbää nɩɩ,

sɛ a kää a 'kä ‑bhölɩɩ,

‑Alowli Zezwii a 'nglɩ 'mö,

‑a kanyɩ ‑sɩbhä a 'dɩ 'nyɛ 'wë,

a kɩ 'yukwli 'mö.

3 Sɛɛ Lagɔ yɩbhää a dɔ'wʋʋ,

‑sɩbhä ma‑a nɩɩ:

'A nʋnʋlii 'wuë 'mö,

a nɩ nɛmö ɔ 'yize a ‑nʋä a sɛ.

Nglʋwi oo,

nyɩbhɛlʋwi oo,

a nɩ ‑sɩɩ kɛ'mö.

4 Miɛ nɩɩ,

‑nmö nyɩbhɛlʋ,

‑n ‑nyɛ ‑na 'lɛnglɛ 'sɔ,

a ‑kä ‑lɛ ‑wʋʋ,

sɛɛ nɛnɩɛ Lagɔ a 'yila 'klʋ a dɔ'wʋ,

sɛɛ 'nɩɛ zʋ 'wʋ ‑bhöö,

a nɩ yɩbhlɩnɩ ‑sɩbhä.

5 ‑Maa nɩkpaa ‑waaa Lagɔ ‑yi a saa,

‑lii a kii 'wuë a 'tʋzokwëa nɩ tanyɩ 'wlumö ‑sunɩ.

6 A 'wuë,

‑li a 'tʋzokwëa a za a nɩ tɩ 'kpʋkpʋ 'wʋ 'päpänɩ,

a nɩ tɩ ylʋ nʋnʋnɩ.

‑Lɛ a wɛlɩ 'la a dɔ'wʋ ‑a kanyɩ ‑pa 'dɩ 'nyɛ nɩɩ,

nɩkpaa ‑wa nʋä sa'a a ‑li,

Lagɔ yuë yɩ 'pɛna 'nyɛ.

7 Sɛ'ɛ n gbää nɩɩ,

‑lii ‑yɩɩɛ nʋnʋsɛ ‑wʋ,

‑a 'kɩ 'mö ‑bhölɩnɩ a za,

nza Lagɔ ‑nɩnyɩɛ ‑lɛ ‑sɛ,

‑maa ‑a 'kä ɔ 'yize a ‑nʋä a sɛ nɛmö,

nza ɔ ‑sanyɩɛ ‑lɛ.

8 Wɛlɩ nɩ n nyanyɩɛ dɛ'ɛɛ,

‑ɔ ‑kɩɩ kplɩ sɛ tlinɩɩ,

nɩkpɛ a wɛlɩ ɔ'ɔɔ kplɩ sɛ tlinɩ,

‑maa Lagɔ ‑ɔ 'zʋanyɩɛ 'Wugɔmʋʋ 'Wlɩlɩ ‑gömöö,

'ɔ bhïlawɛlɩɩ 'mö ɔ yɛɛ kplɩ sɛ tlinɩ.

9 ‑Atʋayuënyɩ,

sɛ a kää a 'kä ‑wawanɩɩ,

yɩ dɔ'wʋ,

yɩ'ɩɛ dɛsɛ ‑kä ‑a 'kanyɩ 'wʋ 'cɛlɩ.

Ɛ'ɛ ‑bhö nyɩasɛ,

‑maa Lagɔ a'bhë mɔɔ sʋlʋnanyɩɛ ‑sɩbhä.

10 ‑A ‑yi sɛ nɩɩ,

sɛɛ Lagɔ sʋlʋnanyɩɛ da'aa,

a nɛmö ‑sɩbhä.

Zezwii a ‑nʋa 'wuë ‑wa ‑wʋä ‑mä Masedʋanɩ‑bhölɩɩ 'möö,

a ‑wʋä ‑tiasɛ.

Zaa,

‑atʋayuënyɩ,

a nɩ 'zʋ 'kwädlɩ ‑sɩbhä,

a nɩ mö 'yukusɛ.

11 Sɛ a 'kää 'zʋ a 'kä 'kwädlɩ ‑lɛ ‑pälɛpälɛ glɩɩ,

a nɩ tɛlɩ ‑sɩbhä sɛ.

Sɛ ‑a 'nyanyɩ'ɛɛ 'dɩɩ,

a nɩ 'zʋ ‑sɩbhä,

miɛ nɩɩ,

a nɩ tɩ anyɩ a 'bhɩa a gbɩ 'mö 'pä,

a nɩ 'libhï 'a kätɩkpöö 'wʋ a 'kä libho nʋ,

a 'kä anyɩ ‑su,

12 nzɩɩ a tɩa nɩkpɛ a ‑ngowlu 'mö ‑wʋ.

A nɩ 'zʋ sa'a,

‑lɛ a dɔ'wʋ nɩkpaa ‑waaa Zezwii a ‑nʋä glɩnɩɩ,

wa yeanyɩ 'klʋkpamö zʋ.

Lagɔ yi gbä 'kuduwaa yi glu 'wlʋ

13 ‑Atʋayuënyɩ,

‑a 'bhɩa Lagɔgänɩwa ‑muë'la ‑wa yɛɛ 'ku 'wëë,

sɛɛ 'wa wɛlɩɩ 'kää ‑wʋʋ,

‑a yɩbhä a nɩ ‑yi ‑sɩbhä.

‑Lɛ a dɔ'wʋ,

nɩkpa ‑muë'la ‑waaa Zezwii a ‑nʋä glɩnɩ zaa ‑waaa dlɩtɛɛnɩdɛ ‑kää,

swɩ tanyɩa wa saa yɔwʋ 'kunɩ.

14 ‑Abhʋa Zezwii a ‑nʋa,

‑a kɩ dlɩ 'wʋ nɩɩ,

Zezwii 'kuä 'wëë,

Lagɔ gälɔɔ 'n ɔ yoo glu ‑sɛ.

A‑a ‑kɩɩ ‑sɩbhä dlɩ 'wʋ ‑kää,

‑a nɩ kɩ'ɛ dlɩ 'wʋ nɩɩ,

sɛɛ Lagɔ ‑sɔɔɔ da'a gluu,

‑sɩbhä ɔ 'kää zɩla'a nɩkpaa ‑wa 'tɛɛnɩɛ Zezwii dlɩ ‑wa 'kuä glu ‑sɛ.

15 Gluwlʋwlɛ a dɔ'wʋ,

sɛ'ɛ ‑a nyanyɩɛ 'dɩ nɩɩ:

‑Zlɩ Zezwii ‑kä yii,

‑abhʋaa ‑kä ‑bhlɛ ‑gää,

‑a 'naa 'kä ɔ ‑nʋa ‑wa yɛɛ 'ku 'wë 'yuku 'plɩnɩ.

Wɛlɩ 'la,

‑Alowli Zezwii a'bhë a ngli a wɛlɩɛ.

16 ‑Lɛ a zlɩ 'la 'mö,

wɛlɩ 'kädɩ 'kää ‑mä ghäyɩ 'wʋ 'bhöönɩ,

Lagɔzuzukuu a 'kifii 'n ɔ 'kää gbʋ ‑dɩ,

'n Lagɔ 'a lɛglɛɛ 'kää gbä,

'n ‑Alowli Zezwii 'kää ‑mä ghäyɩ 'wʋ 'bhöönɩ.

Yɩ ‑kä sa'a 'wʋ 'plɩ cuu,

Zezwii a ‑nʋa ‑wa 'ku a‑a,

mʋa 'kää glu 'wlʋ tɛɛ.

17 Wa ‑kä ‑sɩbhä glu 'wlʋ 'wëë,

‑abhʋaa 'nɩɛ ‑bhlɛ 'kuu,

‑a ‑nyʋä 'sɔ,

a‑a 'kää 'gämö 'wlu 'libhonɩ,

‑a 'kä ‑mä ghäyɩ 'wʋ ‑Alowli Zezwii gbanɩɛ mö.

Tɛɛnɩa'a da'a ‑mä ‑a 'käa'aa 'kwädlɩ ɔ yɔwʋ ‑wʋ.

18 ‑Atʋayuënyɩ,

wɛlɩ 'la,

a nɩ 'libhi 'wʋ a 'kä swɩ nyɛmʋ 'mö 'päpänɩ.