Tɛkäbɔgʋʋ Pɔɔlʋ 'cɛlɩɛ
Tesaloniikö a ‑nʋa
'wʋʋ
Bhälɩwɛlɩɩ
1
‑Amö Pɔɔlʋ,
n ‑nyɛ Silasɩ 'sɔ,
Timotee kökä,
‑abhʋaa panyɩɛ 'bɔgʋ nɩ 'wʋ.
Abhʋaa glɩnɩɛ ‑aa dɩba Lagɔ ‑nyɛ ‑Alowli Zezwii Kliisɩ 'sɔ a ‑nʋä,
abhʋaa ‑wʋä ‑mä Tesaloniikö glɔ 'möö,
‑a bhälanyɩ.
'Tɩɩglɩglɛ ‑nyɛ 'nyupälɩ 'sɔ nɩ ghlanyɩ 'wʋ.
Pɔɔlʋ bhälɩ Lagɔ Tesaloniikö a ‑nʋa a za
2‑3 ‑A ‑kä 'kwädlɩ ‑aa dɩba Lagɔ bhibhee,
a 'wlumö ‑a bhibhemöä.
A 'wuë a sɛ a 'tɛɛnɩɛ tenyii Zezwii dlɩ 'n a ‑gänɩɛ sasɛ 'ɔ wɛlɩɩ a daa,
‑a'a dilaa pö ‑lɛ 'yize.
Sɛ a ‑waa ‑Alowli Zezwii Kliisɩ 'n a ylɔɔ tenyii 'ɔ libhoo a za,
sɛɛ swɩ 'nɩ 'kunanyɩɛ ɔ ‑kʋnɩkʋnɩ dɔ'wʋ yɔwʋʋ,
yɩ 'wuë a daa,
‑a'a dilaa pö ‑lɛ 'yize.
‑Sɩbhä a za,
‑a bhälɩ Lagɔ.
4 ‑Atʋayuënyɩ,
‑a ‑yi sɛ nɩɩ,
Lagɔ ‑wa ɔ ‑waanyɩɛ tenyii,
mɔɔ ‑saanyɩɛ ‑lɛ a 'kä ɔ ‑nʋä glɩnɩ.
5 Nyɩasɛ n'n‑ä ‑sɩbhä gbä,
‑maa ‑zlɩ ‑a ‑lɛmö a‑a ‑mä 'a mä'a 'ɔ 'Mänatɩtɩɩ,
ɔ'bhë mɔɔ nʋ a‑a 'ɔ libhoo.
Wɛlɩ a 'yize ‑a 'nanyɩɛ a 'nyɛ,
‑maa 'Wugɔmʋʋ 'Wlɩlɩ a 'mötɛɛnɔɔ 'mö ɔ 'zʋ a‑a ‑a'a bhïlawɛlɩɩ ‑gömö,
nza a 'tɛɛniɛ dlɩ.
Dɛ ‑a ‑wʋ a‑a ‑mä a jijo'wʋʋ,
‑a'a 'saa 'wuë ‑a nʋ a‑a,
a'bhï a ‑yi sɛ nɩɩ,
a ‑li a ‑li a 'yize yɩ kää 'mö.
6 A'bhï,
dɛ ‑a 'nyanyɩɛ Lagɔ 'a wɛlɩɩ 'n a yiɛ 'wʋ ngluu,
'klɩ wa 'yɩanyɩɛ tenyii yɩ za,
‑maa ‑sɩbhä yɩ ‑wʋ 'mö,
'Wugɔmʋʋ 'Wlɩlɩ zʋanyɩ 'mäna dlɩ zɛmö 'yize.
A ngluä 'klɩyɩyɛ 'la 'wʋʋ,
‑Alowli Zezwii 'a gbäpöö ‑nyɛ 'na ‑nɩɩ 'sɔ 'mö a ‑gänɩɛ da'a.
7 ‑Sɩbhä a za,
Zezwii a ‑nʋa 'wuë ‑wa ‑wʋä ‑mä Masedʋanɩ‑bhölɩɩ 'möö,
wa ‑nyɛ ‑mä Akayii‑bhölɩɩ 'mö a ‑nʋa 'sɔ,
wa 'wuë a dɔ'wʋ,
Zezwii a ‑nʋä a ‑muë ‑wanyɩ 'gbäpö wa 'kä ‑gänɩ 'mö a glɩnɩɛ.
8 Abhʋaa kää 'nglɩ 'n Lagɔ 'a wɛlɩɩ yiɛ saa 'wuë mlɩmanɩ.
'A sɛ a 'tɛɛnɩɛ Lagɔ dlɩ a tɩtɩɩ,
‑mä Masedʋanɩ‑bhölɩɩ ‑nyɛ Akayii‑bhölɩɩ 'sɔ 'mö a 'yize,
mä wa 'niɛ ‑sɛnɩ.
‑Maa saa 'wuë,
‑sɩbhä wa ‑sɛniɛ.
Zaa,
‑lɛ a tɩtɩ 'la,
‑a'bhï ‑a 'ni ‑sɛ ‑kë,
nɩkpaa 'wuë wa ‑yii.
9 Dɛ ‑a möä ‑mä 'a mä'a sɛ a pälanyɩɛ 'n a ‑yinyɩɛ 'yukwli ‑pʋnɩɩ,
nyɛmʋ a ‑sunyɔ ‑ɔ glɩnɩɛ ɔ 'yize ‑tiamö a Lagɔ,
sɛ a yɩbhlɩnɔɔɔ 'n a yiɛ 'fʋ a ‑lagwɩɩ kɛ'mö ‑sɛ a 'kɔ ɔ 'yize bʋbɔ a za‑a,
‑lɛ a wɛlɩ 'la nɩkpaa 'wuë sɛ yɩ 'dɩ.
10 ‑Sɩkaa a dɔ'wʋ,
ɔ Yowli Zezwii ɔ gälaa 'n ɔ yoo glu ‑sɛɛ,
‑ɔ ‑kanyɩɛ Lagɔ 'a ‑zijle 'kädaa a zlɩɩ ngli 'pʋaa,
'mö a ‑kʋnɩɛ ɔ 'kä ‑mä Lagɔ yɔwʋ 'bhöönɩ.