A nɩ nɛmönɩ ‑mä Lagɔ 'a lɩlɛɛ 'mö
5
Lagɔ a 'yuë a glɩnɩɛ,
‑wa ɔ ‑waanyɩɛ tenyii zaa,
a nɩ 'tɛmanɩ 'mö a 'kä ɔ saa nɩkpa ‑wa.
2 Kliisɩ a saa,
'a nʋnʋlii 'wuë,
a nɩ nʋnii ‑wawʋ 'mö.
'Ɔ sɛ ɔ ‑wanyɩɛ ‑sɩbhä ma‑a nɩɩ,
ɔnyɩ ɔ 'wlʋä 'mö 'n ɔ yiɛ ‑aa 'wlumö 'ku.
Bʋbɔnɩlu a ‑muu nɛnɩɛ Lagɔ dlɩ yɔwʋ,
'mö ɔ 'zʋä 'n ɔ yoo ɔnyɩ bʋbɔnɩ.
3 Sɛ'ɛ n gbää nɩɩ,
Lagɔ a 'yize a ‑nʋä a glɩnɩɛ zaa,
'nglwɩ a ‑sɛsɛnɩsɛsɛnɛ,
nyɩbhɛlɩ a ‑sɛsɛnɩsɛsɛnɛ,
'saa glɩnɩɛ Lagɔ a 'yila 'klʋ a dɔ'wʋ fɩplaplʋ a 'ki 'wuë,
yɩ ‑nyɛ gugwagugu 'sɔ,
yɩ nɩ tɩ ‑mä a jijo'wʋ ‑wʋ 'lɩlɩlɩ.
4 Wɛlɩzoku a kii 'wuë,
välɛvlʋ mu,
‑ɔɔ'nɛɛnɩwɛlɩ mi,
wɛlɩɩ 'wuë ‑yɩɩɛ 'yukwli 'mö ‑ngwaa,
yɩ nɩ tanyɩ ngli ghlɛnɩ 'lɩlɩlɩ,
‑maa Lagɔ 'a bhälɩwɛlɩɩ mii nɩ ghlɛnaanyɩ ngli.
5 A nɩ yɩbhlɩnɩ sɛ nɩɩ,
nyɩbhɛlɩɩ ‑wa sɛsɛnɩɛ ngwlɩɩ,
ngwlɩɩ ‑wa sɛsɛnɩɛ nyɩbhɛlɩɩ,
wa ‑nyɛ gugwagugwawaa 'sɔ,
'pɩwʋ mää Lagɔ ‑nyɛ Kliisɩ 'sɔ wa 'kämanɩɛ,
wa'aa ‑mä 'bhle ‑kä.
‑Atʋayuënyɩ,
gugwagugu,
'fʋ a ‑lagwɩ a bʋbɔbʋbʋ a ke ‑mämaa‑a.
6 Wɛlɩ a ‑mii 'nɩɛ gbëaa 'mö ‑kä,
a nɩ ti 'yukwli ‑pʋnɩ,
yɩ tanyɩa dula.
Ɛ'ɛ ‑bhö nyɩasɛ,
‑maa nɩkpaa ‑waaa 'yɩbhä wa 'kä Lagɔ 'klʋkpamö zʋʋ,
mʋa ‑gänɩɛ sa'a a wɛlɩ.
Yɩ za Lagɔ yuë gbʋ köbha.
7 Sa'a a nɩkpa 'la,
a ‑nyʋä 'sɔ a nɩ tɩ bhʋ ‑bhʋlʋ yɩ 'lɩlɩlɩ.
8 Bhla'mö a dɔ'wʋ,
'yuylukwë 'mö a ‑wʋ a‑a.
‑Maa ‑sɩkaa a dɔ'wʋ,
sɛ a ‑glɛɛ ‑Alowli 'wʋ a za,
lɩlɛ 'mö a ‑wʋa'aa,
zaa a nɩ nɛmö nɩkpa a ‑muë ‑wʋ lɩlɛ 'mö a sɛ.
9 Nɩkpɛ a ‑mɔ Zezwii Kliisɩ nglanɩɛ 'ɔ wɛlɩɩ 'mö 'wʋʋ,
dlɩ zɛmö ɔ nɛmanɩɛ,
'mözlɔnɩli a 'yize ɔ nʋä,
gbëaa a 'yize ɔ kää ngli.
10 Zaa,
'saa nɛnɩɛ Lagɔ dlɩ yɔwʋ 'mö a nɩ tɛlɩ sɛ.
11 ‑Lii ‑yɩɩɛ ‑lu a ‑lu gwë ‑glɛɛ,
wa nʋnɩɛ ‑mä guylukwëa 'möö,
a ‑nyɛ yɩ nʋnʋwaa 'sɔ,
a nɩ tɩ bhʋ ‑bhʋlʋ yɩ.
‑Maa 'a Lagɔsɛ a nɛmönɛmösaa,
‑sɩbhä nɩ kä 'nglɩ,
‑lizoku 'la 'kä 'pɩwʋ 'pɔɔ.
12 Nɩkpa 'la,
'wa ‑lii wa nʋä 'wi 'möö,
zʋ 'wʋ yɩ ‑bhöä tenyii,
yɩ'ɩɛ nglisɛsɛ ‑wʋ.
13 ‑Li 'la 'wuë,
Lagɔ ‑kɩɩ 'wʋ ngälaa,
sɛ yɩ glɩnɩɛ 'zokuu,
‑sɩbhä ma‑a 'yoo 'ylɩmö.
14 'Lɩlɩlɩ a dɔ'wʋ 'saa Lagɔ ngälaa 'wʋʋ,
zɩkpa wʋ bhliɛ.
Nza wa nʋä nɩɩ:
‑Nmöö ngämöä,
gɔlɔ,
‑sɔ ‑mä 'kuduwaa gla'mö 'wʋ,
Kliisɩ ‑kamö 'ɔ lɩlɛɛ 'mö 'wʋ ngälanɩ.a
15 Zaa,
'a nɛmönɛmösaa,
a nɩ 'nɛmanɩ ‑sɩbhä 'wʋ tenyii.
Nɩkpa a ‑muë glɩnɩɛ ‑ɔɔ'nɛɛnɩwaa,
a nɩ tɩ wa saa nɛmö,
‑maa a nɩ nɛmö 'nɛɛnɩwa a sɛ.
16 'Tɛnyɩɩ 'wuë Lagɔ nyanyɩɛ a nɩ tɛ 'yi 'tatinɩ ɛ nɩ tɩ 'fʋ 'plɩ.
Ɛ'ɛ ‑bhö nyɩasɛ,
‑maa zilaa ‑a ‑wʋä dɛ'ɛ 'möö,
'zoku yɩ glɩnɩɛ.
17 'Saa ‑Alowli Lagɔ yɩbhää,
'mö a nɩ yɩbhlɩnɩ a 'kɩ nʋ,
‑maa a nɩ tɩ ‑ɔɔ'nɛɛnɩwa a sɛ nɛmö.
18 A nɩ tɩ anyɩ nʋ 'wʋ lʋa,
wʋ tanyɩa bidibidi ‑su.
‑Maa Lagɔ 'a 'Wugɔmʋʋ ‑ɔ ‑wʋanyɩɛ ‑gömöö,
ɔ 'yize mɔɔ nɩ ‑soanyɩ 'kwädlɩ.
19 A ‑kä ‑lɛ glɩɩ,
a nɩ fä Lagɔ lwɩ a kii 'wuë yɔwʋ,
‑sɩbhä 'kanyɩ bhʋlʋbhlʋ swɩ nyɛmʋ 'mö 'pä.
Ɛ yi lwɩ a ‑mii cɛlɩɛ ‑mä 'ɔ wɛlɩɩ a 'bɔgʋʋ 'mö mi oo,
ɛ yi ‑mi 'ɔ 'Wugɔmʋʋ panyɩɛ dlɩ 'wʋ mi oo,
'a dilaa 'wuë 'mö,
a nɩ bhlɩnii Lagɔ,
a 'kä ‑sɩbhä ɔ 'nglɩ 'ghlimanɩ.
20 ‑Lii 'wuë a dɔ'wʋ,
‑Alowli Zezwii Kliisɩ a 'nglɩ 'mö,
a nɩ bhälɩ 'kwädlɩ ‑aa dɩba Lagɔ 'yize.
Sɛ'ɛ Pɔɔlʋ 'zʋä 'ngwlɩ ‑nyɛ 'luwluwa 'sɔ 'dɩ 'mö
21 ‑Atʋayuënyɩ,
a 'wuë,
sɛ a kää Kliisɩ a nganɔ ku 'mö a za,
a nɩ 'zʋzʋnɩ 'klʋkpamö.
22 ‑Nmö nglɔɔ,
'zʋ ‑na 'luwli 'klʋkpamö.
‑N ‑kä ‑sɩbhä 'zʋ dɔ'wʋ ‑wʋʋ,
ɛ nɩ ‑bhɩɛ ‑Alowli Zezwii a'bhë mö ‑n zʋ 'klʋkpamö.
23 Ɛ'ɛ ‑bhö nyɩasɛ,
‑maa Kliisɩ,
ɔ ‑nʋa a ‑zɩkpaa ‑a glɩnɩɛ 'ɔ kpökpaa,
a Puënyɔ ɔ glɩnɩɛ,
mɔɔ glɩnɩ'ɛɛ a 'wukpële.
Sɛ ‑bhʋlʋ ‑kpɔ 'la,
‑sɩbhä 'luwli glɩnɩɛ 'nglɔ a 'wukpële.
24 Zaa,
Kliisɩ a ‑nʋa,
sɛ wa kää wa 'kä wa ‑lowli 'klʋkpamö zʋʋ,
‑mä ‑lii 'wuë 'mö a dɔ'wʋ,
‑sɩbhä 'nglɔ kää ɔ 'kä ɔ 'luwli 'klʋkpamö zʋ.
25 ‑Nmö ‑naa 'luwlii,
sɛɛ Kliisɩ ‑waa ɔ ‑nʋa 'n ɔ yiɛ ɔnyɩ 'mö 'wlʋ 'n ɔ yiɛ wa 'wlumö 'kuu,
‑wa ‑sɩbhä ‑na 'lɛnglɛ.
26 Kliisɩ,
sɛ ɔ 'zʋä da'a a za,
ɔ ‑nʋa wa 'nyɛɛ 'ɔ wɛlɩɩ 'n wa yuëë 'wlu wɔlʋ,
nza wa plɛɛ 'wlɩlɩ 'n wa yiɛ ɔ 'yize a ‑nʋä zʋ.
27 Sɛɛ nɩkpɛ yɩbhä'ɛ nɩɩ,
'ɔ nglɔɔ ɔ 'kää kwä a kpökpaa,
a nɩ ‑wʋ ‑ziliyi a ku a sɛ,
'wlɩlɩ ‑plɔplɔplɔ,
ɔ nɩ glɩnɩ ‑jɛnglɔ,
ɔ nɩ tɩ ‑bibi ‑bhli,
sɛ ‑bhʋlʋ ‑kpɔ 'la,
‑sɩbhä Zezwii 'yɩbhää nɩɩ,
ɔ ‑nʋa 'wuë a ‑zɩkpaa,
‑zlɩ ɔ ‑kaa ‑mä ɔ yɔwʋ wäzɩnɩɩ,
a nɩ glɩnɩ ɔ 'yize a ‑na,
a nɩ tɩ ‑maa yɔwʋ ‑kä.
28 Sɛ ‑bhʋlʋ ‑kpɔ 'la,
‑sɩbhä nɩkpɛ kää ɔ 'kä ɔ 'lɛnglɛ ‑wa,
sɛ ɔ ‑waa ɔnyɩ 'a kpökpaa.
Nɩkpɛ ‑kä ɔ 'lɛnglɛ ‑waa,
ɔ'bhë ɔnyɩ ɔ ‑waa.
29 A ‑yi sɛ nɩɩ,
nɩkpɛ a ‑mɔɔ 'kää ɔnyɩ a kpökpa ‑gblɩɩ,
ɔ'ɔɔ ‑bhölɩ.
‑Maa nɩkpɛ ‑kä 'wlʋʋ,
ɔnyɩ ɔ liaa,
ɔnyɩ ɔ 'zʋnɩɛ 'yli 'tɩɩ.
Kliisɩ,
ɔ ‑nʋa a ‑zɩkpaa,
‑sɩbhä ɔ 'zʋnaa 'yli.
30 Ɛ'ɛ ‑bhö nyɩasɛ,
‑maa ɔ ‑nʋa a ‑zɩkpaa,
'ɔ kpökpaa mö ‑a glɩnɩɛ,
‑abhʋa glɩnɩɛ 'ɔ yɔwʋ a nɩmaa.
31 Lagɔbɔgʋʋ 'mö a wɛlɩkïbhë ‑bhlʋ,
sɛ'ɛ a nʋä nɩɩ:
‑Sɩbhä a za nɩkpɛ kää ɔ 'kä ɔ dɩba ‑nyɛ ɔ ‑da 'sɔ yɔwʋ 'bhöö,
ɔ ‑nyɛ ɔ 'lɛnglɛ 'sɔ,
wa 'kä yɔwʋ 'diodionɩ wa 'kä nɩkpɛ ‑bhlʋ zʋ.b
32 Wɛlɩkïbhë 'la,
zɛmö a kää tenyii.
Na dɔ'wʋ,
Kliisɩ ‑nyɛ ɔ ‑nʋa 'wuë a ‑zɩkpaa 'sɔ a dɛ a bhïlaa.
33 Miɛ abhlɩ,
‑maa abhʋa 'luwluwa ‑nyɛ a 'lɛnglɛwa 'sɔ,
a dɛ a bhïlamöä.
Nza n gbää nɩɩ,
‑nmö 'luwli,
sɛ ‑n ‑waa ‑nanyɩɩ,
‑n kä ‑n 'kä ‑sɩbhä ‑na 'lɛnglɛ ‑wa.
‑Nmö ‑naa 'nglɔ,
‑n kä ‑n 'kä ‑na 'luwli 'klʋkpamö zʋ.