Efɛɛzɩ a ‑nʋa 4

Lagɔ yɩbhä nɩɩ ɔ ‑nʋa 'wuë wa nɩ glɩnɩ ‑bhlʋ

‑Amöö ‑wʋä dɛ'ɛ ‑Alowli Zezwii Kliisɩ 'a libhoo a za ‑jie 'möö,

‑amöö zʋanyɩɛ dɛ'ɛ 'dɩ 'mö nɩɩ:

Nɩkpa a ‑muë Lagɔ ‑sɛɛ ‑lɛ wa 'kä ɔ ‑nʋä glɩnɩɩ,

sɛ wa kää wa 'kä nɛmöö,

a nɩ nɛmö ‑sɩbhä.

2 A nɩ tɩ anyɩ 'kädɩ 'mö 'wʋ 'libhï,

a nɩ yɔnɩ dlɩ 'wʋ,

a nɩ ‑kpaanɩ dlɩ 'mö.

Sɛ a ‑wawanɩɛ a za,

a nɩ 'kunɩ 'mlɩ a ‑nyɛ a'bhɩa 'kä 'wʋ ‑wʋnɩ.

3 Lagɔ 'a 'Wugɔmʋʋ mɔɔ kää 'nglɩ 'n a yiɛ ‑bhlʋ zʋ.

‑Lɛ a 'wʋwʋnɛ 'la,

a nɩ tɛlɩ 'kwädlɩ sɛ ‑lu ‑bhlʋ a'bhë tea sɛ ‑sɛ.

A nɩ ‑wanɩ,

'nyu nɩ tanyɩ jijo'wʋ 'plɩnɩ.

4 Kpökpaa,

a ‑bhli ‑bhlʋ,

Lagɔ 'a 'Wugɔmʋʋ,

ɔ ‑bhli ‑bhlʋ,

‑a 'wuë,

sɛ ‑bhlʋ ‑kpɔ 'la,

dlɩtɛɛnɩdɛ ‑bhlʋ a za Lagɔ wäzɩnyɩɛ.

5 ‑Alowli,

ɔ ‑bhli ‑bhlʋ,

Lagɔ a dlɩtɛɛnɩtɛnɛɛ,

ɛ ‑bhli ‑bhlʋ,

'wluwɔlʋwlɛɛ,

ɛ ‑bhli ‑bhlʋ.

6 Lagɔ,

ɔ ‑bhli ‑bhlʋ ‑kpöö,

mɔɔ glɩnɩɛ ‑a 'wuë a dɩba,

mɔɔ 'kämanɩnyɩɛ ‑a 'wuë ‑gömö,

‑a 'wuë,

‑abhʋa ɔ ghlɛnɩɛ 'mö 'n ɔ nʋä libho,

mɔɔ ‑wʋnyɩɛ ‑a 'wuë ‑gömö.

7 Zezwii Kliisɩ,

‑a 'wuë ‑sɩbhä ɔ 'pää ‑aa ngäzɩdlɩ,

sɛɛ 'ɔ dlɩɩ 'yɩbhää 'n ɔ ‑yinyɩɛ ‑sɩbhä bhʋlʋbhlʋ 'nyupälɩ 'wʋ ghäla.

8 Lagɔ 'a wɛlɩɩ a 'bɔgʋʋ 'mö a 'kïbhë ‑bhlʋ,

sɛ'ɛ a nʋä nɩɩ:

‑Mä ghäyɩ 'wʋ ‑mä ɔ möä,

ɔ ‑su ‑jiewa 'bɩwʋ 'n ɔ yiɛ mö,

'n ɔ yiɛ 'ɔ nɩkpaa ‑li dilanɩ.^a

9 Wɛlɩkïbhë 'la,

‑mä Zezwii Kliisɩ 'mö ‑mä a 'wlʋnɩɛ 'yli.

Sɛ'ɛ a sɛɛ zɛmö nɩɩ:

Zezwii,

ɔ 'bhööä ‑mä ghäyɩ 'wʋʋ,

mä'ä dʋdʋ 'wʋ dʋdʋ 'wʋ ‑mä ɔ yiɛ 'wë,

'n ɔ yiɛ bhäla ‑mä ghäyɩ 'wʋ 'bɩwʋ mö.

10 ‑Ɔ yiɛ mä'ä dʋdʋ 'wʋ dʋdʋ 'wʋʋ,

mɔɔ möä ‑mä ghäyɩ 'wʋ ghäyɩ 'wʋ,

ɔ 'kä saa 'wuë ‑wʋ,

ɔ 'kä ‑lii 'wuë ‑gömö 'kämanɩ.

11 ‑Maa 'nyɛnyɛli 'la yɩbhlɩ miɛ nɩɩ,

ɔ 'pä ‑mumuë 'nyu wa 'kä ɔ tietiewa glɩnɩ,

‑mumuë,

'ɔ 'Wugɔmʋʋ 'kʋä 'mö bhïlanɩ,

‑mumuë,

wa 'kä 'ɔ 'Mänatɩtɩɩ a biabiawa glɩnɩ,

‑mumuë,

wa 'kä ɔ ‑nʋa a ‑zɩkpöö a 'ylizʋnɩwa glɩnɩ,

wa 'kä'ɛ 'ɔ wɛlɩɩ a 'cɩawa glɩnɩ.

12 Nzɩɩ ɔ ‑nʋa 'kä sasɛ 'cɩɛ wa 'kä 'ɔ libhoo nʋ,

Zezwii Kliisɩ 'a kpökpaa,

‑a glɩnɩɛ ɔ ‑nʋa a ‑zɩkpaa,

a 'kä 'yli yɔwʋ 'tɛmanɩ,

nza ɔ 'zuëë ‑sɩbhä ‑mä.

13 ‑Lɛ a dɔ'wʋ,

‑abhʋa ɔ ‑nʋa 'wuë,

‑a ‑kä ‑sɩbhä 'ɔ wɛlɩɩ a dɔ'wʋ 'yukusɛ möö,

'ɔ wɛlɩɩ 'wuë,

‑a yi 'ylɩ ‑bhlʋ 'mö sɛ ‑bhʋlʋ 'mö 'nʋ,

Lagɔ 'a Yuu ‑bhʋlʋ ‑kpɔ,

'saa ɔ glɩnɩɛ 'tɩɩ,

‑a 'wuë ‑a yu 'gämö yɩbhlɩnɩ,

‑mä 'ɔ wɛlɩɩ 'mö a dɔ'wʋ ‑a yi ‑jɩbhɛ,

sɛ ɔ ‑wʋä Lagɔsɛ 'tɩɩ,

‑a ‑nyɔɔ yi ‑sɩbhä 'wlʋnɩ.

14 ‑A ‑kä 'ɔ wɛlɩɩ 'mö a dɔ'wʋ ‑jɩbhɛɛ,

‑a 'naa 'käa'a yɩ dɔ'wʋ 'yuëli nʋ,

‑a 'naa 'kä gba'agbagba'a bhli.

Nɩkpaa ‑wa sɛnɩɛ Lagɔ 'a wɛlɩɩ widɩ 'möö,

wa ‑nyɛ 'wa nɩkpadulawɛlɩɩ ‑kä yii,

‑muë ‑kä sɛ'ɛ nʋ,

‑muë ‑kä sɛ'ɛ nʋʋ,

‑a 'naa 'kä 'wa ylʋʋ 'yukwli ‑pʋnɩ.

15 Zaa,

a‑a nɩ ‑wawanɩ,

a‑a nɩ kä gbëaa ngli,

nzɩɩ,

Zezwii Kliisɩ ɔ glɩnɩɛ ‑a'a 'wukpëlea,

‑mä ‑lii 'wuë 'mö a dɔ'wʋ,

‑a 'kä ɔ saa 'ghlimanɩ.

16 Sɛɛ nɩkpɛ a kpökpa ‑wʋ'ɛ 'n a nɩma 'wuë ‑glɛglɛnɩ'ɛ 'wʋ,

'a gönasaa a za‑a,

Zezwii a ‑nʋa 'wuë,

‑sɩbhä wa ‑wʋä.

Wa 'wuë,

sɛ wa glɩnɩɛ 'ɔ kpökpaa a nɩmaa,

mɔɔ kää 'nglɩ 'n wa ‑glɛglɛnɩɛ 'wʋ 'n wa glɩnɩɛ ‑bhlʋ.

Mɔɔ kää 'nglɩ,

libhi ɔ 'nyʋää bhʋlʋbhlʋ 'n wa nwiɛ.

Wa ‑kä ‑sɩbhä 'zʋ dɔ'wʋ ‑wʋʋ,

sɛ wa ‑wawanɩɛ a za,

sɛɛ kpökpa a ‑maa ‑yɛɛ ‑wʋ'ɛ,

'n a ‑lowli 'ghlimanɩ'ɛ sasɛɛ,

'n ɔ 'tɛɛ'ɛ 'möö,

wa 'wuë,

‑sɩbhä wa ‑wʋä.

Kliisɩ ‑kanyɩ nɩkpalili 'wʋ 'zʋa

17 Wɛlɩkïbhëa ‑anyɩɩ dɔ'wʋ n 'kanyɩɛ ‑Alowli Zezwii Kliisɩ a 'nglɩ 'mö kä'mö titlii,

ma‑a nɩɩ:

Nɩkpaa ‑waaa Lagɔ ‑yii,

'wa sɛ wa nɛmöö,

a nɩ tɩ ‑sɩbhä nɛmö.

Nɩkpa 'la,

‑lii ‑yɩɩɛ dɛsɛ ‑kä 'lɩlɩlɩɩ,

'mö wa pää 'wʋ dlɩ.

18 Sɛɛ wa'a 'yɩbhää Lagɔ 'kʋä 'wʋ ngäla a za,

wa'aa ‑tiamö a 'nɛɛnɔ ‑kä.

Sɛ wa 'tumanɩɛ 'wa dilaa 'mö wa tɩa Lagɔ yɩbhlɩnɩ a za‑a,

‑tiamö a ‑bhölɩbhölɛ Lagɔ nyɛɛ nɩkpɛɛ,

wa 'nɛɛ ‑kä.

19 ‑Lu ‑bhlʋ a'bhë 'nuëa'a zʋ 'wʋ ‑bhö.

‑Lizoku 'mö wa nyɛɛ 'wa dilaa yowʋ,

wa 'kä ‑lii a ki 'wuë ‑yɩ plaa fɩ nʋ a za.

20 ‑Maa abhʋa abhlɩ,

sa'a a ‑bhölɩbhölɛɛ,

'mö Kliisɩ 'nanyɩɛ 'cɩa.

21 Zezwii 'a wɛlɩɩ,

wa kanyi 'nyɛ,

wa kanyi sasɛ dlɩ ‑gömö ‑sɛsɛnɩ zaa,

'a sɛ a ‑gälɔɔɔ da'a 'wʋʋ,

sɛɛ ‑sɩbhä sɛɛ ‑tiamö zɛmöö,

a ‑yi ‑sɩbhä.

22 A ‑yi sɛ nɩɩ,

'a sɛ a nɛmö a‑a bhla'möö,

‑sɩbhä a 'naa 'käa'a ‑sɩkaa nɛmö.

Zaa,

'a bhla'mö a ‑wʋwʋsaa sɛɛ dulanyɩɛ 'n ‑sɩbhä kwanyɩɛ 'nyinylolii ‑yɩ 'kanyɩɛ 'yli bhɩa 'möö,

a nɩ ‑sɛ ‑sɩbhä kɛ'mö 'lɩlɩlɩ.

23 A nɩ nglu 'wʋ,

Lagɔ 'a 'Wugɔmʋʋ 'kä 'a dlɩpäsaa 'mö zigbanɩ,

‑sɩbhä 'kä 'lilele 'zʋ.

24 ‑Wʋsɛlele sɛɛ zlɔnɩɛ 'mö,

sɛɛ ‑wʋä Lagɔsɛ,

sɛɛ ‑nyɛ Lagɔ 'a ‑tiamö a wɛlɩɩ mönɩɛ yɔwʋʋ,

‑sɩbhä Lagɔ a'bhë 'nyanyɩɛ zaa,

a nɩ nglu 'wʋ a 'käa'a ‑sɩkaa ‑sɩbhä a 'yize ‑wʋ.

25 Zaa,

a nɩ ‑sɛ yio kɛ'mö.

A nɩ 'nyɛnyɛnɩ gbëaa.

Ɛ'ɛ ‑bhö nyɩasɛ,

‑maa ‑a 'wuë sɛ ‑a ‑glɛɛ Zezwii 'wʋ a za,

wʋ ‑a ‑glɛglɛnɩɛ.

26 'Klɛ ‑kaanyɩ 'mlɩ yii,

a nɩ 'nɛmanɩ anyɩ 'wʋ,

ɛ tanyɩa 'nyinyloli 'mö kwä.

Klɛ 'la,

swe nɩ te ylunɩ.

27 A nɩ tɩ Sataa 'yi 'tatinɩ ɔ nɩ tanyɩ 'nyinyloli nʋa.

28 ‑Ɔ ‑kä a 'wi ghlii,

ɔ nɩ ‑sɛa'a 'ɔ wii kɛ'mö,

ɔ nɩ 'libhï 'ɔ kätɩkpöö 'wʋ ɔ 'kä libho nʋ,

nzɩɩ ɔ 'käa ɔnyɩ bhɛnɩ,

ɔ 'käa'ɛ ‑waaa ‑lu kä'mö ‑kä 'wʋ yi.

29 Wɛlɩkïbhëzokwë ‑bhlʋ a'bhë nɩ tanyɩ ngli ghlɛnɩ.

‑Maa a ‑kä ‑lɛ glɩɩ,

wɛlɩ a ‑mii kää a 'bhɩa a ‑li a ‑li 'mö,

‑yɩ 'kʋää swɩ nyɛmʋ 'mö 'pää,

yɩ 'yize 'mö a nɩ bhïla.

30 'Wugɔmʋʋ 'Wlɩlɩ Lagɔ 'zʋanyɩɛ ‑gömöö,

a nɩ to kɔmanɩ ‑mä 'a 'zʋzʋsaa 'mö,

‑maa mɔɔ glɩnɩɛ yɩbhlɩnɩdaa ɔ 'zʋanyɩɛ,

‑këë zlɩ ɔ 'kanyɩɛ mä'ä 'pɩwʋ a ‑lii 'wuë 'mö ngli ‑sɛɛ,

ɛ 'kä ghlɛ.

31 Zaa,

a nɩ ‑sɛ ‑lizoku 'wuë kɛ'mö,

ɛ yi 'klɛkwïlaklu oo,

ɛ yi dlɩgwlikäkʋ oo,

ɛ yi 'klɛpäpʋ oo,

yɩ 'wuë a nɩ ‑sɩɩ kɛ'mö.

A nɩ tɩ a 'bhɩa 'wʋ nylanɩ,

a nɩ tɩ nɩkpɛ ‑di zia.

A nɩ ‑sɛ kpʋkpʋʋ kɛ'mö 'lɩlɩlɩ.

32 A nɩ nɛnɩ dlɩ zɛmö,

a nɩ kä a 'bhɩa a ngäzɩdlɩ.

Sɛɛ Lagɔ 'tatinɩɛ Zezwii Kliisɩ a za 'a 'nyinylolii a gbʋʋ 'yii,

a 'wuë,

a 'bhɩa ‑kaanyɩ ‑lizoku 'wlu nʋʋ,

a nɩ 'tatinɩ ‑sɩbhä yɩ gbʋ 'yi.