Efɛɛzɩ a ‑nʋa 3

‑Waaa Zwiiföwa glɩnɩ jijo'wʋʋ ‑mä Zezwii tiee Pɔɔlʋ

‑Amö Pɔɔlʋ,

sɛ n nʋä Zezwii Kliisɩ 'a libhoo ‑mä abhʋaa 'nɩɛ Zwiiföwa glɩnɩ jijo'wʋ a za,

nza n ‑wʋä dɛ'ɛ ‑jie 'mö.

2 Libho 'la Lagɔ nyɩaaa 'ɔ ngäzɩdlɩɩ a za‑a,

nzɩɩ 'ɔ 'saa ɔ yɩbhää a dɛ 'kä 'yli 'wlʋnɩɩ,

n kɩ dlɩ 'wʋ nɩɩ,

wa kanyɩ wʋ 'dɩ 'nyɛ.

3 'Saa Lagɔ 'yɩbhä a‑a 'bhlɩbhëa 'wuë a dɔ'wʋ ‑wʋ ziza‑a a‑a,

Lagɔ a'bhë mɔɔ kälɩnɩ'muä kɛ 'klʋ.

Wʋ dɩɩ,

'mö n 'nyanyɩɛ 'tikïyie 'wʋ ‑pa 'wʋ.

4 A ‑kɩɩ 'mö zɛlɩɩ,

sɛɛ Lagɔ sʋlʋnɩɩɛ Zezwii Kliisɩ 'a wɛlɩɩ ‑yɩ ziza‑a a‑a a zɛmö 'tɩɩ,

a yi ‑sɩbhä yɩbhlɩnɩ.

5 Sɛ'ɛ n gbää nɩɩ,

‑lɛ a wɛlɩ 'la ‑yɩ ziza‑a a‑a,

Lagɔ 'niɛ bhla'mö a nɩkpa kɛ 'klʋ kälɩnɩ,

‑maa ‑sɩkaa a dɔ'wʋ,

'ɔ tietiewaa ‑nyɛ 'ɔ 'möbhïlanɩwaa 'sɔ,

‑wa glɩnɩɛ ɔ 'yize a ‑nʋä,

'mö ɔ kälɩniiɛ kɛ 'klʋ.

'Ɔ 'Wugɔmʋʋ 'mö ɔ ghlɛnɩɛ 'mö 'n ɔ yuënyɩɛ kɛ 'klʋ kälɩnɩ.

6 Wɛlɩ 'la ‑yɩ ziza‑a a‑a,

Zezwii Kliisɩ 'a 'Mänatɩtɩɩ miɛ.

Sɛ'ɛ yɩ nʋä nɩɩ,

ɔ za ‑waaa Zwiiföwaa glɩnɩɩ wa ‑nyɛ Zwiiföwaa 'sɔ,

wa 'wuë,

ɔ 'kʋä ɔ ngëyi ‑bhlʋ 'wʋ 'zʋa,

'nyupälɩɩ 'wuë ‑yɩnyɩ dɛ ɔ bhïla a‑a,

ɔ 'kʋänyɩ 'gämö 'wʋ ghälanɩ.

7 'Mänatɩtɩ 'la a biabianyɔ Lagɔ 'zʋaaa 'wʋ.

'Ɔ ngäzɩdlɩ a 'yize a za,

nza ɔ libhïïä 'wʋ,

'n ɔ ‑yi'miɛ 'wʋ tie,

'n ɔ yiɛ ‑mä na 'mö 'ɔ 'mötɛɛnɔ 'kɔdʋʋ 'yli 'wälanɩ.

8 ‑Mä Lagɔ a ‑nʋa 'wuë gla'mö a dɔ'wʋ,

‑amöö 'nɩ a‑a ‑lu glɩnɩ 'lɩlɩlɩɩ,

‑amö Lagɔ 'libhïä 'wʋ,

'n ɔ ‑yiiɛ ɔ tietienyɔ 'wʋ 'zʋa,

nzɩɩ ‑waaa Zwiiföwa glɩnɩɩ,

'nyupälɩɩ a kii 'wuë ɔ ghälaa nɩkpɛ Kliisɩ a za 'wʋ,

‑yɩɩɛ ‑sɩbhä a sɛ ‑wʋʋ,

n 'kʋä yɩ 'dɩ 'nyɛ.

9 'Saa ‑lii 'wuë a 'wälanyɔ Lagɔ yɩbhä a‑a,

‑yɩ ziza a‑a 'kwädlɩ ‑këë ɔ kälɩa'aa ‑sɩkaa 'klʋʋ,

wa 'kɩ yɩbhlɩnɩ.

10 ‑Lɛ a dɔ'wʋ,

Zezwii Kliisɩ a ‑nʋa a ‑zɩkpa 'kädaa yi 'nglɩ ‑kä zuzukuu 'wuë ‑yɩ 'tɛɛ 'mö ‑yɩ 'kämanɩɛ ‑lɛ zlɩ ‑nyɛ dʋdʋ 'sɔ a jijo'wʋʋ,

yɩ yi sɛ yɩbhlɩmanɩ nɩɩ,

Lagɔ 'a 'nɛɛnɔɔ,

wʋ'ʋä muënɩ.

11 'Saa Lagɔ 'yɩbhä a‑a 'kwädlɩkwädlɩ ɔ 'kä 'yli 'wälanɩɩ,

'mö ɔ 'wälanɩa'aa ‑sɩkaa ‑mä ‑Alowli Zezwii Kliisɩ 'mö 'yli.

12 Zezwii Kliisɩ,

sɛ ‑a ‑gälɔɔ 'wʋ a za,

‑a bhɛnɩa'a ‑sɩkaa ‑a 'kä Lagɔ yɔwʋ 'dio ‑pälɛpälɛ.

‑A 'kɔ yɔwʋ 'dio a dɔ'wʋ,

nganɔ 'naa 'kanyɩa'a 'ku 'mö ‑wʋ.

13 ‑Atʋayuënyɩ,

sɛ n 'nyanyɩɛ Lagɔ 'a wɛlɩɩ a za,

nza n ‑wʋä dɛ'ɛ ‑jie 'mö 'n n yɩɛ 'klɩ.

‑Maa 'na 'klɩyɩyɛ 'la,

ɛ ‑glɛ a ‑li a ‑li 'kädɩ gwë,

zaa,

ɛ nɩ tanyɩ swɩ yɔwʋ 'kuanɩ.

Kliisɩ 'a nɩkpawawʋʋ

14‑15 Zaa,

‑aa dɩba Lagɔ,

‑mä ghäyɩ 'wʋ 'n mä'ä dʋdʋ 'wʋ a ‑bhɛbhɛlii 'wuë 'bhöönɩɛ kä'möö,

‑lɛ ɔ dlɩ 'mö ‑lɛ n pää ‑kokomïladigbï glu,

'n n bhibheoo a 'wlumö.

16 'Na 'saa n 'yɩbhänɩɛ a 'wlumö Lagɔ ‑ɔnyɩɩ 'ghïlinɔɔ 'nɩɛ 'bhlenɩdɛ ‑kää,

muä nɩɩ,

'ɔ 'Wugɔmʋʋ nɩ 'nyɛ ‑a'a dilaa 'mötɛɛnɔ,

17 nzɩɩ a 'kä sasɛ Kliisɩ dlɩ 'tɛɛnɩ.

Ɔ 'kanyɩ ‑sɩbhä a za 'mö ‑bhölɩnɩ,

nzɩɩ 'ɔ ‑wawʋʋ 'kanyɩ dlɩ zɛmö ‑wʋ.

Wʋ 'mö a dɔ'wʋ,

a 'kä ‑nyɔnʋ,

a 'kä 'mö 'tɛɛ.

18 Lagɔ nɩ gbä,

a ‑nyɛ ɔ ‑nʋa 'wuë 'sɔ,

Kliisɩ 'a ‑wawʋʋ,

sɛ wʋ'ʋä ‑sɩbhä a sɛ ‑wʋ,

sɛ wʋ'ʋä 'bhlenɩdɛ ‑kä,

sɛ wʋ mlɩnɩɛ mä'ä 'ylʋ zɛmö a nɩkpaa a kii 'wuë ‑gömöö,

a 'kä ‑sɩbhä yɩbhlɩnɩ.

19 Sɛ'ɛ n gbää nɩɩ,

n bhibhe a 'wlumö Lagɔ,

nzɩɩ Zezwii Kliisɩ 'a ‑wawʋʋ ‑wʋ 'ghïliɛ tenyii,

nɩkpɛ 'nɩɛ bhɛnɩ ɔ 'kä sasɛ 'mö 'nʋʋ,

a 'kʋ ‑tiamö yɩbhlɩnɩ.

‑Lɛ a dɔ'wʋ,

'saa Lagɔ glɩnɩɛ,

a 'kʋ 'tɩɩ yɩbhlɩnɩ,

ɔ 'kanyɩ ‑tiasɛ 'mö ‑bhölɩnɩ.

20 Lagɔ,

ɔ bhɛnɩ ɔ 'kä ‑li a 'kädɩ nʋ,

'saa ‑a 'yɩbhänɔɔ ‑nyɛ 'saa ‑a pää dlɩ 'wʋ 'sɔ,

ɔ bhɛnɩ ɔ 'kɩ nʋ ɔ 'kä ‑lɛ 'wʋ 'mɩɛ.

'Ɔ 'mötɛɛnɔɔ ɔ nʋnɩnyɩɛ libho 'möö,

'ghïli wʋ 'ghïliɛ tenyii.

21 Ɔ 'nglɩ nɩ 'ghlimanɩ.

Ɔ ‑nʋa 'wuë ‑wa ‑glɛɛ Zezwii Kliisɩ 'wʋ a ‑zɩkpa 'kädaa,

a nɩ 'ghlimanɩ ɔ 'nglɩ 'kwädlɩkwädlɩnɩ.

Nn a nɩ 'ghlimanii.