2 Kolɛɛtɩ a ‑nʋa 10

Pɔɔlʋ yɛ 'ɔ Lagɔlibhoo 'wʋ gwɩ

‑Amö Pɔɔlʋ,

wa lɛ n ‑kä ‑mä a jijo'wʋ ‑wʋ n'n wɛlɩ ngli ‑kä,

‑maa n ‑kaanyɩ yɔwʋ 'bhöö 'wëë,

'n n bhïlaa nyɩbhɛlʋsɛ.

Kliisɩ 'a dlɩwätɛɛ ‑nyɛ 'ɔ kɛgänɔɔ 'sɔ a 'nglɩ 'mö,

'dɩ 'mö n zʋanyɩɛ dɛ'ɛ nɩɩ:

2 N bhianyɩ yɔwʋ,

'a nʋnʋlii nɩ tɩ 'nglɩ ‑kä n ‑kä ‑mä 'a mä'a yii,

n tanyɩa yɔwʋkanɩsɛ bhïlanɩ.

Ɛ'ɛ ‑bhö nyɩasɛ,

‑maa ‑wa nʋä da'a nɩɩ,

nɩkpɛsɛ a 'yize ‑a nʋä ‑a'a Lagɔlibhoo,

‑sɩkaa a dɔ'wʋ ‑a ‑kä yii,

yɔwʋkanɩsɛ n 'kʋä 'dɩ 'nyɛ.

3 ‑Tiamö abhlɩ,

mä'ä dʋdʋ 'wʋ a nɩkpa 'wuë a sɛ a nɩkpɛ n glɩnɩmöä.

‑Maa 'na tʋʋ n gwɩɛ,

nɩkpɛsɛ n 'nuä gwɩ.

4 Sɛɛ nɩkpa libhïä wanyɩ a tʋgwɩnɩli 'wʋ 'n wa gwɩɛ,

‑sɩbhä n'n‑ä 'zʋ.

‑Maa Lagɔ,

mɔɔ ‑wʋʋä ‑gömö,

'ɔ 'mötɛɛnɔɔ,

'mö n gwɩnɩɛ.

‑Sɩbhä a za,

‑lii 'wuë yɩ yi tenyii 'mö 'tɛɛ ‑kë,

'wlu n pïliɛ.

Miɛ nɩɩ,

wɛlɩɩ 'wuë ‑yɩɩɛ Lagɔsɛ ‑wʋʋ,

sɛ yɩ glɩnɩɛ yio a 'yizee,

‑sɩbhä n pää 'pɩwʋ.

5 ‑Lii 'wuë bhabhawaa tɛkpɔnɩɛ 'mö ‑yɩnyɩɩ za wa'a ngluä wa 'kä Lagɔ yɩbhlɩnɩɩ,

sɛ yɩ glɩnɩɛ nyɩasɛlii,

‑sɩbhä n pää 'pɩwʋ.

Sa'a ‑sɩbhä n sɛɛ ‑mä nɩkpa a dila zɛmö dlɩpäsɛzokwëa 'wuë,

nzɩɩ ‑a 'wuë ‑a 'kä Kliisɩ a 'yize 'klʋkpamö zʋ.

6 Zaa,

'n a ‑käa'a 'wʋ nglu nɩɩ a yia'a ‑sɩkaa 'na wɛlɩɩ 'klʋkpamö zʋ 'tɩɩ nʋʋ,

n yi yi,

a gla'mö a nɩkpaa ‑waaa da'a 'yɩbhä wa 'kä ‑sɩbhä 'zʋmöö,

n yuë yɔwʋkanɩsɛ 'mö zlɔmanɩ.

7 Sɛɛ ‑lii ‑wʋä gbëaa,

a nɩ 'yi ‑sɩbhä 'ylɩmö.

‑Wa tɛkpɔɔ da'a nɩɩ,

mʋa glɩnɩɛ wabhlɩ Kliisɩ a ‑nʋaa,

wa nɩ yɩbhlɩnɩ sɛ nɩɩ,

sɛ wa gbää da'a ɔ ‑nʋä wa glɩnɩɩ,

‑sɩbhä ‑a glɩnɩmö'ɛɛ ‑abhlɩ ɔ ‑nʋä.

8 N ‑kä'ɛ nɩɩ,

sɛ n glɩnɩɛ ‑Alowli a tietienyɔ a za,

'nglɩ 'kädɩ n kää ‑gömöö,

n ‑yi sɛ nɩɩ,

ɛ'ɛ ‑bhö 'fʋ a tɛkpɔtɛkpʋ.

‑Maa mɔɔ nyɩaaa ‑tiamö ‑lɛ a libho 'la,

n 'kanyɩ 'yukusɛ kwä a za,

‑maa ɛ'ɛ ‑bhö n 'kanyɩ nyima a za.

9 'Bɔgwɩ n panyɩɛ wʋʋ,

a nɩ tɩ ‑tɔnɩ nɩɩ,

n 'kanyɩ 'wʋ 'kïla a za,

nza n cɛli ‑sɩbhä.

10 Sɛ'ɛ ‑mumuë nʋä nɩɩ,

'na 'bɔgwɩɩ n cɛlanyɩɛ 'wʋ 'mö a dɔ'wʋ,

n ‑kä bhïlaa,

‑tiasɛ n bhïlaa,

'na wɛlɩɩ dlɩ yɩ köbhää sɛ,

‑maa n ‑kaanyɩa'a jijo'wʋ ‑wʋʋ,

n'n wɛlɩ ngli ‑kä,

n ‑kä bhïlaa,

'na bhïlawɛlɩɩ 'nɩ 'yli yɔwʋ 'tɛɛ.

11 ‑Wa nʋä sa'a,

mö ‑a nyɛɛ dɛ'ɛ 'dɩ nɩɩ:

‑A ‑kaanyɩ 'wʋ 'cɛlɩ a sɛ ‑a bhïlaa nyɩbhɛlʋsɛɛ,

‑a ‑kä ‑mä 'a mä'a yii,

sɛ ‑bhʋlʋ ‑kpɔ 'la ‑sɩbhä ‑a 'kää bhïla.

12 Nɩkpaa ‑wa zʋä da'a wanyɩ 'nglɩ 'kädɩ ‑gömöö,

n 'nuëa na a ‑käpanɩ,

n 'nuëë nanyɩ yɛkanɩ a'bhë.

‑Tiamö a dɔ'wʋ nɩkpa 'la ‑ɔɔ'nɛɛnɩwa 'kädɩ wa glɩnɩɛ.

Wɛlɩɩ wa sɛɛ wanyɩgäsɛ 'wlumöö,

yɩ za wa zʋä wanyɩ.

13 ‑Abhʋa ‑abhlɩ,

‑aaa ‑anyɩ 'fʋ a 'nglɩ möa.

‑Maa Lagɔ a'bhë mɔɔ 'zʋanyɩɛ ɔ tietiewa 'wʋ,

‑a 'kä saa 'wuë 'ɔ wɛlɩɩ bia.

Libho 'la a nglɩɩ,

'mö n kää ‑gömö cuu,

mö ‑a ‑wʋä nʋ dɔ'wʋ,

a‑a yiɛ ‑mä 'a mä'a ghlɛ.

14 Zaa,

a gbʋ ‑kaa plɛnɩɩ,

ɛ'ɛ ‑bhö fʋ,

‑maa ‑a'a libhoo muä.

‑Abhʋa ‑lɛmanyɩ a‑a tɛɛ Kliisɩ 'a 'Mänatɩtɩɩ.

15 ‑Abhʋa ‑abhlɩ,

'fʋ a 'nglɩ ‑aaa ‑anyɩ möa.

‑A'bhɩa a libhoo ‑aaa 'mö tɛkpɔnɩ.

‑Maa ‑a kɩ dlɩ 'wʋ nɩɩ,

libhoo Lagɔ a'bhë nyɩanyɩɛ,

‑a tɛɛ a‑a ‑mä a jijo'wʋʋ,

‑a yu sasɛ nʋ 'yize,

nzɩɩ a 'käa ‑mä Lagɔgänɩgänɛ 'mö a dɔ'wʋ 'yukusɛ mö.

16 ‑A ‑kä ‑mä 'a mä'a ‑a'a libhoo nʋ 'wëë,

‑mä a nimï a ‑gwlɩɩ 'mö,

mää 'Mänatɩtɩɩ 'nɩɛ ‑bhlɛ ghlɛɛ,

a‑a 'kä'ɛ ‑mä mö,

‑a 'kɩ ‑mä bianɩ.

‑Lɛ a dɔ'wʋ,

libhoo Lagɔ 'nyɛɛ ‑mumuë 'n wa yuä nʋʋ,

‑aaa 'kʋ 'mö plɛ,

‑aaa 'kʋ 'mö tɛkpɔnɩ.

17 Sɛ'ɛ yɩ cɛlɩɛ nɩɩ:

‑Ɔ ‑kä ɔ 'kä tɛkpɔ,

‑Alowli Lagɔ 'mö ɔ nɩ tɛkpɔnɩ 'mö.^a

18 Nza n gbää nɩɩ,

‑ɔ sɛɛ ɔnyɩ a 'dɩ a dɩɩ,

mɔɔ 'nɩɛ ‑tiamö 'nglɩ ‑kä,

‑maa ‑mɔ ‑Alowli zʋä,

mɔɔ kää ‑tiamö 'nglɩ ‑gömö.