2 Kolɛɛtɩ a ‑nʋa 3

Mɛnɩnɔluluu a libhonʋwaa

N ‑kä sa'a gbää,

sɛ'ɛ yɩ sɛ bhä zɛmö nɩɩ,

‑a nɩ ‑su 'bɔgwɩ nzɩɩ ‑a 'kanyɩ ‑anyɩ 'sɔ tulanɩ ‑a?

‑Maa ‑a käa bhä ‑a kä 'bɔgwɩ ‑su nzɩɩ ‑a 'kä ‑anyɩ tula sɛɛ ‑mumuë zʋä?

‑Maa a yɩbhä bhä ‑a nɩ 'yɩbhänanyɩ ‑sɩbhä a 'bɔgwɩ ‑a?

2 ‑Abhʋa ‑abhlɩ,

‑a'a 'bɔgʋʋ ‑wʋ tulanyɩɛ nɩkpaa,

a'bhï abhʋaa.

'Bɔgʋ 'la,

‑mä ‑aa dila zɛmö ‑mä wʋ cɛlɩɛ.

Nɩkpa 'wuë bhɛnɩ wa 'kʋ 'ylɩmö,

nɩkpa 'wuë bhɛnɩ wa 'kʋ 'mö zɛlɩ.

3 'Bɔgʋ 'la ‑a gbää a glɩnɩɛ,

nɩkpaa 'wuë bhɛnɩɛ wa 'kä 'mö zɛlɩɩ,

Kliisɩ a'bhë mɔɔ 'celuä,

‑abhʋa ɔ ghlɛnɩɛ 'mö 'n ɔ yuä 'cɛlɩ.

'Biikö a sɛ a ‑lu wʋ'ʋä 'mö cɛlɩnɩ,

‑maa Lagɔ ‑ɔ ‑bhölɩ 'a 'Wugɔmʋʋ mɔɔ kää 'nglɩ 'n wʋ yiɛ 'celio.

Wʋ'ʋä 'kpɩ 'klʋ cɛlɩ,

‑maa nɩkpa a dila zɛmö ‑mä wʋ cɛlɩɛ.

4 Nyɩasɛ ‑aaa ‑sɩbhä gbä,

‑maa Lagɔ a 'yila 'klʋ,

‑a kä wɛlɩ 'la dlɩ 'wʋ Zezwii Kliisɩ a bɔɔmö a za.

5 ‑Abhʋa 'ɔ tietiewaa,

‑a'bhï ‑a ‑yi sɛ nɩɩ,

‑anyɩgäsɛ ‑aaa 'ɔ libho 'la bhɛnɩ.

‑Maa ‑a ‑kʋʋ sasɛ nʋʋ,

ɔ'bhë mɔɔ kää 'nglɩ.

6 Lagɔ mɔɔ nyɩanyɩɛ 'mötɛɛnɔ a‑a yiɛ Mɛnɩnɔluluu a libhonʋwa 'zʋ.

Wɛlɩ 'la,

sɛ'ɛ yɩ nʋä nɩɩ:

‑Sɩkaa a dɔ'wʋ,

Lagɔ,

'ɔ Gböö ‑yɩ cɛlɩɛ a 'yize,

'mö ɔ 'nɩɛ nɩkpa 'nyɛ,

‑maa 'ɔ 'Wugɔmʋʋ a'bhë 'mö ɔ zuëë ‑gömö.

N nɛ naa,

Gbö 'la,

'kwie yɩ lɛmöä,

‑maa Lagɔ 'a 'Wugɔmʋʋ ɔbhlɩ,

‑bhölɩbhölɛ ɔ nyɛɛ.

7 Sɛ'ɛ n gbää nɩɩ,

Lagɔ 'a Gböö,

'kpɩ 'klʋ yɩ 'celioo.

Lagɔ 'nyɩɛ Moyizɩ yowʋʋ,

'ɔ 'ghïlinɔɔ 'mö Moyizɩ 'yɩɛ 'ylɩmö.

'Ɔ 'ghïlinɔ 'la a za,

Moyizɩ 'bhööä ‑lɛ,

'ɔ klʋʋ 'mö wʋ lɩɛ tenyii.

‑Sɩbhä a za,

ɔ 'bhɩa Yizlaɛlɩ a ‑nʋa,

wa'aa a bhɛnɩ,

wa 'kɔ 'klʋ yɔwʋ nyɔnɔa.

‑Maa ‑sɩbhä yɩ ‑wʋ 'mö,

‑lɛ a lɩlɛ 'la 'plɩplɩleyi ɛ glɩnɩ a‑a.

Gbö 'la,

‑yɩ kää 'lɩbhälɩbhälibhoo,

yɩ ‑kä 'saa 'nglɩ 'kädɩ ‑gömö ‑kä,

8 mɛɛ kä zi'e libhoo 'Wugɔmʋʋ 'Wlɩlɩ nʋa,

mʋʋ 'naa 'käa bhä 'nglɩ 'kädɩ ‑gömö ‑kä ‑a?

9 Lagɔ 'a Gböö a libhoo ‑wʋ köbhaa nɩkpɛ gbʋ a 'nglɩ mö'ɛ,

mɛɛ 'kä zi'e 'Wugɔmʋʋ 'Wlɩlɩ a libhoo ‑wʋ zlɔmanɩɛ nɩkpa Lagɔ a 'yila 'klʋ 'möö,

mʋʋ 'na 'kä bhä tenyii 'nglɩ mö ‑a?

10 Lagɔ 'a 'ghïlinɔɔ libho 'la tulanɩɛ 'ylimö,

‑n ‑kʋʋ 'wʋ yɩlɩɩ,

‑n yi nɩɩ Lagɔ 'a 'ghïlinɔɔ Moyizɩ 'yɩ a‑a 'ylɩmöö,

wʋ'ʋä ‑lu glɩnɩ nʋ.

11 Bhla'mö a ‑li 'la ‑yɩ glɩnɩ a‑a 'plɩplɩlii,

‑mä yɩ 'mö,

'tikïyie 'wʋ Lagɔ 'a 'ghïlinɔɔ 'wlʋnɩ a‑a ‑mä 'yli.

‑Maa ‑sɩkaa a ‑nɩɩ ‑yɩ 'naa 'kää 'kwädlɩ 'plɩɩ,

Lagɔ 'a 'ghïlinɔɔ yɩ tulanɩɛ 'ylimöö,

wʋ'ʋä ‑sɩbhä a sɛ ‑wʋ.

12 ‑Li 'la,

sɛ ‑a 'tɛɛniɛ tenyii dlɩ a za,

‑a 'kɩ bia a dɔ'wʋ,

‑aaa zizo,

‑maa gbëaa ‑a bhïliɛ.

13 Moyizɩ ɔbhlɩ,

ɔ 'kä a‑a nɩkpa Lagɔ 'a Gböö 'nyɛɛ yii,

'ɔ klʋʋ ‑wʋ lɩ a‑a Lagɔ 'a 'ghïlinɔɔ a za 'möö,

lekwi ɔ wɛnuu a‑a 'wʋ.

Lɩlɛ 'la 'plɩplɩleyi ɛ glɩnɩ a‑a zaa,

ɔ 'bhɩa Yizlaɛlɩ a ‑nʋa tɩa ɛ 'wʋngïmongïmuu 'ylɩmö,

nza ɔ ziza a‑a 'ɔ klʋʋ 'wʋ.

‑Maa sɛɛ Moyizɩ 'zʋ a‑a da'aa,

‑abhʋa ‑abhlɩ,

‑sɩbhä ‑a 'nɩɛ 'zʋ.

14 Lekwi 'la,

Moyizɩ wɛnɩ a‑a 'ɔ klʋʋ 'wʋʋ,

sɛ'ɛ ɛ sɛ'ɛɛ zɛmö nɩɩ:

Zwiiföwaa,

wa ‑kä 'kwädlɩ Tɛkämɛnɩnɔɔ a wɛlɩɩ 'mö zɛlɩɩ,

yɩ zɛmösɛsaa 'yli a 'kʋää zizaanɩ zaa,

wa 'naa 'kɩ sasɛ 'mö 'nʋ.

‑Maa nɩkpɛ a ‑mɔɔ yɩbhlɩnɩɛ Kliisɩ,

ɔ 'yize mɔɔ bhɛnɩɛ ɔ 'kä yɩ zɛmösɛsaa 'mö 'nʋ.

15 ‑Tiamö,

Zwiiföwaa ‑kä 'kwädlɩ Moyizɩ 'a Gböö a 'bɔgʋʋ 'mö zɛlɩɩ,

ɛ 'kä ‑bhɩɛ sɛɛ Moyizɩ wɛnɩ a‑a 'ɔ klʋʋ lekwi 'wʋʋ,

‑sɩbhä 'wa dilaa kä lekwi 'klʋ zaa,

wa'a 'nʋ wʋ zɛmösɛsaa 'mö.

16 ‑Maa wa gla'mö a ‑mɔɔ ‑kä ‑tiamö ‑Alowli a'bhë 'yi göö,

‑lɛ a lekwi 'la bhli ɛ 'kää ɔ dɔ'wʋ bhli.

17 N ‑kä dɛ'ɛ ‑Alowli nʋʋ,

Lagɔ 'a 'Wugɔmʋʋ 'mö n gaa.

'Ɔ 'Wugɔmʋ 'la,

mɔɔ ‑kamö ‑gömö 'kämanɩɩ,

‑n yɛ ‑lii 'wuë a galɛ 'mö 'wlʋ.

18 Sɛ'ɛ n gbää nɩɩ,

‑abhʋa Zezwii a ‑nʋa,

‑a 'wuë ‑aa dɔ'wʋ,

Lagɔ 'a 'ghïlinɔɔ yɛ ‑tiamö gbëdanguu bhli.

‑Mä ‑Alowli Zezwii 'mö ‑mä ‑a yɩlɩnuä 'wʋ.

Sɛ ‑a yɩlɩnuä ‑mä 'wʋ 'yizee,

‑sɩbhä ‑a'a dilaa zigbonɩɛ 'kwädlɩ 'mö,

a‑a ‑nyɔɔ 'wlʋmanɩɛ 'yize.

'Ɔ 'Wugɔmʋʋ mɔɔ nʋnɩɛ ‑lɛ a libho 'la ‑mä ‑a'a dilaa zɛmö.