2 Kolɛɛtɩ a ‑nʋa 2

Sɛ'ɛ n gbää nɩɩ,

n tanyɩa'ɛ 'wʋ 'sɔ swɩ yɔwʋ 'kuanɩ,

nza n'n‑ä 'yɩbhä n 'kä ‑bhlɛ ‑mä 'a mä'a nimï yi.

2 N ‑kaanyɩ swɩ yɔwʋ 'kuanɩɩ,

‑ɔ ‑kaa bhäa'a 'mäna 'mö päla 'nɩ?

Abhʋa n 'kuanɩ a‑a swɩ yɔwʋʋ,

abhʋa 'naa ‑kaa a bhä 'mäna 'mö päla ‑a?

3 Zaa,

n'n‑ä 'yɩbhä nɩɩ,

n ‑kä ‑mä a jijo'wʋ yii,

abhʋaa ‑kaa a‑a 'mäna 'mö pälaa,

swɩ ‑kaa a za yɔwʋ 'kunɩ.

N ‑yi sɛ nɩɩ,

n ‑kä 'mäna 'mö ‑wʋʋ,

mɩɩ ‑bhömanyɩɛ 'mäna 'wʋ.

'Bɔgʋʋ n 'panyɩɛ da'a 'wʋʋ,

‑sɩbhä a za n 'pʋä,

'n n 'nɩɛ ‑bhlɛ na'bhë yi.

4 Wɛlɩɩ ‑yɩ 'plɩ a‑a da'aa,

dlɩ 'mlɩ yɩ yilanɩɩ a‑a ‑tiamö tenyii.

‑Sɩbhä a za,

'bɔgʋʋ n 'panyɩɛ da'a 'wʋʋ,

'mɩɔ ‑wʋʋ lɩbhänɩ dɔ'wʋ,

'n n yuä 'cɛlɩ.

N 'kanyɩ swɩ yɔwʋ 'kuanɩ a za,

nza n 'nuä ‑sɩbhä 'cɛlɩ,

‑maa sɛ n ‑waanyɩɛ n 'kanyɩ ‑sɩbhä 'ylimö tulanɩ,

nza n 'celuä.

‑Ɔ nʋä 'nyinyloli a nɩ 'tatinɩ ɔ 'nyinyloli a gbʋ 'yi

5 Nɩkpɛɛ ‑ɔ nʋ a‑a da'a ‑mä a gla'mö swɩyɔwʋkuanɩlii,

‑tiamö a dɔ'wʋ,

‑amö ɔ 'nɩɛ swɩ yɔwʋ 'kuanɩ,

‑maa n ‑yi sɛ nɩɩ,

a'bhï abhʋa ɔ 'kuanɩɛ swɩ yɔwʋ.

'N ɛ 'nɩ ‑bhö a 'wuë abhʋa,

a gla'mö a ‑nʋä a ‑bɛ 'mö ɔ 'kuanɩɛ swɩ yɔwʋ.

6 Nɩkpɛ 'la,

a gla'mö a ‑nʋä a ‑bɛ kɔ ‑bɛ 'wʋ 'mö zlɔmanɩ zaa,

yɩ ‑gäa'a kɛ.

7 A nɩ 'tatinɩa'a 'ɔ 'nyinylolii a gbʋʋ 'yi,

a nɩ 'pɔ swɩ nyɛmʋ 'mö,

nzɩɩ nyɛmʋ toa 'wʋ lu,

swɩ toa tenyii yɔwʋ 'kunɩ.

8 A ‑yayaya,

'a 'zʋzʋsaa nɩ tulanɔɔ 'ylimö nɩɩ,

a ‑wɔɔ.

9 'Bɔgʋʋ n 'cɛlanyɩ a‑a 'wʋʋ,

nyɩasɛ n 'nuä a ‑sɩbhä 'cɛlɩ,

‑maa n 'kanyɩ 'mö kpɔ 'na 'dɩmözʋwɛlɩɩ 'wuë a ‑kɩɩ ‑bhlɛ 'klʋkpamö zʋ 'yize,

n 'kä ‑sɩbhä 'ylɩmö,

nza n 'celu a‑a ‑sɩbhä.

10 Miɛ abhlɩ da'a,

‑maa ‑sɩkaa a dɔ'wʋ,

sɛ'ɛ n gbää nɩɩ,

nɩkpɛɛ ‑ɔ nyima a‑a da'a gbʋʋ,

a ‑kä 'ɔ 'nyinylolii a gbʋʋ 'yi 'tatinɩɩ,

'yi n 'kʋä 'tatinɩmö.

Na'bhë Zezwii Kliisɩ a 'yila 'klʋ n yɛ yɩ gbʋʋ 'yi 'tatinɩ.

11 Nzɩɩ Sataa ‑tɩnyɩa'a bhäla ‑gömö ‑gbälɛ,

‑maa ‑a ‑yia 'saa ɔ yɩbhä 'kwädlɩ.

Pɔɔlʋ a dlɩ klɛ Tiitɩ a za 'yli

12 N möä ‑mä Tlʋasɩ n 'kä ‑Alowli Zezwii Kliisɩ 'a 'Mänatɩtɩɩ biaa,

n ghlɛɛ ‑mä,

ɔ'bhë,

'tɛnyɩ a ‑tɛnyɩ ɔ nyɩaaa n 'kä libho 'la nʋ.

13 Ɔ nyɩa'mɛ abhlɩ ‑sɩbhä 'wë,

‑maa ‑aa ‑daayu Tiitɩ,

n 'nɔɔ ‑mä Tlʋasɩ ghlɩnɩ zaa,

'na dlɩɩ,

'yli ɛ klɛɛ tenyii ‑sɩbhä a za,

'n n yiɛ ‑mä a ‑nʋa kɩnɩ cuu,

'n n yiɛ mä'ä Masedʋanɩ ‑bhölɩ 'mö yi.

Kliisɩ mɔɔ 'tɛɛ 'mö mɔɔ 'plɩɛ 'wlu

14 Sɛ yɩ 'nɩ 'mö ‑wʋ ‑kë,

sɛ yɩ yi 'mö ‑wʋ ‑kë,

n bhälɩ Lagɔ 'yize.

Ɛ'ɛ ‑bhö nyɩasɛ,

‑maa mɔɔ ‑sanyɩɛ ‑lɛ,

sɛɛ 'bhlɩlowli 'kɔdɔ ‑kä'ɛ tʋ 'wlu 'plɩ 'n ɔ ‑kä'ɛ nyebhï köbhä 'n ɔ ‑suë'ɛ 'bɩwʋʋ,

Zezwii ‑kanyɩ ‑sɩbhä 'kwädlɩ 'bɩwʋ ‑su,

saa 'wuë sɛ ‑a biaa 'ɔ nglɩɩ nglɛ a nglɛ a sɛɛ,

nɩkpa 'kä ‑sɩbhä sɛ yɩbhlɩmanɩ nɩɩ,

Kliisɩ mɔɔ 'tɛɛ 'mö,

mɔɔ 'plɩɛ 'wlu.

15 ‑Abhʋaa nyɛɛ nɩkpa Lagɔ a 'nglɩ 'mö Zezwii Kliisɩ a 'dɩɩ,

nɩkpaa ‑wa ghlɩɛ Lagɔ 'a 'pʋpʋɛ oo,

‑wa 'nɛɛ ghlɩ oo,

wa 'wuë a dɛ,

nglɛ a nglɛ a sɛ ‑a ‑wʋä.

16 ‑Lɛ a nglɛ a ‑nglɛ 'la,

‑mumuë a dɛ,

'kunglɛ a ‑mɛɛ ‑lɛmöä kwiee,

'mö ɛ glɩnɩɛ.

‑Mumuë a dɛ 'pʋpʋnglɛ a ‑mɛɛ ‑lɛmöä 'pʋpʋɛɛ,

'mö ɛ glɩnɩ'ɛɛ.

Lagɔ 'a libho 'la ‑wʋ kää 'nglɩ ‑gömöö,

‑ɔ mlɩnɩ bhä wʋ nʋnʋgba 'mö 'nɩ?

17 ‑Tiamö abhlɩ,

nɩkpa ‑mumuë a ‑bɛ,

wa ‑kä Lagɔ 'a wɛlɩɩ bia dɔ'wʋ ‑wʋʋ,

moni wa tɛlɩniɛ 'mö sɛ.

‑Maa ‑abhʋa ‑abhlɩ,

‑a ‑kɩɩ bia dɔ'wʋ ‑wʋʋ,

Kliisɩ a libho ‑a nʋä zaa,

‑aa 'pä käbösɛ dlɩ.

Sɛɛ Lagɔ ‑kanyɩɛ libhoo ‑a nʋä 'wʋ 'yɩbhänɩ a za,

ɔ'bhë sɛ ɔ nyɩanyɩɛ 'ɔ wɛlɩɩ,

‑sɩbhä ‑a bhïliɛ 'tɩɩ.