1 Kolɛɛtɩ a ‑nʋa 14

'Wugɔmʋʋ 'Wlɩlɩ a 'nyupälɩɩ

‑Atʋayuënyɩ,

Lagɔ 'kanyɩ ‑wawʋ dlɩ zɛmö 'zʋ a gbʋʋ,

mʋʋ nɩ plɛnanyɩ.

Lagɔ 'a 'Wugɔmʋʋ a 'nyupälɩɩ ɔ ghlaa ɔ ‑nʋa 'wʋʋ,

a nɩ 'yɩbhänɩmɔnyɩ.

'Nyupälɩɩ ɔ ‑kamö 'wʋ ghäla n‑n nyɛɛ nɩkpa ɔ 'nglɩ 'mö 'dɩɩ,

'mö a nɩ 'yɩbhänɔ tenyii a'bhë.

2 ‑Ɔ bhïlanɩɛ käbögbɩ ɔ'ɔɔ ‑yi 'möö,

Lagɔ 'mö ɔ bhibhee,

‑maa nɩkpɛ ɔ'ɔɔ 'dɩ 'nyɛ.

Lagɔ 'a 'Wugɔmʋʋ mɔɔ ‑sooo 'n ɔ bhïlaa wɛlɩ a ‑mi ‑yɩɩɛ 'mönʋsɛ ‑wʋ zaa,

‑bɛ 'nɩɛ 'ɔ bhibhewɛlɩɩ 'mö ‑ngö.

3 ‑Maa ‑mɔ Lagɔ 'a 'Wugɔmʋʋ kälɩnɩɛ wɛlɩ kɛ 'klʋ ɔ 'kɩ nɩkpa 'nyɛɛ,

ɔ ‑kä bhïlaa,

ɔ 'kä ɔ bhɩa 'dɩ 'mö zʋ,

ɔ 'kʋä swɩɩ nyɛmʋ 'mö 'pä,

ɔ 'kʋä dlɩ 'mlɩ 'pä a za‑a.

4 ‑Ɔ bhibhenɩɛ käbögbɩɩ 'mö Lagɔ,

ɔ 'yize 'a dlɩ'wʋkänɔɔ,

'mö ɔ kwää 'yukuusɛ.

‑Maa ‑mɔ Lagɔ 'a 'Wugɔmʋʋ kälɩnɩɛ wɛlɩ kɛ 'klʋ,

ɔ ‑kɩɩ nɩkpa 'nyɛɛ,

ɔ 'bhɩa Lagɔgänɩwaa 'wuë 'a dlɩ'wʋkänɔɔ 'mö ɔ kwää 'yukuusɛ.

5 ‑Tiamö abhlɩ,

n yɩbhä nɩɩ,

a 'wuë Lagɔ nɩ 'panyɩ 'nyu a 'kä käbögbɩ a'aa ‑yi 'mö bhïlanɩ.

‑Maa 'nyupälɩ ɔ ‑kamö 'wʋ ghäla n‑n nyɛɛ 'ɔ 'Wugɔmʋʋ a 'nglɩ 'mö nɩkpa 'dɩɩ,

'mö n yɩbhää tenyii a'bhë ɔ nɩ ghälaanyɩ 'wʋ.

'Nyupälɩ 'la mɩɩ kää dɛsɛ mɩɩ ziɛ käbögbɩɩ a 'möbhïlanɩbhïlanɛ ‑ɛɛɛ zɛmö sa‑a 'wʋ.

Miɛ abhlɩ,

‑maa a ‑kä 'wlu 'yɩbhää,

‑mɔmɔɔ ‑kä käbögbɩɩ 'mö bhïlanɩ,

yɩ ‑kä zɛmö 'sɔɔɔ,

yɩ yi ɔ 'bhɩa 'wuë 'yukusɛ kwä zaa,

yɩ ‑kämö'ɛ yɩbhlɩ dɛsɛ.

6 ‑Atʋayuënyɩ,

nimï n yɩbhanyɩɛ dɛ'ɛ nɩɩ:

N ‑kä ‑mä 'a mä'a yi,

n ‑kaanyɩ käbögbɩ a'aa 'mö ‑ngö 'mö 'dɩ 'nyɛnɩ,

yɩ 'nɩ zɛmö 'sɔɔɔ,

dɛ ‑ma yɩ kä bhä a dɔ'wʋ sɛ 'nɩ?

Yɩ'ɩɛ dɛsɛ ‑kä 'lɩlɩlɩ.

‑Maa n ‑kä ‑mä a jijo'wʋ yii,

Lagɔ 'a 'Wugɔmʋʋ ‑kaa wɛlɩ kɛ 'klʋ kälɩnɩ,

n ‑kaanyi gbëaa 'nyɛɛ,

mɩɩ kää dɛsɛ.

Lagɔ 'a wɛlɩɩ,

'ɔ 'Wugɔmʋʋ 'nuaaa 'mö 'tɩɩ,

'mö n ‑kaanyɩ 'cɩaa,

mɩɩ kä'ɛɛ dɛsɛ.

7 A nɩ 'pänɩɛ ‑ka gbägbälii dlɩ kɛ.

Ɛ yi ‑väla oo,

ɛ yi kpëte oo,

a nɩ 'päniɛ ‑ka dlɩ kɛ.

‑N 'ni sasɛ bhlɩɩ,

sɛ wa 'kä bhä sɛ yɩ gbää 'mö 'nʋ 'nɩ.

8 Tʋgwɩlɛglɛ ‑n 'nɛ sasɛ bhlɩɩ,

sɛ wa 'kä bhä sɛ ‑yi nɩɩ tʋ yɛ bhli 'n wa 'kä bhä nyɔla wa 'kä tʋ 'mö mö 'nɩ?

9 Sɛ ‑bhʋlʋ ‑kpɔ 'la ‑sɩbhä käbögbɩɩ a 'möbhïlanɩbhïlanɛ ‑wʋmöä.

Miɛ nɩɩ,

gbɩ a ‑mi ‑bɛ 'nɩɛ 'mö ‑ngö a ‑kɩɩ 'mö bhïlanɩ,

yɩ 'nɩ zɛmö 'sɔɔɔ,

‑bɛ 'naa 'kä 'a 'saa a bhïlaa 'mö 'nʋ zaa,

'fʋ a ‑gëbë a yɛɛ ‑sɛ.

10 Mä'ä 'pɩwʋ a gbägbägbɩɩ,

yɩ'ɩɛ muënɩ,

yɩ 'wuë zɛmö yɩ kää bhʋlʋbhlʋ.

11 ‑Maa nɩkpɛ ‑kä gbʋ gbä,

n 'nu 'mö ‑ngöö,

ɔ dɔ'wʋ lɛgäyi ‑n glɩnɩɛ,

ɔ'bhë,

lɛgäyi ɔ glɩnɩɛ na dɔ'wʋ.

12 Zaa,

abhʋaa 'tɛɛ sa'a Lagɔ 'a 'Wugɔmʋʋ 'a 'nyupälɩɩ a sɛtɛlɩyiliyɔwʋʋ,

abhʋa n nyɛɛ 'dɩ nɩɩ,

'ɔ 'nyupälɩɩ ɔ ‑kamö 'wʋ ghäla,

n‑n bhïlaa 'mönʋsɛ n‑n kwää Zezwii a ‑nʋa a ‑zɩkpaa 'yukusɛɛ,

'mö a nɩ tɛlɩ sɛ a 'kɩ tenyii ghlɩ.

13 ‑Sɩbhä a za,

‑ɔ pa‑a 'nyu ɔ 'kä käbögbʋ ɔ'ɔɔ ‑yi 'mö bhïlanɩ,

ɔ ‑kʋʋ ‑mä a jijo'wʋ 'mö bhïlanɩ 'wëë,

ɔ nɩ tɛlɩ sɛ,

ɔ 'kä 'ɔ bhïlawɛlɩ 'la zɛmö ‑sɛ.

14 N ‑kä käbögbʋ 'mö bhibhenɩɩ,

‑tiamö abhlɩ,

Lagɔ 'a 'Wugɔmʋʋ mɔɔ bhibhenɩɩɛ 'mö,

‑maa na'bhë ‑amöö 'nɩɛ dlɩ 'pä zaa,

'saa n ‑wʋä bhïla dɔ'wʋʋ,

wʋ'ʋä na 'bhɩa a ‑lu a ‑lu 'mö ‑kä.

15 Zaa,

sɛ n 'kä bhä 'mö 'zʋmözʋmö 'nɩ?

N ‑kä 'Wugɔmʋsɛ bhibhe 'wëë,

n yi'ɛ 'mönʋsɛ bhibhe.

N ‑kä 'Wugɔmʋsɛ bhlɩ 'wëë,

n yi'ɛ 'mönʋsɛ bhlɩ.

16 N‑n ‑kä 'Wugɔmʋsɛ a 'yize Lagɔ bhälɩɩ,

‑ɔ ‑wʋmöa ‑mä ‑zɩkpaa 'möö,

ɔ'ɔɔ 'yɛ ‑na'a sɛ ‑n bhälɩɛ Lagɔ 'mö 'nʋʋ,

sɛ ɔ 'kä bhä 'wʋ nglu ɔ 'kä:

«‑Amɛɛ!»

nʋ 'nɩ?

Bhälɩwɛlɩ 'la,

ɔ 'niɛ 'mö ‑ngö zaa,

ɔ 'naa 'kä ‑sɩbhä nʋ.

17 ‑Na'a bhibhewɛlɩɩ yi tenyii nɛnɩ oo,

‑maa ‑bɛ 'niɛ 'mö ‑ngö zaa,

yɩ 'naa 'kä nɩkpɛ ‑bhlʋ a'bhë 'yukusɛ kwä.

18 N bhälɩ Lagɔ,

sɛ n bhïlanɩɛ käbögbɩ 'mö 'n n zeanyɩ a 'wuë 'wʋ a za.

19 Miɛ abhlɩ,

‑maa Zezwii a ‑nʋa ‑kä 'wlu 'yɩbhä,

n ‑kʋä wɛlɩkïbhïya wa 'kää 'mö 'nʋ 'mö 'cɩanɩɩ,

mɩɩ nɛnɩɛ na dɔ'wʋ,

mɩɩ ziɛ n 'kä wɛlɩ 'kɔkɔmlɛ gbɩ a ‑mi wa'aa 'mö ‑ngö 'mö bhïlanɩ 'wʋ.

20 ‑Atʋayuënyɩ,

a nɩ tɩ ‑li 'yuë 'tikïyie a sɛ 'mö 'nʋ.

Ɛ ‑kä 'kpʋkpʋli a nʋnʋdɔ'wʋʋ,

a nɩ ‑wʋ 'yuë 'tikïyie a sɛ.

‑Maa ɛ ‑kä ‑li a 'mönʋdɔ'wʋʋ,

a nɩ 'nwi 'kädɩ a sɛ 'mö.

21 Lagɔbɔgʋʋ 'mö a 'kïbhë ‑bhlʋ,

sɛ'ɛ a nʋä nɩɩ:

Lagɔ lɛ naa:

Lɛgäwaa,

‑wa bhïlaa käbögbɩɩ,

'mö n 'kää 'mö ghlɛnɩ,

nɩkpa 'la ‑wa ‑saaa 'klʋkpamö n 'kʋä 'dɩ 'nyɛ,

‑sɩbhä yɩ ‑wʋ 'mö,

‑maa wa 'naa ‑kaa 'yukwli ‑pʋnɩ.^a

22 Käbögbɩ a gbägbʋʋ mʋʋ tulanɩɛ Lagɔ 'a 'mötɛɛnɔɔ ‑waaa Zezwii dlɩ 'wʋ ‑kä 'ylimö.

‑Wa nyɛɛ Lagɔ a 'nglɩ 'mö nɩkpa dɩɩ,

Lagɔ 'a 'mötɛɛnɔɔ 'mö wʋ tulanɩɛ ‑wa 'tɛɛnɩɛ Zezwii dlɩ 'ylimö.

23 A'bhï a nɩ 'pää ‑ka dlɩ.

'A ‑zɩkpaa 'wuë ‑kä a dɛ ‑bhʋlʋ 'wlu 'yɩbhä,

a 'wuë a ‑kä a käbögbɩ a ‑mi ‑bɛ 'nɩɛ 'mö ‑ngö a 'yize 'mö bhïlanɩɩ,

'n nɩkpa ‑mumuë,

ɛ yi 'fʋ a nɩkpa oo,

ɛ yi ‑muë 'nɔɔ dlɩ 'wʋ ‑kä muë oo,

‑sɩbhä a nɩkpa ‑kä a ‑mä a jijo'wʋ yii,

wa 'naa 'kä a bhä nɩɩ a 'wlumö yɛ nyimo nʋ ‑a?

24 ‑Maa a 'wuë 'n Lagɔ ‑kaanyɩ 'mö bhïlanɩɩ,

'n nɩkpa 'la a sɛ a nɩkpɛ ‑bhlʋ ‑kaanyɩ jijo'wʋ yii,

wɛlɩɩ Lagɔ 'a 'Wugɔmʋʋ bhïlananyɩɛ 'möö,

ɔ yi 'mö 'nʋ,

ɔ yi 'ɔ 'nyinylolii yɩbhlɩnɩ.

A 'wuë,

sɛ a 'nyɔɔ da'a gbëaa 'dɩ a za,

ɔ yi sɛ yɩbhlɩmanɩ nɩɩ,

Lagɔ a 'yila 'klʋ a dɔ'wʋ,

ɔ kä gbʋ ‑gömö.

25 'Ɔ 'mlɩ a wɛlɩɩ 'wuë yɩ yi gbëdanguu bhli,

ɔ yi ‑kokomïladigbï glu 'pä,

ɔ yi Lagɔ a 'nglɩ 'ghlimanɩ,

ɔ yi nɩɩ:

«Lagɔ ‑wʋanyɩ ‑tiamö jijo'wʋ» nʋ.

Zezwii a ‑nʋa a ‑zɩkpaa 'mö a ‑lii 'wuë yɩ nɩ ‑käbha 'yli

26 ‑Atʋayuënyɩ,

sɛ'ɛ n gbää nɩɩ,

a ‑kä 'wlu 'yɩbhä a 'kä Lagɔ bʋbɔɔ,

a 'wuë bhʋlʋbhlʋ,

sɛɛ Lagɔ 'a 'Wugɔmʋʋ ‑soanyɩɛ a nɩ 'zʋ ‑sɩbhä.

‑Mɔmɔɔ ‑kä ‑lɛ 'lʋ 'pää,

a nɩ bhlu,

‑mɔmɔɔ nɩ ‑sɛsɛnɩ Lagɔ 'a wɛlɩɩ a 'kïbhë dlɩ ‑gömö,

Lagɔ 'a 'Wugɔmʋʋ ‑kä ‑mɔmɔɔ wɛlɩ kɛ 'klʋ kälɩnɩ,

ɔ nɩ bhïlii.

Ɔ ‑kä ‑mɔmɔɔ käbögbʋ 'mö bhïlanɩ,

ɔ nɩ gbʋ.

Ɔ ‑kä ‑mɔmɔɔ gbʋ 'la a zɛmö sʋlʋnɩɩ,

ɔ nɩ ‑sʋʋ zɛmö.

‑Li 'la 'wuë sɛ yɩ 'kanyɩɛ Lagɔ 'a wɛlɩɩ 'mö a dɔ'wʋ 'yukusɛ kwää,

‑sɩbhä yɩ nɩ 'plɩ 'wʋ.

27 Käbögbɩɩ a dɔ'wʋ,

dɛ a yɩbhää 'wlu nɩkpa 'sɔ nɩkpa ta ‑kä wɛlɩ ghäyɩ 'pä wa ‑kɩɩ 'mö bhïlanɩɩ,

yɩ ‑zu.

Wa nɩ 'zʋ ‑sɩbhä bhʋlʋbhlʋ,

‑mɔmɔɔ 'kɩ zɛmö ‑sɛ.

28 Yɩ zɛmösɛnyɔ 'nanyɩ jijo'wʋ ‑wʋʋ,

‑mɔ Lagɔ 'a 'Wugɔmʋʋ ‑kɩɩ 'mö bhïlanɩɩ,

ɔ nɩ tɩ gbʋ ‑dɩ,

‑maa ɔ nɩ bhïlanii dlɩ zɛmö ɔ 'kä ‑sɩbhä Lagɔ bhibhe.

29 Ɛ ‑kä ‑muë Lagɔ 'a 'Wugɔmʋʋ kälɩnɩɛ wɛlɩ kɛ 'klʋ wa 'kɩ wa 'bhɩa 'nyɛ muëë,

nɩkpa 'sɔ,

nɩkpa ta mʋa nɩ bhïlii,

nzɩɩ ‑muë'la 'wuë 'kɩ 'ylɩmö Lagɔ mɔɔ ‑kʋäa 'mö bhïlanɩ a za.

30 Lagɔ 'a 'Wugɔmʋʋ ‑kä a gla'mö a ‑nɔ ‑bhlʋ wɛlɩ kɛ 'klʋ kälɩnɩ ɔ ‑kɩɩ bhïla dɔ'wʋ ‑wʋʋ,

'n ɔ ‑kä'ɛ ‑mɔmɔɔ wɛlɩ kɛ 'klʋ kälɩnɩ,

nɩkpɛ 'la ‑kä 'wʋ ‑sɔ,

ɔ ‑kä gbʋ ‑dɩɩ,

tɛkänɔɔ nɩ 'zʋ vlɩɩ.

31 Abhʋa Lagɔ 'a 'Wugɔmʋʋ kälɩnɩɛ wɛlɩ kɛ 'klʋʋ,

a 'wuë a bhɛnɩ a 'kɩ ‑sɩbhä bhʋlʋbhlʋ bhïla.

‑Lɛ a dɔ'wʋ a 'bhɩa ‑muë'la 'wuë yi 'mö 'nʋ,

yɩ yuë swɩ nyɛmʋ 'mö 'pä.

32 Lagɔ 'a 'Wugɔmʋʋ ‑kä nɩkpɛ 'mö bhïlanɩɩ,

ɔ 'nɔɔ 'wlumö ‑sunɩ,

‑maa nɩkpɛ ‑kä bhïla dɔ'wʋ ‑wʋʋ,

ɔ'bhë mɔɔ ‑suä ɔnyɩ.

33 Nyɩasɛ n'n‑ä ‑sɩbhä gbää,

‑maa Lagɔ 'nɩɛ ‑lii ‑yɩ ‑wʋä bidibidi 'yɩbhä,

ɔ yɩbhä nɩɩ,

‑lii 'wuë yɩ nɩ ‑wʋ 'tɩɩ.

Zezwii a ‑nʋa a ‑zɩkpöö 'wuë 'mö,

‑sɩbhä yɩ ‑wʋä ‑mä.

34 A ‑kä 'wlu 'yɩbhä a 'kä Lagɔ bʋbɔɔ,

ngwlɩɩ nɩ ‑wʋ vlɩɩ.

Lagɔ 'a wɛlɩɩ sɛ'ɛ yɩ nʋä nɩɩ,

nyɩbhɛlʋ mɔɔ glɩnɩɛ 'nglɔ a 'wukpële.

Wɛlɩ 'la wa nɩ 'zwi 'klʋkpamö,

yɩ za,

a ‑kä 'wlu yɩbhää,

wa'aa ‑kä wa 'kä bhïla.

35 'Nglɔ 'nɩ Lagɔwɛlɩɩ a kïbhë ‑mämaa 'mö 'nʋʋ,

ɔ nɩ 'nɩgböä 'wë,

ɔ 'kä ɔ 'luwli ‑mä 'ligbë 'mö nimï 'yɩbhänɩ.

‑Maa dɛɛ Zezwii a ‑nʋa 'wuë yɩbhää 'wlu 'nglɔ ‑kä ‑lɛ bhïlanɩ,

yɩ'ɩɛ nɛnɩ.

36 Wɛlɩ nɩ,

a ‑kä nɩɩ ɛ'ɛ ‑bhö mi nʋʋ,

nimï n yɩbhanyɩɛ nɩɩ:

‑Mä 'a mä'a ‑mä Lagɔwɛlɩɩ tɛɛnɩ bhä ‑a?

‑Maa,

a 'yize abhʋaa 'nwi bhä ‑a?

37 Nɩkpɛ ‑kä ‑tiamö nɩɩ,

Lagɔ mɔɔ bhïlanɔɔ 'mö,

ɔ ‑kä nɩɩ Lagɔ 'a 'Wugɔmʋʋ mɔɔ ‑wɔɔɔ ‑gömö nʋʋ,

ɔ nɩ yɩbhlɩnɩ sɛ nɩɩ,

sɛ n nyanyɩɛ dɛ'ɛ 'dɩɩ,

‑Alowli Zezwii a'bhë mɔɔ gbää ‑sɩbhä.

38 ‑Maa ɔ 'ni ‑sɩbhä yɩbhlɩnɩɩ,

ɔ'bhë,

Lagɔ 'nɔɔ ‑yi.

39 Zaa,

‑atʋayuënyɩ,

sɛ'ɛ n gbää nɩɩ:

A 'wuë,

Lagɔ 'kanyɩ wɛlɩ kɛ 'klʋ kälɩnɩ,

a 'kɩ a 'bhɩa 'nyɛ,

'mö a nɩ tɛlɩ sɛ.

‑Maa ‑wa bhïlanɩɛ käbögbɩ wa'aa 'mö ‑ngö 'möö,

a nɩ tuë'ɛ 'yio 'wʋ ‑sɛ.

40 A ‑kä 'wlu 'yɩbhää,

‑lii 'wuë a nʋä,

yɩ nɩ kä 'klʋkpamö,

yɩ nɩ ‑wʋ 'tɩɩ.