1 Kolɛɛtɩ a ‑nʋa 15

'Mänatɩtɩɩ ‑yɩ bhïlaa Zezwii a gluwlʋwlɛɛ a dɛɛ

‑Atʋayuënyɩ,

Zezwii 'a 'Mänatɩtɩɩ n 'nyanyɩ a‑a,

'mö n 'kanyɩɛ dɛ'ɛ 'wʋ ligbanɩ.

Wɛlɩ 'la n 'nyanyiɛ,

'wʋ a ngwliɛ 'n a yiɛ 'wʋ gbulo.

2 Yɩ 'wuë sɛ n 'nyanyiɛ,

a ‑kɩɩ ‑sɩbhä 'kwädlɩ dlɩ 'wʋ ‑kää,

mɩɩ 'kää 'nglɩ ‑kä a 'kä Lagɔ 'a 'pʋpʋɛ ghlɩ.

‑Maa 'n yɩ 'nɩ ‑sɩbhä ‑wʋʋ,

'a dlɩtɛɛnɩtɛnɛɛ,

'fʋ a ‑leyiɛ.

3 Wɛlɩɩ n 'nyanyɩɛ,

sɛ wa 'cɩa'miɛ na'bhëë,

‑sɩbhä n 'cɩanyiɛ 'tɩɩ.

Yɩ 'wuë a dɔ'wʋ,

‑yɩ kää tenyii dɛsɛ miɛ nɩɩ:

Kliisɩ,

‑a'a 'nyinylolii a za ɔ 'kuä.

‑Sɩbhä yɩ cɛlɩ a‑a 'kɩ ɔ dɛ.

4 Ɔ 'kuä,

wa zizoo 'wë a ylɩ a tanɛɛ 'mö,

'n Lagɔ yoo gäla 'n ɔ yoo glu ‑sɛ,

‑sɩbhä yɩ cɛlɩmö a 'yɛɛ 'kɩ ɔ dɛ.

5 Ɔ 'wlʋä glu 'wëë,

ɔ tulanɩ ɔnyɩ Piɛlɩ 'ylimö,

'n ɔ yi'ɛɛ ɔnyɩ 'ɔ tietiewaa kʋgbä'sɔ ‑kpɔ 'ylimö tulanɩ.

6 Yɩ 'plɩɛ ‑sɩbhä 'wëë,

ɔ ‑nʋa 'wuë,

wa gla'mö a nɩkpaa a 'du ‑bhlʋ nɩkpa a gwlɩ ngbï (500) a sɛ,

'n ɔ yuë'ɛɛ ɔnyɩ 'ylimö tulanɩ.

‑Lɛ a nɩkpa 'la,

wa ‑mumuë yɛ abhlɩ 'ku,

‑maa ‑mumuë a ‑bɛ ‑bhölɩ ‑bhlɛ.

7 ‑Mi'la 'plɩɛ 'wëë 'n ɔ yiɛ ɔnyɩ Zaakö 'ylimö tulanɩ,

'n ɔ yi'ɛɛ ɔnyɩ 'ɔ tietiewaa 'wuë 'ylimö tulanɩ.

8 Wa 'wuë wa yoo 'ylɩmö 'wëë,

'gbëbhlenɩdɔ'wʋ,

‑amöö ‑bhɩɛɛ 'yu a ‑mɔ ‑ɔnyɩɩ nɩkplokwë 'nɩɛ ‑lɛ ghlɛ wa gwälɩ 'n ɔ ‑yiiɛ ɔnyɩ 'ylimö tulanɩ.

9 'Na sɛ n pää dlɩ a dɔ'wʋ,

'ɔ tietiewaa 'wuë gla'mö,

sɛ n ‑gblɩ a‑a ɔ ‑nʋa a ‑zɩkpö a za,

n'n‑ä dɛsɛ ‑kä.

'Lɩlɩlɩ a dɔ'wʋ,

n'n‑ä ɔ tietienyɔ a ‑gba 'mö mlɩnɩ.

10 ‑Maa Lagɔ,

'ɔ ngäzɩdlɩɩ a za,

nza ɔ 'zʋaaa 'saa n glɩnɩɛ dɛ'ɛ 'wʋ.

Sɛ ɔ 'pää da'a na ngäzɩdlɩ 'n ɔ ‑yiiɛ ɔ tietienyɔ 'wʋ 'zʋaa,

‑lu a ‑lu ‑sɩbhä kää 'ylimö.

Nyɩasɛ n'n‑ä ‑sɩbhä gbä,

‑maa ɔ 'zʋaaa ɔ tietienyɔ 'wʋʋ,

'ɔ libhoo n nu tenyii,

n zi ‑muë'la 'wuë 'wʋ,

nza n gbää ‑sɩbhä.

‑Tiamö a dɔ'wʋ,

nanyɩgäsɛ ‑amöö 'nɩɛ libho 'la nʋ,

‑maa Lagɔ a'bhë,

'ɔ ngäzɩdlɩɩ a za,

mɔɔ nʋnɩ'muä 'mö.

11 ‑Maa ɛ yi ‑amö oo,

ɛ yi 'ɔ tietiewa ‑muë'la 'wuë muë oo,

'ɔ 'Mänatɩtɩɩ,

‑a ‑kɩɩ biaa,

nuë ‑bhʋlʋ ‑a kää.

Sɛ ‑a bhïliɛ,

‑sɩbhä ‑a 'nyanyiɛ 'n a yiɛ 'wʋ nglu.

'Kuduwaa a gluwlʋwlɛɛ a wɛlɩɩ

12 'Mänatɩtɩɩ ‑a nyɛɛ nɩkpaa,

sɛ'ɛ yɩ nʋä nɩɩ:

Kliisɩ 'kuä 'wëë,

Lagɔ gälɔɔ 'n ɔ yoo glu ‑sɛ.

Zaa,

yɩ ‑wʋ'ɛ sa'a 'möö,

sɛ yɩ ‑wʋ ɔ 'n a gla'mö a ‑nʋä ‑mumuë nʋ ɔ nɩɩ,

Lagɔ 'naa 'kä 'kuduwa glu ‑sɛ 'nɩ?

13 Sɛ wa nʋä da'aa,

ɛ ‑kä a ‑tiamö ‑sɩbhä ma‑a,

sɛ'ɛ yɩ sɛ a 'yɛɛ zɛmö nɩɩ,

Kliisɩ,

ɔ'ɔɔ glu 'wlʋ.

14 'N Zezwii Kliisɩ 'nɩ ‑tiamö glu 'wlʋʋ,

‑a'a Lagɔwɛlɩɩ ‑a biaa,

nyɩasɛwɛlɩɛ,

abhʋaa 'tɛɛniɛ dlɩɩ,

'fʋ a ylɔɔ.

15 Sɛɛ a gla'mö a ‑mumuë nʋä da'a nɩɩ,

Lagɔ 'naa 'kä 'kuduwa glu ‑sɛ,

‑sɩbhä yɩ ‑kä a ‑tiamö ‑wʋʋ,

Lagɔ 'nɩɛ a‑a Zezwii Kliisɩ glu ‑sɛ zaa,

‑abhʋaa nʋä nɩɩ Lagɔ kɔ glu ‑sɛɛ,

Lagɔ mö ‑a yɛ a‑a da'a widɩ 'wʋ 'libhïnɩ.

16 Sɛ'ɛ n gbää nɩɩ,

'n 'kuduwa 'nɩ bhɛnɩ wa 'kä glu 'wlʋʋ,

Kliisɩ ɔbhlɩ,

ɔ'ɔɔ'ɛ glu 'wlʋ.

17 'N Kliisɩ 'nɩ ‑tiamö glu 'wlʋʋ,

'fʋ a 'tɛɛnɩɛ Lagɔ dlɩ,

‑maa 'a 'nyinylolii a gbʋʋ ‑wʋanyɩ ‑gömö 'yize.

18 Zezwii a ‑nʋa 'wuë ‑wa yɛɛ 'kuu,

'yli wa yɛɛ bhɩɛ.

19 ‑Abhʋa ɔ ‑nʋa 'wuë,

a‑a nɩ ‑kɔɔ mä'ä 'pɩwʋ a 'yize a za dlɩ 'tɛɛnɩɩ,

‑abhʋaa glɩnɩɛ nɩkpaa 'wuë a gla'mö a dɔ'wʋ ngäzɩwaa.

Zezwii Kliisɩ 'wlʋ ‑tiamö glu

20 ‑Maa Lagɔ gäla ‑tiamö Kliisɩ 'n ɔ yoo glu ‑sɛ.

Sa'a ‑sɩbhä ɔ tulanɩɛ 'ylimö nɩɩ,

'kuduwaa 'wuë ɔ yuë glusɛmö.

21 Sɛɛ 'kwie 'bhöönɩɛ nɩkpɛ ‑bhlʋ ‑kpöö 'möö,

‑sɩbhä gluwlʋwlɛ 'bhöönɩɛ nɩkpɛ ‑bhlʋ ‑kpöö 'mö.

22 Miɛ nɩɩ,

nɩkpaa 'wuë sɛ wa 'bhöönɩɛ Adaa 'mö a za,

nza wa kuä.

Sɛ ‑bhʋlʋ ‑kpɔ 'la ‑sɩbhä wa 'kää Kliisɩ a bɔɔmö a za zɩkpa ‑a 'naa 'kää 'wʋ bhɩɛ ghlɩ.

23 ‑Lii 'wuë,

'tɛnyɩ Lagɔ ‑dɩniɛ yɩ 'kä 'mö 'yli 'wlʋnɩɩ,

'mö yɩ 'wlʋnɩɛ 'mö 'yli.

Kliisɩ 'a gluwlʋwlɛ 'la,

mɛɛ glɩnɩɛ gluwlʋwlɛ 'wuë a tɛɛnɩdɛ.

‑Zlɩ ɔ ‑kä zɩla'a yii,

‑lɛ ɔ 'kää ɔ ‑nʋa 'wuë glu ‑sɛnɩ.

24 ‑Mi'la ‑käa'a 'plɩ 'wëë,

'n 'pɩwʋ a 'wlusɛnɩda 'kää ghlɛ.

'Kädɩɩ 'wuë ‑wa 'tɛɛ 'mö ‑wa 'kämanɩɛ,

‑waaa 'yɩbhä Lagɔ 'kʋä ‑gömö 'kämanɩɩ,

'n Kliisɩ 'kʋää 'yli bhɩa,

ɔ'bhë 'kämanɔɔ ɔ dɩba Lagɔ 'nyɔ a‑a,

'n ɔ 'kɔnyɩɛ kä'mö 'wlu sɩbhä.

25 Kliisɩ kä ɔ 'kä 'kämanɩ ‑këë Lagɔ 'kä gbä ɔ 'kä 'ɔ ‑gblɩwaa 'wuë kple ‑gömö 'nigba.

26 'Gbëbhlenɩnɔɔ ɔ 'kää 'yli bhɩaa,

mɔɔ 'kwie mɔ.

27 Nza Lagɔwɛlɩɩ nʋä nɩɩ:

Lagɔ yɛ Zezwii Kliisɩ ‑lii 'wuë a ‑gömökämanɩnyɔ 'wʋ 'zʋaa.^a

‑Maa Lagɔwɛlɩɩ ‑kä ‑sɩbhä gbää,

‑tiamö abhlɩ,

Kliisɩ,

‑lii 'wuë ɔ 'kämani ‑gömö,

‑maa Lagɔ a'bhë ‑ɔ 'nyɔɔ ‑lɛ a 'kämanɔ 'la 'mö ɔ 'nɩɛ ‑gömö 'kämanɩmö.

28 ‑Maa Lagɔ 'a Yuu ‑bhʋlʋ ‑kpɔ,

sɛɛ ɔ dɩba 'zooo ‑lii 'wuë a ‑gömökämanɩnyɔ 'wʋʋ,

‑zlɩ ‑sɩbhä ‑kä gbëdanguu bhli,

ɔ ‑kä 'ɔ ‑gblɩwaa 'wuë 'yli bhɩa 'wëë,

‑lɛ a zlɩ 'la 'mö ‑lɛ ɔ 'kää 'ɔ 'kämanɔɔ 'wuë ‑mä ɔ dɩba Lagɔ kä'mö 'wlu sɩbha,

nzɩɩ ɔ 'yize mɔɔ 'käa'a ‑lii 'wuë a 'wukpëlea glɩnɩ.

29 Gluwlʋwlɛ a dɔ'wʋ,

sɛ'ɛ n gbä'ɛɛ naa:

N ‑yi sɛ nɩɩ,

a gla'mö a nɩkpa ‑mumuë,

nɩkpaa ‑waaa 'wlu ‑wɔlʋ 'n wa yiɛ 'kuu,

wa 'wlumö wa wɔluë 'wlu.

‑Maa a'bhï a nɩ 'pää ‑ka dlɩ,

a ‑kä nɩɩ Lagɔ 'naa 'kä 'kuduwa glu ‑sɛ nʋʋ,

nimï n yɩbhanyɩɛ dɛ'ɛ nɩɩ:

Zaa,

sɛ yɩ ‑wʋ ɔ 'mö 'n a gla'mö a ‑mumuë yɩbhä bhäa'a wa nɩ wɔluë ‑wa yɛɛ 'ku a 'wlumö 'wlu 'nɩ?

30 'N Lagɔ ‑nɩnyɩ ‑tiamö glu ‑sɛɛ yii,

‑abhʋa Zezwii 'a tietiewaa ‑abhʋa ‑wʋä 'kwädlɩ 'ɔ libhoo a za ‑mä 'kwie 'möö,

sɛ yɩ ‑wʋ ɔ 'mö,

a‑a ylɔ bhä ‑sɩbhä 'nɩ?

31 ‑Atʋayuënyɩ,

‑Alowli Zezwii Kliisɩ 'a libhoo n nʋä,

wʋ kä ‑tiamö ‑lu a ‑lu 'ylimö.

'A sɛ a glɩnɩɛ ɔ ‑nʋä,

sɩbhä ma‑a glɩnɩɛ wʋ 'ylimö a ‑lu.

A za ɔ ‑kaaa 'ylɩ ‑bhlʋ 'mö bhɩzɩ.

Miɛ abhlɩ,

‑maa ‑lɛ a libho 'la a za,

sɛɛ zila zɩɛ 'yize,

‑mä 'kwie 'mö ‑mä n ‑wʋä 'kwädlɩ.

32 Sɛɛ 'na ‑gblɩwaa ziaaa 'ylɩ ‑bhlʋ 'mö mä'ä Efɛɛzɩ 'zwɩɩ,

ɛ 'kä bhɩɛ glanɩma n ‑nyɛɛ yɛ gwɩ.

‑Lɛ a zwɩ 'la,

'n ɛ 'nɩ ‑bhö nɩɩ Lagɔ ‑yii 'ylɩ ‑bhlʋ 'mö glu ‑sɛ a za‑a,

dɛ ‑ma yɩ kä bhä sɛ 'nɩ?

'N Lagɔ 'nɩ a ‑tiamö 'kuduwa glu ‑sɛɛ yii,

sɛ'ɛ ‑a 'kä a‑a nɩɩ:

‑A li ‑a 'kä sɛ pö,

‑maa ‑a 'wuë ku ‑a 'kää 'ku zaa,

‑a nɩ tɩ 'fʋ ‑anyɩ yɔlɔa.^b

33 ‑Atʋayuënyɩ,

a nɩ tɩ anyɩ dula,

‑maa ‑n ‑nyɛ 'winyɔ ‑kä 'wʋ ‑bhlinɩ,

'winyɔ ‑n zʋä.

34 A nɩ tɩ ‑bhɩɛ nʋlɩbhäwa,

‑maa a nɩ ‑ligba a 'kä ‑lɛ glɩ,

'a nɛmönɛmösaa 'kä 'mö zlɔnɩ.

Yɩ ‑bhöä tenyii zʋ 'wʋ a'bhë miɛ nɩɩ:

A gla'mö a ‑mumuë 'nɩɛ 'saa Lagɔ glɩnɩɛ ‑tiamö ‑yi 'lɩlɩlɩ.

'Kuduwaa ‑kä glu 'wlʋʋ kpökpalelee wa 'kää ‑su

35 Sɛ'ɛ ‑mumuë 'kää ‑kamä nɩɩ:

«Nɩkpaa ‑wa yɛɛ 'ku 'wëë,

sɛ yɩ 'kä bhä 'mö 'plɩmöplɩmö 'n wa 'kä bhä glu 'wlʋ 'nɩ?

Wa ‑kä glu 'wlʋʋ,

sɛɛ 'wa kpökpaa 'kä bhä ‑wʋ 'nɩ?»

36 ‑Ɔ pää sa'a dlɩɩ,

‑ɔɔ'nɛɛnɩnyɔ ɔ glɩnɩɛ.

‑A 'wuë ‑a ‑yi sɛ nɩɩ,

‑n ‑kä lileyeyi glʋʋ,

ɛ 'maa 'kä zɛ 'wë,

'n ɛ wlʋä.

37 ‑N ‑kä glʋä yii,

lileyeyi a'bhë mö ‑n zʋä ‑mä glu.

Ɛ yi 'sɩkayeyi oo,

'saa‑yeyi ɛ yi glɩnɩ oo,

ɛ'bhë mö ‑n zʋä ‑mä glu,

‑maa 'kwëyi ‑ɛ 'kää 'wlʋ mö ‑n 'nɩɛ ‑mä zʋ.

38 Lagɔ,

'ɔ sɛ ɔ 'yɩbhää ‑ɔ 'wälaa ‑sɩbhä ‑lii 'wuë,

mɔɔ kää 'nglɩ,

lileyʋʋ a kii ‑n glʋä,

sɛ wʋ ‑wʋä bhʋlʋbhlʋ 'n wʋ wlʋä ‑sɩbhä.

39 'Pɩwʋ a ‑lii 'wuë ‑yɩ nyɛpɛɛ,

'wlʋnɩ yɩ'ɩɛ 'wlʋnɩ.

Nɩkpaa ‑wʋ 'wa sɛ,

nɩmaa ‑wʋ 'yɩ sɛ,

zɩɩ ‑wʋ 'yɩ sɛ,

zibhïï ‑wʋ 'yɩ sɛ.

40 Sɛɛ ‑li ‑wʋä mä'ä dʋdʋ 'wʋʋ,

‑sɩbhä ‑mimii ‑wʋ'ɛɛ ‑mä zlɩ 'mö.

Mä'ä dʋdʋ 'wʋ a ‑lii,

yɩ nɛnɩ 'yɩ sɛ 'ylimö,

‑mä ghäyɩ 'wʋ a ‑nɩɩ,

yɩ nɛnɩ 'yɩ sɛ 'ylimö.

41 ‑Mä zlɩ 'mö a ‑lii ‑yɩ lɩɛ,

bhʋlʋbhlʋ 'yɩ lɩlɛ ‑wʋä.

'Ylʋväla lɩ 'a sɛ,

cʋʋ lɩ 'wʋ sɛ,

‑zɛlɩɩ lɩ 'yɩ sɛ.

‑Zɛlɩɩ a'bhï yɩ 'wuë bhʋlʋbhlʋ 'yɩ lɩlɛ ‑wʋä.

42 Sɛ ‑bhʋlʋ ‑kpɔ 'la ‑sɩbhä nɩkpaa ‑kä 'ylɩ ‑bhlʋ 'mö glu 'wlʋ a kpökpaa wa 'kää ‑suu,

‑sɩbhä a 'kää 'a sɛ ‑wʋ.

Kpökpa ‑a ‑suä dɛ'ɛ,

‑a ‑kä 'ku wa 'kää ‑mä glu 'zʋʋ,

zɛzɛlea a glɩnɩɛ.

‑Maa Lagɔ ‑kanyɩ glu ‑sɛ a ‑naa ‑a 'kää ‑suu,

a 'naa 'kä 'kwädlɩ zɛ.

43 Kpökpaa wa zizaa,

a'aa'a dɛsɛ ‑kä,

a'aa'a 'mötɛɛnɔ ‑kä.

‑Maa ‑a ‑kä glu 'wlʋ a ‑naa ‑a 'kää ‑suu,

a'aa'a a 'kä ‑sɩbhä a sɛ ‑wʋ,

gbligbli a 'kää ‑wʋ.

44 Nɩkpɛ ‑kä 'kuu,

ɔ ‑su 'ɔ ‑daagwälɩkpökpaa 'n wa zizoo.

Ɔ ‑kä glu 'wlʋʋ,

Lagɔkpökpaa ɔ ghlɩɛ.

'N ‑Daagwälɩkpökpaa ‑kä ‑bhölɩɩ,

Lagɔkpökpaa ‑bhölɩ'ɛ.

45 Sɛ'ɛ yɩ cɛlɩɛ ‑mä Lagɔbɔgʋʋ 'mö nɩɩ:

TɛkänɩkpɛAdaa,

'pɩwʋnɩkpɛ ɔ 'zʋä.^c

‑Maa Adaa 'sɔnɔɔ,

'Wugɔmʋʋ ‑ɔ nyɛɛ ‑tiamö a ‑bhölɩbhölɛ 'mö ɔ glɩnɩɛ.

46 Kpökpaa ‑a 'kää ‑mä Lagɔ 'a 'pɩwʋlelea 'wʋ ‑suu,

mö ‑a 'nɩɛ 'wʋ tɛɛnɩ.

‑Maa ‑ma ‑a ‑suä dɛ'ɛ,

‑a glɩnɩɛ mä'ä 'pɩwʋ a 'yize a ‑laa,

a ‑kä 'plɩ 'wë 'n 'ɔ 'Wugɔmʋʋ ‑kanyɩɛ bhäla ‑mä'la 'nyɛ.

47 Mä'ä 'pɩwʋ a tɛkänɩkpɛ Adaa,

dʋdʋ 'mö Lagɔ 'libhïä 'wʋ 'n ɔ yoo ‑bhɛ.

‑Maa Adaa 'sɔnɔɔ (Kliisɩ),

‑mä Lagɔ yɔwʋ,

‑mä ɔ 'bhöönɩɛ ɔbhlɩ.

48 ‑Wa ‑wʋä mä'ä dʋdʋ 'wʋʋ,

Adaa ‑ɔ ‑bhɛ a‑a dʋdʋʋ 'wʋ a sɛ a kpökpa wa kää.

‑Wa 'kää ‑mä Lagɔ yɔwʋ ‑wʋʋ,

‑ɔ 'bhöönɩɛ ‑mä a sɛ a kpökpaa wa kää wa 'kä ‑kä.

49 Zaa,

sɛ ‑a ‑nyɛ Adaa ‑ɔ bhɛ a‑a dʋdʋ 'wʋ 'wlʋnɩɛ ‑bhlɛ dɛ'ɛɛ,

‑ɔ 'bhöönɩɛ ‑mä Lagɔ yɔwʋʋ,

‑sɩbhä ‑a ‑nyɔɔ 'kä zɩla'a 'wlʋnɩ.

50 ‑Atʋayuënyɩ,

sɛ'ɛ n gbää nɩɩ,

kpökpaa ‑a ‑suä mä'ä dʋdʋ 'wʋ,

‑a glɩnɩɛ 'ylibhɩɛlaa,

nɩkpɛ 'naa 'kä ‑sɩbhä a ‑na ‑su,

'pɩwʋ mää Lagɔ 'kämanɩɛ mää 'naa 'kää 'yli bhɩɛ,

ɔ 'kä ‑mä plɛ.

51 A ‑pʋnɩ 'yukwli,

n 'kanyɩ wɛlɩ ‑bhlʋ kɛ 'klʋ kälɩnɩ,

n nɛ naa:

‑Abhʋa Zezwii a ‑nʋa,

‑a 'wuë ‑sɩbhä ‑a 'naa 'kä 'gämö 'kunɩ 'wë ɔ 'kä bhäla yi.

Miɛ abhlɩ,

‑maa ‑zlɩ ɔ ‑kä yii,

‑wa yɛ a‑a 'ku 'wë oo,

‑wa 'nɩɛ ‑bhlɛ 'ku oo,

‑a 'wuë mö ‑a 'kää zigbonɩ ‑a 'kä kpökpalele ghlɩ.

52 'Gbëbhlenɩzlɩɩ ‑kä ghlɛɛ,

Lagɔ 'a lɛglɛɛ ‑kä gbä cuu,

sɛ wa bhlɩ'ɛ 'yli a sɛ,

‑a 'wuë,

a‑a 'kää kpökpalele 'la ghlɩ.

Lɛglɛ 'la ‑kä gbää,

'kuduwaa 'wuë,

Lagɔ glu ɔ 'kʋä ‑sɛ,

ɔ 'kʋä kpökpalele a ‑maa 'naa 'kää zɛ 'nyɛ.

‑Abhʋa ‑bhölɩɛ ‑bhlɛ,

'mö ‑a 'kää zigbonɩ,

‑a 'kä ‑sɩbhä kpökpalele ghlɩmö.

53 Kpökpa a ‑ma zɛɛ,

kpökpa a ‑ma a 'naa 'kää zɛ 'mö a kää a 'kä 'mö yinɩ.

Kpökpa a ‑ma 'kwie bhɛnɩɛ ‑gömöö,

kpökpa a ‑ma 'kwie 'naa 'kää ‑gömö bhɛnɩ 'mö a kää a 'kä 'mö yinɩ.

54 Yɩ ‑kä ‑sɩbhä 'wʋ 'plɩɩ,

‑a'a kpökpaa ‑kä ‑sɩbhä a kpökpa 'mö yinɩɩ,

‑lɛ a zlɩ 'la 'mö,

wɛlɩ ‑bhlʋ ‑yɩ cɛlɩɛ ‑mä Lagɔbɔgʋʋ 'möö,

mɩɩ yɛɛ da'a 'yli 'wlʋnɩ.

Sɛ'ɛ yɩ nʋä nɩɩ:

Lagɔ yɛ 'kwie 'wlu 'plɩ,

'ɛ saa yɛ 'yli bhɩɛ.^d

55 Kwie,

dɛɛ ‑na'a 'wluplɩnɩplɩnɛɛ ‑wʋ bhäa'a?

'Kwie,

'mötɛɛnɔɔ ‑n kää n‑n 'kuaa nɩkpaa,

dɛ wʋ ‑wʋ bhäa'a?^e

56 'Nyinylolii a za 'kwie kää 'mötɛɛnɔ.

‑Maa Lagɔ 'a Gböö a za 'nyinyloli kää 'mötɛɛnɔ.

57 ‑Mä yɩ 'mö,

Lagɔ a 'nglɩ nɩ 'ghlimanɩ.

‑Alowli Zezwii Kliisɩ a bɔɔmö a za,

‑a yɛ 'wlu 'plɩ.

58 Na dlɩsɛkädaayuënyɩ,

sa'a ‑sɩbhä yɩ ‑wʋä.

Zaa,

a nɩ 'tɛmanɩ 'yli yɔwʋ 'yize,

dɛ a kää sɛ,

a nɩ nyɔnʋ ‑lɛ kɛ.

‑Alowli Zezwii 'a libhoo a nʋnʋ dɔ'wʋ a nɩ ‑su 'kwädlɩ ku 'mö 'yize.

A nɩ ‑yi sɛ nɩɩ,

libhoo a nʋä ɔ za‑a,

ɛ'ɛ ‑bhö 'fʋ a yɔlɔylʋ.