1 Kolɛɛtɩ a ‑nʋa 13

‑Wawʋʋ mʋʋ ziɛ 'wʋ

N yi mä'ä 'pɩwʋ a nɩkpa 'wuë a gbɩ gbä oo,

n yi a'bhë Lagɔzuzuku a gbɩ 'mö bhïlanɩ oo,

‑maa 'n n 'nɩ ‑wawʋ dlɩ zɛmö ‑kää,

sɛɛ ‑klɩma sɛ 'yɛ 'fʋ ‑gëbëë,

‑sɩbhä n ‑wʋä,

n 'kä ‑bhɩɛ 'fʋ a leyii gbä.

2 Lagɔ a'bhë ‑yii 'mö bhïlanɩ oo,

n yi 'ylizizanɩlii 'wuë ‑yi oo,

Lagɔ 'a wɛlɩɩ 'wuë,

n yi yɩ zɛmö ‑yi oo,

n yi tenyii Lagɔ dlɩ 'tɛɛnɩ n yi ‑sɩbhä a za ‑gägö 'dɩ 'nyɛ yɩ yi ‑gba 'mö 'bhöö oo,

‑maa 'n n 'nɩ ‑wawʋ dlɩ zɛmö ‑kää,

n'n‑ä ‑lu glɩnɩ.

3 'Na 'saa n kää 'wuë n yu 'pʋäwa dilanɩ oo,

n yi 'wʋ nglu a'bhë nɩɩ n 'kä Lagɔ a za si n 'kä 'ku oo,

‑maa 'n n 'nɩ ‑wawʋ dlɩ zɛmö ‑kä,

'na 'saa n nʋä,

wʋ'ʋä ‑lu 'ylimö ‑kä.

4 Nɩkpɛ a ‑mɔɔ kää ‑wawʋ dlɩ zɛmöö,

dlɩ 'mö ɔ ‑kpaanɩɛ,

dlɩ zɛmö ɔ nɛnɩɛ,

ɔ 'bhɩa 'nɔɔ 'yli kälɩ,

ɔ'ɔɔ tɛkpɔ,

ɔ'ɔɔ bha.

5 Nɩkpɛ a ‑mɔɔ kää ‑wawʋ dlɩ zɛmöö,

‑li a ‑mii ‑bhöä zʋ 'wʋʋ,

ɔ'ɔ nwi,

ɔnyɩ a gbʋʋ 'nɔɔ plɛnɩ,

ɔ dlɩɩ 'nɩɛ yɔwʋ ‑su,

ɔ'ɔ kwïla 'klɛ.

6 'Saa kää ɔ 'li a ‑lizoku 'möö,

yɩ 'nɔɔ 'mäna 'wʋ ‑bhö.

‑Ɔ kää ‑wawʋ dlɩ zɛmöö,

'saa kää gbëaa 'mö,

yɩ ‑kä nuoo,

mɩɩ ‑bhooo 'mäna 'wʋ.

7 Sɛ yɩ yi 'mö ‑wʋ ‑kë,

'mlɩ ɔ 'kunɩɛ.

'Saa ‑kɔɔ ghlɩ ‑kë,

swɩ 'nɔɔ yɔwʋ 'kunɩ,

‑maa ɔ 'tɛɛnɩ 'kwädlɩ Lagɔ dlɩ,

ɔ dlɩ 'tɛɛ 'wʋ 'yize.

8 ‑Wawʋʋ a 'yize mʋʋ 'naa 'kää 'kwädlɩ 'yli bhɩɛ.

Lagɔ 'a 'möbhïlanɩwaa a libhoo,

'bhlenɩ wʋ 'kää 'bhlenɩ,

käbögbɩ a ‑mi wa'aa ‑yi a bhïlabhïlu,

'bhlenɩ wʋ 'kää 'bhlenɩmö.

Lagɔ 'a wɛlɩɩ 'wuë a zɛmöyiye,

'yli ɛ 'kää bhɩɛ.

9 ‑Sɩkaa a dɔ'wʋ Lagɔ 'a ‑lii 'wuë,

‑a 'niɛ ‑bhlɛ sasɛ ‑yi.

'Saa 'wuë Lagɔ kälɩnɩnyɩɛ kɛ 'klʋ ‑yɩnyɩ dɩ ‑a nyɛɛ nɩkpaa,

ɛ'ɛ ‑bhö ‑bhlɛ 'ɔ ‑lii 'wuë mi.

10 ‑Zlɩ ‑yɩ nɛnɩɛ tenyii ‑kä ghlɛɛ,

‑a yi nɩɩ 'saa 'wuë ‑a ‑yi a‑a ‑mä dʋdʋ 'wʋʋ,

wʋ'ʋä a ‑lu glɩnɩ nʋ.

11 'Tɛnyɩ 'mö n glɩnɩ a‑a 'yuu,

'na sɛ n bhïla a‑a,

sɛ n pä a‑a dlɩ,

sɛ n nʋ a‑a ‑lii 'mö,

yɩ 'wuë 'yuësɛ yɩ ‑wʋ a‑a.

‑Maa n ‑käa'a 'kɔdɔ zʋʋ,

'yuëlii 'wuë kɛ'mö n ‑sɩɩɛ.

12 Sɛ ‑bhʋlʋ ‑kpɔ 'la ‑sɩbhä ‑a'a Lagɔ a ‑yiye a wɛlɩɩ ‑wʋä.

'Saa ‑a ‑yiɛ ‑bhlɛ ɔ dɛɛ,

sɛ wa ylɩnɩ'ɛ pöpleyi 'mö ‑lu 'wʋʋ,

‑sɩbhä wʋ ‑wʋä ‑bhlɛ.

Sɛ ɔ ‑wʋä 'tɩɩ,

‑a 'nɔɔ ‑bhlɛ ‑sɩbhä 'ylɩmö.

‑Maa ‑lɛ a zlɩ 'la 'mö,

ɔ'bhë gbëdanguu ‑a 'kɔɔ 'ylɩmö.

'Saa ‑a ‑yiɛ ‑bhlɛ dɛ'ɛ ɔ dɛɛ,

kïbhë mö ‑a ‑yinuuä.

‑Maa ‑lɛ a zlɩ 'la 'mö,

ɔ'bhë sɛ ɔ ‑yinyɩɛ 'tɩɩ,

‑sɩbhä ‑a 'kɔɔ yɩbhlɩnɩ.

13 Zaa,

‑li ta mɩɩ kää dɛsɛ:

Dlɩtɛɛnɩtɛnɛ mɛ,

dlɩ'wʋtɛɛnɔ mu 'n ‑wawʋʋ.

‑Maa yɩ ta ‑kpɔ a dɔ'wʋ,

‑wawʋʋ,

mʋʋ kää tenyii dɛsɛ,

mʋʋ ziɛ 'wʋ.