1 Kolɛɛtɩ a ‑nʋa 12

Lagɔ 'a 'Wugɔmʋʋ a 'nyupälɩɩ

‑Atʋayuënyɩ,

Lagɔ 'a 'Wugɔmʋʋ 'a 'nyupälɩɩ a wɛlɩɩ,

'mö n 'kanyɩa'aa dlɩ ‑gömö ‑sɛsɛnɩ 'tɩɩ,

a 'kɩa sasɛ ‑yi.

2 A'bhï a ‑yi sɛ nɩɩ,

dɛɛ a'a a‑a ‑bhlɛ Lagɔ 'a wɛlɩɩ ‑gänɩ a dɔ'wʋ,

zuzukuzokuu mɩɩ ‑sunanyɩ a‑a 'wlumö,

'n yɩ 'pänanyɩ a‑a 'fʋ a ‑lagwɩɩ ‑yɩɩ bhïlaa a bʋbɔbʋbʋ 'wʋ.

3 Nza n nyanyɩɛ gbëaa 'dɩ nɩɩ:

Nɩkpɛ,

'Wugɔmʋʋ 'Wlɩlɩ 'naa 'kɔ 'mö bhïlanɩ dɔ'wʋ ‑wʋ 'n ɔ 'kä nɩɩ:

«Zezwii,

‑bhätlɩnɩ ɔ ‑bhätlɩnɩɛ» nʋ.

'N Lagɔ 'a 'Wugɔmʋʋ mɔɔ 'nɩ'ɛ nɩkpɛ ‑gömö ‑wʋʋ,

ɔ 'naa 'kä nɩɩ:

«‑Alowli,

mɔɔ glɩnɩɛ Zezwii» nʋ.

4 'Nyupälɩɩ Lagɔ ghälaa ɔ ‑nʋa bhʋlʋbhlʋ 'wʋ wa 'kä 'ɔ libhoo nʋ a za‑a,

yɩ kii,

‑zu yɩ ‑zuä.

‑Maa 'ɔ 'Wugɔmʋʋ ‑bhʋlʋ ‑kpɔ 'mö yɩ 'bhöönɩɛ 'mö.

5 'Ɔ libhii wa nʋä,

‑zu yɩ ‑zuä.

‑Maa yɩ 'wuë,

‑Alowli ‑bhʋlʋ ‑kpɔ mɔɔ nyʋänyɩɛ.

6 Libhi 'la a nʋnʋsaa ‑zu a ‑zuä.

‑Maa Lagɔ,

ɔ ‑bhʋlʋ ‑kpɔ mɔɔ ‑wʋnyɩɛ ‑a 'wuë ‑gömö,

a‑a nwiɛ.

7 ‑A 'wuë,

bhʋlʋbhlʋ Lagɔ 'a 'Wugɔmʋʋ 'wälanɩɛ ‑mä ‑aa 'mö 'ɔ 'mötɛɛnɔɔ 'yli,

yɩ 'kä Lagɔgänɩwaa 'wuë a ‑li a ‑li 'mö ‑kä a za,

nza ɔ zʋä ‑sɩbhä.

8 ‑Mɔmɔɔ,

Lagɔ 'a 'Wugɔmʋʋ pɔ 'nɛɛnɩwɛlɩ dlɩ 'wʋ,

‑mɔmɔɔ Lagɔ 'a 'Wugɔmʋʋ slʋnɔ Lagɔ 'a wɛlɩɩ a zɛmö,

'n ɔ bhïliɛ.

9 Lagɔ 'a 'Wugɔmʋʋ ‑bhʋlʋ ‑kpɔ 'la,

mɔɔ kää 'nglɩ 'n ‑mɔmɔɔ 'tɛɛnɩɛ tenyii Lagɔ dlɩ.

Mɔɔ kä'ɛɛ 'nglɩ 'n ‑mɔmɔɔ yɛmanɩɛ ɔ 'mötɛɛnɔ 'mö guzuwa.

10 Mɔɔ pää ‑mɔmɔɔ 'nyu 'n ɔ bhɛɛ ɔ 'mötɛɛnɔ 'mö zɩzɛli.

Mɔɔ bhïlanɩɛ ‑mɔmɔɔ 'mö,

wɛlɩɩ ɔ kälɩnɔɔ kɛ 'klʋ ɔ 'kɩ nɩkpa 'nyɛ.

‑Mɔmɔɔ pa‑a 'nyu ɔ 'kä Lagɔ 'a 'Wugɔmʋʋ ‑nyɛ zuzukuzoku 'sɔ 'mö ‑yiyinɩ.

Mɔɔ pää ‑mɔmɔɔ 'nyu 'n ɔ 'nyɛnɩɛ ɔ 'bhɩa Lagɔgänɩwaa gbʋ ɔ'ɔɔ ‑yi 'mö 'dɩ.

Mɔɔ pää ‑mɔmɔɔ 'nyu 'n ɔ sɛnuëë gbʋ 'la zɛmö.

11 'Nyupälɩ 'la 'wuë,

Lagɔ 'a 'Wugɔmʋʋ ‑bhʋlʋ ‑kpɔ mɔɔ 'wälaniɛ 'kwädlɩ 'yli.

Sɛ ɔ yɩbhää,

‑sɩbhä ɔ dilaniɛ bhʋlʋbhlʋ.

Kpökpa yɔwʋ a nɩma ‑zu yɩ ‑zuä

12 ‑A 'wuë ‑a ‑yi sɛ nɩɩ nɩkpɛ a kpökpa,

‑tiamö abhlɩ,

a yɔwʋ a nɩma,

yɩ ‑zu,

‑maa ‑sɩbhä yɩ ‑wʋ 'mö,

kpökpa 'la,

‑bhlʋ a glɩnɩɛ,

a nɩma 'wuë,

'wʋ yɩ ‑glɛglɛnɩɛ.

‑A 'wuë ‑abhʋaa ‑glɛɛ Zezwii Kliisɩ 'wʋʋ,

sɛ ‑bhʋlʋ ‑kpɔ 'la,

‑sɩbhä ‑a glɩnɩɛ ‑bhlʋ.

13 ‑A 'wuë,

‑a yi Zwiiföwa glɩnɩ oo,

‑a 'nɩ Zwiiföwa glɩnɩ oo,

‑a yi göwa glɩnɩ oo,

‑a 'nɩ göwa glɩnɩ oo,

Lagɔ,

'ɔ 'Wugɔmʋʋ ‑bhʋlʋ ‑kpɔ 'mö ɔ wɔlʋnɩnyɩɛ 'mö 'wlu,

a‑a yiɛ kpökpa a sɛ ‑bhlʋ 'zʋ.

‑A 'wuë,

a‑a yiɛ 'Wugɔmʋ 'la ‑bhʋlʋ ‑kpɔ 'nɩmänɩmänyu a sɛ ghlɩ.

14 Nɩkpɛ a kpökpa,

nɩmɛ ‑bhlʋ a 'yize a'aa glɩnɩ,

‑maa nɩma a ‑bɛ a glɩnɩɛ.

15 'N kplea ‑kä a nɩɩ:

«N'n‑ä na a kätɩkpa glɩnɩ zaa,

n'n ‑bhö kpökpa yɔwʋ a nɩmɛ»,

a yɛ ‑sɩbhä nʋ a za a 'naa 'kɛ a bhäa'a glɩnɩ ‑a?

16 'N 'yukwli ‑kä a 'yɛ nɩɩ:

«N'n‑ä na a 'yli glɩnɩ zaa,

n'n ‑bhö kpökpa yɔwʋ a nɩmɛ»,

ɛ yɛ ‑sɩbhä nʋ a za ɛ 'naa 'kɛ a bhäa'a glɩnɩ ‑a?

17 Nɩkpɛ a kpökpaa,

'yli a 'yize a ‑kä a glɩnɩɩ,

sɛ ɔ 'kä a bhä 'zʋ ɔ 'kä ‑ngö 'nɩ?

'Yukwli a 'yize a ‑kä a 'yɛ glɩnɩɩ,

sɛ ɔ 'kä a bhä 'zʋ ɔ 'kä nglɛ 'mö ‑ngö 'nɩ?

18 Lagɔ ‑ɔ ‑bhɛɛ nɩkpɛ ‑ɔ glɔɔ ɔ yɔwʋ a nɩmaa 'wʋʋ,

'ɔ sɛ ɔ 'yɩbhää,

‑sɩbhä ɔ 'nyɩɛ bhʋlʋbhlʋ libhi.

19 Kpökpaa 'wuë nɩmɛ ‑bhlʋ a ‑kä a glɩnɩɩ,

wa 'naa 'ka a kpökpa la.

20 Kpökpa yɔwʋ a nɩma ‑zu yɩ ‑zuä,

‑sɩbhä yɩ ‑wʋ 'mö,

‑maa kpökpa ‑bhʋlʋ ‑kpɔ 'mö yɩ ‑glɛɛ 'wʋ.

21 ‑Sɩbhä a za 'yli 'naa 'kä kätɩkpaa 'dɩ 'nyɛ nɩɩ:

«‑N ‑nɩɩɛ dɛsɛ ‑kä.»

'Wukpëlea 'naa 'kä'ɛ kplɩɩ 'dɩ 'nyɛ nɩɩ:

«A ‑nɩɩɛ dɛsɛ ‑kä.»

22 Ɛ'ɛ ‑bhö ‑sɩbhä ma,

‑maa kpökpaa yɔwʋ a nɩma a ‑mii 'kä ‑bhɩɛɛ yɩ'ɩ dɛsɛ ‑kä a'bhëë,

yɩ kä tenyii dɛsɛ.

23 ‑Mi 'yli 'nɩ möä tenyii 'wʋ a'bhëë,

mö ‑a blɔɔ tenyii ‑mi'la 'wuë a dɔ'wʋ.

‑Mii ‑bhönyɩɛ zʋ 'wʋʋ,

mö ‑a 'zʋnɩɛ sasɛ 'yli.

24 ‑Mi 'yli möä tenyii 'wʋʋ,

‑sɩbhä ‑a 'niɛ 'zʋ.

‑A'a kpökpa yɔwʋ a nɩmaa 'wuë,

Lagɔ mɔɔ 'zwiɛ ‑lɛ.

‑Mi 'yli 'nɩ möä tenyii 'wʋʋ,

mɔɔ 'yɩbhää nɩɩ,

‑a nɩ 'zwi tenyii yɩ 'käa 'klʋkpamö ‑kämö.

25 Yɩ 'wuë a dɔ'wʋ,

‑mimii tɩa 'klʋkpamö ‑kä,

‑mimii tɩa 'ylimö ‑flanɩ,

nza Lagɔ 'zwiɛ ‑sɩbhä.

Nzɩɩ,

yɩ 'wuë sɛ yɩ ‑glɛglɛnɩɛ 'wʋ,

yɩ 'kä ‑sɩbhä 'yli 'zʋzʋnɩ.

26 Zaa,

kpökpa a nɩmɛ ‑bhlʋ ‑kä ‑gbapöö,

‑mi'la 'wuë 'klɩ yɩ 'yɩmöä.

'Yli ‑kä ‑bhlʋ 'wʋ möö,

‑mi'la 'wuë a ‑li a ‑li yɩ glɩnɩmöä.

27 ‑Atʋayuënyɩ,

abhʋa Zezwii Kliisɩ a ‑nʋa 'wuë,

abhʋaa glɩnɩɛ 'ɔ kpökpaa.

Zaa,

a 'wuë kpökpa yɔwʋ a nɩma a sɛ a ‑glɛmɔɔɔ 'wʋ.

28 Lagɔ a ‑nʋa 'wuë a ‑zɩkpa 'käda 'mö,

bhʋlʋbhlʋ ɔ nyɛɛ ‑mä nɩkpa 'bhli.

Tɛkädɔ'wʋ,

ɔ 'zʋa ‑mumuë ɔ tietiewa 'wʋ.

'Sɔnadɔ'wʋ,

ɔ 'zʋa ‑mumuë ɔ 'möbhïlanɩwa 'wʋ.

Tanadɔ'wʋ,

ɔ 'zʋ ‑lɛ ‑mumuë wa 'kä 'ɔ wɛlɩɩ a 'cɩawa glɩnɩ.

‑Mumuë pa‑a 'nyu wa 'kä zɩzɛli nʋ.

‑Mumuë pa‑a 'nyu wa 'kä guzuwa yɛmanɩ.

Ɔ 'pä ‑mumuë 'nyu wa 'kä nɩkpa kwänɩ.

Ɔ 'pä ‑mumuë 'nyu wa 'kä 'yukugänɩwa glɩnɩ.

‑Mumuë pa‑a 'nyu wa 'kä käbögbɩ wa'aa ‑yi 'mö bhïlanɩ.

29 Zaa,

wa 'wuë ‑sɩbhä wa'aa ‑lɛ sa‑a,

wa 'kä 'gämö ɔ tietiewa glɩnɩ,

‑sɩbhä wa'aa 'gämö Lagɔ a 'möbhïlanɩwa glɩnɩ,

‑sɩbhä wa'aa 'gämö 'ɔ wɛlɩɩ a 'cɩawa glɩnɩ.

‑Sɩbhä wa'aa 'gämö zɩzɛli nʋnɩ.

30 ‑Sɩbhä wa'aa 'gämö 'nyu pa‑a,

wa 'kä guzuwa yɛmanɩ.

‑Sɩbhä wa'aa 'gämö käbögbɩ wa'aa ‑yi 'mö bhïlanɩ.

‑Sɩbhä wa'aa 'gämö gbɩ 'la zɛmö ‑sɛ.

31 ‑Atʋayuënyɩ,

Lagɔ 'a 'Wugɔmʋʋ 'a 'nyupälɩɩ ‑yɩ kää tenyii dɛsɛ 'mö a nɩ tɛlɩ sɛ.

Miɛ abhlɩ,

‑maa sɛ a kää a 'kä nɛmö sɛɛ nɛnɩɛ tenyii,

‑sɩbhä n 'kanyɩa'aa sʋlʋnɩ.